Read Iu Mien Saauv Mienh 10 Bible Online

Saauv Mienh 10 - Iu Mien bible

Saauv Mienh 10

¹ZIOUV gorngv mbuox Mose,

²“Oix zuqc longc nyaanh daav i norm nzatc. Biomv wuov deix i norm nzatc heuc zuangx mienh gapv zunv, yaac biomv heuc suiv ndopv-liuh ciangv.

³Biomv i norm nzatc nyei ziangh hoc, zuangx mienh oix zuqc daaih caux meih gapv zunv yiem Wuic Buangh Ndopv-Liuh nyei gaengh ndaangc.

⁴Se gorngv kungx biomv yietc norm nzatc hnangv, fingx-fingx I^saa^laa^en Mienh nyei bieiv zeiv oix zuqc daaih zunv meih naaiv.

⁵Haiz biomv nzatc nyei qiex mbui, beqv nyei, corng ndopv-liuh yiem dong bung maengx wuov deix oix zuqc cuotv jauv.

⁶Haiz biomv da'nyeic nzunc, corng ndopv-liuh yiem naamh bung maengx wuov deix yaac oix zuqc cuotv jauv. Biomv nzatc nyei qiex mbui, beqv nyei, ziouc zoux jangx-hoc bun hiuv duqv oix zuqc cuotv jauv.

⁷Weic heuc zuangx mienh daaih zunv oix zuqc biomv nzatc, mv baac maiv dungx biomv mbui nyei, beqv nyei, wuov nyungc qiex.

⁸“Se dongh Aalon nyei dorn mbuo wuov deix sai mienh oix zuqc biomv nzatc. Naaiv se meih mbuo doic jiex doic, yietc liuz oix zuqc gan nyei leiz.

⁹Meih mbuo yiem ganh nyei deic-bung yaac maaih win-wangv daaih hoic ziouc cuotv mingh caux ninh mbuo mborqv jaax, oix zuqc longc wuov deix nzatc biomv qiex mbui nyei, beqv nyei. ZIOUV, meih mbuo nyei Tin-Hungh, ziouc jangx meih mbuo, njoux meih mbuo leih ndutv meih mbuo nyei win-wangv.

¹⁰Aengx taux njien-youh nyei ziangh hoc, jiex meih mbuo nyei zipv caux Siang-Hlaax nyei Zipv,[26] dorh ga'naaiv mingh buov ziec, yaac ziec weic jiu tong wuov zanc, oix zuqc biomv naaiv deix nzatc. Naaiv se weic bun meih mbuo nyei ZIOUV jangx zuqc meih mbuo. Yie zoux ZIOUV, meih mbuo nyei Tin-Hungh.”

¹¹Taux da'nyeic hnyangx, nyeic hlaax, nyic ziepc wuov hnoi, yiem Laengz Ngaengc Waac nyei Ndopv-Liuh gu'nguaaic wuov dorv mbuonx faaux.

¹²I^saa^laa^en Mienh ziouc cuotv Sinaai Deic-Bung-Huaang, kang jiex kang mingh taux mbuonx dingh njiec Baalaan Deic-Bung-Huaang.

¹³Ninh mbuo cuotv naaiv da'yietv nzunc jauv ziux ZIOUV longc Mose mbuox nyei waac.

¹⁴Yiem Yu^ndaa Mienh nyei ndopv-liuh ciangv nyei guanh guanh cuotv jauv mingh ndaangc. Ninh mbuo yaac yiem ninh mbuo nyei geh ga'ndiev. Maaih Am^mi^naa^ndapc nyei dorn, Naason, gunv ninh mbuo.

¹⁵Zu^aa nyei dorn, Ne^tan^en, gunv Itc^saax^kaa Fingx wuov guanh.

¹⁶Aengx maaih Helon nyei dorn, E^li^apc, gunv Se^mbu^lun Fingx wuov guanh.

¹⁷Caeqv liuz zaangc Tin-Hungh nyei ndopv-liuh, Geson Mienh caux Me^laa^li Mienh, dongh bienh Ndopv-Liuh wuov deix, ziouc cuotv jauv.

¹⁸Jiex daaih, yiem Lu^mben Mienh nyei ndopv-liuh ciangv nyei guanh guanh cuotv jauv, yaac yiem ninh mbuo nyei geh ga'ndiev. Maaih Se^nde^e nyei dorn, E^li^su, gunv ninh mbuo.

¹⁹Sux^li^satv^ndai nyei dorn, Se^lu^mi^en, gunv Si^me^on Fingx wuov guanh.

²⁰Yaac maaih Nde^u^en nyei dorn, E^li^yaa^saapc, gunv Gaatc Fingx wuov guanh.

²¹Jiex daaih, Ko^haatv Mienh cuotv jauv yaac gaeng jienv cing-nzengc nyei ga'naaiv mingh. Ninh mbuo taux dorngx, zaangc Tin-Hungh nyei ndopv-liuh zungv corng ziangx aqv.

²²Jiex daaih, aengx maaih yiem E^faa^im Mienh nyei ndopv-liuh ciangv nyei guanh guanh cuotv jauv, yaac yiem ninh mbuo nyei geh ga'ndiev. Maaih Am^mi^hutv nyei dorn, E^li^saa^maa, gunv ninh mbuo.

²³Maaih Be^ndaa^su nyei dorn, Gaa^maa^li^en, gunv Maa^natv^se Fingx wuov guanh.

²⁴Yaac maaih Gi^nde^o^ni nyei dorn, Aa^mbi^ndan, gunv Mben^yaa^min Fingx wuov guanh.

²⁵Nqa'haav laai, weic tengx guanh guanh mbungh jienv nqa'haav maengx, maaih yiem Ndaan Mienh nyei ndopv-liuh ciangv nyei guanh guanh cuotv jauv, yaac yiem ninh mbuo nyei geh ga'ndiev. Maaih Am^mi^qatv^ndai nyei dorn, Aa^hi^ye^se, gunv.

²⁶Maaih Okaan nyei dorn, Baa^gi^en, gunv Aa^se Fingx wuov guanh.

²⁷Yaac maaih Enan nyei dorn, Aa^hi^laa, gunv Napv^taa^li Fingx wuov guanh.

²⁸Guanh guanh I^saa^laa^en Mienh cuotv jauv nyei ziangh hoc, oix zuqc hnangv naaiv nor ziux ninh mbuo nyei yietc nyeic mingh.

²⁹Mose caux ninh nyei ong-daa, Mi^ndien Mienh, Le^u^en nyei dorn, Ho^mbapc, gorngv, “Yie mbuo oix cuotv jauv mingh taux ZIOUV gorngv, ‘Yie oix jiu bun meih mbuo’ wuov norm dorngx. Tov caux yie mbuo mingh oc. Yie mbuo ziouc zoux longx bun meih weic zuqc ZIOUV laengz ceix longx nyei ga'naaiv bun I^saa^laa^en Mienh.”

³⁰Ho^mbapc dau, “Yie maiv mingh aqv. Yie oix nzuonx yie ganh nyei deic-bung, yie ganh nyei mienh wuov.”

³¹Mose aengx gorngv, “Tov meih maiv dungx guangc yie mbuo oc. Meih hiuv duqv yiem naaiv deic-bung-huaang yie mbuo oix zuqc corng ndopv-liuh ciangv yiem haaix. Meih haih tengx yie mbuo zoux m'zing.

³²Se gorngv meih caux yie mbuo mingh nor, ZIOUV ceix haaix nyungc longx nyei bun yie mbuo, yie mbuo yaac bun meih caux jienv maaih buonc.”

³³I^saa^laa^en Mienh ziouc cuotv ZIOUV nyei mbong mingh buo hnoi nyei jauv. Wuov deix buo hnoi gu'nyuoz ZIOUV nyei Laengz Ngaengc Waac Faang mingh ndaangc tengx ninh mbuo lorz dorngx hitv.

³⁴Haaix zanc cuotv jauv, lungh hnoi zanc ZIOUV nyei mbuonx yiem ninh mbuo gu'nguaaic.

³⁵Gaeng Laengz Ngaengc Waac Faang cuotv jauv nyei ziangh hoc, Mose gorngv, “O ZIOUV aah! Jiez daaih maah! Tov bun meih nyei win-wangv faatv nzaanx nzengc. Tov bun nzorng meih wuov deix mienh yiem meih nyei nza'hmien biaux nqoi.”

³⁶Laengz Ngaengc Waac Faang haaix zanc dingh njiec, Mose aengx gorngv, “O ZIOUV aac, tov meih nzuonx daaih, caux cin-cin waanc-waanc I^saa^laa^en Mienh yiem.”