Read Iu Mien Ho^se^yaa 2 Bible Online

Ho^se^yaa 2 - Iu Mien bible

Ho^se^yaa 2

¹“Oix zuqc gorngv mbuox meih mbuo nyei youz, ‘Ammi,’[6] yaac mbuox meih mbuo nyei muoc, ‘Lu^haa^maa,’ [7]

²“Meih mbuo oix zuqc qaqv tov meih mbuo nyei maa. Za'gengh oix zuqc qaqv tov, [8] weic zuqc ninh maiv zeiz yie nyei auv, yie yaac maiv zeiz ninh nyei nqox. Oix zuqc heuc ninh guangc nqoi maaic sin nyei hmien-mueic, yaac guangc nqoi ninh hienx nqox nyei jauv. [9]

³Maiv zei aeqv, yie oix ciev ninh nyei lui-houx, bun ninh laengh gaengv nyei yiem hnangv ninh cuotv seix wuov hnoi. Yie yaac oix bun ninh hnangv deic-bung-huaang, zoux bun ninh benx mborngx nqaai nyei ndau, yaac bun ninh jaang nqaatv taux daic.

⁴Yie yaac maiv korv-lienh ninh nyei fu'jueiv weic zuqc ninh mbuo se maaic sin mienh duqv daaih nyei fu'jueiv.

⁵Ninh mbuo nyei maa mingh maaic sin. Duqv ninh mbuo daaih wuov dauh maa zoux nyaiv haic nyei sic. Ninh gorngv, ‘Yie mingh gan hnamv yie wuov deix, dongh bun hnaangx bun wuom yie, bun ba'gi yungh biei caux la'maah ndie yie, yaac bun ga'lanv youh caux a'ngunc diuv.

⁶Weic naaiv yie oix longc njimv-m'njormh mbiorngz jienv ninh nyei jauv, yie yaac oix zoux laatc dangv jienv ninh, ninh ziouc lorz maiv buatc jauv mingh.

⁷Ninh oix zunc ninh hnamv wuov deix mv baac zunc maiv zaaic. Ninh oix lorz ninh mbuo mv baac lorz maiv buatc. Ninh ziouc gorngv, ‘Yie mingh aqv. Yie mingh lorz yie nyei loz-nqox, weic zuqc wuov zanc yie duqv gauh longx ih zanc.’

⁸Ninh maiv hiuv duqv se dongh yie bun mbiauh, a'ngunc diuv caux ga'lanv youh, aengx jaa tipv jiem nyaanh camv nyei bun ninh, dongh ninh mbuo longc weic zaangc Mbaa^an zienh.

⁹Weic naaiv taux siou mbiauh nyei ziangh hoc, caux zoux ziangx siang-a'ngunc diuv nyei ziangh hoc, yie oix zorqv nzuonx. Yie nyei ba'gi yungh biei caux la'maah ndie, dongh longc buang jienv ninh laengh gaengv nyei sin, yie yaac oix zorqv nzuonx.

¹⁰Ih zanc yie oix yiem dongh ninh hnamv wuov deix nyei nza'hmien biux mengh ninh zoux laih hlopv nyei sic, yaac maiv maaih haaix dauh njoux ninh biaux ndutv yie nyei buoz-ndiev.

¹¹Yie oix bun ninh yietc zungv njien-youh nyei jauv baac mi'aqv, se ninh jiex nyei zipv, ninh bieqc Siang-Hlaax nyei zipv, ninh nyei Dingh Gong Hnoi, caux ninh nyei yietc zungv dingc daaih nyei zipv.

¹²Yie yaac oix zoux waaic ninh nyei a'ngunc hmei caux ninh nyei ngongh nyorx ndiangx, dongh ninh gorngv, ‘Naaiv se hnamv yie wuov deix bun yie weic cingv yie.’ Yie ziouc bun wuov deix ndiangx benx lomc. Lomc-huaang nyei hieh zoih ziouc naqv nzengc naaiv deix ndiangx.

¹³Yie oix dingc ninh nyei zuiz, weic ninh jiex zipv nyei hnoi buov hung bun Mbaa^an zienh, yaac weic ninh dangh jienv buoz-ndoqv-nzaeng [10] caux siou-setv mingh gan hnamv ninh wuov deix yaac la'kuqv yie.” Naaiv se ZIOUV gorngv nyei waac.

¹⁴Weic naaiv mangc maah! Yie oix yuoqc ninh, dorh ninh bieqc deic-bung-huaang gorngv orn hnyouv nyei waac.

¹⁵Yiem wuov yie oix zorqv a'ngunc huingx bun ninh, aengx zorqv Aako Horngz[11] benx maaih lamh hnamv nyei gaengh. Ninh ziouc dau [12] hnangv ninh lunx nyei ziangh hoc, hnangv yiem I^yipv cuotv daaih nyei ziangh hoc.”

¹⁶ZIOUV gorngv, “Taux wuov hnoi meih oix heuc yie, ‘Yie nyei nqox.’ Yiem naaiv mingh meih maiv heuc yie zoux, ‘Yie nyei Mbaa^an.’

¹⁷Weic zuqc yie oix zorqv Mbaa^an zienh nyei mbuox cuotv ninh nyei nzuih, ninh ziouc maiv aengx heuc naaiv deix mbuox.

¹⁸Taux wuov zanc yie oix weic ninh [13] caux lomc-huaang nyei hieh zoih, caux ndaamv-lungh nyei norqc, caux nyorng ndau nyei ga'naaiv liepc jiez ngaengc waac. Yie yaac oix wuotv nauv [14] yiem guoqv gu'nyuoz nyei juang-zinx caux nzuqc ndaauv, yaac bun mborqv jaax nyei jauv dangx. Yie yaac oix bun ninh baengh orn nyei bueix njiec.

¹⁹Yie oix gorngv ziangh meih, bun meih yietc liuz benx yie nyei auv. Yie oix longc zoux horpc nyei jauv, baengh fim nyei, ziepc zuoqv hnamv mienh nyei hnyouv caux korv-lienh nyei hnyouv gorngv ziangh meih.

²⁰Yie oix ziepc zuoqv nyei gorngv ziangh meih. Meih ziouc hiuv duqv yie, ZIOUV. ”

²¹ZIOUV gorngv, “Taux wuov hnoi yie oix dau lungh, lungh ziouc dau ndau. [15]

²²Ndau yaac oix dau mbiauh, a'ngunc diuv caux ga'lanv youh. Naaiv deix yaac oix dau Yitv^le^en. [16]

²³Yie oix weic yie ganh zorqv ninh zuangx jienv naaiv norm deic-bung. Yie ziouc korv-lienh Lo Lu^haa^maa [17] yaac gorngv mbuox Lo Ammi, [18] ‘Meih se yie nyei baeqc fingx.’ Ninh ziouc gorngv, ‘Meih se yie nyei Tin-Hungh.’