Read Iu Mien Yo^en 2 Bible Online

Yo^en 2 - Iu Mien bible

Yo^en 2

¹Oix zuqc yiem Si^on biomv jorng, yiem yie nyei cing-nzengc mbong biomv qiex mbui. Guoqv gu'nyuoz yietc zungv mienh oix zuqc sin zinx, weic zuqc ZIOUV nyei hnoi oix taux, zungv taux fatv aqv.

²Benx norm hmuangx nyei hnoi, lungh yiem-yiem wuov, benx norm maaih mbuonx, mapv hmuangx nyei hnoi. Hnangv hmuangx om jienv mbong-ningv gu'nguaaic, maaih yietc domh guanh mienh[7] youc hlo youc henv daaih. Yiem loz-hnoi daaih maiv maaih jiex hnangv naaiv. Nqa'haav hingv taux maanc gouv maanc doic yaac maiv maaih.

³Yiem ninh mbuo nza'hmien maengx maaih douz buov qui, yiem ninh mbuo nqa'haav maengx yaac maaih douz-mbietc zieqc jienv. Ninh mbuo maiv gaengh daaih nyei ziangh hoc deic-bung se hnangv E^nden Huingx. Jiez liuz, nqa'haav benx baaic waaic nyei deic-bung-huaang, maiv maaih haaix nyungc haih biaux duqv ndutv ninh mbuo.

⁴Ninh mbuo nyei fangx zeiv hnangv maaz, ninh mbuo tiux hnangv mborqv jaax nyei maaz tiux.

⁵Ninh mbuo tiux gan mbong-ningv mingh, qiex mbui hnangv mborqv jaax nyei maaz-cie, hnangv douz zieqc mbiauh nqaauv gorn mbeux nyei qiex mbui, yaac hnangv guanh henv haic nyei baeng mbaih jienv cuotv mingh mborqv jaax.

⁶Zuangx fingx yietv buatc, ninh mbuo hnyouv waaic nzengc. Dauh dauh mienh nyei hmien mbienc nzengc.

⁷Ninh mbuo hnangv henv haic nyei baeng tiux, yaac hnangv mborqv jaax nyei baeng biu faaux zingh laatc. Ninh mbuo mingh benx yietc mbaih, yietc mbaih, maiv bun ninh mbuo nyei guanh lunc.

⁸Ninh mbuo laanh maiv nziangc zuqc laanh, gorqv-mienh baeng zaqc yangh hungx jienv wuov ndaangc mingh. Ninh mbuo borngz tong mborqv jaax nyei ga'naaiv, maiv maaih haaix nyungc dangv duqv jienv.

⁹Ninh mbuo borngz bieqc zingh gu'nyuoz, tiux zingh laatc gu'nguaaic. Ninh mbuo nyorng bieqc biauv, nyorng bieqc fong muonh hnangv janx-zaqc.

¹⁰Yiem ninh mbuo nyei wuov ndaangc maengx ndau dongz, aengx ndanc zuqc lungh nyanh nyanh nyei. Mba'hnoi caux hlaax hmuangx mi'aqv, hleix yaac maiv ziux njang.

¹¹ZIOUV yiem ninh nyei jun-baeng guanh nyei wuov ndaangc maengx cuotv qiex mbui. Ninh nyei baeng-guanh za'gengh! hlo haic. Muangx ninh hatc nyei waac wuov deix yaac henv. ZIOUV nyei hnoi za'gengh hlo haic, gamh nziex haic nyei hnoi. Haaix dauh haih diev duqv?

¹²ZIOUV gorngv, “Maiv gunv hnangv naaic, meih mbuo oix zuqc zei maiv nyanc haaix nyungc oix zuqc nzauh, oix zuqc nyiemv jienv longc nzengc hnyouv nzuonx daaih lorz yie.”

¹³Oix zuqc betv meih mbuo nyei hnyouv, maiv zeiz betv meih mbuo nyei lui-houx. Nzuonx daaih lorz ZIOUV, meih mbuo nyei Tin-Hungh, weic zuqc ninh maaih en-zingh yaac korv-lienh mienh. Ninh maiv qiex jiez siepv, ninh za'gengh! ziepc zuoqv nyei hnamv mienh. Ninh yaac goiv hnyouv maiv bun zuqc domh zeqc naanc.

¹⁴Haaix dauh haih hiuv duqv? Nziex ninh haih goiv za'eix ziouc korv-lienh mienh, yaac ceix fuqv bun ninh mbuo maaih fongc horc nyei laangh ziqc caux ciev ziec nyei ga'naaiv bun ZIOUV, meih mbuo nyei Tin-Hungh.

¹⁵Oix zuqc yiem Si^on biomv jorng. Oix zuqc dingc ziangx norm zei maiv nyanc haaix nyungc nyei hnoi, heuc mienh gapv zunv zoux leiz-baaix.

¹⁶Oix zuqc mbuox zuangx baeqc fingx gapv zunv aengx saax gapv zunv nyei mienh cing-nzengc. Bun zuangx mienh gox daaih zunv. Dorh fu'jueiv, liemh hopv jienv nyorx nyei gu'nguaaz gapv zunv daaih. Siang-laangh caux siang-mbuangz oix zuqc cuotv ninh mbuo nyei gen daaih.

¹⁷Bun fu-sux ZIOUV nyei sai mienh yiem capv cuotv zaangc Tin-Hungh nyei biauv nza'hmien maengx caux ziec-dorngh mbu'ndongx nyiemv, aengx gorngv, “ZIOUV aac, tov korv-lienh meih nyei baeqc fingx. Maiv dungx bun meih nzipc nyei buonc zuqc mienh huotv, zuqc maanc guoqv mienh longc zoux gouv gorngv. Yiem maanc fingx mbu'ndongx mienh weic haaix diuc oix zuqc gorngv, ‘Ninh mbuo nyei Tin-Hungh yiem haaix?’+”

¹⁸Wuov zanc ZIOUV oix nzaeng jienv ninh nyei deic-bung, yaac oix korv-lienh ninh nyei baeqc fingx.

¹⁹ZIOUV oix dau ninh nyei baeqc fingx gorngv, “Yie oix bun meih mbuo duqv laangh ziqc, siang-a'ngunc diuv caux ga'lanv youh, meih mbuo ziouc duqv nyanc beuv. Yie maiv aengx bun meih mbuo yiem maanc fingx mbu'ndongx zuqc ninh mbuo huotv.

²⁰“Yie oix zunc yiem baqv bung daaih nyei domh guanh leih meih mbuo go, yaac zunc ninh bieqc norm deic-bung-huaang, deic-bung-haanz. Nza'hmien wuov guanh oix zunc bieqc dong bung nyei koiv,[8] nqa'haav nqaang wuov guanh zunc bieqc fai bung nyei koiv.[9] Zueix nyei qiex ziouc faaux, ninh huv zueix nyei qiex congx faaux lungh, laaix ninh zoux hlo haic nyei domh sic.”[10]

²¹Ndau aah! Maiv dungx gamh nziex. Oix zuqc njien-youh orn-lorqc, weic zuqc ZIOUV zoux hlo haic nyei sic.

²²Lomc-huaang nyei hieh zoih aah! Maiv dungx gamh nziex. Weic zuqc deic-bung-huaang nyei miev-ciangv cuotv miev nyiemz aqv. Ndiangx yaac ziangh biouv. Ngongh nyorx ndiangx caux a'ngunc hmei ziangh biouv gitv.

²³O Si^on nyei mienh aah! Oix zuqc a'hneiv. Oix zuqc weic ZIOUV, meih mbuo nyei Tin-Hungh, njien-youh, weic zuqc ninh ziux ziangh hoc ceix cun-gen mbiungc, ninh bun mbiungc duih njiec, maaih cun-gen caux ciou-gen mbiungc hnangv zinh ndaangc wuov nor.

²⁴Mborqv mbiauh nyei ciangv ziouc maaih mbiauh buangv nzengc. A'ngunc diuv caux ga'lanv youh zungv mienz cuotv siou nyei dorngx.

²⁵“Jopv-nyeic nyanc waaic ga'naaiv nyei hnyangx-soux yie oix jaauv meih mbuo, se domh jopv-nyeic caux jopv-nyeic ndaix, caux jopv-nyeic tiux caux jopv-nyeic guanh, dongh yie fungx daaih bieqc meih mbuo mbu'ndongx nyei domh guanh.[11]

²⁶Meih mbuo duqv nyanc gaux, duqv nyanc beuv nzengc. Meih mbuo ziouc ceng ZIOUV, meih mbuo nyei Tin-Hungh nyei mengh, dongh weic meih mbuo zoux mbuoqc horngh nyei sic wuov dauh. Yie nyei baeqc fingx yietc liuz maiv zuqc aengx baaic hmien.

²⁷Meih mbuo ziouc hiuv duqv yie yiem I^saa^laa^en Mienh mbu'ndongx, yaac hiuv duqv yie se ZIOUV, meih mbuo nyei Tin-Hungh, maiv maaih ganh dauh. Yie nyei baeqc fingx yietc liuz maiv zuqc aengx baaic hmien.

²⁸“Hoz daaih yie oix dox yie nyei Singx Lingh ceix bun maanc mienh. Meih mbuo nyei dorn, meih mbuo nyei sieqv oix tengx yie douc waac. Meih mbuo nyei mienh gox mienh oix mbeix mbeix. Meih mbuo nyei mienh lunx mienh oix buatc hinc yaangh nyei sic.

²⁹Yiem wuov deix hnoi yie yaac oix dox yie nyei Singx Lingh ceix bun liemh m'jangc bou, m'sieqv bou.

³⁰Yie oix yiem lungh yiem ndau zoux cuotv mbuoqc horngh nyei sic, maaih nziaamv, maaih douz, maaih douz-sioux-don.

³¹ZIOUV nyei wuov norm gamh nziex haic nyei domh hnoi maiv gaengh taux, mba'hnoi oix hmuangx mingh, hlaax yaac oix siqv hnangv nziaamv nor.

³²Taux wuov zanc haaix dauh heuc ZIOUV nyei mbuox, wuov dauh ziouc duqv njoux. Yiem Si^on Mbong caux Ye^lu^saa^lem Zingh, ziouc maaih biaux ndutv nyei mienh hnangv ZIOUV gorngv nor. Yiem naaiv deix duqv maengc cuotv nyei mienh mbu'ndongx maaih ZIOUV heuc[12] daaih nyei mienh.