Read Iu Mien Ho^se^yaa 8 Bible Online

Ho^se^yaa 8 - Iu Mien bible

Ho^se^yaa 8

¹“Biomv nzatc maah![47] Weic zuqc maaih dauh win-wangv hnangv domh jaangv-ngongh yiem ZIOUV nyei biauv gu'nguaaic, weic zuqc baeqc fingx ngaengc yie nyei ngaengc waac yaac baamz yie nyei leiz-latc.

²Ninh mbuo heuc jienv yie gorngv, Yie nyei Tin-Hungh aah! Yie mbuo, I^saa^laa^en Mienh, hiuv duqv meih nyei.”

³Longx nyei wuov nyungc, I^saa^laa^en nqemh, win-wangv ziouc zunc zaaic ninh.

⁴Ninh mbuo liepc hungh diex, mv baac maiv zeiz yie paaiv. Ninh mbuo liepc jien, mv baac yie maiv hiuv. Ninh mbuo longc jiem longc nyaanh weic ganh zoux miuc-fangx weic bun ninh mbuo ganh zuqc mietc.

⁵Saa^maa^lie aah! Yie nqemh[48] meih mbuo nyei ngongh dorn. Yie nyei ga'qiex baetv cuotv bun ninh mbuo. Ninh mbuo taux haaix zanc cingx daaih cing-nzengc?

⁶Ninh mbuo yiem I^saa^laa^en, maaih zaangc mienh dox daaih nyei ngongh dorn, mv baac se maiv zeiz Tin-Hungh. Yiem Saa^maa^lie nyei ngongh dorn zungv oix zuqc mborqv huv nzengc.

⁷“Weic zuqc ninh mbuo zuangx nyei se nziaaux, ninh mbuo siou nyei ziouc benx nziaaux-zunc. Mbiauh zungh maiv cuotv dorv, ziouc maiv cuotv mbiauh weic zoux mbuonv. Se gorngv cuotv mbiauh nor, ganh fingx mienh yaac daaih nyanc nzengc.

⁸I^saa^laa^en zuqc naqv nzengc mi'aqv. Ih zanc yiem maanc fingx mbu'ndongx benx maiv lamh longc nyei nie-mor huv.

⁹Ninh mbuo mingh kaux[49] Atc^si^lie hnangv dauh hieh lorh ndoqc youh jienv mingh. E^faa^im yaac cingv mienh hnamv ninh.

¹⁰Maiv gunv ninh mbuo cingv ganh guoqv mienh zoux doic, maiv lauh yie oix siou ninh mbuo zunv. Ninh mbuo ziouc jiez gorn[50] hei jienv njiec laaix hungh diex caux jien bun ninh mbuo ndaam hniev.

¹¹E^faa^im jaa zoux ziec-dorngh weic fiqv zuiz[51] daaux nzuonx naaiv deix ziec-dorngh bun ninh baamz zuiz.

¹²Se gorngv yie weic ninh fiev waanc-waanc diuh yie nyei leiz-latc, ninh kungx funx benx ganh nyungc ga'naaiv hnangv.

¹³Ninh mbuo a'hneiv fongc horc ziec. Ninh mbuo longc saeng-kuv fongc horc ziec yaac nyanc wuov deix orv, mv baac ZIOUV maiv a'hneiv ninh mbuo. Ih zanc ninh oix jangx ninh mbuo nyei zuiz-nipc yaac dingc ninh mbuo nyei zuiz, ninh mbuo ziouc nzuonx I^yipv Deic-Bung.

¹⁴I^saa^laa^en Mienh la'kuqv Zeix Ninh Mbuo Daaih Wuov Dauh yaac ceix hungh dinc. Yu^ndaa Mienh yaac liepc weih wuonv nyei zingh jaa camv jienv faaux, mv baac yie oix bun douz buov ninh mbuo nyei zingh, douz ziouc buov qui ninh mbuo weih wuonv nyei dorngx.