Read Iu Mien Se^kaa^li^yaa 8 Bible Online

Se^kaa^li^yaa 8 - Iu Mien bible

Se^kaa^li^yaa 8

¹Yie aengx duqv zipv Nernh Jiex nyei ZIOUV nyei waac gorngv,

²Nernh Jiex nyei ZIOUV hnangv naaiv gorngv, “Yie nzaeng jienv Si^on, za'gengh qiex jiez jienv nzaeng ninh.”

³ZIOUV hnangv naaiv gorngv, “Yie oix nzuonx Si^on, oix yiem Ye^lu^saa^lem Zingh gu'nyuoz. Ye^lu^saa^lem oix duqv mbuox heuc Ziepc Zuoqv nyei Zingh. Nernh Jiex nyei ZIOUV nyei mbong yaac heuc benx Cing-Nzengc Mbong.”

⁴Nernh Jiex nyei ZIOUV hnangv naaiv gorngv, “Aengx oix maaih mienh gox mienh m'jangc m'sieqv duqv yiem Ye^lu^saa^lem nyei jaai-horngc. Gorqv-mienh nyei buoz nanv jienv biaav-mbiaac weic zuqc hnyangx-jeiv gox.

⁵Zingh gu'nyuoz nyei jaai-horngc yaac maaih dorn maaih sieqv caux fu'jueiv nziaauc buangv nzengc.”

⁶Nernh Jiex nyei ZIOUV hnangv naaiv gorngv, “Taux wuov deix hnoi-nyieqc, naaiv deix zengc njiec nyei baeqc fingx buatc benx mbuoqc horngh nyei sic.[31] Yie ganh nyei m'zing yaac buatc benx mbuoqc horngh nyei sic fai?” Naaiv se Nernh Jiex nyei ZIOUV gorngv.

⁷Nernh Jiex nyei ZIOUV hnangv naaiv gorngv, “Mangc maah! Yie oix njoux yie nyei baeqc fingx biaux cuotv dong bung caux fai bung nyei deic-bung.

⁸Yie oix dorh ninh mbuo nzuonx daaih yiem Ye^lu^saa^lem gu'nyuoz. Ninh mbuo ziouc zoux yie nyei baeqc fingx. Yie yaac zoux ninh mbuo nyei Tin-Hungh, ziepc zuoqv nyei, baengh fim nyei dorh ninh mbuo.”

⁹Nernh Jiex nyei ZIOUV hnangv naaiv gorngv, “Meih mbuo oix zuqc henv,[32] weic zuqc ceix Nernh Jiex nyei ZIOUV nyei biauv liepc gorn-ndoqv wuov hnoi, douc waac mienh douc daaih nyei waac meih mbuo haiz mi'aqv.

¹⁰Wuov deix hnoi-nyieqc maiv gaengh taux, mienh caux saeng-kuv maiv duqv bietv haaix nyungc gong-zinh. Laaix win-wangv, maiv maaih haaix dauh haih baengh orn nyei bieqc cuotv, weic zuqc yie bun gorqv-mienh caux gorqv-mienh nyei juangc laangz mienh maiv horpc jaax.

¹¹Mv baac ih zanc yie maiv zoux bun naaiv deix zengc njiec nyei mienh hnangv zinh ndaangc nor.” Naaiv se Nernh Jiex nyei ZIOUV gorngv.

¹²“Weic zuqc ninh mbuo oix duqv baengh orn nyei zuangx.[33] A'ngunc hmei oix ziangh biouv, ndau yaac oix cuotv gaeng-zuangx, lungh oix njiec mbiungc-suiv. Yie oix bun naaiv deix zengc njiec nyei mienh nzipc naaiv deix yietc zungv.

¹³Yu^ndaa nyei zeiv-fun caux I^saa^laa^en nyei zeiv-fun aah! Meih mbuo zinh ndaangc hnangv haaix nor benx zuqc ziex guoqv zioux nyei ga'naaiv, yie ziouc oix njoux meih mbuo, bun mienh gorngv meih mbuo benx duqv fuqv nyei mienh.[34] Maiv dungx gamh nziex. Oix zuqc henv.”[35]

¹⁴Nernh Jiex nyei ZIOUV hnangv naaiv gorngv, “Meih mbuo nyei ong-taaix cuoqv yie qiex jiez nyei ziangh hoc, yie hnangv naaiv dingc bun meih mbuo zuqc zeqc naanc yaac maiv korv-lienh meih mbuo.

¹⁵Ih zanc yie hnangv wuov nor dingc aengx zoux longx bun Ye^lu^saa^lem caux Yu^ndaa nyei zeiv-fun. Meih mbuo maiv dungx gamh nziex.

¹⁶Meih mbuo oix zuqc zoux nyei se hnangv naaiv. Oix zuqc laanh caux laanh gorngv zien waac hnangv. Yiem meih mbuo nyei sic dorngh[36] oix zuqc baengh fim nyei siemv weic bun duqv baengh orn.

¹⁷Maiv dungx daav orqv nyei za'eix hoic meih mbuo nyei juangc laangz mienh, yaac maiv dungx a'hneiv zoux jaav zorng-zengx. Naaiv deix yietc zungv sic yie nzorng haic.” ZIOUV hnangv naaiv gorngv.

¹⁸Yie aengx duqv zipv Nernh Jiex nyei ZIOUV nyei waac.

¹⁹Nernh Jiex nyei ZIOUV hnangv naaiv gorngv, “Feix hlaax, hmz hlaax, cietv hlaax caux ziepc hlaax, zei maiv nyanc haaix nyungc nyei hnoi-nyieqc, oix weic Yu^ndaa benx njien-youh, a'hneiv, orn-lorqc nyei zipv. Hnangv naaic meih mbuo oix zuqc hnamv zien leiz caux baengh orn.”

²⁰Nernh Jiex nyei ZIOUV hnangv naaiv gorngv, “Zungv oix maaih ziex guoqv mienh caux yiem ziex norm zingh nyei mienh daaih Ye^lu^saa^lem.

²¹Yietc norm zingh nyei mienh oix mingh lorz ganh norm zingh nyei mienh gorngv, ‘Mbuo oix zuqc siepv-siepv nyei mingh tov ZIOUV ceix en yaac lorz Nernh Jiex nyei ZIOUV. Yie yaac mingh nyei.’

²²Ziex fingx mienh caux henv haic nyei guoqv nyei mienh oix daaih taux Ye^lu^saa^lem lorz Nernh Jiex nyei ZIOUV, jouh ZIOUV nyei en aqv.”

²³Nernh Jiex nyei ZIOUV hnangv naaiv gorngv, “Taux wuov deix hnoi-nyieqc, maaih ziepc dauh yiem maanc guoqv gorngv nyungc-nyungc waac nyei mienh, oix baeng jienv yietc dauh Yiutai Mienh nyei lui-juoqv yaac gorngv, ‘Bun yie mbuo caux meih mbuo mingh maah! Weic zuqc yie mbuo haiz gorngv Tin-Hungh caux meih mbuo yiem.’+”