Read Iu Mien Naanc Zingh Nzung 3 Bible Online

Naanc Zingh Nzung 3 - Iu Mien bible

Naanc Zingh Nzung 3

¹[20] Yie se yietc dauh zuqc jiex kouv naanc nyei mienh, se zuqc Tin-Hungh qiex jiez mborqv.

²Ninh zunc yie mingh yaac bun yie yangh hmuangx nyei dorngx, maiv maaih njang.

³Ninh zungv ziangh hnoi mborqv yie yietc nzunc jiex yietc nzunc yaac maiv korv-lienh.

⁴Ninh bun yie nyei ndopv caux orv soqv yaac wuotv yie nyei mbungv nauv.

⁵Ninh bun yie zuqc kouv haic nyei naanc zingh weih jienv yie hnangv laatc nor.

⁶Ninh hoic yie yiem hmuangx nyei dorngx hnangv daic mingh lauh nyei mienh nor.

⁷Ninh zoux laatc weih jienv yie, bun yie biaux maiv ndutv. Ninh longc limc hniev nyei ndoh jienv yie.

⁸Maiv gunv yie heuc jienv tov tengx, ninh maiv muangx yie daux gaux nyei waac.

⁹Ninh longc zuqc daaih nyei la'bieiv dangv jienv yie nyei jauv, yaac bun yie nyei jauv njuotv mingh.

¹⁰Ninh se hnangv dauh jiepv zuov jienv maeqv yie, yaac hnangv sienh bingx jienv yiem mbueiz nyei dorngx.

¹¹Ninh tor yie cuotv yie nyei jauv yaac betv yie benx ziex deix ziex deix, bun yie zuqc guangc huaang.

¹²Ninh baeng ninh nyei juang-zinx, zorqv yie benx mbaeqc zuqc ninh nyei forng buonv.

¹³Ninh baeng forng yiem ninh nyei forng-ndongh cuotv, buonv bieqc yie nyei hnyouv gu'nyuoz.

¹⁴Yie benx zuangx fingx mienh[21] jatv nyei ga'naaiv, ninh mbuo ziangh hnoi zorqv yie benx nzung baaux.

¹⁵Ninh bun yie zuqc kouv naanc hnangv nyanc im nyei ga'naaiv beuv, bun yie kouv taux ndiev hnangv hopv yangh meuz zungx.

¹⁶Ninh longc la'bieiv bun yie nyei nyaah nauv,[22] bun yie gamh nziex jienv mbaapv njiec saaiv-ndui.

¹⁷Yie nyei hnyouv maiv maaih yietc deix baengh orn, yie zungv la'kuqv orn-lorqc nyei jauv hnangv haaix nor.

¹⁸Yie ziouc gorngv, “Yie nyei qaqv[23] zitc nzengc. Yie kaux ZIOUV maaih lamh hnamv nyei yaac maiv maaih aqv.”

¹⁹Tov jangx yie zuqc kouv caux yie zuqc nyei naanc zingh,[24] hnangv yangh meuz caux jiepv-daamv im.

²⁰Yie nyei hnyouv zanc-zanc jangx jienv, yie nyei hnyouv yaac nzauh jienv yiem.

²¹Mv baac yie jangx zuqc naaiv deix sic, yie ziouc maaih lamh hnamv dorngx.

²²ZIOUV maiv dingh liouh ziepc zuoqv nyei hnamv mienh. Ninh korv-lienh mienh nyei hnyouv yietc liuz maiv dangx.

²³Ndorm-ndorm zungv siang nyei. Meih za'gengh! ziepc zuoqv haic.

²⁴Yie nyei hnyouv gorngv, “ZIOUV se yie nyei buonc. Weic naaiv yie kaux ninh maaih lamh hnamv.”

²⁵ZIOUV zoux longx bun kaux[25] ninh, maaih hnyouv lorz ninh wuov deix mienh.

²⁶Mienh sekv nzieqc nyei zuov jienv ZIOUV nyei njoux en se longx haic.

²⁷Mienh hnyangx-jeiv lunx nyei ziangh hoc hoqc linc maaih noic[26] se longx nyei.

²⁸Ninh zuqc kouv naanc[27] nyei ziangh hoc, bun ninh ganh nduqc dauh zueiz jienv sekv-sekv nyei yiem wuov.

²⁹Bun ninh ndoqv m'nqorngv nyiemc ganh zoux faix,[28] nziex corc maaih lamh hnamv.

³⁰Bun ninh huin hmien sueih mienh mbaix, bun ninh zuqc diev nyaiv taux daauh.

³¹Weic zuqc Ziouv maiv yietc liuz guangc mienh.

³²Maiv gunv Ziouv bun mienh zuqc nzauh, ziux ninh ziepc zuoqv nyei hnamv mienh, ninh zungv oix korv-lienh.

³³Weic zuqc ninh maiv zeiz a'hneiv bun mienh zuqc kouv fai zuqc nzauh nyei sic.

³⁴Lungh ndiev yietc zungv wuonx loh nyei mienh zuqc caaiv njiec zaux-ndiev,

³⁵fai dorng jienv Yiem Hlang Jiex Wuov Dauh nyei nza'hmien, mienh maiv duqv horpc zuqc duqv nyei leiz,

³⁶fai yiem sic-dorngh dunx sic maiv zingx, Ziouv maiv horpc hnyouv aqv.

³⁷Cuotv liuz Ziouv dingc, haaix dauh gorngv haaix nyungc ziouc cuotv hnangv wuov nyungc fai?

³⁸Longx nyei caux ciouv nyei maiv zeiz yiem Hlang Jiex Wuov Dauh nyei nzuih cuotv fai?

³⁹Ziangh jienv nyei baamh mienh weic ganh zoux nyei sic zuqc dingc zuiz fungc oix zuqc ngopv?

⁴⁰Mbuo oix zuqc zaah mangc yaac seix mbuo zoux nyei jauv aengx nzuonx daaih lorz ZIOUV.

⁴¹Mbuo oix zuqc koi nqoi hnyouv, sung jienv buoz hungx jienv yiem lungh zaangc nyei Tin-Hungh daux gaux.

⁴²“Yie mbuo baamz zuiz ngaengc meih, meih zungv maiv guangc yie mbuo nyei zuiz.

⁴³“Meih za'gengh qiex jiez jienv zunc yie mbuo, meih daix yie mbuo yaac maiv korv-lienh.

⁴⁴Meih longc mbuonx-jieqv om jienv ganh, bun yie mbuo daux gaux nyei waac faaux maiv tong.

⁴⁵Meih bun yie mbuo zuqc yiem maanc fingx mbu'ndongx, benx la'fapv caux guangc nyei ga'naaiv.

⁴⁶“Yie mbuo nyei yietc zungv win-wangv, morngx nqoi ninh mbuo nyei nzuih gorngv yie mbuo.

⁴⁷Yie mbuo zuqc haeqv gamh nziex, zuqc ndortv njiec zaeng mienh nyei kuotv, zuqc baaic, zuqc mietc.”

⁴⁸Yie nyei m'zing liouc wuom-mueic hnangv ndoqv nor, laaix yie nyei juangc fingx mienh zuqc mietc.

⁴⁹Yie nyei m'zing zanc-zanc liouc wuom-mueic, maiv maaih ziangh hoc dingh,

⁵⁰zuov jienv ZIOUV yiem gu'nguaaic lungh mangc njiec ziouc buatc.

⁵¹Yie buatc yie nyei buonv-zingh nyei zuangx m'sieqv dorn[29] buangh nyei sic, yie haiz hnyouv mun haic.

⁵²Zoux yie nyei win-wangv yaac maiv maaih gorn-baengx wuov deix, qaqv zunc yie hnangv zunc norqc nor.

⁵³Ninh mbuo zorqv yie liemh nangh zoi njiec kuotv, aengx zorqv la'bieiv zoi njiec ngatv jienv yie.[30]

⁵⁴Wuom yiemx jiex yie nyei m'nqorngv. Yie gorngv, “Yie daic aav loh!”

⁵⁵O ZIOUV aac, yie yiem kuotv ndo nyei dorngx heuc meih nyei mbuox.

⁵⁶Meih haiz yie jouh nyei qiex, “Tov maiv dungx buang m'normh maiv muangx yie heuc jienv tov meih tengx nyei waac.”

⁵⁷Yie heuc meih wuov zanc meih daaih nitv fatv yie. Meih gorngv, “Maiv dungx gamh nziex.”

⁵⁸O Ziouv aac, meih zungv daaih tengx yie caengx sic, yaac zuoqc yie nyei maengc.

⁵⁹O ZIOUV aac, meih buatc liuz yie zuqc mienh zoux dorngc yie nyei sic. Tov tengx siemv dingc yie maiv maaih zuiz.

⁶⁰Meih buatc win-wangv maaih hnyouv oix jaauv win bun yie,[31] yaac hiuv duqv ninh mbuo daav daaih hoic yie nyei yietc zungv za'eix.

⁶¹O ZIOUV aac, meih haiz ninh mbuo huotv yie nyei waac, yaac haiz ninh mbuo daav daaih hoic yie nyei yietc zungv za'eix.

⁶²Oix hoic yie wuov deix mienh nyei nzuih gorngv nyei waac caux ninh mbuo hnamv cuotv nyei jauv, ziangh hnoi caux yie doix-dekc.

⁶³Mangc maah! Maiv gunv ninh mbuo zueiz fai jiez sin, ninh mbuo dorh yie zoux nzung baaux.

⁶⁴O ZIOUV aac, meih oix ziux ninh mbuo nyei buoz zoux nyei gong winh bun ninh mbuo.

⁶⁵Meih oix bun ninh mbuo nyei hnyouv ngaengc, bun ninh mbuo zuqc meih zioux.

⁶⁶O ZIOUV aac, meih oix qiex jiez jienv zunc ninh mbuo, maiv bun ninh mbuo yiem meih nyei lungh ndiev.