Read Iu Mien Matv^taai 1 Bible Online

Matv^taai 1 - Iu Mien bible

Matv^taai 1

¹Yesu Giduc zoux Ndaawitv Hungh nyei zeiv-fun. Ndaawitv Hungh yaac zoux Apc^laa^ham nyei zeiv-fun. Ih zanc fiev naaiv se Yesu Giduc doic jiex doic nyei douh zong.

²Apc^laa^ham zoux I^sakc nyei die. I^sakc zoux Yaakopv nyei die. Yaakopv zoux Yu^ndaa mbuo muoz-dorn doic nyei die.

³Yu^ndaa zoux Beletv caux Zelaa nyei die. Ninh mbuo nyei maa heuc Taamaa. Beletv zoux Hetv^lon nyei die. Hetv^lon zoux Laam nyei die.

⁴Laam zoux Am^mi^naa^ndapc nyei die. Am^mi^naa^ndapc zoux Naason nyei die. Naason zoux Sanx^mon nyei die.

⁵Sanx^mon zoux Mbo^aatc nyei die. Mbo^aatc nyei maa heuc Laa^hapc. Mbo^aatc zoux O^mbetc nyei die. O^mbetc nyei maa heuc Lu^te. O^mbetc zoux Jetc^si nyei die.

⁶Jetc^si zoux Ndaawitv Hungh nyei die. Ndaawitv Hungh zoux Saa^lo^morn nyei die. Saa^lo^morn nyei maa zinh ndaangc zoux U^li^yaa nyei auv.

⁷Saa^lo^morn zoux Le^hox^mbo^am nyei die. Le^hox^mbo^am zoux Aa^mbi^yaa nyei die. Aa^mbi^yaa zoux Aasaax nyei die.

⁸Aasaax zoux Ye^ho^saa^fatv nyei die. Ye^ho^saa^fatv zoux Yolam nyei die. Yolam zoux Utc^si^yaa nyei die.

⁹Utc^si^yaa zoux Yotaam nyei die. Yotaam zoux Aa^hatc nyei die. Aa^hatc zoux He^se^ki^yaa nyei die.

¹⁰He^se^ki^yaa zoux Maa^natv^se nyei die. Maa^natv^se zoux Aamon nyei die. Aamon zoux Yo^si^yaa nyei die.

¹¹Yo^si^yaa zoux Ye^ko^ni^yaa[1] mbuo muoz-doic nyei die. Wuov zanc doix zuqc I^saa^laa^en Mienh zuqc caangv mingh Mbaa^mbi^lon Deic-Bung.

¹²Zuqc caangv mingh liuz, nqa'haav Ye^ko^ni^yaa zoux Se^an^ti^en nyei die. Se^an^ti^en zoux Se^lupv^mbaa^mben nyei die.

¹³Se^lupv^mbaa^mben zoux Aa^mbi^yutv nyei die. Aa^mbi^yutv zoux E^li^yaa^kim nyei die. E^li^yaa^kim zoux Aasor nyei die.

¹⁴Aasor zoux Saax^ndokc nyei die. Saax^ndokc zoux Aakim nyei die. Aakim zoux E^li^utc nyei die.

¹⁵E^li^utc zoux E^le^aa^saa nyei die. E^le^aa^saa zoux Matv^taan nyei die. Matv^taan zoux Yaakopv nyei die.

¹⁶Yaakopv zoux Yosepv nyei die. Yosepv se Maa^li^yaa nyei nqox. Maa^li^yaa zoux Yesu nyei maa. Yesu dongh mienh heuc Giduc wuov dauh.

¹⁷Hnangv naaic, yiem Apc^laa^ham mingh taux Ndaawitv Hungh maaih ziepc feix doic mienh. Aengx yiem Ndaawitv Hungh mingh taux I^saa^laa^en Mienh zuqc guaatv mingh Mbaa^mbi^lon Deic-Bung maaih ziepc feix doic. Aengx yiem zuqc guaatv mingh nyei ziangh hoc taux Giduc cuotv seix wuov zanc, maaih ziepc feix doic.

¹⁸Yesu Giduc cuotv seix nyei jauv-louc se hnangv naaiv. Yesu nyei maa, mbuox heuc Maa^li^yaa. Yosepv gorngv ziangh ninh mi'aqv. Ninh mbuo maiv gaengh juangc dorngx bueix jiex mv baac Maa^li^yaa maaih sin aqv, se yiem Singx Lingh nyei qaqv daaih.

¹⁹Ninh nyei nqox, Yosepv, se kuv mienh yaac maiv oix bun Maa^li^yaa dorng zuangx zuqc nyaiv. Ninh ziouc yiem hnyouv hnamv oix beic ndiev tuix.

²⁰Yosepv yiem hnyouv hnangv naaiv nor hnamv. Maaih dauh Ziouv nyei fin-mienh daaih box mbeix mbuox ninh, “Ndaawitv nyei zeiv-fun, Yosepv aah! Maiv dungx gamh nziex. Gunv longc Maa^li^yaa zoux meih nyei auv aqv oc. Ninh maaih jienv wuov norm sin se Singx Lingh bun ninh maaih.

²¹Ninh oix duqv dauh dorn. Meih oix zuqc tengx wuov dauh dorn cuotv mbuox heuc Yesu,[2] weic zuqc ninh oix njoux ninh nyei baeqc fingx leih ndutv ninh mbuo nyei zuiz.”

²²Naaiv deix sic cuotv daaih weic bun doix nzengc zinh ndaangc Ziouv longc wuov dauh douc waac mienh gorngv nyei waac. Ninh gorngv,

²³“Maaih dauh maiv nziaauc jiex dorn nyei sieqv, oix maaih norm sin, yungz duqv dauh dorn. Ninh mbuo oix cuotv mbuox heuc I^maa^nu^en.” (Eix leiz se “Tin-Hungh caux mbuo yiem.”)

²⁴Yosepv nyie daaih, ninh ei jienv Ziouv nyei fin-mienh mbuox nyei waac zoux, ziouc dorh Maa^li^yaa daaih zoux ninh nyei auv aqv.

²⁵Mv baac ninh mbuo maiv nitv doic taux Maa^li^yaa duqv naaiv dauh dorn daaih. Yosepv tengx wuov dauh dorn cuotv mbuox heuc Yesu.