Read Iu Mien Ye^le^mi 6 Bible Online

Ye^le^mi 6 - Iu Mien bible

Ye^le^mi 6

¹“Mben^yaa^min Mienh aah! Biaux mingh weic biaux ndutv. Biaux cuotv Ye^lu^saa^lem. Yiem Te^ko^aa biomv jorng. Cie jangx-hoc nyei geh yiem Mbetc Hakv^ke^lem, weic zuqc maaih domh zeqc naanc yiem baqv bung daaih, yaac maaih baaic waaic nyei domh sic.

²Nzueic haic nyei fioux-zoih sieqv, Si^on, yie oix mietc nzengc.

³Goux ba'gi yungh nyei mienh caux ninh mbuo nyei ba'gi yungh guanh oix daaih mborqv ninh. Ninh mbuo oix corng ninh mbuo nyei ndopv-liuh weih gormx ninh, gorqv-mienh ziouc yiem gorqv-mienh nyei dorngx bungx yungh.

⁴“Oix zuqc liuc leiz ziangx caux ninh mborqv jaax. Jiez daaih maah! Mbuo lungh aanx nyei ziangh hoc mingh mborqv. Mbuo zuqc kouv aqv, weic zuqc lungh hnoi nyei njang jiex jienv mingh, lungh maanz-hmuangx nyei dongh linh gunv zoux gunv ndaauv aqv.

⁵Jiez daaih maah! Mbuo lungh muonz zanc mingh mborqv, mietc nzengc zingh nyei hungh dinc.”[31]

⁶Nernh Jiex nyei ZIOUV hnangv naaiv gorngv, “Oix zuqc goix wuov norm zingh nyei ndiangx, ndui nie weih gormx[32] mborqv Ye^lu^saa^lem. Naaiv se horpc zuqc dingc zuiz nyei zingh. Yiem zingh gu'nyuoz kungx maaih zeix mienh nyei sic hnangv.

⁷Hnangv wuom-kuotv maiv dingh nyei cuotv wuom-nzang, naaiv norm zingh maiv dingh nyei cuotv orqv sic. Zanc-zanc maaih zoux doqc, baaic waaic nyei sic yiem zingh gu'nyuoz, zuqc baengc, zuqc mun nyei jauv zanc-zanc yiem yie nyei nza'hmien.

⁸Ye^lu^saa^lem aah! Oix zuqc muangx meih zuqc njaaux nyei waac, nziex yie nyei hnyouv youx meih, nziex yie bun meih benx baaic waaic nyei dorngx, maiv maaih mienh yiem nyei deic-bung.”

⁹Nernh Jiex nyei ZIOUV hnangv naaiv gorngv, “Ninh mbuo oix guaatv nzengc zengc njiec nyei I^saa^laa^en mienh, hnangv gaeqv liuz aengx gaeqv zengc njiec nyei a'ngunc biouv. Hnangv gaeqv a'ngunc biouv nyei mienh nyei buoz aengx hlutv gan jienv a'ngunc nquaah mingh.”

¹⁰Yie oix zuqc caux haaix dauh gorngv yaac kuinx ninh mbuo cingx daaih oix muangx? Ninh mbuo nyei m'normh zietc mi'aqv,[33] ninh mbuo ziouc maiv haih muangx. Mangc maah! ZIOUV nyei waac, benx ninh mbuo huotv nyei ga'naaiv, ninh mbuo yaac maiv a'hneiv muangx.

¹¹Weic naaiv yie qiex jiez hnangv ZIOUV nor, zungv haiz nyienz maiv jienv. “Oix zuqc dox njiec yiem jaai-horngc nyei fu'jueiv caux gapv zunv nyei mienh lunx mienh. Liemh auv liemh nqox yaac oix zuqc dorh mingh, caux jienv hnyangx-jeiv hlang caux mienh gox mienh.”

¹²Ninh mbuo nyei biauv, lingh deic caux auv zungv zuqc zorqv bun ganh dauh, weic zuqc yie oix sung yie nyei buoz zoux bun yiem deic-bung nyei baeqc fingx.” Naaiv se ZIOUV gorngv nyei waac.

¹³“Yiem zoux faix jiex nyei taux zoux hlo jiex nyei mienh, dauh dauh mauv oix duqv maiv baengh fim nyei leic zinh. Yiem douc waac mienh taux sai mienh, dauh dauh kungx zoux jaav sic hnangv.

¹⁴Ninh mbuo zorc yie nyei baeqc fingx mun nyei dorngx hnangv maiv zeiz mun camv nor. Ninh mbuo gorngv, ‘Baengh orn aqv, baengh orn aqv’ maiv gunv maiv maaih baengh orn.

¹⁵Ninh mbuo zoux gamh nziev nyei sic, ninh mbuo hiuv duqv nyaiv fai? Maiv zeiz. Ninh mbuo yietc deix yaac maiv nyaiv. Ninh mbuo maiv hiuv duqv hnangv haaix nor zuqc baaic hmien.[34] Weic naaiv ninh mbuo oix zuqc king njiec yiem king njiec nyei mienh mbu'ndongx. Yie dingc ninh mbuo nyei zuiz nyei ziangh hoc ninh mbuo ziouc zuqc mietc[35] aqv.” Naaiv se ZIOUV gorngv nyei waac.

¹⁶ZIOUV hnangv naaiv nor gorngv, “Meih mbuo oix zuqc souv jienv jauv longx-longx nyei samx mangc. Naaic taux wuov deix loz-hnoi nyei jauv. Naaic gaax wuov diuh longx nyei jauv yiem haaix yaac gan wuov diuh jauv yangh. Meih mbuo nyei hnyouv ziouc lorz duqv baengh orn. Mv baac ninh mbuo gorngv, ‘Yie mbuo maiv yangh wuov diuh jauv.’

¹⁷Yie paaiv deix siouv gaeng mienh goux meih mbuo yaac gorngv, ‘Oix zuqc muangx jorng nyei qiex.’ Mv baac ninh mbuo gorngv, ‘Yie mbuo maiv muangx.’

¹⁸Maanc guoqv mienh aah! Weic naaiv oix zuqc muangx. Meih mbuo gapv zunv nyei mienh aah! Oix zuqc hiuv duqv ninh mbuo oix buangh nyei sic.

¹⁹Ndau aac, muangx maah! Yie oix bun naaiv deix baeqc fingx zuqc ciouv nyei zeqc naanc, laaix ninh mbuo ei ninh mbuo daav guv guaix nyei za'eix, weic zuqc ninh mbuo maiv muangx yie nyei waac. Yie nyei leiz-latc aeqv, ninh mbuo yaac nqemh.

²⁰Yiem Qe^mbaa daaih nyei hung[36] fai yiem go nyei deic-bung dorh daaih nyei laapc liuc[37] fungx bun yie weic haaix nyungc eix leiz? Meih mbuo buov ziec nyei ga'naaiv yie maiv haih zipv, meih mbuo ziec nyei ga'naaiv maiv horpc yie nyei hnyouv.”

²¹Weic naaiv ZIOUV hnangv naaiv gorngv, “Yie oix zorqv ga'naaiv an jienv naaiv deix baeqc fingx nyei nza'hmien bun ninh mbuo ndiqv zuqc ndorpc. Liemh die liemh dorn fih hnangv nyei caux jienv juangc laangz mienh caux loz-gaeng doic oix zuqc mietc.”

²²ZIOUV hnangv naaiv gorngv, “Mangc maah! Maaih yietc fingx yiem baqv bung guoqv daaih, benx yietc domh guoqv mienh yiem lungh ndiev go jiex nyei dorngx zuqc coqv jiez daaih.

²³Ninh mbuo nanv juang-zinx caux cang, ninh mbuo youc ciouv youc doqc, maiv korv-lienh mienh. Ninh mbuo nyei qiex mbui hnangv koiv jiez laangc mbui zoz zoz nyei. Ninh mbuo geh maaz, mbaih jienv daaih mborqv jaax, weic mborqv meih, Si^on Zingh.”[38]

²⁴Yie mbuo muangx haiz ninh mbuo nyei fienx hnangv, yie mbuo nyei buoz mau nzengc mi'aqv. Yie mbuo hnyouv za'gengh! mun haic, hnangv m'sieqv dorn mun gu'nguaaz kouv nor.

²⁵Maiv dungx cuotv mingh wuov ndeic fai gan jauv yangh, weic zuqc win-wangv maaih nzuqc ndaauv, yaac maaih gamh nziex haic nyei sic weih gormx.

²⁶Yie nyei baeqc fingx aah![39] Oix zuqc sai jienv la'maah ndie-cou, yaac njangx jienv saaiv gu'nyuoz.[40] Oix zuqc hnyouv mun nyei nyiemv hnangv nyiemv ganh nyei ndoqc dorn nor, weic zuqc zoux mietc wuov dauh oix liemh zeih taux mbuo.

²⁷“Yie bun meih yiem yie nyei baeqc fingx mbu'ndongx seix yaac kauv ninh mbuo weic bun meih hiuv yaac seix duqv cuotv ninh mbuo nyei jauv-louc.

²⁸Ninh mbuo yietc zungv hnyouv ngaengc nyei faanv lunc, jiex naaiv jiex wuov gorngv waac-huv. Ninh mbuo hnangv dongh siqv, hnangv hlieqv, ninh mbuo yietc zungv zoux waaic sic.

²⁹Louh cui duqv seix haic, jungz zuqc douz buov qui. Sinx jienv mingh yaac maiv lamh longc weic zuqc maiv duqv zorqv orqv mienh cuotv.

³⁰Ninh mbuo zuqc heuc benx nyaanh nqaiv, weic zuqc ZIOUV nqemh ninh mbuo.