Read Iu Mien Mikaa 5 Bible Online

Mikaa 5 - Iu Mien bible

Mikaa 5

¹Ye^lu^saa^lem Mienh aah! Diuc nzoih meih nyei jun-baeng,[20] maaih win-wangv weih jienv yie mbuo. Ninh mbuo longc biaav mborqv I^saa^laa^en nyei bieiv zeiv nyei kamx-bui.

²ZIOUV gorngv, “Mbetc^le^hem E^faa^taa aac, yiem Yu^ndaa nyei bungh buonc mbu'ndongx meih se yietc norm faix nyei mungv, mv baac yie oix bun dauh yiem meih cuotv daaih weic yie, ninh oix gunv I^saa^laa^en. Ninh nyei gorn-nyuonh se loz-hnoi, se yiem loz-hnoi dongh cor wuov daaih.”

³Hnangv naaic ZIOUV oix zorqv ninh nyei baeqc fingx jiu bun ninh mbuo nyei win-wangv, zuov taux mun gu'nguaaz wuov dauh m'sieqv dorn yungz ninh nyei dorn. Taux wuov zanc ninh nyei dorn zengc njiec nyei gorx-youz duqv nzuonx daaih caux I^saa^laa^en Mienh gapv jienv yiem.

⁴Ninh daaih nyei ziangh hoc ninh kaux ZIOUV nyei qaqv gunv ninh nyei baeqc fingx, hnangv mangc yungh nyei mienh goux ninh nyei ba'gi yungh nor. Ninh kaux ZIOUV, ninh nyei Tin-Hungh, njang-laangc nyei mengh, ninh mbuo ziouc duqv yiem longx, weic ih zanc yiem jomc lungh ndiev nyei mienh nyiemc ninh zoux hlo.

⁵Ninh oix dorh baengh orn nyei jauv daaih. Atc^si^lie Mienh bieqc yie mbuo nyei deic-bung nyei ziangh hoc, yaac caaiv jienv yie mbuo nyei ndau, yie mbuo ziouc paaiv siec dauh goux ba'gi yungh nyei mienh caux hietc dauh bieiv zeiv mborqv ninh mbuo.

⁶Ninh mbuo ziouc longc nzuqc ndaauv gunv Atc^si^lie Guoqv, longc baeng cuotv daaih nyei nzuqc ndaauv gunv Nimlotv. Atc^si^lie Mienh bieqc yie mbuo nyei deic-bung, caaiv yie mbuo nyei gapv-jaaix gu'nyuoz nyei ziangh hoc, ninh mbuo[21] oix njoux yie mbuo biaux ndutv Atc^si^lie Mienh nyei buoz-ndiev.

⁷Yaakopv nyei zeiv-fun zengc njiec nyei mienh oix zuqc yiem camv-fingx mienh mbu'ndongx, hnangv ZIOUV bun daaih nyei mbiungc-suiv, hnangv duih mbiungc-mbuonv liemh miev, maiv zuov mienh, yaac maiv zuov baamh mienh.

⁸Yaakopv zengc njiec nyei mienh ziouc zuqc yiem camv-guoqv mienh mbu'ndongx, yiem camv-fingx mienh gu'nyuoz, hnangv sienh yiem lomc nyei hieh zoih mbu'ndongx, hnangv sienh lunx yiem ba'gi yungh guanh gu'nyuoz. Jiex mingh nyei ziangh hoc ziouc caaiv njiec betv huv yaac maiv maaih mienh njoux.

⁹I^saa^laa^en Mienh ziouc duqv hingh jiex win-wangv,[22] meih mbuo nyei yietc zungv win-wangv oix zuqc pai guangc.

¹⁰ZIOUV gorngv, “Taux wuov hnoi, “Yie oix bun yiem meih mbuo mbu'ndongx nyei maaz zutc nzengc, yaac mietc meih mbuo mborqv jaax nyei maaz-cie.

¹¹Yie oix mietc nzengc meih mbuo nyei guoqv gu'nyuoz nyei zingh, yaac caeqv nzengc meih mbuo yietc zungv wuonv nyei dorngx.

¹²Yie oix mietc nzengc yietc zungv zoux faatv nyei mienh, meih mbuo ziouc maiv maaih mangc maengc mienh aqv.

¹³Yie oix mietc meih mbuo zuqc daaih nyei miuc-fangx caux yiem meih mbuo mbu'ndongx nyei la'bieiv-dongc. Jiex mingh meih mbuo maiv duqv aengx gueic njiec baaix ganh nyei buoz zoux daaih nyei ga'naaiv.

¹⁴Yie oix caeqv nzengc yiem meih mbuo nyei guoqv nyei Aa^se^laa zienh nyeiz nyei fangx, aengx mietc meih mbuo nyei zingh.

¹⁵Yie oix qiex jiez, nouz haic, jaauv win, bun maiv muangx yie wuov deix maanc guoqv mienh.