Read Iu Mien E^se^ken 47 Bible Online

E^se^ken 47 - Iu Mien bible

E^se^ken 47

¹Wuov laanh mienh aengx dorh yie nzuonx taux zaangc Tin-Hungh nyei biauv nyei gaengh ndaangc. Yie buatc gaengh ga'ndiev maaih wuom liouc cuotv mingh dong bung (weic zuqc zaangc Tin-Hungh nyei biauv huin dong bung). Naaiv deix wuom yiem zaangc Tin-Hungh nyei biauv nyei gaengh ndaangc ga'ndiev liouc cuotv naamh bung, ziec-dorngh nyei naamh bung ga'hlen.

²Ninh aengx dorh yie cuotv baqv bung nyei gaengh, dorh yie yiem ga'nyiec maengx huing mingh taux huin mingh dong bung ga'nyiec wuov kang gaengh. Buatc wuom yiem naamh bung liouc cuotv.

³Wuov laanh mienh nanv jienv ndorqc nyei hlaang yangh dong bung mingh ndorqc yietc cin ndorqc. Ninh dorh yie yangh wuom mingh. Wuom mbaengc zaux-mueic hnangv.

⁴Ninh aengx ndorqc yietc cin ndorqc yaac bun yie yangh wuom mingh. Wuom ndo taux cingh mborqc. Ninh aengx ndorqc yietc cin ndorqc yaac bun yie yangh wuom mingh. Wuom ziouc mbaengc jaaiv.

⁵Ninh aengx ndorqc yietc cin ndorqc, wuom ziouc benx ndoqv mi'aqv. Yangh jiex maiv duqv weic zuqc wuom faaux taux ndo gaux haih ziouh duqv aqv.

⁶Ninh gorngv mbuox yie, “Baamh mienh aah! Meih buatc naaiv fai?” Ninh aengx dorh yie gan ndoqv-hlen nzuonx.

⁷Nzuonx nyei ziangh hoc yie buatc i bung ndoqv-hlen, naaiv bung caux wuov bung, maaih ndiangx camv haic.

⁸Ninh gorngv mbuox yie, “Naaiv deix wuom liouc hungx jienv dong bung nyei ndau mingh taux Aa^laa^mbaa,[225] aengx njiec mingh bieqc Koiv.[226] Wuov deix wuom liouc bieqc koiv, wuom-nzaaih ziouc tiuv benx wuom-zaamv.

⁹Naaiv diuh ndoqv liouc mingh taux haaix, maaih maengc nyei ga'naaiv gapv zunv yiem wuov camv nyei, yaac maaih mbiauz camv nyei. Weic zuqc naaiv deix wuom liouc njiec naaiv, koiv nyei wuom ziouc zaamv mingh. Hnangv naaic, ndoqv mingh taux haaix, nyungc-nyungc ziouc maaih maengc aqv.

¹⁰Maaih borngz mbiauz mienh souv wuov koiv-hlen. Yiem En Ge^ndi mingh taux En Ekc^laa^im ziouc maaih pui mungz nyei dorngx. Maaih ziex! ziex nyungc mbiauz, ndongc yiem Domh Koiv[227] nyei mbiauz.

¹¹Mv baac wuom-njaangh caux ndorngh nyei dorngx maiv haih zaamv. Oix zuqc guangc jienv wuov benx nzauv.

¹²Yiem i bung ndoqv-hlen maaih nyungc-nyungc ndiangx nyei biouv weic zoux nyanc hopv. Normh yaac maiv nqaai, biouv yaac maiv dangx. Hlaax-hlaax cuotv siang-biouv weic zuqc yungz naaiv deix ndiangx nyei wuom yiem singx dinc liouc cuotv daaih. Ndiangx nyei biouv longc benx nyanc nyei ga'naaiv. Ndiangx nyei normh longc zoux ndie.”

¹³Ziouv TIN-HUNGH hnangv naaiv gorngv, “Naaiv se meih mbuo oix zuqc ziux ndau nyei gapv-jaaix paaiv bun nqoi benx ziepc nyeic fingx I^saa^laa^en Mienh nzipc nyei buonc. Yosepv duqv i gouv.

¹⁴Oix zuqc bun fih mbuoqc nyei. Yie houv jienv zorqv naaiv deix ndau bun meih mbuo nyei ong-taaix. Naaiv deix ndau ziouc benx meih mbuo nzipc nyei buonc.

¹⁵“Naaiv se deic-bung nyei gapv-jaaix. “Baqv bung nyei gapv-jaaix yiem Domh Koiv mingh Hetv^lon Zingh nyei jauv jiex Haamatv nyei jauv-kuv aengx jiex mingh taux Se^ndatc,

¹⁶Mbe^lo^taa, Sipc^laa^im (se yiem Ndaa^matv^gatc caux Haamatv mbu'ndongx nyei gapv-jaaix), mingh taux yiem Haulaan nyei gapv-jaaix, Haase Hatv^ti^kon wuov norm dorngx.

¹⁷Hnangv naaic baqv bung nyei gapv-jaaix yiem koiv mingh taux Haasaa Enon, gan Ndaa^matv^gatc baqv bung nyei gapv-jaaix yaac maaih Haamatv nyei gapv-jaaix yiem baqv bung. Naaiv se baqv bung maengx nyei gapv-jaaix.

¹⁸“Dong bung nyei gapv-jaaix yiem Haulaan caux Ndaa^matv^gatc, yiem Gi^le^aatc caux I^saa^laa^en mbu'ndongx, se gan Jor^ndaen Ndaaih mingh taux dong bung nyei koiv aengx jiex mingh taux Taamaa. Naaiv se dong bung nyei gapv-jaaix.

¹⁹“Naamh bung nyei gapv-jaaix yiem Taamaa mingh taux Me^li^mbatc Kaa^ndetc nyei wuom, gan I^yipv nyei Ndoqv-dorn mingh taux Domh Koiv. Naaiv se naamh bung nyei gapv-jaaix.

²⁰“Fai bung maaih Domh Koiv zoux gapv-jaaix mingh taux bieqc Haamatv nyei jauv doix-ngaanc nyei dorngx. Naaiv se fai bung nyei gapv-jaaix.

²¹“Meih mbuo oix zuqc ziux I^saa^laa^en nyei fingx paaiv naaiv deix ndau.

²²Naaiv deix ndau oix zuqc paaiv bun nqoi benx meih mbuo ganh nzipc nyei buonc caux yiem meih mbuo mbu'ndongx nyei ganh fingx mienh, se dongh yiem meih mbuo mbu'ndongx duqv fu'jueiv fun-faqv nyei mienh duqv nzipc nyei buonc. Meih mbuo oix zuqc funx ninh mbuo hnangv yiem I^saa^laa^en mbu'ndongx cuotv seix nyei mienh. Oix zuqc bun ninh mbuo yiem I^saa^laa^en Fingx gu'nyuoz duqv caux jienv meih mbuo nzipc ninh mbuo nyei buonc.

²³Ganh fingx mienh yiem meih mbuo haaix fingx mienh mbu'ndongx, yiem wuov meih mbuo oix zuqc paaiv ndau bun ninh mbuo nzipc.” Naaiv se Ziouv TIN-HUNGH gorngv nyei waac.