Read Iu Mien Saauv Mienh 5 Bible Online

Saauv Mienh 5 - Iu Mien bible

Saauv Mienh 5

¹ZIOUV mbuox Mose,

²“Oix zuqc mbuox I^saa^laa^en Mienh hatc butv gomh huv baengc nyei mienh caux sin zaangc cuotv maiv horpc zuqc cuotv nyei haaix nyungc wuom, aengx caux laaix muoqv zuqc janx-daic maaih uix nyei mienh, cuotv ga'nyiec ziqc ndopv-liuh ciangv.

³Maiv gunv m'jangc m'sieqv, oix zuqc hatc cuotv ga'nyiec ziqc ndopv-liuh ciangv weic maiv bun ninh mbuo nyei ciangv, dongh yie yiem ninh mbuo mbu'ndongx nyei dorngx, maaih uix.”

⁴I^saa^laa^en Mienh ziouc hnangv naaiv nor zoux, hatc ninh mbuo cuotv ga'nyiec ziqc ndopv-liuh ciangv. ZIOUV hnangv haaix nor mbuox Mose, I^saa^laa^en Mienh ziouc hnangv wuov nor zoux.

⁵ZIOUV gorngv mbuox Mose,

⁶“Oix zuqc mbuox I^saa^laa^en Mienh, maiv gunv m'jangc m'sieqv, haaix dauh zoux haaix nyungc dorngc haaix dauh,[11] wuov dauh maiv ziepc zuoqv nyei zoux bun ZIOUV, ninh ziouc dorngc mi'aqv.

⁷Ninh oix zuqc nyiemc ninh zoux dorngc nyei zuiz, yaac oix zuqc zorqv ninh zoux dorngc nyei yietc zungv tuix nzuonx bun ninh dorngc wuov dauh, aengx buih biaa gouv nyei yietc gouv.

⁸Mv baac se gorngv zuqc mienh zoux dorngc wuov dauh daic yaac maiv maaih cien-ceqv laengz wuov deix buih nyei ga'naaiv, oix zuqc bun sai mienh weih fungx bun ZIOUV. Liemh weic fiqv ninh nyei zuiz wuov dauh ba'gi yungh gouv oix zuqc bun.

⁹I^saa^laa^en Mienh dorh daaih fungx bun sai mienh nyei yietc zungv cing-nzengc nyei ga'naaiv ziouc benx sai mienh nyei.

¹⁰Gorqv-mienh nyei cing-nzengc ga'naaiv se gorqv-mienh ganh nyei, mv baac ninh fungx haaix nyungc bun sai mienh, wuov nyungc ziouc benx sai mienh nyei.”

¹¹ZIOUV aengx gorngv mbuox Mose,

¹²“Oix zuqc mbuox I^saa^laa^en Mienh, ‘Se gorngv haaix dauh mienh nyei auv yangh pien zaux-mbiec, maiv ziepc zuoqv nyei zoux bun ninh nyei nqox,

¹³ziouc caux ganh dauh m'jangc dorn bueix beic ninh nyei nqox, maiv gunv ninh zoux maiv cing-nzengc, maiv maaih haaix dauh zoux zorng-zengx, (weic zuqc bueix nyei ziangh hoc mienh zorqv maiv duqv),

¹⁴yaac se gorngv nqox nzaeng-buang, laaic ninh nyei auv maaih jauv, auv yaac za'gengh zoux maiv cing-nzengc, oix zuqc dorh ninh nyei auv mingh sai mienh wuov. Fai se gorngv nqox nzaeng-buang ninh nyei auv, laaic ninh nyei auv maaih jauv, maiv gunv ninh nyei auv maiv maaih, ninh cing-nzengc nyei,

¹⁵nqox oix zuqc dorh ninh nyei auv mingh sai mienh wuov. Yaac oix zuqc weic ninh nyei auv dorh jienv i morqv[12] mbaali mbiauh mbuonv. Yaac maiv dungx dox ga'lanv youh, maiv dungx zorqv hung an gu'nguaaic, weic zuqc naaiv deix ziec nyei ga'naaiv se weic nzaeng-buang nyei jauv, weic jangx mienh zoux dorngc nyei sic.

¹⁶“+‘Sai mienh ziouc dorh naaiv dauh m'sieqv dorn daaih souv jienv ZIOUV nyei nza'hmien,

¹⁷ziouc zorqv deix cing-nzengc nyei wuom daaih dapv nie-baengh, aengx nyau deix zaangc Tin-Hungh nyei ndopv-liuh nyei ndau nyei nie-mbung dapv jienv.

¹⁸Sai mienh ziouc bun wuov dauh m'sieqv dorn souv jienv ZIOUV nyei nza'hmien yaac jaiv nqoi ninh nyei mba'biei, aengx zorqv weic nzaeng-buang nyei jauv, weic jangx mienh zoux dorngc nyei sic wuov deix ziec nyei mbuonv, bun ninh bouh jienv. Sai mienh ganh bouh jienv houv mienh nyei wuom-im,

¹⁹ziouc heuc wuov dauh m'sieqv dorn laengz jiez ngaengc waac. Sai mienh gorngv mbuox ninh, “Se gorngv maiv maaih ganh dauh m'jangc dorn caux meih bueix, meih yaac maiv yangh pien zaux-mbiec, yiem jienv nqox nyei buoz-ndiev maiv zoux maiv cing-nzengc nyei sic, tov bun naaiv deix houv nyei wuom hoic maiv zuqc meih.

²⁰Mv baac se gorngv meih yiem nqox nyei buoz-ndiev aengx yangh pien zaux-mbiec ziouc zoux maiv cing-nzengc, caux ganh dauh m'jangc dorn bueix, maiv zeiz ganh nyei nqox,”

²¹(taux naaiv norm dorngx, sai mienh bun naaiv dauh m'sieqv dorn ziux ninh laengz ngaengc waac zuqc houv. Sai mienh aengx gorngv), “tov ZIOUV bun meih nyei ga'sie omx, camh zuih jaic, nyaux nzengc,[13] ziouc yiem meih nyei mienh mbu'ndongx zoux zuqc mienh houv, zuqc mienh zioux nyei mienh.

²²Tov bun naaiv deix houv mienh nyei wuom-im bieqc meih nyei ga'sie, bun meih nyei ga'sie omx, camh zuih jaic, nyaux nzengc.” “+‘Wuov dauh m'sieqv dorn oix zuqc dau, “Aamen. Aamen.”

²³“+‘Sai mienh ziouc fiev naaiv deix houv nyei waac yiem sou-njunc, aengx nzaaux naaiv deix nzaangc bieqc wuov deix wuom-im.

²⁴Ninh ziouc bun wuov dauh m'sieqv dorn hopv naaiv houv nyei wuom-im. Wuom ziouc bieqc ninh nyei sin hoic ninh diev kouv.

²⁵Sai mienh aengx zorqv yiem m'sieqv dorn nyei buoz weic nzaeng-buang nyei sic fongc horc nyei mbuonv, yiem ZIOUV nyei nza'hmien bouh jienv cunv ging fongc horc liuz, ziouc dorh mingh taux ziec-dorngh.

²⁶Ninh aengx zorqv yietc nyau weic jangx mienh zoux dorngc nyei sic ziec nyei mbuonv hietv ziec-dorngh buov. Buov liuz, ziouc heuc wuov dauh m'sieqv dorn hopv naaiv deix wuom.

²⁷Se gorngv ninh zoux maiv cing-nzengc nyei sic, maiv ziepc zuoqv zoux bun ninh nyei nqox, yangh pien zaux-mbiec, ninh hopv liuz naaiv deix wuom bieqc mingh, ninh ziouc zuqc diev kouv. Ninh nyei ga'sie omx, camh zuih jaic, nyaux nzengc.[14] Ninh yaac yiem ninh nyei mienh mbu'ndongx zuqc mienh zioux, zuqc mienh houv.

²⁸Mv baac se gorngv wuov dauh mienh cing-nzengc nyei, maiv yangh pien zaux-mbiec, ziouc bun cing ninh maiv dorngc, yaac haih maaih gu'nguaaz nyei.

²⁹“+‘Naaiv se nzaeng-buang nyei leiz-latc, dongh m'sieqv dorn yangh pien zaux-mbiec, yiem nqox nyei buoz-ndiev mingh zoux maiv cing-nzengc nyei sic.

³⁰Fai mienh laaic ninh nyei auv maaih jauv ziouc hanc ninh nyei auv. Sai mienh oix zuqc bun wuov dauh m'sieqv dorn yiem ZIOUV nyei nza'hmien yaac ei jienv naaiv nyungc leiz-latc nyei diuh diuh leiz zoux.

³¹Nqox yaac maiv maaih zuiz aqv. Mv baac wuov dauh m'sieqv dorn ziux ninh zoux nyei, oix zuqc dingc zuiz.’+”