Read Iu Mien Saauv Mienh 3 Bible Online

Saauv Mienh 3 - Iu Mien bible

Saauv Mienh 3

¹Naaiv se Aalon caux Mose nyei ziex doic mienh, doix Mose yiem Sinaai Mbong, ZIOUV caux ninh gorngv waac nyei ziangh hoc.

²Aalon nyei dorn nyei mbuox maaih hnangv naaiv. Dorn-hlo heuc Naa^ndapc yaac maaih Aa^mbi^hu, E^le^aa^saa, caux I^taa^maa.

³Naaiv se Aalon nyei dorn nyei mbuox, dongh Mose longc youh orn daaih zoux sai mienh, paaiv zoux sai mienh nyei gong.

⁴Mv baac yiem Sinaai Deic-Bung-Huaang wuov zanc, Naa^ndapc caux Aa^mbi^hu longc maiv maaih leiz longc nyei douz ziec bun ZIOUV ziouc zuqc yiem ZIOUV nyei nza'hmien daic mi'aqv. Ninh mbuo maiv maaih dorn-jueiv. Hnangv naaic, Aalon ziangh jienv nyei ziangh hoc, kungx maaih E^le^aa^saa caux I^taa^maa zoux sai mienh nyei gong hnangv.

⁵ZIOUV aengx gorngv mbuox Mose,

⁶“Oix zuqc dorh Lewi Fingx daaih jiu bun Aalon sai mienh weic tengx ninh.

⁷Ninh mbuo oix zuqc yiem Wuic Buangh nyei Ndopv-Liuh weic Aalon yaac weic zuangx baeqc fingx zoux ndopv-liuh nyei gong.

⁸Ninh mbuo oix zuqc goux Wuic Buangh Ndopv-Liuh nyei yietc zungv jaa-sic yaac weic I^saa^laa^en Mienh zoux ndopv-liuh nyei gong.

⁹Oix zuqc zorqv Lewi Mienh jiu bun Aalon caux ninh nyei dorn mbuo. Yiem I^saa^laa^en Mienh mbu'ndongx se dongh naaiv deix oix zuqc jiu nzengc bun Aalon.

¹⁰Oix zuqc orn Aalon caux ninh nyei dorn mbuo zoux sai mienh nyei gong. Cuotv liuz naaiv deix, maaih haaix dauh mingh fatv singx dinc, wuov dauh oix zuqc daix daic.”

¹¹ZIOUV yaac gorngv mbuox Mose,

¹²“Yiem I^saa^laa^en nyei zuangx mienh gu'nyuoz yie ginv cuotv Lewi Mienh weic div I^saa^laa^en nyei yietc zungv m'sieqv dorn yungz nyei daauh dauh dorn. Lewi Mienh benx yie nyei,

¹³weic zuqc dauh dauh dorn-la'gauv benx yie nyei. Yiem I^yipv Deic-Bung yie daix mouz dauh dorn-la'gauv wuov zanc, yie ginv cuotv liemh mienh liemh saeng-kuv nyei daauh dauh dorn benx nzengc yie nyei. Ninh mbuo oix zuqc benx yie nyei. Yie se ZIOUV. ”

¹⁴Yiem Sinaai Deic-Bung-Huaang, ZIOUV gorngv mbuox Mose,

¹⁵“Oix zuqc saauv Lewi Mienh ziux ninh mbuo nyei bungh buonc, ziux ninh mbuo nyei mienh buonc. Da'faanh buangv hlaax faaux maengx nyei m'jangc dorn, oix zuqc saauv nzengc.”

¹⁶Mose ziouc ei jienv ZIOUV nyei waac saauv ninh mbuo, hnangv ZIOUV paaiv ninh zoux nor.

¹⁷Naaiv se Lewi nyei dorn nyei mbuox. Maaih Geson, Ko^haatv caux Me^laa^li.

¹⁸Geson nyei dorn ziux ninh mbuo nyei bungh buonc maaih Lipv^ni caux Si^me^i Mienh.

¹⁹Ko^haatv nyei dorn ziux ninh mbuo nyei bungh buonc maaih Amlaam, Itc^haa, He^mbo^lon caux Utc^si^en Mienh.

²⁰Me^laa^li nyei dorn ziux ninh mbuo nyei bungh buonc benx Maali caux Musi Mienh. Naaiv se Lewi Fingx ziux ninh mbuo nyei bungh buonc.

²¹Geson nyei bungh buonc se Lipv^ni caux Si^me^i Mienh. Naaiv se Geson Mienh nyei bungh buonc.

²²Yiem yietc hlaax faaux maengx nyei m'jangc dorn yietc zungv maaih siec cin hmz baeqv dauh.

²³Geson Mienh nyei bungh buonc oix zuqc corng ganh nyei ndopv-liuh yiem Wuic Buangh nyei Ndopv-Liuh nqa'haav maengx, fai bung wuov.

²⁴Laa^en nyei dorn, E^li^yaa^saapc, zoux Geson Mienh nyei bungh buonc bieiv zeiv.

²⁵Yiem Wuic Buangh Ndopv-Liuh, Geson Mienh oix zuqc goux gomv ndopv-liuh gu'nyuoz wuov yiemc caux ga'nyiec wuov yiemc, aengx goux gomv gu'nguaaic nyei ndopv, bieqc Wuic Buangh Ndopv-Liuh nyei mbaeqc gaengh ndie,

²⁶weih gormx ndopv-liuh caux ziec-dorngh mbaeqc laatc caux mbaeqc laatc gaengh nyei ndie. Liemh hlaang aengx caux naaiv buoqv ga'naaiv yietc zungv se ninh mbuo oix zuqc liuc leiz.

²⁷Ko^haatv nyei bungh buonc maaih Amlaam, Itc^haa, He^mbo^lon caux Utc^si^en Mienh. Naaiv se Ko^haatv Mienh nyei bungh buonc.

²⁸Yiem yietc hlaax faaux maengx nyei yietc zungv m'jangc dorn maaih hietc cin luoqc baeqv dauh. Ko^haatv Mienh nyei gong se oix zuqc goux singx dinc.

²⁹Ko^haatv Mienh nyei bungh buonc oix zuqc corng ganh nyei ndopv-liuh yiem Wuic Buangh Ndopv-Liuh nyei naamh bung maengx.

³⁰Utc^si^en nyei dorn, E^li^saa^faan, zoux Ko^haatv Mienh nyei bungh buonc bieiv zeiv.

³¹Ninh mbuo oix zuqc goux Laengz Ngaengc Waac Faang, dieh, dang-jaax, ziec-dorngh caux buov hung dieh, aengx caux yietc zungv yiem singx dinc longc nyei jaa-sic, liemh mbaeqc gaengh ndie. Da'faanh naaiv buoqv ga'naaiv qiemx longc nyei yietc zungv se yiem ninh mbuo liuc leiz nzengc.

³²Maaih Aalon sai mienh nyei dorn, E^le^aa^saa, zoux Lewi Mienh gauh hlo jiex nyei bieiv zeiv yaac gunv goux singx dinc wuov deix mienh.

³³Me^laa^li nyei bungh buonc maaih Maali caux Musi Mienh. Naaiv se Me^laa^li Mienh nyei bungh buonc.

³⁴Yiem yietc hlaax faaux maengx nyei m'jangc dorn yietc zungv maaih juqv cin nyic baeqv dauh.

³⁵Aa^mbi^haa^in nyei dorn, Sux^li^en, zoux Me^laa^li Mienh nyei bungh buonc bieiv zeiv. Ninh mbuo oix zuqc corng ganh nyei ndopv-liuh yiem Wuic Buangh Ndopv-Liuh nyei baqv bung maengx.

³⁶Paaiv bun Me^laa^li Mienh zoux nyei gong se oix zuqc goux ndopv-liuh nyei qorng, gungh gangc ndiangx, dongc, taapv, caux yietc zungv zoux qorng nyei ga'naaiv. Da'faanh naaiv buoqv ga'naaiv qiemx longc nyei nyungc-nyungc se yiem ninh mbuo liuc leiz.

³⁷Liemh laatc dongc, dongc nyei taapv, mborng ndau corng laatc ndie nyei dongc caux hlaang yaac oix zuqc goux.

³⁸Mose caux Aalon caux Aalon nyei dorn mbuo oix zuqc corng ganh nyei ndopv-liuh yiem zaangc Tin-Hungh nyei ndopv-liuh nyei dong bung maengx, mba'hnoi cuotv wuov bung, se yiem Wuic Buangh nyei Ndopv-Liuh nza'hmien. Ninh mbuo oix zuqc weic I^saa^laa^en Mienh goux singx dinc. Cuotv liuz naaiv deix, haaix dauh mingh fatv singx dinc, oix zuqc daix daic.

³⁹Mose caux Aalon ei ZIOUV paaiv nyei waac saauv Lewi Mienh. Ziux bungh buonc dauh dauh buangv hlaax faaux maengx nyei m'jangc dorn yietc zungv maaih i waanc i cin dauh.

⁴⁰ZIOUV gorngv mbuox Mose, “Oix zuqc saauv nzengc I^saa^laa^en Mienh yungz daaih buangv hlaax faaux maengx nyei daauh dauh dorn. Oix zuqc fiev jienv mouz dauh nyei mbuox.

⁴¹Meih mbuo oix zuqc ginv Lewi Mienh bun yie weic div I^saa^laa^en Mienh yungz nyei yietc zungv daauh dauh dorn. Lewi Mienh nyei saeng-kuv yaac oix zuqc longc div I^saa^laa^en Mienh nyei yietc zungv saeng-kuv njiec nyei daauh toi dorn. Yie se ZIOUV. ”

⁴²Mose ziouc ziux ZIOUV paaiv nyei waac saauv nzengc I^saa^laa^en nyei zuangx mienh yungz nyei daauh dauh dorn.

⁴³Ziux faaux mbuox nyei soux mouc, maaih i waanc i cin nyic baeqv cietv ziepc faam dauh yietc hlaax faaux maengx nyei daauh dauh dorn.

⁴⁴ZIOUV aengx gorngv mbuox Mose,

⁴⁵“Oix zuqc zorqv Lewi Mienh fungx bun yie div I^saa^laa^en Mienh yungz nyei yietc zungv dorn-la'gauv, yaac longc Lewi Mienh nyei saeng-kuv div I^saa^laa^en Mienh nyei saeng-kuv. Lewi Mienh oix zuqc benx yie nyei. Yie se ZIOUV.

⁴⁶I^saa^laa^en Mienh nyei dorn-la'gauv gauh camv Lewi Mienh nyei nyic baeqv cietv ziepc faam dauh. Zengc njiec naaiv deix, oix zuqc zuoqc.

⁴⁷Yietc dauh oix zuqc cuotv yietc lungz faam-zinh[5] nyaanh ziux singx dinc dingc daaih nyei hniev-daauh.

⁴⁸Zuoqc zengc njiec naaiv deix mienh nyei nyaanh oix zuqc jiu bun Aalon caux ninh nyei dorn mbuo.”

⁴⁹Mose ziouc siou dongh Lewi Mienh div liuz zengc njiec wuov deix I^saa^laa^en Mienh nyei zuoqc mienh nyaanh.

⁵⁰Yiem I^saa^laa^en Mienh nyei dorn-la'gauv ninh duqv nduoh joih nyic ziepc hmz lungz[6] nyaanh ziux singx dinc dingc daaih nyei hniev-daauh.

⁵¹Mose ziouc ziux ZIOUV paaiv nyei waac zorqv naaiv deix zuoqc mienh nyei nyaanh fungx bun Aalon caux ninh nyei dorn mbuo.