Read Iu Mien Ho^se^yaa 11 Bible Online

Ho^se^yaa 11 - Iu Mien bible

Ho^se^yaa 11

¹“I^saa^laa^en hnyangx-jeiv lunx nyei ziangh hoc yie hnamv ninh, yaac heuc yie nyei dorn yiem I^yipv cuotv daaih.

²Yie yietc zei heuc ninh mbuo, ninh mbuo yietc zei leih go yie. Ninh mbuo zanc-zanc fongc horc ziec bun Mbaa^an zienh, yaac buov hung bun miuc-fangx.

³Mv baac se dongh yie njaaux E^faa^im yangh jauv, yie longc yie[64] nyei buoz hlorpv jienv ninh mbuo, ninh mbuo yaac maiv hiuv duqv se yie zorc ninh mbuo longx.

⁴Yie longc korv-lienh mienh nyei hnyouv zoux hlaang[65] ken ninh mbuo, yaac longc hnamv mienh nyei hnyouv zoux kou kou jienv ninh mbuo. Yie bun ninh mbuo nyei ndiangx-gaaz[66] heng njiec, yaac ndoqv njiec uix ninh mbuo.

⁵Ninh mbuo oix zuqc nzuonx[67] I^yipv Deic-Bung, Atc^si^lie duqv gunv ninh mbuo,[68] laaix ninh mbuo maiv kangv nzuonx daaih lorz yie.

⁶Mienh oix longc nzuqc ndaauv yiem ninh mbuo nyei zingh mborqv jaax, baaic waaic ninh mbuo nyei zingh nyei gaengh sorn, yaac laaix ninh mbuo caangh laangh daav nyei za'eix[69] bun ninh mbuo zuqc mietc.

⁷Yie nyei baeqc fingx kungx maaih hnyouv oix leih nqoi yie, ninh mbuo ziouc zuqc dingc ziangx oix zuqc gaaz ndiangx-gaaz, yaac maiv maaih haaix dauh haih tengx ninh mbuo zorqv nqoi.[70]

⁸“E^faa^im aah! Yie hnangv haaix nor haih bungx guangc meih? I^saa^laa^en aah! Yie hnangv haaix nor haih zorqv meih jiu bun ganh dauh? Yie hnangv haaix nor haih bun meih hnangv Atc^maa? Yie hnangv haaix nor haih zoux bun meih hnangv zoux bun Se^mbo^yim? Yie nyei hnyouv faanv-fei lunc, weic zuqc yie za'gengh korv-lienh ninh mbuo.

⁹Yie maiv ei yie qiex jiez haic nyei jauv zoux bun meih mbuo. Yie maiv aengx mietc E^faa^im, weic zuqc yie se Tin-Hungh, maiv zeiz baamh mienh. Yie se yiem meih mbuo mbu'ndongx nyei Cing-Nzengc Tin-Hungh. Yie yaac maiv zeiz qiex jiez nyei daaih lorz meih mbuo.[71]

¹⁰Ninh mbuo oix gan jienv ZIOUV, ninh oix hnangv sienh nor njunh. Zeiz nyei, ninh za'gengh oix njunh. Ninh nyei naamh nyouz ziouc yiem fai bung sin zinx jienv daaih.

¹¹Ninh mbuo ziouc sin zinx jienv daaih hnangv I^yipv daaih nyei norqc, yaac hnangv yiem Atc^si^lie daaih nyei baeqc gopv. Yie oix dorh ninh mbuo nzuonx ninh mbuo ganh nyei biauv.” Naaiv se ZIOUV gorngv nyei waac.

¹²E^faa^im longc gorngv-baeqc nyei waac, I^saa^laa^en longc guv guaix nyei jauv weih jienv yie. Yu^ndaa ngaengc Tin-Hungh,[72] se ngaengc jienv ziepc zuoqv nyei Cing-Nzengc Tin-Hungh.[73]