Read Iu Mien Se^kaa^li^yaa 5 Bible Online

Se^kaa^li^yaa 5 - Iu Mien bible

Se^kaa^li^yaa 5

¹Yie aengx cau hmien mangc, buatc maaih njunc sou ndaix jienv.

²Fin-mienh naaic yie, “Meih buatc haaix nyungc?” Yie dau, “Yie buatc ndaix jienv nyei sou-njunc. Sou-njunc ndaauv nyic ziepc ndorqc, jangv ziepc ndorqc.”

³Ninh ziouc gorngv mbuox yie, “Naaiv se zioux nyei waac cuotv mingh gormx deic-bung. Ziux yietc bung sou fiev jienv, da'faanh zoux zaqc nyei mienh oix zuqc pai guangc. Yaac ziux ganh bung sou, da'faanh zoux jaav zorng-zengx nyei mienh oix zuqc pai guangc.

⁴Nernh Jiex nyei ZIOUV gorngv, ‘Yie oix bun naaiv deix zioux nyei waac cuotv mingh bieqc zoux zaqc mienh nyei biauv caux dengv yie nyei mbuox zoux jaav zorng-zengx mienh nyei biauv. Naaiv deix zioux nyei waac oix yiem jienv ninh nyei biauv. Liemh biauv liemh ndiangx caux la'bieiv zungv oix zuqc baaic waaic.’+”

⁵Caux yie gorngv waac naaiv dauh fin-mienh cuotv daaih mbuox yie, “Cau hmien mangc gaax maaih haaix nyungc cuotv daaih?”

⁶Yie naaic gaax, “Naaiv benx haaix nyungc?” Ninh dau, “Benx norm ndaan.”[21] Ninh aengx gorngv, “Naaiv beiv gormx deic-bung nyei baeqc fingx nyei zuiz.”

⁷Yie buatc longc jungz zoux daaih nyei nqaaix zuqc zorqv nqoi. Yiem ndaan gu'nyuoz maaih dauh m'sieqv dorn zueiz jienv.

⁸Wuov dauh fin-mienh gorngv, “Naaiv dauh m'sieqv dorn beiv orqv sic.” Fin-mienh ziouc zorqv wuov dauh m'sieqv dorn zatv njiec ndaan gu'nyuoz, zorqv longc jungz zoux daaih nyei nqaaix gomv jienv.

⁹Yie aengx cau hmien mangc, buatc i dauh m'sieqv dorn ndaix jienv daaih.[22] Ninh mbuo nyei ndaatv hnangv norqc nyieh nyei ndaatv. Ninh mbuo ziouc bouh wuov norm ndaan jiez daaih yiem lungh caux ndau mbu'ndongx.

¹⁰Yie naaic caux yie gorngv waac wuov dauh fin-mienh, “Wuov deix m'sieqv dorn dorh ndaan mingh haaix?”

¹¹Ninh dau, “Dorh mingh Mbaa^mbi^lon[23] weic naaiv norm ndaan zoux norm biauv. Zoux ziangx biauv ziouc zorqv ndaan an jienv sengh nyei dorngx gu'nguaaic.”