Read Iu Mien Yo^en 1 Bible Online

Yo^en 1 - Iu Mien bible

Yo^en 1

¹Naaiv se Be^tu^en nyei dorn, Yo^en, zipv ZIOUV nyei waac gorngv,

²Meih mbuo mienh gox mienh aah! Muangx naaiv deix waac maah! Yiem deic-bung nyei yietc zungv baeqc fingx oix zuqc baeng m'normh muangx. Yiem meih mbuo ziangh nyei hnoi-nyieqc fai meih mbuo nyei ong-taaix nyei hnoi-nyieqc, maaih naaiv nyungc sic cuotv jiex nyei fai?

³Zorqv naaiv deix sic mbuox meih mbuo nyei fu'jueiv, yaac bun meih mbuo nyei fu'jueiv gorngv mbuox ninh mbuo nyei fu'jueiv, yaac bun ninh mbuo nyei fu'jueiv gorngv mbuox ninh mbuo nyei fun-faqv.

⁴Jopv-nyeic guanh nyanc zengc nyei, domh jopv-nyeic daaih nyanc. Domh jopv-nyeic nyanc zengc nyei, jopv-nyeic ndaix daaih nyanc. Jopv-nyeic ndaix nyanc zengc nyei, jopv-nyeic tiux daaih nyanc.[1]

⁵Diuv nquin nyei mienh aah! Oix zuqc nyie daaih nyiemv. Hopv diuv nyei mienh aah! Oix zuqc nzauh nyiemv, weic zuqc gaam nyei diuv dangx mi'aqv, maiv taux meih mbuo nyei nzuih aqv.

⁶Maaih guanh henv haic nyei fingx,[2] zungv saauv maiv hingh, daaih mborqv yie nyei deic-bung. Wuov fingx nyei nyaah hnangv sienh nyei nyaah, ninh nyei nyaah ngau hnangv sienh nyeiz nyei nyaah ngau.

⁷Ninh baaic waaic yie nyei a'ngunc hmei yaac pai yie nyei ngongh nyorx biouv ndiangx, ninh maeqv nzengc ndiangx-ndopv, maeqv liuz zoi guangc, ndiangx-nquaah mbopv baeqc nyei.

⁸Oix zuqc nzauh nyiemv hnangv dauh maiv bueix jiex dorn nyei sieqv[3] zuqv jienv la'maah ndie-cou, nzauh nyiemv ninh lunx nyei ziangh hoc gorngv ziangh ninh wuov dauh nqox.

⁹Fongc horc nyei laangh ziqc caux ciev ziec nyei ga'naaiv yiem ZIOUV nyei biauv dangx mi'aqv. Fu-sux ZIOUV nyei sai mienh ziouc nzauh nyiemv.

¹⁰Lingh deic huaang nzengc mi'aqv. Ndau mborngx nqaai nyei.[4] Weic zuqc mbiauh zuqc mietc, siang-a'ngunc diuv nqaai mingh, ga'lanv youh yaac dangx mi'aqv.

¹¹Zoux ndeic nyei mienh aah! Oix zuqc nzauh aqv. Fioux a'ngunc hmei nyei mienh aah! Oix zuqc nzauh nyiemv. Weic zuqc mbiauh witv caux mbiauh mbaali, liemh lingh deic nyei gaeng-zuangx zuqc mietc nzengc.

¹²A'ngunc hmei nqaai nzengc. Ngongh nyorx biouv ndiangx nyaux mi'aqv. Ziqc liouh biouv,[5] daau ndiangx caux ba'jaauh ndiangx, caux yietc zungv lomc-huaang nyei ndiangx kou nqaai nzengc. Zuangx mienh nyei njien-youh zitc nzengc mi'aqv.

¹³Sai mienh aah! Meih mbuo oix zuqc zuqv jienv la'maah ndie-cou nzauh nyiemv, meih mbuo yiem ziec-dorngh fu-sux nyei sai mienh aah! Oix zuqc qaqv nyiemv mbui, meih mbuo fu-sux yie nyei Tin-Hungh nyei mienh aah! Daaih maah! Zuqv jienv la'maah ndie-cou jiex muonz, weic zuqc fongc horc nyei laangh ziqc caux ciev ziec nyei ga'naaiv yiem meih mbuo nyei Tin-Hungh nyei biauv dangx mi'aqv.

¹⁴Oix zuqc dingc ziangx norm zei maiv nyanc haaix nyungc nyei hnoi, heuc mienh gapv zunv daaih zoux leiz-baaix. Heuc zuangx mienh gox caux yiem deic-bung nyei yietc zungv baeqc fingx daaih taux ZIOUV, meih mbuo nyei Tin-Hungh, nyei biauv heuc jienv tov ZIOUV.

¹⁵Kouv aqv! Wuov norm hnoi oix taux. ZIOUV nyei hnoi taux fatv aqv, oix yiem Nernh Jiex Wuov Dauh[6] daaih yaac benx norm bun nyungc-nyungc zuqc mietc nyei hnoi.

¹⁶Nyanc hopv dorng jienv yie mbuo nyei m'zing dangx mi'aqv, yiem yie mbuo nyei Tin-Hungh nyei biauv nyei njien-youh caux orn-lorqc jiex mi'aqv, maiv zeiz?

¹⁷Ga'naaiv-nyim yiem ndau-ndiev huv mi'aqv. Siou ga'naaiv nyei dorngx zuqc guangc huaang, lamz yaac huv waaic njiec, weic zuqc mbiauh kou nqaai mi'aqv.

¹⁸Saeng-kuv qaqv heuc, ngongh guanh yaac lunc weic zuqc ninh mbuo maiv maaih miev-ciangv. Ba'gi yungh caux yungh guanh fih hnangv nyei zuqc kouv.

¹⁹O ZIOUV aah! Yie heuc jienv tov meih weic zuqc douz buov mietc deic-bung-huaang nyei miev-ciangv. Douz-mbietc buov nzengc lomc-huaang nyei ndiangx.

²⁰Liemh hieh zoih heuc jienv tov meih, weic zuqc ndoqv nyei wuom nqaai mi'aqv. Douz yaac buov waaic lomc-huaang nyei miev-ciangv.