Read Iu Mien Ho^se^yaa 12 Bible Online

Ho^se^yaa 12 - Iu Mien bible

Ho^se^yaa 12

¹E^faa^im nyanc nziaaux, ziangh hnoi zunc jienv dong bung nyei nziaaux mingh. Ninh bun gorngv-baeqc caux zoux doqc nyei jauv jaa camv. Ninh caux Atc^si^lie laengz ngaengc waac, yaac bienh ga'lanv youh mingh bun I^yipv.

²ZIOUV gox Yu^ndaa, yaac ziux Yaakopv zoux nyei jauv oix dingc ninh nyei zuiz, yaac ei ninh zoux nyei sic winh bun ninh.

³Yiem maa nyei ga'sie gu'nyuoz ninh nanv jienv ninh gorx nyei zaux-nqo. Benx domh mienh nyei ziangh hoc ninh caux Tin-Hungh borngz.

⁴Ninh caux fin-mienh borngz yaac borngz duqv hingh, ninh nyiemv yaac tov fin-mienh korv-lienh. Yiem Mbetc^en ninh buangh zuqc Tin-Hungh, yiem wuov Tin-Hungh yaac caux ninh[74] gorngv waac,

⁵se ZIOUV, Nernh Jiex nyei Tin-Hungh. Ninh nyei mbuox heuc ZIOUV.

⁶Hnangv naaic meih oix zuqc kaux Tin-Hungh tengx nzuonx daaih.[75] Oix zuqc goux longx hnamv mienh nyei hnyouv caux baengh fim nyei jauv, yaac zanc-zanc zuov jienv meih nyei Tin-Hungh.

⁷Saeng-eix mienh, buoz nanv jienv maiv horpc nyei nziangx. Ninh a'hneiv zeix mienh.

⁸E^faa^im gorngv, “Aa, yie benx butv-zoih mienh aqv. Yie zornc duqv zinh zoih benx yie ganh nyei.” Mv baac ninh nyei yietc zungv zinh zoih yietc liuz maiv haih gaux nzaaux ninh baamz nyei zuiz.[76]

⁹Yiem meih cuotv I^yipv Deic-Bung daaih yie zoux ZIOUV, meih nyei Tin-Hungh. Yie aengx oix bun meih yiem ndopv-liuh, hnangv jiex dingc daaih nyei zipv nyei hnoi-nyieqc.

¹⁰Yie caux douc waac mienh gorngv waac, se yie bun laauc yaangh nyei sic jaa camv. Yie longc douc waac mienh gorngv waac-beiv.

¹¹Yiem Gi^le^aatc maaih zuiz nyei fai? Ninh mbuo ndongc haaix zungv maiv lamh longc. Ninh mbuo yiem Gin^gaan fongc horc ngongh gouv ziec. Ninh mbuo nyei ziec-dorngh hnangv yiem ndeic laih liuz nyei zuonx nyei la'bieiv-ndui.

¹²(Zinh ndaangc Yaakopv biaux taux Aalam Deic, yiem wuov I^saa^laa^en zoux gong bietv auv longc, ninh tengx mienh bungx ba'gi yungh weic bietv auv.)

¹³ZIOUV longc douc waac mienh dorh I^saa^laa^en yiem I^yipv cuotv daaih. I^saa^laa^en yaac bangc dauh douc waac mienh beu jienv ninh.

¹⁴E^faa^im za'gengh! cuoqv ZIOUV nouz haic. Ninh daix mienh nyei zuiz ninh ganh oix zuqc ndaam-dorng. Laaix ninh mangc piex ZIOUV, ZIOUV oix winh bun ninh.