Read Iu Mien Maako 10 Bible Online

Maako 10 - Iu Mien bible

Maako 10

¹Yesu cuotv wuov norm dorngx mingh Yu^ndie Saengv aengx jiex Jor^ndaen Ndaaih. Mienh camv haic aengx daaih gapv zunv ninh wuov. Ninh ziouc hnangv yietc gau nor, njaaux ninh mbuo.

²Maaih deix Faa^li^si Mienh daaih oix seix Yesu ziouc naaic, “Nqox leih ninh nyei auv se horpc mbuo nyei leiz nyei fai?”

³Yesu dau, “Mose hnangv haaix nor mbuox meih mbuo?”

⁴Ninh mbuo dau, “Mose bun nqox fiev zeiv leih cai sou bun auv ziouc heuc auv mingh mi'aqv.”

⁵Yesu mbuox ninh mbuo, “Se laaix meih mbuo hnyouv ngaengc Mose cingx daaih fiev naaiv diuh leiz.

⁶Mv baac zinh ndaangc Tin-Hungh zeix lungh zeix ndau wuov zanc, ‘Tin-Hungh zeix mienh daaih benx m'jangc m'sieqv.’

⁷‘Weic naaiv m'jangc dorn dorng jaa, leih ninh nyei diex maac, caux jienv ninh nyei auv gapv daaih.

⁸Ninh mbuo i dauh ziouc benx yietc dauh mi'aqv.’ Hnangv naaic, ninh mbuo maiv zeiz i dauh aqv. Benx yietc dauh hnangv.

⁹Weic naaiv, Tin-Hungh gapv daaih nyei cai-doix, maiv dungx bun mienh caeqv nqoi.”

¹⁰Bieqc biauv mingh wuov zanc, sai-gorx mbuo tov Yesu gorngv mengh naaiv diuc jauv.

¹¹Yesu ziouc mbuox ninh mbuo, “Haaix dauh leih ninh nyei auv, aengx mingh longc siang-auv, ninh se hienx auv hnangv, yaac dorngc ninh nyei loz-auv.

¹²Auv yaac fih hnangv nyei. Se gorngv leih ninh nyei nqox aengx longc siang-nqox, ninh se hienx nqox hnangv.”

¹³Maaih deix mienh dorh fu'jueiv daaih lorz Yesu, oix Yesu maan ninh mbuo, mv baac sai-gorx mbuo gorngv wuov deix mienh.

¹⁴Yesu buatc ziouc qiex jiez haic, gorngv mbuox sai-gorx mbuo, “Gunv bun fu'jueiv daaih lorz yie. Maiv dungx laanh ninh mbuo saa. Weic zuqc haaix dauh longc Tin-Hungh zoux Ziouv gunv ninh, se hnangv naaiv deix fu'jueiv nor.

¹⁵Yie gorngv zien mbuox meih mbuo, haaix dauh maiv hnangv dauh fu'jueiv longc Tin-Hungh zoux Ziouv gunv ninh, wuov dauh yietc liuz maiv duqv bieqc Tin-Hungh nyei guoqv.”

¹⁶Gorngv liuz, Yesu ziouc hlorpv fu'jueiv, yietc dauh yietc dauh maan jienv buang waac ninh mbuo.

¹⁷Yesu aengx cuotv jauv wuov zanc, maaih laanh mienh tiux daaih, gueic njiec Yesu nyei nza'hmien naaic ninh, “Baengh Fim nyei Fin-Saeng aah! Yie oix zuqc hnangv haaix nor zoux cingx duqv yietc liuz nyei maengc?”

¹⁸Yesu naaic ninh, “Meih weic haaix diuc heuc yie zoux baengh fim nyei mienh? Cuotv liuz Tin-Hungh, maiv maaih haaix dauh baengh fim.

¹⁹Meih yaac hiuv duqv leiz-latc. Leiz-latc gorngv, ‘Maiv dungx daix mienh, maiv dungx hienx auv hienx nqox, maiv dungx zoux zaqc, maiv dungx zoux jaav zorng-zengx, maiv dungx pienx mienh, oix zuqc tongx nimc diex maac.’+”

²⁰Wuov dauh mienh gorngv, “Fin-Saeng aac, naaiv deix leiz yie faix-faix nyei fiou taux ih zanc aqv.”

²¹Yesu mangc jienv ninh, yaac hnamv ninh, ziouc gorngv, “Meih corc caa yietc nyungc maiv gaengh duqv zoux. Oix zuqc mingh maaic nzengc meih maaih nyei ga'naaiv, aengx zorqv wuov deix nyaanh bun mienh jomc mienh. Hnangv naaiv meih ziouc maaih jaaix nyei ga'naaiv siou jienv wuov tin-dorngh. Zoux liuz, daaih gan yie oc.”

²²Wuov dauh mienh yietv haiz naaiv joux waac, hmien mbienc nzengc, ziang naaic nzauh nzauh nyei mingh mi'aqv, weic zuqc ninh maaih jaa-dingh hoz haic.

²³Yesu huin mangc ninh nyei sai-gorx, mbuox ninh mbuo, “Butv-zoih mienh aqc duqv bieqc Tin-Hungh nyei guoqv.”

²⁴Sai-gorx mbuoqc horngh naaiv joux waac mv baac Yesu nzipc jienv gorngv, “Fu'jueiv aac, weic kaux zinh zoih wuov deix, za'gengh aqc duqv bieqc Tin-Hungh nyei guoqv.[27]

²⁵Lorh torh cunx jiex sim-mbiuic corc gauh hungh hec butv-zoih mienh bieqc Tin-Hungh nyei guoqv.”

²⁶Sai-gorx mbuo gengh! mbuoqc horngh haic ziouc naaic, “Wuov nyungc, haaix dauh haih duqv njoux?”

²⁷Yesu mangc jienv ninh mbuo aengx gorngv, “Baamh mienh maiv haih njoux ganh mv baac Tin-Hungh haih nyei. Maanc sic Tin-Hungh haih zoux duqv nyei.”

²⁸Bide ziouc mbuox ninh, “Mangc gaax, yie mbuo guangc nzengc nyungc-nyungc daaih gan Sai-Diex.”

²⁹Yesu gorngv, “Yie gorngv zien mbuox meih mbuo, haaix dauh weic yie yaac weic kuv fienx guangc biauv fai muoz-doic fai diex maac fai fu'jueiv fai lingh deic,

³⁰wuov dauh guangc naaiv deix yietc gouv, yiem naaiv seix ninh oix duqv yietc baeqv gouv. Oix duqv biauv, muoz-doic, maa, fu'jueiv, lingh deic, yaac zuqc mienh zoux doqc. Nqa'haav hingv ninh yaac duqv yietc liuz nyei maengc.

³¹Mv baac yiem wuov ndaangc maaih mienh camv oix zuqc nzuonx nqa'haav, yiem nqa'haav maaih mienh camv duqv yiem wuov ndaangc.”

³²Yesu caux ninh nyei sai-gorx mbuo mingh Ye^lu^saa^lem Zingh. Mingh wuov zanc, Yesu mingh ndaangc. Sai-gorx mbuo gan ninh mingh yaac mbuoqc horngh haic. Gan ninh mbuo mingh wuov deix mienh yaac gamh nziex nyei. Yesu aengx dorh wuov deix ziepc nyeic dauh sai-gorx mingh pien deix, gorngv nqa'haav hingv ninh ganh oix zuqc buangh nyei sic mbuox ninh mbuo.

³³Ninh gorngv, “Muangx oc. Mbuo mingh Ye^lu^saa^lem Zingh. Taux wuov, Baamh Mienh nyei Dorn, ziouc zuqc jiu bun sai mienh bieiv caux njaaux leiz nyei fin-saeng. Ninh mbuo oix dingc daix ninh, yaac zorqv ninh jiu bun Janx.

³⁴Janx ziouc guatc doqc jatv ninh, tuiv wuom-nzuih naetv ninh, longc biaav-bin mborqv, yaac daix ninh. Mv baac nqa'haav buo hnoi ninh ziouc aengx nangh daaih.”

³⁵Se^mbe^ndi nyei i dauh dorn, Yaagorpc caux Yo^han, daaih lorz Yesu yaac gorngv, “Sai-Diex aah! Yie mbuo oix meih ei jienv yie mbuo tov nyei waac zoux.”

³⁶Yesu dau, “Meih mbuo oix yie tengx meih mbuo zoux haaix nyungc?”

³⁷Ninh mbuo dau, “Meih faaux weic zoux hungh duqv njang-laangc wuov zanc, tov bun yie mbuo zueiz dauh meih nyei mbiaauc maengx, zueiz dauh meih nyei zaaix maengx oc.”

³⁸Yesu mbuox ninh mbuo, “Meih mbuo tov nyei meih mbuo maiv hiuv. Meih mbuo haih hopv dongh yie oix zuqc hopv wuov norm zaanv fai? Meih mbuo haih jiex dongh yie oix zuqc jiex wuov nyungc leiz fai?”[28]

³⁹Ninh mbuo dau, “Yie mbuo haih nyei.” Yesu mbuox ninh mbuo, “Yie hopv nyei zaanv meih mbuo za'gengh oix zuqc hopv. Yie jiex nyei leiz meih mbuo za'gengh oix zuqc jiex.

⁴⁰Mv baac yie maiv maaih leiz paaiv haaix dauh zueiz yie nyei mbiaauc maengx fai zaaix maengx. Tin-Hungh liuc leiz ziangx bun haaix dauh zueiz, wuov deix duqv zueiz aqv.”

⁴¹Wuov deix ziepc dauh sai-gorx haiz liuz naaiv deix sic, ziouc qiex jiez Yaagorpc caux Yo^han.

⁴²Yesu heuc ninh mbuo yietc zungv daaih nzoih yaac gorngv, “Meih mbuo hiuv duqv Janx funx zoux ninh mbuo nyei domh jien wuov deix longc hatc maaz gunv ninh mbuo. Zoux hlo wuov deix longc hatc maaz hatc ninh mbuo.

⁴³Mv baac, meih mbuo maiv horpc zuqc hnangv naaic. Haaix dauh oix duqv zoux hlo, wuov dauh oix zuqc zoux meih mbuo nyei bou.

⁴⁴Haaix dauh oix zoux hlo jiex, wuov dauh oix zuqc zoux zuangx mienh nyei nouh.

⁴⁵Weic zuqc liemh yie, Baamh Mienh nyei Dorn, maiv zeiz daaih oix mienh fu-sux yie. Yie daaih fu-sux mienh yaac siev yie nyei maengc weic zuoqc mienh camv nzuonx.”

⁴⁶Ninh mbuo mingh taux Ye^li^ko Zingh. Yesu caux jienv ninh nyei sai-gorx, aengx caux jienv mienh camv cuotv zingh wuov zanc, maaih dauh m'zing maengh nyei mienh zueiz jienv jauv-hlen tov nyaanh. Dongh Ti^me^atc nyei dorn wuov dauh Mbaa^ti^me^atc.

⁴⁷Ninh haiz gorngv, jiex jauv wuov dauh se Naa^saa^letv Mungv nyei Yesu, ninh ziouc heuc jienv gorngv, “Ndaawitv Hungh nyei Zeiv-Fun, Yesu aah! Korv-lienh yie maah!”

⁴⁸Mienh camv nyei hemx ninh, mbuox ninh maiv dungx ko lo. Mv baac ninh jaa heuc gauh mbui deix, “Ndaawitv nyei Zeiv-Fun aah! Korv-lienh yie maah!”

⁴⁹Yesu ziouc dingh jienv yaac gorngv, “Heuc ninh daaih naaiv maah!” Ninh mbuo ziouc heuc wuov dauh m'zing maengh nyei mienh. Ninh mbuo gorngv, “Gunv bungx hnyouv aqv. Jiez sin daaih. Ninh heuc meih aqv.”

⁵⁰Mbaa^ti^me^atc ziouc jaiv guangc ninh nyei domh lui, nquaqv sin daaih, mingh taux Yesu wuov.

⁵¹Yesu naaic ninh, “Meih oix yie tengx haaix nyungc meih?” M'zing maengh mienh dau, “Fin-Saeng aac, yie oix haih mangc duqv buatc.”

⁵²Yesu mbuox ninh, “Gunv mingh aqv. Laaix meih sienx yie, meih nyei m'zing ziouc longx.” Ninh liemh zeih haih mangc duqv buatc ziouc gan jienv Yesu mingh mi'aqv.