Read Iu Mien Se^kaa^li^yaa 11 Bible Online

Se^kaa^li^yaa 11 - Iu Mien bible

Se^kaa^li^yaa 11

¹O Le^mbaa^norn aah! Koi nqoi meih nyei gaengh, douz ziouc buov qui meih nyei si^ndaa zongh ndiangx.

²O zongh ndiangx aah! Oix zuqc nyiemv aqv. Weic zuqc si^ndaa zongh ndiangx mbaang mi'aqv, longx haic, nzueic haic nyei ndiangx baaic nzengc. Mbaasaan nyei mba'ong zuei ndiangx aah! Oix zuqc nyiemv, weic zuqc hoz haic nyei gemh goix nzengc mi'aqv.

³Muangx maah! Goux ba'gi yungh nyei mienh nyiemv, weic zuqc ninh mbuo njang-laangc nyei miev-ciangv zuqc mietc nzengc mi'aqv. Muangx maah! Sienh njunh nyei qiex mbui weic zuqc Jor^ndaen Ndaaih hlen nyei ndiangx-lomc zuqc baaic huaang.

⁴ZIOUV, yie nyei Tin-Hungh, hnangv naaiv gorngv, “Meih oix zuqc zoux hnangv dauh goux ba'gi yungh nyei mienh goux naaiv guanh oix zuqc daix nyei ba'gi yungh.[59]

⁵Maaiz ninh mbuo wuov deix daix ninh mbuo yaac maiv zuqc dingc zuiz. Maaic ba'gi yungh wuov deix gorngv, ‘Ceng ZIOUV weic zuqc yie butv zoih mi'aqv.’ Goux ninh mbuo wuov deix goux ba'gi yungh mienh yaac maiv korv-lienh ninh mbuo.”

⁶ZIOUV gorngv, “Yiem naaiv mingh yie maiv korv-lienh naaiv norm deic-bung nyei mienh. Mangc maah! Yie oix bun ninh mbuo gorqv-mienh zuqc yiem gorqv-mienh nyei juangc laangz mienh nyei buoz-ndiev, yaac zuqc yiem ninh mbuo nyei hungh diex nyei buoz-ndiev. Ninh mbuo oix baaic waaic naaiv norm deic-bung.[60] Yie yaac maiv njoux haaix dauh biaux ndutv ninh mbuo nyei buoz-ndiev.”

⁷Yie ziouc zoux goux ba'gi yungh nyei mienh goux oix zuqc daix daic nyei ba'gi yungh. Yie aengx zorqv i diuh biaav-mbiaac. Maaih diuh heuc “Hungh En,” maaih diuh heuc “Gapv Jienv.” Yie yaac goux ba'gi yungh.

⁸Yietc hlaax nyieqc gu'nyuoz yie zunc cuotv buo dauh goux ba'gi yungh nyei mienh weic zuqc yie maiv noic faanh ninh mbuo. Ninh mbuo yaac nzorng yie.[61]

⁹Yie ziouc gorngv mbuox ba'gi yungh guanh, “Yie maiv zoux meih mbuo nyei goux ba'gi yungh mienh aqv. Oix zuqc daic, sueih ninh daic aqv. Oix zuqc mietc nyei, sueih ninh zuqc mietc aqv. Zengc njiec nyei, sueih ninh mbuo laanh nyanc laanh.”

¹⁰Yie aengx zorqv yie nyei biaav-mbiaac, heuc “Hungh En” wuov diuh, wuotv nauv bun cing yie caux maanc fingx[62] liepc nyei ngaengc waac jiex mi'aqv.

¹¹Dongh wuov hnoi wuov deix liepc nyei ngaengc waac jiex mi'aqv. Maaiz maaic ba'gi yungh nyei mienh mangc jienv yie ziouc hiuv duqv naaiv se ZIOUV ganh gorngv nyei waac.

¹²Yie ziouc gorngv mbuox ninh mbuo, “Se gorngv meih mbuo buatc horpc nor, tov zorqv yie nyei gong-zinh bun yie. Se gorngv buatc maiv horpc nor, maiv zuqc bun aqv.” Ninh mbuo ziouc zorqv faah ziepc norm zinh[63] bun yie zoux gong-zinh.

¹³ZIOUV gorngv mbuox yie, “Dorh naaiv deix zinh guaengx bun nanv nie-mor zaangc.”[64] Se dongh ninh mbuo funx yie puix duqv zipv nyei, longx haic nyei jaax-zinh. Yie ziouc dorh wuov deix faah ziepc norm zinh mingh zaangc ZIOUV nyei biauv guaengx bun nanv nie-mor zaangc.

¹⁴Yie aengx wuotv nauv yie nyei da'nyeic diuh biaav-mbiaac, dongh maaih mbuox heuc “Gapv Jienv” wuov diuh, ziouc caeqv nqoi, bun Yu^ndaa caux I^saa^laa^en zoux gorx-youz jiu tong nyei jauv dangx.

¹⁵ZIOUV aengx gorngv mbuox yie, “Oix zuqc aengx zorqv nzunc maiv lamh longc nyei goux ba'gi yungh mienh nyei jaa-sic,

¹⁶weic zuqc yie oix yiem naaiv norm deic-bung liepc dauh goux ba'gi yungh nyei mienh. Ninh maiv gunv oix zuqc daic nyei, fai lorz dingx laaih wuov deix.[65] Ninh yaac maiv zorc zuqc mun nyei yaac maiv yungz longx henv nyei wuov deix. Daaux nzuonx ninh oix nyanc ba'gi yungh junc nyei orv, liemh deih zungv betv nzengc.

¹⁷Maiv lamh longc nyei goux ba'gi yungh mienh, dongh guangc ninh nyei yungh guanh wuov dauh oix zuqc kouv aqv. Tov bun nzuqc ndaauv hngaqv ninh nyei buoz caux ninh nyei mbiaauc bung m'zing. Tov bun ninh nyei mbiaauc jieqv buoz nyaux nqaai nzengc, bun ninh nyei mbiaauc bung m'zing maengh mingh.”