Read Iu Mien Aamotv 2 Bible Online

Aamotv 2 - Iu Mien bible

Aamotv 2

¹ZIOUV hnangv naaiv gorngv, “Weic Mo^apc baamz zuiz buo nzunc, aengx baamz biei nzunc, yie zungv dingc zuiz, maiv guangc, weic zuqc ninh mbuo buov E^ndom Hungh nyei mbungv qui hnangv hui nor.

²Yie oix bun douz njiec Mo^apc, douz ziouc buov qui Ke^li^otc weih wuonv nyei dinc. [9] Mborqv jaax nyei qiex mbui, biomv jorng nyei ziangh hoc, Mo^apc Mienh zungv oix zuqc daic aqv.

³Yie oix mietc gunv deic-bung wuov dauh, yaac oix bun ninh nyei zuangx jien caux jienv zuqc daic.” Naaiv se ZIOUV gorngv nyei waac.

⁴ZIOUV hnangv naaiv gorngv, “Weic Yu^ndaa baamz zuiz buo nzunc, aengx baamz biei nzunc, yie zungv dingc zuiz, maiv guangc. Weic zuqc ninh mbuo guangc ZIOUV nyei leiz-latc, maiv ei jienv ninh nyei leiz. Ninh mbuo gorngv-baeqc nyei sic [10] nduov ninh mbuo mingh dorngc jauv, gan ninh mbuo nyei ong-taaix nyei nyungc zoux.

⁵Yie ziouc bun douz njiec Yu^ndaa, douz ziouc buov qui Ye^lu^saa^lem weih wuonv nyei dinc.”

⁶ZIOUV hnangv naaiv gorngv, “Weic I^saa^laa^en baamz zuiz buo nzunc, aengx baamz biei nzunc, yie zungv dingc zuiz, maiv guangc. Ninh mbuo maaic kuv mienh weic duqv nyaanh, yaac maaic dangx-donx nyei mienh weic duqv yietc laengc heh.

⁷Ninh mbuo caaiv mienh jomc mienh nyei m'nqorngv njiec ga'ndiev ndau nyei nie-mbung, yaac maiv bun zuqc zeix nyei mienh duqv baengh fim nyei jauv. I dorn-diex juangc dauh sieqv hienx, bun yie nyei cing-nzengc mengh maaih uix.

⁸Ninh mbuo yiem norm-norm ziec-dorngh ga'hlen zorqv mienh dorh daaih dorngx nyei lui dimc jienv bueix. Yiem ninh mbuo nyei zienh nyei biauv, ninh mbuo hopv baatc mienh duqv daaih nyei diuv.

⁹“Mv baac yie yiem ninh mbuo nyei nza'hmien mietc Aa^mo^lai Mienh maiv gunv ninh mbuo hlo hlang hnangv si^ndaa zongh ndiangx, yaac henv hnangv mba'ong zuei ndiangx, yie liemh nquaah liemh nzungh [11] mietc nzengc.

¹⁰“Yie yaac dorh meih mbuo yiem I^yipv Deic-Bung cuotv daaih, yaac yiem deic-bung-huaang dorh meih mbuo feix ziepc hnyangx, weic bun meih mbuo duqv nzipc Aa^mo^lai Mienh nyei ndau.

¹¹Yie yiem meih mbuo nyei dorn mbu'ndongx liepc douc waac mienh, aengx yiem meih mbuo nyei mienh lunx mienh liepc Naasi Mienh. O I^saa^laa^en Mienh aac, naaiv se za'gengh zien nyei maiv zeiz?” Naaiv se ZIOUV gorngv nyei waac.

¹²“Mv baac meih mbuo aapv Naasi Mienh hopv a'ngunc diuv, yaac hatc douc waac mienh, ‘Maiv dungx douc waac.’

¹³“Mangc maah! Yie oix zatv meih mbuo njiec meih mbuo yiem nyei dorngx, hnangv mbiauh zeiv dapv buangv cie ngatv jienv zietc nyei.

¹⁴Tiux siepv nyei mienh biaux maiv ndutv. Mienh henv mienh nyei qaqv oix zitc mi'aqv. Mienh henv mienh maiv haih njoux maiv duqv ganh nyei maengc.

¹⁵Nanv juang-zinx nyei mienh souv maiv jienv. Zaux siepv nyei mienh maiv haih njoux ganh, geh maaz nyei mienh yaac maiv haih njoux maiv duqv ganh.

¹⁶Maiv gunv daamv hlo jiex nyei mborqv jaax baeng, taux wuov hnoi ninh mbuo oix zuqc njang sin civ liv nyei biaux.” Naaiv se ZIOUV gorngv nyei waac.