Read Iu Mien Saauv Mienh 21 Bible Online

Saauv Mienh 21 - Iu Mien bible

Saauv Mienh 21

¹Kaa^naa^an Mienh, Aalaatv Zingh nyei hungh, dongh yiem Negepc haiz gorngv I^saa^laa^en Mienh gan Aa^taa^lim wuov diuh jauv daaih, ninh ziouc cuotv mingh caux I^saa^laa^en Mienh mborqv jaax, caangv duqv deix ninh mbuo nyei mienh.

²I^saa^laa^en Mienh ziouc caux ZIOUV laengz jiez ngaengc waac. Ninh mbuo gorngv, “Se gorngv ZIOUV zorqv naaiv deix mienh jiu bun yiem yie mbuo nyei buoz-ndiev, yie mbuo ziouc mietc nzengc ninh mbuo nyei zingh aqv.”

³ZIOUV haiz I^saa^laa^en Mienh tov nyei waac ziouc zorqv Kaa^naa^an Mienh jiu bun ninh mbuo. Ninh mbuo ziouc mietc[59] nzengc Kaa^naa^an Mienh caux wuov norm deic-bung nyei zingh yietc zungv. Wuov norm horngc ninh mbuo yaac cuotv mbuox heuc “Homaa.”[60]

⁴I^saa^laa^en Mienh yiem Ho^aa Mbong cuotv jauv yangh mingh Koiv-Siqv wuov diuh jauv weic wingc E^ndom Deic-Bung. Yiem jauv zaangc zuangx mienh haiz maiv noic faanh.

⁵Ninh mbuo ziouc ngopv Tin-Hungh caux Mose, “Meih mbuo weic haaix diuc dorh yie mbuo cuotv I^yipv Deic-Bung bun yie mbuo yiem naaiv deic-bung-huaang daic? Yiem naaiv maiv maaih nyanc nyei ga'naaiv. Maiv maaih wuom hopv. Yie mbuo youx! haic ih zanc nyanc jienv naaiv deix maiv benx nyanc nyei ga'naaiv.”

⁶ZIOUV ziouc bun naang-doqc yiem zuangx baeqc fingx nyei mbu'ndongx. Naang nyorqv mienh ziouc maaih I^saa^laa^en Mienh daic camv haic.

⁷Baeqc fingx daaih lorz Mose yaac gorngv, “Yie mbuo baamz zuiz weic zuqc yie mbuo ngopv ZIOUV yaac ngopv meih. Ih zanc tov tengx daux gaux tov ZIOUV dorh naaiv deix naang cuotv yie mbuo mbu'ndongx mingh.” Mose ziouc weic ninh mbuo daux gaux.

⁸ZIOUV gorngv mbuox Mose, “Oix zuqc zoux diuh naang-doqc an wuov dongc gu'nguaaic. Da'faanh zuqc naang nyorqv nyei mienh mangc yiem dongc wuov diuh dongh siqv naang, wuov dauh ziouc duqv ziangh jienv.”

⁹Mose ziouc longc dongh siqv zoux diuh naang an jienv dongc gu'nguaaic. Haaix dauh zuqc naang-doqc nyorqv yaac mangc naaiv diuh dongh siqv naang, wuov dauh ziouc duqv maengc cuotv.

¹⁰I^saa^laa^en Mienh aengx suiv mingh corng ndopv-liuh ciangv yiem O^mbotc.

¹¹Yiem O^mbotc ninh mbuo cuotv jauv mingh liepc ndopv-liuh ciangv yiem I^ye Aa^mbaa^lim, se yiem deic-bung-huaang, Mo^apc doix-ngaanc, huin mba'hnoi cuotv wuov bung.

¹²Yiem naaic ninh mbuo aengx suiv mingh liepc ciangv yiem Zeletv Horngz.

¹³Ninh mbuo aengx cuotv jauv yiem Aannon Ndaaih hlen baqv bung maengx. Aannon Ndaaih yiem deic-bung-huaang caengx bieqc Aa^mo^lai Mienh nyei deic, yaac zoux Mo^apc Deic-Bung caux Aa^mo^lai Mienh nyei gapv-jaaix.

¹⁴Weic naaiv yiem ZIOUV nyei Mborqv Jaax Sou gorngv, “...Sufaa Deic nyei Waa^hepv Zingh, caux Aannon Ndaaih nyei yietc zungv horngz,

¹⁵caux caengx faaux taux Aan Zingh wuov deix horngz nyei mbaiv, yaac nzomz mingh Mo^apc Deic-Bung nyei gapv-jaaix.”

¹⁶I^saa^laa^en Mienh yiem naaic aengx mingh douc taux Mbe^e. Yiem Mbe^e maaih norm wuom-kuotv, dongh zinh ndaangc ZIOUV mbuox Mose, “Heuc zuangx baeqc fingx daaih zunv, yie ziouc bun wuom ninh mbuo hopv,” wuov norm dorngx.

¹⁷Wuov zanc I^saa^laa^en Mienh baaux naaiv diuh nzung, “Wuom-kuotv aac, bun wuom baetv cuotv daaih, yie mbuo lomh nzoih baaux nzung houc.

¹⁸Se bieiv zeiv wetv nyei wuom-kuotv, baeqc fingx nyei jien long cuotv daaih nyei, longc hungh biaav caux biaav-mbiaac long.” Ninh mbuo aengx cuotv deic-bung-huaang mingh taux Matv^taa^naa,

¹⁹yiem Matv^taa^naa mingh taux Naa^haa^li^en Horngc. Yiem Naa^haa^li^en aengx suiv mingh taux Mbaamotv.

²⁰Cuotv Mbaamotv ninh mbuo aengx mingh Mo^apc Deic nyei horngz, se mangc njiec deic-bung-huaang nyei Bitc^gaa Mbong-ningv ga'hlen.

²¹I^saa^laa^en Mienh paaiv mienh mingh mbuox Aa^mo^lai Mienh nyei hungh, Si^honx.

²²“Tov bun yie mbuo jiex meih nyei deic-bung oc. Yie mbuo maiv yangh pien bieqc ndeic fai a'ngunc huingx, yaac maiv hopv haaix norm wuom-kuotv nyei wuom. Yie mbuo kungx gan hungh diex nyei domh jauv taux jiex jomc meih nyei deic-bung hnangv.”

²³Mv baac Si^honx Hungh maiv kangv bun I^saa^laa^en Mienh jiex ninh nyei deic. Ninh heuc ninh nyei zuangx baeng daaih zunv aengx cuotv mingh deic-bung-huaang mborqv I^saa^laa^en Mienh. Ninh taux Yaa^haatv ziouc caux I^saa^laa^en Mienh mborqv jaax.

²⁴Mv baac I^saa^laa^en Mienh longc nzuqc ndaauv daix ninh, aengx caangv ninh nyei deic-bung yiem Aannon Ndaaih taux Yapv^mborkc Ndaaih, mv baac kungx caangv taux Ammon Mienh nyei gapv-jaaix hlen, weic zuqc Ammon Mienh nyei gapv-jaaix se wuonv haic.

²⁵I^saa^laa^en Mienh caangv nzengc Aa^mo^lai Mienh nyei norm-norm zingh, liemh Hetv^mbon Zingh caux weih gormx nyei fiuv-laangz, ziouc bieqc mingh yiem jienv.

²⁶Hetv^mbon zoux Aa^mo^lai Mienh nyei Si^honx Hungh nyei domh zingh. Si^honx Hungh caux zinh ndaangc wuov dauh Mo^apc Mienh nyei hungh mborqv jaax caangv nzengc yiem Mo^apc Hungh nyei buoz-ndiev nyei yietc zungv deic-bung taux Aannon Ndaaih.

²⁷Weic naaiv zoc nzung nyei mienh gorngv, “Daaih taux Hetv^mbon Zingh, bun naaiv norm zingh aengx duqv liepc jiez, bun Si^honx Hungh nyei domh zingh aengx ceix jiez daaih.

²⁸Maaih douz yiem Hetv^mbon Zingh cuotv, douz-mbietc yiem Si^honx nyei zingh njopc daaih buov qui Mo^apc Deic-Bung nyei Aan Zingh, caux huing Aannon Ndaaih geh zorng nyei baeqc fingx.

²⁹O Mo^apc Mienh aac, meih zuqc kouv aqv. O zaangc Kemotv nyei mienh aac, meih mbuo zuqc mietc aav loh! Kemotv zienh bun ninh nyei dorn zuqc benx biaux sic nyei mienh, yaac bun ninh nyei sieqv zuqc caangv mingh jiu bun Aa^mo^lai Mienh nyei Si^honx Hungh caangv.

³⁰Mv baac yie mbuo bun ninh mbuo nyei zeiv-fun zuqc mietc, yiem Hetv^mbon Zingh zuqc mietc taux Ndi^mbon. Yie mbuo baaic nzengc ninh mbuo taux Nofaa, se taux Me^nde^mbaa wuov norm dorngx.”

³¹I^saa^laa^en Mienh ziouc yiem njiec Aa^mo^lai Mienh nyei deic-bung.

³²Mose paaiv mienh mingh zaah liuz Yaase Zingh, nqa'haav I^saa^laa^ en Mienh mingh mborqv, aengx zorqv Yaase Zingh caux huing nzuonx nyei fiuv-laangz yaac zunc Aa^mo^lai Mienh cuotv nzengc.

³³Jiex daaih, I^saa^laa^en Mienh huin mingh hungx jienv Mbaasaan Deic-Bung mingh. Mbaasaan nyei Okc Hungh caux ninh nyei zuangx baeng ziouc cuotv daaih taux E^nden^i Zingh caux ninh mbuo mborqv jaax.

³⁴ZIOUV gorngv mbuox Mose, “Maiv dungx gamh nziex ninh, weic zuqc yie zorqv ninh caux ninh nyei zuangx baeng, caux ninh nyei deic-bung, jiu yiem meih nyei buoz-ndiev. Oix zuqc zoux bun ninh hnangv meih mbuo zoux bun yiem Hetv^mbon Zingh, wuov dauh Aa^mo^lai Mienh nyei Si^honx Hungh wuov nor.”

³⁵Hnangv naaic, I^saa^laa^en Mienh daix Okc Hungh, caux ninh nyei dorn mbuo caux ninh nyei zuangx baeng. Yietc dauh yaac maiv liouh. Ninh mbuo ziouc zorqv ninh nyei deic-bung benx ninh mbuo nyei buonc.