Read Iu Mien Matv^taai 4 Bible Online

Matv^taai 4 - Iu Mien bible

Matv^taai 4

¹Yesu jiex liuz wuom nyei leiz, Singx Lingh ziouc dorh ninh mingh deic-bung-huaang zuqc mienv nyei hungh seix.

²Feix ziepc hnoi feix ziepc muonz Yesu zei maiv nyanc haaix nyungc, hnyouv ziouc sie aqv.

³Mienv nyei hungh ziouc daaih lorz ninh yaac gorngv, “Meih za'gengh Tin-Hungh nyei Dorn nor, heuc naaiv deix la'bieiv benx njuov daaih maah!”

⁴Yesu dau, “Ging-Sou fiev jienv gorngv, ‘Mienh maiv zeiz kungx kaux nyanc hopv yungz maengc hnangv, mv baac oix zuqc kaux Tin-Hungh gorngv nyei joux-joux waac.’+”

⁵Mienv nyei hungh ziouc dorh Yesu mingh cing-nzengc nyei zingh, Ye^lu^saa^lem, bun ninh yiem zaangc Tin-Hungh nyei biauv hlang jiex nyei dorngx,

⁶gorngv mbuox ninh, “Meih za'gengh Tin-Hungh nyei Dorn nor, biu njiec gaax. Weic zuqc Ging-Sou fiev jienv gorngv, ‘Tin-Hungh oix paaiv ninh nyei fin-mienh goux jienv meih. Ninh mbuo ziouc longc buoz bouh jienv meih, maiv bun meih nyei zaux zong zuqc la'bieiv.’+”

⁷Yesu dau, “Mv baac Ging-Sou yaac fiev jienv gorngv, ‘Maiv dungx seix Ziouv, meih nyei Tin-Hungh.’+”

⁸Mienv nyei hungh aengx dorh Yesu faaux norm hlang haic nyei mbong, bun ninh mangc lungh ndiev maanc guoqv yaac mangc maanc guoqv nyei njang-laangc.

⁹Mienv nyei hungh gorngv, “Se gorngv meih gueic njiec baaix yie, yie ziouc zorqv naaiv deix yietc zungv bun meih.”

¹⁰Yesu ziouc dau, “Saadaan aah! Biaux nqoi maah! Ging-Sou fiev jienv gorngv, ‘Oix zuqc baaix Ziouv, meih nyei Tin-Hungh. Kungx oix zuqc fu-sux ninh nduqc dauh hnangv.’+”

¹¹Mienv nyei hungh ziang naaic leih nqoi Yesu mi'aqv. Fin-mienh ziouc daaih liuc leiz Yesu.

¹²Yesu haiz gorngv Yo^han zuqc wuonx loh, ninh ziouc mingh Gaa^li^li Saengv mi'aqv.

¹³Yesu maiv yiem Naa^saa^letv Mungv, ninh mingh yiem Kaa^be^naa^um Mungv, Gaa^li^li Koiv-Dorn hlen, Se^mbu^lun caux Napv^taa^li Deic nyei gapv-jaaix dorngx.

¹⁴Hnangv naaic cuotv daaih se weic bun zinh ndaangc tengx Tin-Hungh douc waac wuov dauh I^saa^yaa nyei waac doix nzengc.

¹⁵I^saa^yaa gorngv, “Se^mbu^lun caux Napv^taa^li Deic, yiem wuov ngaanc ziqc Jor^ndaen Ndaaih, dongh mingh koiv wuov diuh jauv, se Janx yiem nyei deic-bung, Gaa^li^li.

¹⁶Yiem hmuangx gu'nyuoz nyei baeqc fingx, zungv duqv buatc domh njang. Yiem zuqc daic nyei dongh linh gu'nyuoz wuov deix, maaih njang cuotv daaih ziux jienv ninh mbuo.”

¹⁷Yangh naaiv mingh Yesu jiez gorn zunh doz. Ninh gorngv, “Oix zuqc goiv hnyouv guangc zuiz. Tin-Hungh daaih zoux Ziouv gunv mienh nyei hnoi taux fatv aqv.”

¹⁸Yesu yangh jauv gan Gaa^li^li Koiv-Dorn hlen mingh, buatc maaih i muoz-dorn. Ninh mbuo zoux zorqv mbiauz nyei mienh, yiem wuov koiv borngz mbiauz. Maaih dauh heuc Simon, aengx maaih norm mbuox heuc Bide, caux jienv ninh nyei youz, An^ndaa^lu.

¹⁹Yesu mbuox ninh mbuo, “Meih mbuo daaih gan yie oc. Yie oix njaaux meih mbuo lorz mienh, hnangv ih zanc meih mbuo lorz mbiauz nor.”

²⁰Ninh mbuo liemh zeih guangc ninh mbuo nyei mungz gan jienv Yesu mingh aqv.

²¹Yesu jiex mingh deix aengx buatc Se^mbe^ndi nyei i dauh dorn, Yaagorpc caux Yo^han. Naaiv deix i muoz caux ninh mbuo nyei die yiem wuov nzangv liuc leiz mungz. Yesu heuc ninh mbuo daaih.

²²Ninh mbuo liemh zeih guangc jienv ninh mbuo nyei die, guangc jienv nzangv, gan Yesu mingh aqv.

²³Yesu mingh gormx Gaa^li^li Saengv, yiem ninh mbuo nyei wuic dorngh njaaux mienh, yaac zunh Tin-Hungh zoux Ziouv gunv mienh nyei kuv fienx. Ninh yaac zorc longx zuangx mienh nyei nyungc-nyungc baengc.

²⁴Yesu nyei mengh dauh sing buangv Silie Deic-Bung. Mienh ziouc dorh yietc zungv baengc mienh daaih lorz Yesu, se dorh butv nyungc-nyungc baengc caux zuqc diev mun nyei, zuqc mienv muoqv nyei, butv dungz-ndin nyei, caux butv baengc-mbai nyei mienh daaih. Yesu yaac zorc longx ninh mbuo.

²⁵Mienh camv haic gan jienv Yesu mingh. Maaih deix yiem Gaa^li^li Saengv, maaih deix yiem Totv^mbu^li[7] Saengv, maaih deix yiem Ye^lu^saa^lem Zingh, maaih deix yiem Yu^ndie Saengv, aengx maaih deix yiem Jor^ndaen Ndaaih nyei dong bung maengx gan jienv Yesu mingh.