Read Iu Mien Naanc Zingh Nzung 4 Bible Online

Naanc Zingh Nzung 4 - Iu Mien bible

Naanc Zingh Nzung 4

¹[32] Jiem nyei njang zitc mi'aqv. Zien jiem yaac tuix setv. Zoux singx dinc nyei la'bieiv[33] faatv nzaanx yiem diuh diuh jaai-horngc nyei jauv-kuv.

²Si^on jaaix haic nyei houh saeng ndongc zien jiem jaaix. Ih zanc funx ninh mbuo nyei jaax-zinh ndongc nanv nie-mor zaangc nyei buoz nanv nyei nie-mor.

³Liemh hieh juv bun nyorx ninh mbuo nyei dorn hopv, mv baac yie nyei baeqc fingx nyei m'sieqv dorn ih zanc doqc haic, hnangv deic-bung-huaang nyei norqc lorh torh nor.[34]

⁴Hopv nyorx nyei gu'nguaaz nyei mbietc nqaai, zungv naetv jienv nzuih dungz. Fu'jueiv tov ga'naaiv nyanc, mv baac maiv maaih haaix dauh bun ninh mbuo.

⁵Nyanc guenx kuv nyei ga'naaiv wuov deix, yiem wuov jaai-horngc ngorc daic mi'aqv. Zuqv ciouh dunc[35] hlo daaih nyei mienh, ih zanc bueix wuov la'fapv-ndui.

⁶Yie nyei baeqc fingx zuqc dingc zuiz, zungv gauh hniev So^ndom zuqc dingc nyei. Ndongc nziepv dangh m'zing So^ndom zuqc mietc nzengc, yaac maiv maaih mienh nyei buoz muoqv.

⁷Si^on zoux hlo nyei mienh[36] gauh cing-nzengc sorng, yaac gauh baeqc jiex nyorx. Ninh mbuo nyei sin gauh siqv koiv-ndiev nyei la'bieiv-siqv, ninh mbuo nyei fangx zeiv nzueic ndongc la'bieiv-jaaix mbuov nyei.

⁸Ih zanc ninh mbuo nyei hmien gauh jieqv douz-miec. Yiem jaai-horngc mienh zieqv maiv duqv ninh mbuo. Ninh mbuo nyei ndopv soqv naetv jienv mbungv, kou nqaai hnangv ndiangx nor.

⁹Zuqc nzuqc ndaauv daix nyei mienh zungv duqv gauh longx ngorc daic nyei mienh, weic zuqc ngorc daic wuov deix gunv zoux gunv jaic njiec taux daic, laaix maiv duqv lingh deic nyei gaeng-zuangx nyanc.

¹⁰Yie nyei baeqc fingx zuqc mietc nyei ziangh hoc, maaih hnyouv korv-lienh mienh wuov deix m'sieqv dorn, zungv zorqv ganh nyei fu'jueiv daaih zouv weic benx ninh mbuo nyei nyanc hopv.

¹¹ZIOUV za'gengh qiex jiez taux daauh, ga'qiex ziouc baetv cuotv hnangv douz nor jorm. Ninh yiem Si^on bun douz njopc daaih, buov qui zingh nyei gorn-ndoqv.

¹²Yiem ndau-beih nyei hungh diex, fai yiem lungh ndiev nyei maanc mienh, maiv sienx haaix dauh win-wangv fai win-jaa haih duqv bieqc Ye^lu^saa^lem nyei zingh gaengh.

¹³Naaiv se laaix Si^on nyei douc waac mienh nyei zuiz, yaac laaix ninh nyei sai mienh zoux nyei zuiz. Ninh mbuo yiem zingh gu'nyuoz bun kuv mienh nyei nziaamv liouc cuotv.

¹⁴Ninh mbuo hnangv m'zing maengh nyei mienh huaax jienv gan jaai-horngc mingh. Ninh mbuo zuqc nziaamv guoqv jienv maaih uix, mienh zungv maiv haih muoqv ninh mbuo nyei lui-houx.

¹⁵Mienh dorng jienv ninh mbuo nauc jienv gorngv, “Simv nqoi, simv nqoi, maaih uix nyei. Simv nqoi, simv nqoi, maiv dungx kuatv zuqc yie.” Ninh mbuo ziouc biaux aengx youh jienv mingh. Yiem maanc fingx mbu'ndongx maaih mienh gorngv, “Ninh mbuo maiv duqv aengx caux mbuo yiem naaiv aqv.”

¹⁶ZIOUV ganh zoux bun ninh mbuo faatv nzaanx nzengc. Yiem naaiv mingh ninh maiv mangc ninh mbuo aqv. Mienh maiv taaih sai mienh, yaac maiv korv-lienh mienh gox.

¹⁷Yie mbuo nyei m'zing qaqv mangc zuov mienh daaih tengx, mangc gau, m'zing zungv maiv njang aqv. Zuov nyei ziangh hoc yie mbuo zuov jienv yietc norm maiv haih njoux maiv duqv mienh nyei guoqv.

¹⁸Mienh zunc yie mbuo nyei zaux-mbiec mingh, yie mbuo ziouc maiv haih yangh yie mbuo nyei jaai-horngc mingh. Yie mbuo nqa'haav laai nyei ziangh hoc taux fatv, yie mbuo nyei hnoi-nyieqc buangv aqv, weic zuqc yie mbuo setv mueiz nyei ziangh hoc taux.

¹⁹Zunc yie mbuo nyei mienh gauh siepv yiem lungh nyei domh jaangv. Ninh mbuo yiem mbong zunc yie mbuo, yiem deic-bung-huaang bingx jienv zuov yie mbuo.

²⁰ZIOUV orn daaih wuov dauh se hnangv mbuo nyei mba'zorng nyei qiex. Ninh yaac zuqc ndortv ninh mbuo zaeng hlaang nyei kuotv. Yie mbuo gorngv taux ninh, “Yiem ninh nyei dongh linh ga'ndiev, yie mbuo duqv yiem maanc guoqv mbu'ndongx.”

²¹Yiem Utc Deic nyei E^ndom Mienh[37] aah! Gunv njien-youh orn-lorqc aqv. Kouv nyei jauv[38] yaac oix jiex taux meih mbuo naaic. Meih mbuo ziouc hopv nquin, jaiv nzengc lui-houx, laengh gaengv nyei yiem.

²²O Si^on Zingh nyei mienh[39] aac, meih mbuo zuqc dingc zuiz nyei soux mouc buangv mi'aqv. Ziouv maiv bun meih mbuo aengx zuqc guaatv mingh.[40] Mv baac E^ndom Mienh aah! Ziouv oix dingc meih mbuo nyei zuiz. Oix bun meih zoux nyei zuiz cuotv daaih nqaengc nyei.