Read Iu Mien Ndaa^ni^en 4 Bible Online

Ndaa^ni^en 4 - Iu Mien bible

Ndaa^ni^en 4

¹Yie, Ne^mbu^katv^netv^saa Hungh, zunh mbuox lungh ndiev nyei maanc guoqv, maanc fingx caux maanc nyungc waac nyei mienh, Tov bun meih mbuo duqv domh baengh orn.

²Yie a'hneiv gorngv Yiem Hlang Jiex nyei Tin-Hungh weic yie zoux jangx-hoc caux mbuoqc horngh nyei sic zunh mbuox meih mbuo.

³Ninh nyei jangx-hoc ndongc haaix hlo, ninh mbuoqc horngh nyei sic ndongc haaix henv, ninh nyei guoqv se yietc liuz nyei guoqv, ninh duqv gunv taux maanc gouv maanc doic.

⁴Yie, Ne^mbu^katv^netv^saa, yiem yie ganh nyei hungh dinc gu'nyuoz haiz kuh yiem, bungx-zuoqc nyei.

⁵Yie mbeix norm mbeix bun yie gamh nziex. Yie bueix jienv yie nyei coux wuov zanc, yiem hnyouv hnamv cuotv yaac buatc laauc yaangh nyei sic haeqv yie gamh nziex haic!

⁶Yie ziouc heuc Mbaa^mbi^lon Saengv nyei yietc zungv guai-qaauv mienh daaih yie naaiv weic tengx yie porv mbeix.

⁷Zoux huaax-nyinz, zoux faatv, samx hleix nyei mienh[9] caux gaanv hei mienh ziouc daaih zunv, yie gorngv mbeix bun ninh mbuo muangx mv baac ninh mbuo maiv haih tengx yie porv mbeix.

⁸Nqa'haav laai Ndaa^ni^en daaih yiem yie nyei nza'hmien, yie yaac gorngv mbeix bun ninh muangx. (Ninh aengx maaih norm mbuox heuc Mben^te^satv^saa, se gan yie nyei zienh nyei mbuox, weic zuqc ninh maaih singx zienh bun daaih nyei cong-mengh[10] yiem ninh gu'nyuoz.)

⁹“O huaax-nyinz mienh nyei bieiv, Mben^te^satv^saa aac, yie hiuv duqv meih maaih singx zienh bun daaih nyei cong-mengh yiem meih gu'nyuoz yaac maiv maaih haaix nyungc gem jienv nyei sic weic meih aqc jiex ndaangc. Yie mbeix buatc nyei mbeix se hnangv naaiv. Tov meih porv mbuox yie.

¹⁰Yie bueix jienv coux buatc naaiv deix laauc yaangh nyei sic. Yie buatc yiem baamh gen mbu'ndongx maaih diuh domh! ndiangx hlo haic, hlang! haic.

¹¹Naaiv diuh ndiangx gunv zoux gunv hlang, gunv zoux gunv henv, zungv faaux taux lungh. Yiem jomc lungh ndiev mangc duqv buatc nyei.

¹²Ndiangx nyei normh nzueic nyei, biouv yaac ziangh duqv camv. Yiem naaiv diuh ndiangx maaih nyanc hopv gaux yietc zungv maaih maengc nyei ga'naaiv. Lomc-huaang nyei hieh zoih yiem ndiangx ga'ndiev bingx laangh. Ndaamv-lungh nyei norqc yiem ninh nyei nquaah. Yietc zungv maaih maengc nyei ga'naaiv yiem naaiv diuh ndiangx duqv nyanc hopv.

¹³“Yie bueix jienv coux buatc naaiv deix laauc yaangh nyei sic, buatc dauh siouv gaeng nyei cing-nzengc fin-mienh, yiem lungh njiec daaih.

¹⁴Ninh heuc mbui nyei gorngv, ‘Goix naaiv diuh ndiangx, hngaqv ninh nyei nquaah, hlutv ninh nyei normh, bun ninh nyei biouv faatv nzaanx nzengc. Bun yiem ndiangx ga'ndiev nyei hieh zoih biaux, bun yiem ndiangx-nquaah nyei norqc yaac ndaix mingh.

¹⁵Mv baac bun ndiangx-gorn caux nzungh corc ziangh jienv ndau, longc hlieqv caux dongh siqv kou kou jienv, bun ninh yiem wuov miev-nyiemz nyei dorngx, lomc-huaang gu'nyuoz. “+‘Bun ninh zuqc lungh nyei mbiungc-suiv pinx ninh ndorn, yaac bun ninh maaih buonc caux hieh zoih yiem wuov lomc-huaang, miev nyiemz nyei dorngx.

¹⁶Bun ninh nyei hnyouv goiv yienc, maiv benx baamh mienh nyei hnyouv yaac bun ninh duqv hnyouv hnangv hieh zoih nyei hnyouv. Sueih ninh hnangv naaic yiem siec hnyangx.[11]

¹⁷“+‘Naaiv deix siemv nyei waac se siouv gaeng nyei cing-nzengc fin-mienh dingc nyei waac. Cing-nzengc fin-mienh gorngv naaiv deix dingc daaih nyei waac weic bun lungh ndiev mienh hiuv duqv Yiem Hlang Jiex Wuov Dauh gunv baamh mienh nyei guoqv, yaac zorqv guoqv jiu bun dongh ninh oix bun nyei mienh, liepc maiv maaih mengh dauh jiex nyei mienh gunv guoqv.’

¹⁸“Naaiv se yie, Ne^mbu^katv^netv^saa Hungh, mbeix nyei mbeix. Mben^te^satv^saa aah! Tov tengx yie porv mbeix, weic zuqc yiem yie nyei guoqv nyei yietc zungv guai-qaauv mienh, maiv maaih haaix dauh haih porv mbeix bun yie muangx. Mv baac meih haih nyei, weic zuqc meih maaih singx zienh bun daaih nyei cong-mengh yiem meih gu'nyuoz.”[12]

¹⁹Ndaa^ni^en, aengx maaih norm mbuox heuc Mben^te^satv^saa, yietv haiz naaiv deix waac ziouc haeqv dangh ninh, hnyouv huaang nzengc. Hungh diex gorngv, “Mben^te^satv^saa aac, maiv dungx bun mbeix caux porv mbeix nyei eix leiz haeqv meih.” Mben^te^satv^saa dau, “Yie nyei ziouv aah! Tov bun naaiv norm mbeix gorngv zuqc nzorng meih wuov deix, bun mbeix nyei eix leiz gorngv zuqc meih nyei win-wangv.

²⁰Meih buatc wuov diuh ndiangx, gunv hlo gunv henv, hlang taux gu'nguaaic lungh, dueiv zungv taux lungh mi'aqv, jomc lungh ndiev haih mangc duqv buatc,

²¹normh yaac nzueic, biouv ziangh duqv camv, maaih nyanc hopv gaux yietc zungv maaih maengc nyei ga'naaiv nyanc. Lomc-huaang nyei hieh zoih yiem ndiangx ga'ndiev hitv kuonx. Ndaamv-lungh nyei norqc yiem ninh nyei nquaah.

²²O hungh diex aah! Meih se wuov diuh ndiangx aqv. Meih hlo yaac henv, zungv hlo taux gu'nguaaic lungh. Meih gunv nyei guoqv taux jomc lungh ndiev.

²³“O hungh diex aac, meih buatc siouv gaeng, cing-nzengc nyei fin-mienh, yiem wuov lungh gorngv, ‘Goix naaiv diuh ndiangx yaac mietc nzengc, mv baac liouh gorn caux nzungh yiem wuov ndau. Longc hlieqv caux dongh siqv kou kou jienv, bun ninh yiem wuov lomc-huaang nyei miev-lunx, yaac bun ninh zuqc mbiungc-suiv pinx ndorn. Bun ninh caux lomc-huaang nyei hieh zoih yiem buangv siec hnyangx.’[13]

²⁴“O hungh diex aac, yiem naaiv mingh se porv mbeix nyei eix leiz. Naaiv se Yiem Hlang Jiex Wuov Dauh cuotv daaih nyei lingc gorngv yie nyei ziouv, hungh diex.

²⁵Meih zungv oix zuqc yiem baamh mienh mbu'ndongx zuqc zunc cuotv mingh caux hieh zoih yiem. Meih oix zuqc hnangv ngongh nor, nyanc miev, zuqc lungh zaangc nyei mbiungc-suiv pinx ndorn. Oix zuqc jiex liuz siec hnyangx, zuov taux meih nyiemc Yiem Hlang Jiex Wuov Dauh gunv baamh mienh nyei guoqv. Ninh oix zorqv guoqv jiu bun haaix dauh ninh ziouc jiu bun wuov dauh aqv.

²⁶Fin-mienh gorngv oix zuqc liouh ndiangx-gorn caux nzungh ziangh jienv ndau nyei eix leiz se, zuov meih nyiemc Tin-Dorngh gunv, nqa'haav meih nyei guoqv zungv aengx benx meih nyei.

²⁷O hungh diex aah! Tov muangx yie kuinx nyei waac. Tov guangc meih nyei zuiz aengx zoux duqv horpc. Guangc zoux waaic nyei sic, korv-lienh mienh jomc mienh.[14] Hnangv naaic nziex meih haih duqv bungx-zuoqc nyei yiem lauh.”

²⁸naaiv deix yietc zungv sic cuotv daaih zuqc Ne^mbu^katv^netv^saa Hungh.

²⁹Jiex liuz ziepc nyeic hlaax nyieqc, hungh diex yiem Mbaa^mbi^lon nyei hungh dinc nyei biauv-ngorh gu'nguaaic[15] yangh jienv mingh wuov zanc,

³⁰hungh diex gorngv, “Naaiv se domh Mbaa^mbi^lon Zingh, dongh yie ganh nyei domh qaqv liepc daaih zoux domh zingh, weic biux mengh yie nyei haangh daauh nyei domh njang-laangc.”

³¹Naaiv deix waac corc yiem hungh diex nyei nzuih gorngv maiv gaengh setv, maaih qiex yiem wuov lungh njiec daaih gorngv, “Ne^mbu^katv^netv^saa Hungh aah! Naaiv deix waac gorngv meih aqv. Meih nyei hungh lingc zuqc zorqv mi'aqv.

³²Meih zungv zuqc zunc cuotv, maiv duqv yiem mienh mbu'ndongx. Oix zuqc caux hieh zoih yiem lomc-huaang nyanc miev hnangv ngongh nor. Meih oix zuqc hnangv naaiv nor yiem jiex liuz siec hnyangx, zuov meih nyiemc Yiem Hlang Jiex Wuov Dauh maaih lingc gunv baamh mienh nyei guoqv. Ninh oix zorqv guoqv bun haaix dauh, ninh ziouc bun wuov dauh aqv.”

³³Gorngv Ne^mbu^katv^netv^saa naaiv deix waac jang-jang gorngv baac hnangv, sic liemh zeih cuotv daaih doix-diuc. Ninh zuqc zunc cuotv zuangx mienh mbu'ndongx yaac nyanc miev hnangv ngongh nor. Ninh nyei sin zuqc mbiungc-suiv pinx ndorn. Ninh nyei mba'biei ndaauv hnangv domh jaangv nyei biei. Ninh nyei zaux-ndoqv-nquaiz yaac hnangv norqc nyei nyiuv.

³⁴Wuov deix ziangh hoc jiex liuz, yie, Ne^mbu^katv^netv^saa, cau hmien mangc lungh, yie ziouc nzang daaih aqv. Wuov zanc yie ceng Yiem Hlang Jiex Wuov Dauh. Yie taaih ninh yaac ceng yietc liuz ziangh nyei Tin-Hungh weic zuqc ninh gunv nyei guoqv se yietc liuz nyei guoqv, ninh nyei guoqv yiem taux maanc gouv maanc doic.

³⁵Lungh ndiev maanc mienh ninh maiv funx maaih jaax-zinh. Yiem lungh maaih qaqv nyei ga'naaiv[16] caux yiem lungh ndiev nyei baamh mienh mbu'ndongx, ninh sueih ninh ganh nyei eix zoux. Maiv maaih haaix dauh haih laanh ninh nyei buoz, fai naaic ninh, “Meih zoux haaix nyungc laeh?”

³⁶Yie nzang daaih wuov zanc, yie aengx duqv haangh daauh, duqv mienh taaih weic yie njang-laangc nyei guoqv. Yie nyei caangh laangh mienh caux domh jien nzuonx daaih. Yie nyei hungh weic aengx duqv liepc wuonv, zungv jaa zoux hlo jienv faaux.

³⁷Ih zanc yie, Ne^mbu^katv^netv^saa, ceng yaac taaih lungh zaangc nyei Hungh Diex, weic zuqc ninh zoux nyei nyungc-nyungc ninh zoux duqv horpc. Ninh nyei jauv yaac baengh fim nyei. Zoux maux nyei mienh ninh yaac haih zatv duqv njiec.