Read Iu Mien Se^kaa^li^yaa 10 Bible Online

Se^kaa^li^yaa 10 - Iu Mien bible

Se^kaa^li^yaa 10

¹Yiem cun gueix meih mbuo oix zuqc gan ZIOUV tov mbiungc, oix zuqc tov zeix mbuonx-jieqv nyei ZIOUV. Ninh bun mbiungc-gorng duih njiec, bun dauh dauh mienh nyei lingh deic cuotv gaeng-zuangx.

²Weic zuqc an biauv nyei miuc-fangx dau maiv lamh longc nyei jauv. Mbouv guaax mienh gorngv gorngv-baeqc nyei waac. Mbeix mbeix mienh gorngv nyei mbeix se jaav nyei, ninh mbuo orn mienh nyei hnyouv benx kungx-waac. Weic naaiv baeqc fingx nzaanx hnangv ba'gi yungh, yaac zuqc kouv weic zuqc maiv maaih bieiv zeiv goux.[51]

³ZIOUV gorngv, “Yie qiex jiez! haic gunv baeqc fingx wuov deix,[52] yie oix dingc bieiv zeiv nyei zuiz.[53] Weic zuqc Nernh Jiex nyei ZIOUV goux ninh nyei mienh,[54] se Yu^ndaa nyei zeiv-fun, yaac bun ninh mbuo hnangv yie nyei mborqv jaax henv nyei maaz.

⁴An biauv-gorqv longc jienv jiex nyei la'bieiv oix yiem Yu^ndaa cuotv. Mborng ndau corng ndopv-liuh nyei dongc yaac oix yiem ninh cuotv, mborqv jaax nyei juang-zinx oix yiem ninh cuotv, yietc zungv zoux bieiv nyei mienh oix yiem ninh cuotv.

⁵Ninh mbuo lomh nzoih oix hnangv mborqv jaax nyei mienh henv mienh caaiv win-wangv njiec[55] jaai-horngc nyei wuom-bamc. Ninh mbuo mborqv jaax weic zuqc ZIOUV caux ninh mbuo yiem, ninh mbuo ziouc mborqv hingh win-wangv nyei geh maaz baeng.

⁶Yie oix tengx Yu^ndaa nyei zeiv-fun henv, yaac oix njoux Yosepv nyei zeiv-fun. Yie oix dorh ninh mbuo nzuonx weic zuqc yie korv-lienh ninh mbuo, ninh mbuo ziouc hnangv yie maiv guangc ninh mbuo nor, weic zuqc yie se ZIOUV, ninh mbuo nyei Tin-Hungh. Yie oix dau ninh mbuo.

⁷E^faa^im Mienh oix hnangv henv haic nyei baeng, ninh mbuo nyei hnyouv orn-lorqc hnangv hopv a'ngunc diuv. Ninh mbuo nyei naamh nyouz duqv buatc ziouc orn-lorqc, ninh mbuo nyei hnyouv yaac a'hneiv haic ZIOUV.

⁸Yie oix heuc[56] ninh mbuo yaac siou ninh mbuo zunv, weic zuqc yie zuoqc ninh mbuo nzuonx. Ninh mbuo nyei mienh soux ziouc jaa ndongc zinh ndaangc camv.

⁹Maiv gunv yie bun ninh mbuo faatv nzaanx yiem ziex guoqv mbu'ndongx, mv baac yiem go nyei deic-bung ninh mbuo corc oix jangx yie, ninh mbuo ziouc caux ninh mbuo nyei fu'jueiv fun-faqv yiem jienv aengx duqv nzuonx daaih.

¹⁰Yie oix dorh ninh mbuo yiem I^yipv Deic-Bung nzuonx daaih, bun yiem Atc^si^lie cuotv daaih gapv zunv ziouc dorh ninh mbuo mingh yiem Gi^le^aatc caux Le^mbaa^norn, taux naaiv deix dorngx zungv maiv gaux ninh mbuo yiem.

¹¹Ninh mbuo oix jiex I^yipv[57] nyei koiv, yaac mborqv koiv nyei wuom-laangc, Nai^aa Ndaaih yietc zungv ndo nyei dorngx yaac oix nqaai nzengc. Zoux maux nyei Atc^si^lie Mienh oix zuqc baaic hmien, I^yipv nyei hungh lingc[58] yaac oix jiex mi'aqv.

¹²Yie oix bun yie nyei baeqc fingx kaux yie, ZIOUV, henv jiez daaih, ninh mbuo ziouc dengv yie nyei mengh ei jienv zoux.” Naaiv se ZIOUV gorngv.