Read Iu Mien Se^kaa^li^yaa 9 Bible Online

Se^kaa^li^yaa 9 - Iu Mien bible

Se^kaa^li^yaa 9

¹Naaiv se ZIOUV nyei waac. ZIOUV gorngv Hatc^laakv Deic, aengx gorngv Ndaa^matv^gatc Zingh, weic zuqc baamh mienh caux fingx-fingx I^saa^laa^en Mienh mangc jienv ZIOUV. [37]

²Ninh yaac mangc nitv gapv-jaaix nyei Haamatv Zingh, liemh Tailaqv caux Sai^ndorn Zingh maiv gunv naaiv deix baeqc fingx benx mienh guai mienh.

³Tailaqv weic ganh ceix weih wuonv nyei zingh laatc, yaac siou nyaanh ndui jienv hnangv nie-mbung, aengx siou jiem ndongc jaai-horngc nyei wuom-bamc camv.

⁴Mv baac mangc maah! Ziouv oix zorqv Tailaqv maaih nyei ga'naaiv mingh, yaac mborqv baaic Tailaqv yiem koiv maaih nyei lingc,[38] naaiv norm zingh zungv oix zuqc douz buov qui.

⁵Atc^ke^lon Zingh buatc ziouc gamh nziex, Gaasaa Zingh duqv buatc ziouc za'gengh haiz kouv. E^ko^lon yaac fih hnangv nyei. Ninh mbuo maaih lamh hnamv nyei dorngx zuqc baaic waaic mi'aqv. Gaasaa nyei hungh oix zuqc mietc, Atc^ke^lon zungv maiv maaih mienh yiem.

⁶Maaih lorpc zorpc buonv nyei mienh[39] oix yiem Atc^ndotc. Yie, ZIOUV, oix bun Fi^li^saa^die Mienh zoux maux nyei jauv zutc nzengc.

⁷Yie oix zorqv cuotv yiem ninh mbuo nyei nzuih nyei nziaamv, zorqv nqoi yiem ninh mbuo nyei nyaah qangx, gamh nziev nyei ga'naaiv.[40] Naaiv deix zengc njiec nyei mienh duqv benx yie mbuo nyei Tin-Hungh nyei mi'aqv, benx Yu^ndaa Fingx gu'nyuoz nyei yietc fingx,[41] E^ko^lon Mienh yaac oix hnangv Ye^mbutc Mienh.

⁸Wuov zanc yie oix liepc ciangv weih gormx yie nyei biauv[42] weic beu jienv, maiv bun win-wangv sueih eix bieqc bieqc cuotv-cuotv, maiv maaih haaix dauh aengx haih bieqc daaih zeix ninh mbuo, weic zuqc ih zanc yie ganh nyei m'zing mangc jienv nyei.

⁹O Si^on nyei mienh aah![43] Meih mbuo oix zuqc njien-youh orn-lorqc. Ye^lu^saa^lem nyei mienh aah![44] Oix zuqc heuc mbui nyei. Mangc maah! Meih mbuo nyei hungh daaih meih mbuo naaiv, ninh baengh fim nyei yaac duqv hingh jiex.[45] Ninh hnyouv suonc nyei, geh jienv maaz-li daaih, geh jienv maaz-li nyei dorn.

¹⁰Yie oix mietc yiem E^faa^im mborqv jaax nyei maaz-cie, caux yiem Ye^lu^saa^lem longc mborqv jaax nyei maaz. Mborqv jaax nyei juang-zinx oix zuqc mietc, ninh zungv oix gorngv bun maanc guoqv duqv baengh orn. Ninh nyei lingc oix yiem naaiv bung koiv mingh taux wuov bung koiv, yiem Yu^fe^ditc Ndaaih mingh taux jomc lungh ndiev.

¹¹Si^on Mienh aah! Yie, weic longc ziec nyei saeng-kuv nziaamv caux meih mbuo liepc jiez ngaengc waac,[46] oix bungx meih mbuo zuqc guaatv mingh nyei mienh cuotv wuom-kuotv-nqaai.

¹²Zuqc guaatv mingh corc maaih lamh hnamv nyei mienh aah! Nzuonx meih mbuo weih wuonv nyei dorngx daaih. Ih hnoi yie gorngv yie oix jaa buih bun meih mbuo duqv longx i gouv.

¹³Yie wuotv Yu^ndaa ngau zoux yie nyei juang-zinx, longc E^faa^im zoux juang-zinx nyei forng. O Si^on aah! Yie coqv[47] meih nyei dorn mbuo, mingh mborqv Janx-Gikc nyei dorn, yaac bun meih hnangv henv nyei mborqv jaax baeng nyei nzuqc ndaauv.

¹⁴ZIOUV oix yiem ninh mbuo gu'nguaaic hinc cuotv, ninh nyei forng zungv cuotv mingh hnangv borngz mba'lingc nor, Ziouv TIN-HUNGH oix biomv jorng, yaac yiem naamh bung nyei nziaaux-zunc cuotv mingh.

¹⁵Nernh Jiex nyei ZIOUV oix beu jienv ninh mbuo, ninh mbuo ziouc mietc win-wangv yaac caaiv njiec longc ndopv-hlaang[48] bungx la'bieiv nyei mienh. Ninh mbuo oix heuc hnangv hopv diuv nquin nyei mienh,[49] ninh mbuo ziouc hnangv zaangh nziaamv buangv nyei nzormc, yaac hnangv ziec-dorngh nyei jorng pietv ndorn nzengc.[50]

¹⁶Taux wuov hnoi, ZIOUV, ninh mbuo nyei Tin-Hungh, oix njoux ninh mbuo, hnangv goux ba'gi yungh nyei mienh njoux ninh nyei ba'gi yungh. Ninh mbuo oix yiem deic-bung aengv cuotv njang hnangv yiem hungh ningv nyei la'bieiv-jaaix.

¹⁷Ninh mbuo nzueic, njang-laangc haic. Maaih laangh ziqc caux siang-a'ngunc diuv bun houh saeng, sieqv-dorn henv.