Read Iu Mien Matv^taai 2 Bible Online

Matv^taai 2 - Iu Mien bible

Matv^taai 2

¹Yesu cuotv seix yiem Yu^ndie Saengv, Mbetc^le^hem Mungv wuov zanc, doix zuqc Helotv zoux hungh diex. Nqa'haav maaih deix samx hleix nyei domh fin-saeng yiem dong bung daaih taux Ye^lu^saa^lem Zingh

²naaic gaax, “Cuotv seix daaih zoux Yiutai Mienh nyei hungh wuov dauh gu'nguaaz yiem haaix? Yie mbuo buatc ninh nyei hleix yiem dong bung cuotv ziouc daaih baaix ninh.”

³Helotv Hungh muangx haiz naaiv deix waac ninh ziouc hnyouv maiv henh yietc deix. Yiem Ye^lu^saa^lem Zingh nyei zuangx mienh yietc zungv yaac hnyouv maiv henh nzengc.

⁴Helotv ziouc heuc Yiutai Mienh nyei zuangx sai mienh bieiv caux njaaux leiz nyei fin-saeng daaih nzoih yiem zunv ziouc naaic ninh mbuo, “Zoux Giduc[3] wuov dauh oix cuotv seix yiem haaix?”

⁵Ninh mbuo dau, “Yiem Yu^ndie Saengv, Mbetc^le^hem Mungv, weic zuqc douc waac mienh hnangv naaiv nor fiev,

⁶‘Yu^ndaa Deic-Bung, Mbetc^le^hem Mungv aah! Yiem Yu^ndaa Deic-Bung nyei domh zingh, meih maiv zeiz gauh faix jiex. Weic zuqc maaih dauh domh jien oix yiem meih naaic cuotv daaih dorh yie nyei baeqc fingx, I^saa^laa^en Mienh.’+”

⁷Helotv ziouc heuc wuov deix samx hleix nyei domh fin-saeng daaih, bingx jienv longx-longx nyei naaic gaax, “Wuov norm hleix ziangh haaix cuotv daaih?”

⁸Naaic liuz, Helotv ziouc mbuox ninh mbuo mingh Mbetc^le^hem Mungv. Ninh gorngv, “Meih mbuo gunv mingh Mbetc^le^hem Mungv longx-longx nyei lorz wuov dauh fu'jueiv. Lorz buatc, nzuonx daaih mbuox yie, yie ziouc haih mingh baaix ninh.”

⁹Muangx hungh diex gorngv liuz, wuov deix domh fin-saeng ziouc cuotv jauv mingh aqv. Zinh ndaangc yiem dong bung buatc cuotv wuov norm hleix mingh ndaangc ninh mbuo. Mingh taux fu'jueiv yiem wuov norm dorngx gu'nguaaic ziouc dingh jienv wuov.

¹⁰Domh fin-saeng buatc wuov norm hleix ziouc njien-youh orn-lorqc haic.

¹¹Bieqc biauv mingh, buatc wuov dauh fu'jueiv[4] caux ninh nyei maa, Maa^li^yaa, ziouc gueic njiec ndau baaix wuov dauh fu'jueiv. Ninh mbuo zorqv ninh mbuo dorh daaih nyei zingh nyeic cuotv daaih fongc horc bun ninh. Maaih jiem caux i nyungc ndaang nyei ndiangx-zung heuc mu^yorc caux faan^gen^sen.

¹²Tin-Hungh box mbeix mbuox wuov deix domh fin-saeng maiv dungx nzuonx Helotv wuov. Ninh mbuo ziouc yangh ganh diuh jauv nzuonx ninh mbuo nyei deic-bung.

¹³Wuov deix domh fin-saeng nzuonx mi'aqv. Maaih dauh Ziouv nyei fin-mienh box mbeix mbuox Yosepv, “Jiez sin daaih, dorh jienv fu'jueiv caux ninh nyei maa biaux mingh I^yipv Deic-Bung. Oix zuqc yiem wuov zuov taux yie mbuox meih, weic zuqc Helotv oix lorz naaiv dauh fu'jueiv daix.”

¹⁴Yosepv ziouc jiez sin daaih, lungh muonz zanc dorh jienv wuov dauh fu'jueiv caux fu'jueiv nyei maa biaux mingh I^yipv Deic-Bung,

¹⁵yiem wuov zuov taux Helotv daic mingh. Hnangv naaic cuotv daaih weic bun doix nzengc Ziouv longc douc waac mienh gorngv nyei waac. Ninh gorngv, “Yie heuc yie nyei dorn yiem I^yipv Deic-Bung cuotv daaih.”

¹⁶Helotv Hungh hiuv duqv wuov deix domh fin-saeng nduov ninh, ninh ziouc qiex jiez! haic. Ninh njiec lingc daix nzengc Mbetc^le^hem Mungv caux huing nzuonx nyei dorngx wuov deix i hnyangx ga'ndiev maengx nyei gu'nguaaz-dorn. Helotv hnangv naaiv nor daix naaiv deix fu'jueiv ei ninh naaic samx hleix nyei domh fin-saeng buatc hleix cuotv nyei ziangh hoc funx daaih.

¹⁷Naaiv deix sic cuotv daaih doix nzengc wuov dauh douc waac mienh, Ye^le^mi, nyei waac. Ye^le^mi gorngv,

¹⁸“Haiz mienh yiem wuov Laamaa Zingh mbiouh mbiouh bungx-sing bungx-qiex nyei nyiemv. Laasen nyiemv ninh nyei fu'jueiv, ninh yaac maiv longc haaix dauh tengx ninh jaiv nzauh, weic zuqc ninh nyei fu'jueiv daic mi'aqv.”

¹⁹Helotv Hungh daic mi'aqv. Yiem I^yipv Deic-Bung maaih dauh Ziouv nyei fin-mienh daaih box mbeix Yosepv.

²⁰Fin-mienh gorngv, “Jiez sin daaih, dorh wuov dauh fu'jueiv caux jienv fu'jueiv nyei maa nzuonx I^saa^laa^en Deic-Bung aqv oc. Weic zuqc oix hoic naaiv dauh fu'jueiv nyei maengc wuov deix daic nzengc mi'aqv.”

²¹Yosepv ziouc jiez sin dorh jienv fu'jueiv caux fu'jueiv nyei maa nzuonx I^saa^laa^en Deic-Bung aqv.

²²Mv baac haiz gorngv Aan^ke^laa^atc nzipc ninh nyei die, Helotv, zoux Yu^ndie Saengv nyei hungh, Yosepv ziouc gamh nziex maiv mingh wuov aqv. Tin-Hungh yaac box mbeix donv Yosepv, Yosepv mbuo ziouc mingh Gaa^li^li Saengv,

²³yiem norm mungv mbuox heuc Naa^saa^letv. Naaiv deix jauv cuotv daaih doix nzengc douc waac mienh nyei waac. Wuov deix douc waac mienh gorngv, “Mienh oix heuc ninh zoux Naa^saa^letv Mienh.”