Read Iu Mien Ndaa^ni^en 5 Bible Online

Ndaa^ni^en 5 - Iu Mien bible

Ndaa^ni^en 5

¹Mben^satv^saa Hungh mbenc donx nyanc hopv hlo! nyei, bun yietc cin dauh ninh nyei zoux hlo nyei mienh nyanc. Ninh yaac caux ninh mbuo doix hmien hopv a'ngunc diuv.

²Mben^satv^saa hopv diuv nyei ziangh hoc ninh paaiv mienh mingh zorqv dongh ninh nyei die,[17] Ne^mbu^katv^netv^saa, yiem Ye^lu^saa^lem, zaangc Tin-Hungh nyei biauv, caangv daaih nyei jiem nyaanh jaa-dorngx weic bun hungh diex caux ninh nyei zoux hlo nyei mienh, ninh nyei auv mbuo, caux ninh nyei jaav-zeih auv longc hopv diuv.

³Ninh mbuo ziouc dorh yiem Ye^lu^saa^lem nyei singx dinc, zaangc Tin-Hungh nyei biauv, caangv daaih nyei jiem nyaanh jaa-dorngx. [18] Hungh diex caux zoux hlo nyei mienh, hungh nyei auv caux jaav-zeih auv ziouc longc naaiv deix jaa-dorngx hopv diuv.

⁴Ninh mbuo yietc binc hopv diuv, yietc binc ceng longc jiem nyaanh, dongh siqv, hlieqv, ndiangx caux la'bieiv zoux daaih nyei zienh.

⁵Liemh zeih maaih baamh mienh nyei buoz-ndoqv hinc cuotv yiem hungh dinc gu'nyuoz, dang-jaax wuov ndaangc maengx nyei njongc, [19] fiev nzaangc. Hungh diex mangc jienv wuov jieqv buoz fiev nzaangc,

⁶ninh nyei hmien mbienc nzengc mi'aqv. Gamh nziex haic, cingh mborqc nqaapv jaax, zaux mau nzengc.

⁷Hungh diex heuc zoux faatv nyei mienh, samx hleix nyei mienh, [20] caux gaanv hei mienh daaih ziouc mbuox Mbaa^mbi^lon nyei naaiv deix yietc zungv guai-qaauv mienh, “Haaix dauh doqc fiev jienv naaiv deix nzaangc aengx porv bun yie muangx, yie ziouc bun wuov dauh zuqv setv luoqc nyei lui-ndaauv aengx bun ninh nyei jaang dangh jienv jiem-limc. Yie yaac oix orn ninh yiem yie nyei guoqv zoux da'faam wuov dauh.”

⁸Hungh diex nyei yietc zungv guai-qaauv mienh ziouc bieqc daaih mv baac ninh mbuo maiv haih doqc naaiv deix nzaangc yaac maiv haih porv eix leiz.

⁹Mben^satv^saa Hungh gauh fatv gamh nziex, hmien zungv tuix setv, mbienc nzengc mi'aqv. Ninh nyei zoux hlo nyei mienh yietc zungv hnamv maiv mengh baeqc.

¹⁰Hungh maac [21] haiz hungh diex caux ninh zoux hlo nyei mienh gorngv waac nyei qiex, ninh ziouc bieqc mbenc nyanc hopv hlo wuov qongx biauv. Hungh maac gorngv, “O hungh diex aah! Tov bun hungh diex ziangh duqv maanc fuix. Maiv dungx gamh nziex, maiv dungx bun hmien mbienc.

¹¹Yiem meih nyei guoqv maaih dauh mienh maaih singx zienh bun daaih nyei cong-mengh[22] yiem ninh nyei hnyouv. Yiem meih nyei die nyei seix zeiv naaiv dauh mienh maaih hnyouv-zoih longx, maaih wuonh zaang caux cong-mengh hnangv zienh nyei cong-mengh nor. Meih nyei die, Ne^mbu^katv^netv^saa Hungh, se hungh nyei die, liepc ninh zoux huaax-nyinz, zoux faatv, samx hleix caux gaanv hei nyei mienh nyei bieiv.

¹²Naaiv dauh mienh, Ndaa^ni^en, dongh hungh diex heuc Mben^te^satv^saa, maaih hnyouv-zoih longx, maaih wuonh zaang, maaih cong-mengh, maaih banh zeic porv mbeix, haih cai duqv cuotv waac-ormv yaac haih jaiv kuonx hnyouv nyei sic. Heuc Ndaa^ni^en daaih, ninh ziouc porv mengh fiev jienv naaiv deix waac nyei eix leiz.”

¹³Ninh mbuo ziouc dorh Ndaa^ni^en daaih yiem hungh diex nyei nza'hmien. Hungh diex naaic Ndaa^ni^en, “Meih se dongh yiem Yu^ndaa zuqc guaatv daaih, se yie nyei die, hungh diex, yiem Yu^ndaa dorh daaih wuov dauh Ndaa^ni^en fai?

¹⁴Yie haiz gorngv meih maaih singx zienh bun daaih nyei cong-mengh [23] yiem meih gu'nyuoz. Meih maaih hnyouv-zoih longx, maaih wuonh zaang, maaih cong-mengh longx haic.

¹⁵Ih zanc mienh dorh guai-qaauv mienh caux zoux faatv nyei mienh daaih doqc naaiv deix nzaangc aengx porv eix leiz bun yie, mv baac ninh mbuo maiv haih porv aqv.

¹⁶Yie haiz gorngv meih haih porv mengh yaac haih jaiv kuonx hnyouv nyei sic. Se gorngv meih haih doqc naaiv deix nzaangc aengx porv nzaangc nyei eix leiz, meih ziouc duqv zuqv lui-ndaauv-luoqc, jaang yaac duqv dangh jienv jiem-limc, yiem guoqv gu'nyuoz meih yaac duqv zoux da'faam wuov dauh.”

¹⁷Ndaa^ni^en ziouc dau hungh diex, “Meih nyei zingh nyeic gunv liouh meih ganh fai zorqv meih nyei zingh nyeic bun ganh dauh. Mv baac yie oix weic hungh diex doqc naaiv deix nzaangc aengx porv nzaangc nyei eix leiz.

¹⁸“O hungh diex aah! Yiem Hlang Jiex nyei Tin-Hungh ceix hlo haic nyei guoqv bun meih nyei die, Ne^mbu^katv^netv^saa, zoux hungh yaac bun ninh zoux hlo, maaih njang-laangc caux haangh daauh.

¹⁹Weic zuqc Tin-Hungh bun ninh zoux hlo, maanc guoqv, maanc fingx, maanc nyungc waac nyei mienh yiem ninh nyei nza'hmien gamh nziex, sin zinx. Hungh diex oix daix haaix dauh ninh ziouc daix, oix liouh haaix dauh ninh ziouc liouh aqv. Ninh oix liepc haaix dauh zoux hlo ninh ziouc zoux aqv. Oix zatv haaix dauh njiec aiv ninh ziouc zoux aqv.

²⁰Mv baac ninh nyei hnyouv maux jienv faaux, hnyouv ngaengc, zoux duqv maux, ninh ziouc zuqc tuix cuotv ninh nyei hungh weic caux zoux hungh nyei njang-laangc.

²¹Ninh yiem baamh mienh mbu'ndongx zuqc zunc cuotv. Ninh nyei hnyouv yaac hnangv hieh zoih nyei hnyouv. Ninh caux hieh lorh yiem, nyanc miev hnangv ngongh nor. Ninh nyei sin yaac zuqc lungh nyei mbiungc-suiv pinx ndorn nzengc, zuov taux ninh hiuv duqv Yiem Hlang Jiex nyei Tin-Hungh gunv baamh mienh nyei guoqv yaac sueih eix liepc ninh ginv daaih nyei mienh gunv.

²²“O Mben^satv^saa aac, meih zoux ninh nyei dorn.[24] Maiv gunv meih hiuv duqv naaiv deix yietc zungv sic, meih yaac maiv zatv ganh nyei hnyouv njiec.

²³Daaux nzuonx, meih taaih ganh zoux hlo, ngaengc yiem lungh zaangc nyei Ziouv. Meih heuc mienh mingh zorqv naaiv deix jaa-dorngx yiem ninh nyei singx dinc daaih yiem meih nyei nza'hmien. Meih caux meih nyei zoux hlo nyei mienh, meih nyei auv caux jaav-zeih auv longc hopv diuv. Meih aengx ceng wuov deix longc jiem longc nyaanh, longc dongh siqv, longc hlieqv, longc ndiangx, longc la'bieiv zoux daaih nyei zienh. Naaiv deix zienh mangc maiv buatc, muangx maiv haiz, yaac maiv haih bieqc hnyouv. Mv baac meih maiv taaih Tin-Hungh, dongh bun meih tauv nyei qiex caux meih nyei yietc zungv jauv-louc yiem ninh nyei buoz-zaangv-or wuov dauh.

²⁴Weic naaiv Tin-Hungh bun jieqv buoz hinc cuotv daaih fiev naaiv deix nzaangc.

²⁵“Naaiv deix nzaangc hnangv naaiv nor fiev. Mene, Mene, Teken, Baasin

²⁶“Naaiv deix waac nyei eix leiz se hnangv naaiv. Mene [25] se Tin-Hungh saauv meih nyei guoqv nyei hnyangx-daauh buangv ziouc taux setv mueiz aqv.

²⁷Teken [26] se meih zuqc yiem tin-baengh nziangx nziang, buatc meih caa deix.

²⁸Baasin [27] se meih nyei guoqv bun nqoi benx Mi^ndie Mienh caux Besie Mienh nyei.”

²⁹Mben^satv^saa ziouc paaiv waac. Mienh zorqv lui-ndaauv-luoqc bun Ndaa^ni^en zuqv jienv, yaac zorqv jiem-limc dangh jienv ninh nyei jaang. Mienh aengx zunh gorngv, yiem guoqv gu'nyuoz Ndaa^ni^en duqv zoux da'faam wuov dauh.

³⁰Dongh wuov muonz Mbaa^mbi^lon nyei hungh, Mben^satv^saa, zuqc daix.

³¹Mi^ndie Mienh nyei hungh, Ndaa^li^atc, duqv caangv deic-bung mi'aqv. Wuov zanc ninh duqv luoqc ziepc nyeic hnyangx.