Read Iu Mien Ndaa^ni^en 2 Bible Online

Ndaa^ni^en 2 - Iu Mien bible

Ndaa^ni^en 2

¹Yiem Ne^mbu^katv^netv^saa zoux hungh gunv da'nyeic hnyangx wuov hnyangx, ninh mbeix norm mbeix, haiz hnyouv maiv henh, bueix maiv njormh.

²Hungh diex ziouc paaiv mienh mingh heuc yietc zungv zoux huaax-nyinz, zoux faatv, mangc maengc caux samx hleix nyei mienh[5] daaih, oix ninh mbuo gorngv ninh nyei mbeix bun ninh muangx. Ninh mbuo daaih souv jienv hungh diex nyei nza'hmien wuov zanc,

³hungh diex mbuox ninh mbuo, “Yie mbeix norm mbeix. Mbeix liuz, haiz hnyouv maiv henh, oix hiuv duqv naaiv norm mbeix nyei eix leiz.”

⁴Samx hleix nyei mienh ziouc longc Aalam waac dau hungh diex,[6] “O hungh diex aac, ziangh duqv maanc fuix aqv. Tov gorngv meih nyei mbeix bun yie mbuo, meih nyei bou muangx, yie mbuo ziouc porv meih nyei mbeix.”

⁵Hungh diex dau naaiv deix samx hleix mienh,[7] “Yie zungv dingc hnyouv, se gorngv meih mbuo maiv gorngv yie mbeix nyei mbeix aengx porv bun yie muangx nor, yie ziouc betv meih mbuo zoux biei juoqv. Meih mbuo nyei biauv yaac oix zuqc baaic waaic nzengc.

⁶Se gorngv meih mbuo haih gorngv yie nyei mbeix aengx porv mbeix nyei eix leiz mbuox yie, meih mbuo ziouc duqv ga'naaiv, duqv zingh nyeic yaac duqv mengh dauh hlo. Hnangv naaic, gunv gorngv yie nyei mbeix caux mbeix nyei eix leiz bun yie muangx maah!”

⁷Wuov deix mienh aengx gorngv da'nyeic nzunc, “Tov hungh diex gorngv mbeix mbuox yie mbuo, meih nyei bou, yie mbuo ziouc tengx hungh diex porv mbeix oc.”

⁸Hungh diex ziouc dau, “Yie zungv hiuv duqv meih mbuo duqv-eix tor ziangh hoc weic zuqc meih mbuo hiuv duqv yie nyei waac dingc mi'aqv.

⁹Se gorngv meih mbuo maiv gorngv mbeix mbuox yie, yie ziouc hiuv duqv kungx maaih nduqc nyungc zoux bun meih mbuo hnangv. Meih mbuo dongh hnyouv caangh laangh gorngv waac maiv zien nduov yie, zuov ziangh hoc nziex haih maaih haaix nyungc goiv yienc. Hnangv naaic, meih mbuo oix zuqc gorngv mbeix mbuox yie, yie ziouc hiuv duqv meih mbuo gengh haih porv mbeix.”

¹⁰Samx hleix nyei mienh dau hungh diex, “Lungh ndiev maiv maaih yietc dauh jun-zeiv mienh haih ei jienv hungh diex tov nyei waac zoux. Maiv maaih haaix dauh hungh diex ndongc haaix hlo, ndongc haaix henv, heuc haaix dauh huaax-nyinz mienh fai zoux faatv nyei mienh fai samx hleix mienh hnangv naaiv nor zoux jiex.

¹¹Hungh diex naaic nyei waac se ba'laqc aqc haic. Maiv maaih haaix dauh haih dau cuotv liuz zienh. Zienh yaac maiv yiem baamh mienh mbu'ndongx.”

¹²Weic naaiv hungh diex qiex jiez! haic. Qiex biuih cuotv ziouc hatc gorngv oix zuqc daix nzengc yiem Mbaa^mbi^lon nyei yietc zungv guai-qaauv mienh.

¹³Hnangv naaic ziouc maaih hungh njiec nyei lingc cuotv mingh oix daix yietc zungv guai-qaauv mienh. Mienh ziouc mingh lorz Ndaa^ni^en caux ninh nyei loz-gaeng doic, oix daix ninh mbuo.

¹⁴Hungh diex nyei sin-hlen mienh nyei bieiv zeiv, Aa^li^okc, cuotv mingh lorz oix daix Mbaa^mbi^lon nyei guai-qaauv mienh. Ndaa^ni^en ziouc lorz waac horpc, cong-mengh nyei caux Aa^li^okc gorngv waac.

¹⁵Ndaa^ni^en naaic gaax hungh nyei sin-hlen mienh nyei bieiv, “Hungh diex weic haaix diuc njiec lingc ndongc naaic hniev?” Aa^li^okc ziouc gorngv naaiv deix sic mbuox Ndaa^ni^en.

¹⁶Ndaa^ni^en ziouc bieqc mingh yiem hungh diex nyei nza'hmien tov bun deix ziangh hoc ninh, weic bun ninh haih porv mbeix nyei eix leiz bun hungh diex muangx.

¹⁷Ndaa^ni^en ziouc nzuonx ninh nyei biauv zorqv naaiv deix sic gorngv mbuox ninh nyei doic Haa^nan^yaa, Mi^saa^en, caux Aa^saa^li^yaa.

¹⁸Ninh mbuox ninh mbuo tov lungh zaangc nyei Tin-Hungh korv-lienh ninh mbuo aengx porv mengh naaiv deix maiv gaengh mbiaangx yaangh nyei sic weic bun Ndaa^ni^en caux ninh nyei doic caux yiem Mbaa^mbi^lon zengc njiec nyei guai-qaauv mienh maiv zuqc daic.

¹⁹Wuov muonz buatc laauc yaangh nyei sic porv mengh bun Ndaa^ni^en hiuv duqv naaiv deix maiv gaengh mbiaangx yaangh nyei sic. Ndaa^ni^en ziouc ceng lungh zaangc nyei Tin-Hungh.

²⁰Ninh gorngv, “Oix zuqc yietc liuz ceng Tin-Hungh nyei mengh taux maanc gouv maanc doic, cong-mengh caux qaqv benx ninh nyei.

²¹Ninh goiv yienc ziangh hoc caux gueix, ninh bun hungh diex tuix weic aengx faaux weic. Ninh ceix cong-mengh bun cong-mengh nyei mienh, zorqv wuonh zaang ceix bun hiuv duqv toux nyei mienh.

²²Ninh laauc yaangh ndo haic caux gem jienv nyei sic. Ninh hiuv duqv yiem hmuangx zong nyei sic, njang yaac caux ninh yiem.

²³O yie nyei ong-taaix nyei Tin-Hungh aac, yie laengz zingh yaac ceng meih, weic zuqc meih ceix cong-mengh caux qaqv bun yie. Ziux yie mbuo tov meih nyei waac meih bun yie hiuv mi'aqv, weic zuqc meih bun yie mengh baeqc hungh diex nyei sic.”

²⁴Ndaa^ni^en ziouc bieqc mingh lorz Aa^li^okc, dongh hungh diex paaiv mietc Mbaa^mbi^lon nyei guai-qaauv mienh, mbuox ninh, “Tov maiv dungx daix Mbaa^mbi^lon nyei guai-qaauv mienh. Tov dorh yie mingh hungh diex wuov. Yie ziouc gorngv mbeix nyei eix leiz mbuox hungh diex.”

²⁵Aa^li^okc siepv-siepv nyei dorh Ndaa^ni^en mingh gorngv mbuox hungh diex, “Yiem guaatv daaih nyei Yu^ndaa Mienh mbu'ndongx yie buatc dauh mienh. Ninh haih gorngv mbeix nyei eix leiz mbuox hungh diex.”

²⁶Hungh diex naaic gaax Ndaa^ni^en, aengx ganh maaih norm mbuox heuc Mben^te^satv^saa, “Meih maaih banh zeic gorngv yie mbeix nyei mbeix aengx porv mbeix nyei eix leiz fai?”

²⁷Ndaa^ni^en dau hungh diex, “Maiv maaih haaix dauh guai-qaauv mienh, zoux faatv nyei mienh, zoux huaax-nyinz nyei mienh fai mbouv guaax gaanv hei nyei mienh haih gorngv mengh hungh diex naaic wuov deix maiv gaengh mbiaangx yaangh nyei sic.

²⁸Mv baac yiem lungh zaangc maaih dauh Tin-Hungh haih laauc yaangh gem jienv nyei sic. Ninh zungv biux mengh bun Ne^mbu^katv^netv^saa Hungh hiuv duqv nqa'haav setv mueiz nyei hnoi oix hnangv haaix nor. Meih bueix jienv coux mbeix nyei mbeix caux yiem hnyouv buatc laauc yaangh nyei sic se hnangv naaiv.

²⁹“O hungh diex aac, meih bueix jienv coux nyei ziangh hoc meih hnamv taux hoz nqaang oix cuotv nyei sic. Dongh haih biux mengh gem jienv nyei sic wuov dauh bun meih hiuv duqv maaih haaix nyungc jauv oix cuotv daaih.

³⁰Yie aeqv, naaiv deix gem jienv nyei sic biux mengh bun yie se maiv zeiz weic zuqc yie maaih cong-mengh gauh camv jiex yietc zungv ziangh jienv nyei mienh. O hungh diex aac, se weic bun meih hiuv duqv meih nyei mbeix nyei eix leiz yaac mengh baeqc meih yiem hnyouv hnamv nyei jauv.

³¹“O hungh diex aac, meih mbeix buatc yietc dauh ga'naaiv hlo nyei. Naaiv dauh ga'naaiv se henv haic, njang-laangc haic, souv jienv meih nyei nza'hmien. Fangx zeiv se gamh nziex nyei.

³²Naaiv dauh ga'naaiv nyei m'nqorngv se longc zien jiem zoux daaih. La'kuotv caux buoz longc nyaanh zoux. Ga'sie caux camh zuih longc dongh siqv.

³³Zaux longc hlieqv. Zaux-benv longc hlieqv zorpc jienv ba'naih nie.

³⁴Meih mangc jienv wuov zanc, maaih norm la'bieiv, dongh maiv zeiz mienh nyei buoz zuqc cuotv daaih nyei la'bieiv, daaih mborqv wuov dauh ga'naaiv nyei zaux-benv, se longc hlieqv caux nie zorpc jienv zoux nyei zaux-benv, mborqv huv nzengc.

³⁵Hlieqv caux ba'naih nie, dongh siqv, nyaanh caux jiem yietc zungv huv muonc nzengc, ziouc hnangv nqaai gorng yiem mborqv mbiauh ciangv nyei cuqv-maux zuqc nziaaux buonc nzaanx nzengc. Lorz maiv buatc yietc deix aqv. Mv baac daaih mborqv wuov dauh ga'naaiv wuov norm la'bieiv benx norm domh! mbong yiem buangv lungh ndiev.

³⁶“Naaiv se hungh diex nyei mbeix. Ih zanc yie mbuo oix porv mbeix mbuox hungh diex.

³⁷O hungh diex aac, meih se maanc hungh nyei hungh. Lungh zaangc nyei Tin-Hungh zorqv guoqv caux lingc caux qaqv caux njang-laangc jiu bun meih gunv.

³⁸Ninh zorqv maanc mienh caux lomc-huaang nyei hieh zoih caux ndaamv-lungh nyei norqc jiu bun yiem meih nyei buoz-ndiev. Maiv gunv ninh mbuo yiem haaix, ninh bun meih gunv naaiv deix yietc zungv ga'naaiv. Meih se dongh wuov norm jiem-m'nqorngv.

³⁹“Meih jiex mingh aengx maaih norm guoqv faaux daaih mv baac maiv ndongc meih nyei. Aengx maaih da'faam norm guoqv, se dongh siqv wuov norm, gunv lungh ndiev.

⁴⁰Nqa'haav maaih da'feix norm guoqv hnangv hlieqv nor henv, weic zuqc hlieqv mborqv nyungc-nyungc huv muonc nzengc. Naaiv norm guoqv oix mborqv wuov deix norm-norm guoqv huv muonc nzengc.

⁴¹Hnangv meih buatc wuov norm ga'naaiv nyei zaux-benv caux zaux-ndoqv maaih yietc buonc ba'naih nie, yietc buonc hlieqv ziouc benx bun nqoi nyei guoqv. Mv baac naaiv norm guoqv corc henv deix hnangv wuov deix hlieqv yaac hnangv meih buatc wuov deix hlieqv zorpc jienv ba'naih nie.

⁴²Yaac hnangv zaux-ndoqv benx yietc buonc hlieqv, yietc buonc ba'naih nie, wuov norm guoqv henv deix, mau deix.

⁴³Hnangv meih buatc wuov deix hlieqv zorpc ba'naih nie, baeqc fingx ziouc zorpc buonv yaac maiv haih jiu doic, hnangv hlieqv caux ba'naih nie maiv haih jiu doic.

⁴⁴“Wuov deix hungh diex gunv nyei ziangh hoc, lungh zaangc nyei Tin-Hungh oix ganh liepc norm guoqv, se yietc liuz maiv haih zuqc mietc nyei guoqv. Yietc liuz yaac maiv zuqc ndortv benx ganh fingx mienh nyei. Naaiv norm guoqv oix mborqv wuov deix yietc zungv guoqv huv muonc nzengc, bun zutc nzengc, mv baac naaiv norm guoqv oix yietc liuz yiem.

⁴⁵Naaiv se hnangv hungh diex buatc wuov norm la'bieiv, se maiv zeiz baamh mienh nyei buoz yiem mbong zuqc cuotv daaih, mborqv huv wuov deix jiem nyaanh, dongh siqv, hlieqv, ba'naih nie. Hlo jiex nyei Tin-Hungh zorqv nqa'haav oix cuotv nyei sic bun hungh diex hiuv. Wuov norm mbeix se zien nyei. Porv daaih nyei eix leiz yaac za'gengh zeiz aqv.”

⁴⁶Ne^mbu^katv^netv^saa Hungh ziouc mbaapv njiec ndau baaix Ndaa^ni^en, yaac paaiv mienh dorh ga'naaiv daaih fongc horc aengx buov hung bun Ndaa^ni^en.

⁴⁷Hungh diex gorngv mbuox Ndaa^ni^en, “Meih nyei Tin-Hungh se maanc zienh nyei Tin-Hungh, maanc hungh diex nyei Ziouv. Ninh haih laauc yaangh gem jienv nyei sic, weic zuqc meih haih laauc yaangh naaiv kang gem jienv nyei sic.”

⁴⁸Hungh diex aengx taaih Ndaa^ni^en faaux hlang, duqv zoux hlo, yaac bun zingh nyeic camv nyei. Ninh bun Ndaa^ni^en zoux hlo gunv gormx Mbaa^mbi^lon Saengv aengx liepc ninh gunv yietc zungv guai-qaauv mienh.

⁴⁹Ndaa^ni^en yaac tov hungh diex, hungh diex ziouc orn Satv^lakv, Mesaakv, caux Aa^mbetc^ne^go gunv Mbaa^mbi^lon Saengv nyei sic. Ndaa^ni^en ganh yiem wuov hungh dinc.