Read Iu Mien Maako 14 Bible Online

Maako 14 - Iu Mien bible

Maako 14

¹Aengx maaih i hnoi hnangv ziouc taux Siex Maengc Zipv caux Maiv An Bingv nyei Njuov nyei Zipv. Sai mienh bieiv caux njaaux leiz nyei fin-saeng daav za'eix hnangv haaix nor haih bingx jienv zorqv Yesu daix guangc.

²Ninh mbuo gorngv, “Naaiv deix jiex zipv nyei hnoi gu'nyuoz, mbuo maiv dungx gaengh zorqv. Gamh nziex zuangx mienh haih lunc nzengc mv bei.”

³Yesu yiem Mbe^taa^ni Laangz, butv jiex gomh huv baengc wuov dauh Simon nyei biauv. Nyanc jienv hnaangx wuov zanc, maaih dauh m'sieqv dorn dorh norm baengh [39] dapv buangv jaaix haic nyei naa^ndaa youh daaih. Ninh mborqv huv baengh yaac dox naaiv deix youh ndaang hietv Yesu nyei m'nqorngv.

⁴Maaih deix yiem wuov nyei mienh qiex jiez haic. Laanh ziouc mbuox laanh, “Baeqc baeqc zaaux youh ndaang guangc zoux haaix nyungc?

⁵Naaiv deix youh ndaang maaic duqv faam-baeqv hnoi gong-zinh nyei nyaanh[40] bun mienh jomc mienh niaa.” Ninh mbuo ziouc gorngv hniev nyei bun wuov dauh m'sieqv dorn.

⁶Mv baac Yesu gorngv, “Maiv dungx gorngv ninh maah! Meih mbuo zoux haaix nyungc la'nyauv ninh? Ninh hnangv naaiv nor zoux bun yie se longx haic aqv.

⁷Meih mbuo zanc-zanc maaih mienh jomc mienh caux meih mbuo yiem. Haaix zanc oix zoux longx bun ninh mbuo se zoux duqv nyei. Mv baac meih mbuo maiv duqv yie yietc liuz caux meih mbuo yiem.

⁸Naaiv dauh m'sieqv dorn, ei ninh haih zoux nyei, ninh ziouc zoux aqv. Ninh dox youh ndaang hietv yie nyei sin, ninh jaa-ndaangc zoux weic liuc leiz zangx yie.

⁹Yie gorngv zien mbuox meih mbuo, maiv gunv yiem lungh ndiev haaix norm dorngx zunh kuv fienx, mienh oix gorngv naaiv dauh m'sieqv dorn zoux nyei jauv-louc weic jangx taux ninh.”

¹⁰Yesu nyei ziepc nyeic dauh sai-gorx maaih dauh, mbuox heuc Yu^ndaatc I^saa^kaa^li^otc. Yu^ndaatc mingh lorz sai mienh bieiv, oix zorqv Yesu maaic bun ninh mbuo.

¹¹Sai mienh bieiv haiz ninh hnangv naaiv nor gorngv, ninh mbuo a'hneiv haic yaac laengz bun nyaanh ninh. Yiem naaic daaih, Yu^ndaatc ziouc lorz qangx zorqv Yesu jiu bun ninh mbuo.

¹²Jiex Maiv An Bingv nyei Njuov nyei Zipv daauh hnoi, dongh daix ba'gi yungh dorn nyanc Siex Maengc Zipv wuov hnoi, sai-gorx mbuo naaic Yesu, “Sai-Diex oix yie mbuo yiem haaix mbenc Siex Maengc Zipv nyei nyanc hopv bun Sai-Diex nyanc?”

¹³Yesu ziouc paaiv i dauh sai-gorx mingh yaac mbuox ziangx ninh mbuo, “Meih mbuo oix zuqc bieqc zingh ziouc maaih dauh mienh ndaam jienv nie-ha'louh zaangh jienv wuom nyei, daaih buangh meih mbuo. Oix zuqc gan ninh mingh aqv.

¹⁴Ninh bieqc haaix norm biauv, oix zuqc naaic gaax biauv-ziouv, ‘Sai-Diex naaic, ninh [41] caux ninh nyei sai-gorx oix zuqc yiem haaix qongx biauv nyanc Siex Maengc Zipv nyei hnaangx?’

¹⁵Biauv-ziouv ziouc dorh meih mbuo faaux mingh mangc gu'nguaaic wuov nzangh biauv, maaih qongx jangv nyei. Nyungc-nyungc maaih nzoih. Meih mbuo yiem naaic weic mbuo mbenc aqv.”

¹⁶Sai-gorx mbuo ziouc cuotv jauv mingh aqv. Bieqc zingh mingh, buatc nyungc-nyungc doix-diuc Yesu gorngv nyei waac. Ninh mbuo ziouc yiem wuov mbenc Siex Maengc Zipv nyei hnaangx.

¹⁷Lungh maanz-hmuangx, Yesu caux ninh nyei ziepc nyeic dauh sai-gorx daaih.

¹⁸Nyanc jienv hnaangx wuov zanc, Yesu gorngv, “Yie gorngv zien mbuox meih mbuo, yiem meih mbuo mbu'ndongx maaih dauh oix maaic yie, dongh yietc dauh caux yie juangc dieh nyanc hnaangx nyei mienh.”

¹⁹Sai-gorx mbuo nzauh haic ziouc yietc dauh yietc dauh nyei naaic Yesu, “Maiv zeiz yie saah?”

²⁰Yesu dau, “Se meih mbuo ziepc nyeic dauh nyei yietc dauh, dongh caux yie juangc nzormc guoqv njuov nyei yietc dauh.

²¹Yie, Baamh Mienh nyei Dorn, oix zuqc guei seix, hnangv Ging-Sou gorngv nor. Mv baac maaic yie wuov dauh zungv oix zuqc kouv aqv. Ninh maiv dungx cuotv seix gauh longx.”

²²Nyanc jienv hnaangx wuov zanc, Yesu zorqv njuov daaih, laengz zingh liuz Tin-Hungh, ziouc maeqv nqoi bun ninh nyei sai-gorx yaac gorngv, “Zipv jienv aqv. Naaiv se yie nyei sin.”

²³Yesu aengx zorqv zaanv a'ngunc diuv daaih, laengz zingh Tin-Hungh yaac cunv bun ninh mbuo hopv. Ninh mbuo yietc zungv ziouc juangc wuov norm zaanv hopv.

²⁴Yesu aengx mbuox ninh mbuo, “Naaiv se yie nyei nziaamv weic liepc jiez Tin-Hungh nyei ngaengc waac. Se weic mienh camv liouc cuotv daaih.

²⁵Yie gorngv zien mbuox meih mbuo, yiem naaiv mingh, yie maiv hopv naaiv a'ngunc diuv. Zuov taux yiem Tin-Hungh nyei guoqv wuov norm hnoi yie caux meih mbuo siang-hopv jiex.” [42]

²⁶Ninh mbuo baaux liuz nzung ziouc cuotv daaih, mingh wuov Ga'lanv Mbong.

²⁷Yesu gorngv mbuox ninh nyei sai-gorx, “Meih mbuo yietc zungv oix guangc jienv yie biaux, weic zuqc Ging-Sou fiev jienv gorngv, ‘Tin-Hungh [43] oix daix ba'gi yungh nyei ziouv, ba'gi yungh ziouc nzaanx nzengc mi'aqv.’

²⁸Mv baac yie daic mingh Tin-Hungh aengx bun yie nangh daaih, yie ziouc mingh Gaa^li^li Saengv ndaangc meih mbuo.”

²⁹Bide mbuox Yesu, “Sai-Diex aac, maiv gunv ninh mbuo yietc zungv guangc meih, yie maiv guangc.”

³⁰Yesu mbuox Bide, “Yie gorngv zien mbuox meih, ih muonz, jai maiv gaengh nqaaix i nzunc, meih zungv maiv nyiemc yie buo nzunc.”

³¹Bide aengx gorngv gauh ngaengc, “Maiv gunv yie zuqc caux Sai-Diex daic, yie yietc liuz nyiemc, maiv guangc meih.” Wuov deix sai-gorx yietc zungv yaac fih hnangv nyei gorngv.

³²Ninh mbuo ziouc mingh taux norm dorngx, mbuox heuc Getc^se^maa^ni. Yesu mbuox ninh nyei sai-gorx, “Meih mbuo zueiz jienv naaiv zuov yie daux gaux oc.”

³³Ninh ziouc dorh Bide, Yaagorpc, Yo^han caux jienv ninh mingh. Wuov zanc Yesu haiz hnyouv mun, nzauh duqv kouv haic.

³⁴Yesu mbuox ninh mbuo, “Yie haiz za'gengh! nzauh haic, hnangv haih daic nyei nor. Meih mbuo yiem naaiv ging hnyouv zuov jienv oc.”

³⁵Yesu aengx jiex mingh deix ziouc mbaapv njiec ndau daux gaux tov Tin-Hungh se gorngv haih nor, bun ninh haih simv ndutv wuov norm siouc kouv nyei ziangh hoc.

³⁶Ninh gorngv, “Aa Die aah! Aa Die! Maanc sic die haih zoux nyei. Tov zorqv nqoi yie oix zuqc hopv naaiv norm zaanv. [44] Mv baac maiv dungx ei yie nyei eix. Oix zuqc ei die nyei eix hnangv.”

³⁷Yesu daux gaux liuz, ziouc nzuonx daaih buatc wuov deix buo dauh sai-gorx m'njormh nzengc mi'aqv. Ninh mbuox Bide, “Simon aah! Meih m'njormh mi'aqv? Meih maiv haih ging jienv zuov yietc norm ziangh hoc fai?

³⁸Oix zuqc ging jienv hnyouv daux gaux, tov Tin-Hungh maiv dungx bun meih mbuo buangh zuqc seix hnyouv nyei sic. Meih mbuo nyei hnyouv oix zoux horpc, mv baac sin zaangc mau haic.”

³⁹Yesu aengx mingh daux gaux nzunc, yaac hnangv zinh ndaangc wuov nzunc nor gorngv.

⁴⁰Ninh aengx nzuonx taux sai-gorx wuov, buatc ninh mbuo m'njormh mi'aqv, weic zuqc m'zing nyuix! haic, nungx maiv nqoi. Ninh mbuo yaac maiv hiuv duqv oix zuqc hnangv haaix nor dau Yesu.

⁴¹Yesu aengx nzuonx da'faam nzunc, mbuox ninh mbuo, “Meih mbuo corc yiem naaic bueix m'njormh hitv kuonx? Gaux aqv. Ziangh hoc taux aqv. Yie, Baamh Mienh nyei Dorn, zuqc jiu bun yiem zuiz-mienh nyei buoz-ndiev.

⁴²Jiez sin daaih, mbuo mingh aqv. Mangc gaax wuov! Maaic yie wuov dauh mienh daaih taux aqv.”

⁴³Yesu gorngv waac zungv maiv gaengh setv, ziepc nyeic dauh sai-gorx nyei yietc dauh, mbuox heuc Yu^ndaatc, liemh zeih daaih taux aqv. Aengx maaih sai mienh bieiv caux njaaux leiz nyei fin-saeng caux mienh gox paaiv daaih nyei mienh camv, dorh jienv nzuqc ndaauv, nanv jienv ndiangx-ndonx, gan jienv daaih.

⁴⁴Maaic Yesu wuov dauh jaa-ndaangc mbuox ziangx wuov deix, ninh oix zoux norm jangx-hoc bun ninh mbuo hiuv duqv Yesu. Ninh gorngv, “Yie zom haaix dauh, se dongh meih mbuo oix zorqv wuov dauh aqv. Zorqv ninh, goux longx, ken jienv mingh aqv.”

⁴⁵Yu^ndaatc yietv taux ziouc baeng zaqc nyei mingh Yesu wuov yaac gorngv, “Sai-Diex aah!” Aengx zom ninh nyei hmien.

⁴⁶Wuov deix mienh ziouc njiec buoz zorqv Yesu qam jienv aqv.

⁴⁷Mv baac maaih dauh souv ga'hlen nyei mienh baeng ninh nyei nzuqc ndaauv cuotv, hngaqv domh sai mienh nyei nouh, pai zuqc nouh nyei yietc bung m'normh ndutv mingh.

⁴⁸Yesu doix ninh mbuo gorngv, “Meih mbuo buatc yie hnangv zaqc baeng cingx daaih dorh jienv nzuqc ndaauv caux ndiangx-ndonx daaih zorqv yie?

⁴⁹Yie hnoi-hnoi caux meih mbuo yiem zaangc Tin-Hungh nyei biauv njaaux mienh, meih mbuo yaac maiv zorqv yie. Mv baac fiev jienv Ging-Sou nyei waac oix zuqc cuotv daaih doix-diuc.”

⁵⁰Sai-gorx mbuo yietc zungv ziang naaic guangc jienv ninh biaux nzengc mi'aqv.

⁵¹Maaih dauh houh saeng, kungx pongx kuaaiv la'maah ndie, gan jienv Yesu mingh. Wuov deix mienh ziouc oix zorqv ninh,

⁵²mv baac ninh guangc jienv la'maah ndie wuov, laengh gaengv nyei biaux.

⁵³Zorqv Yesu wuov deix dorh Yesu mingh domh sai mienh nyei biauv. Zuangx sai mienh bieiv caux mienh gox caux njaaux leiz nyei fin-saeng yaac gapv zunv wuov.

⁵⁴Bide gan jienv mingh mv baac leih go deix nyei, ziouc taux domh sai mienh nyei biauv. Ninh bieqc laatc gu'nyuoz, caux zuov biauv nyei baeng zueiz jienv nzaaux douz.

⁵⁵Sai mienh bieiv caux Gunv Sic Wuic nyei zuangx mienh oix lorz zorng-zengx gox Yesu weic daix ninh, mv baac lorz maiv duqv haaix nyungc zorng-zengx.

⁵⁶Maaih mienh camv nyei zoux jaav zorng-zengx gox ninh, mv baac ninh mbuo gorngv nyei waac maiv doix.

⁵⁷Aengx maaih deix mienh souv jiez daaih zoux jaav zorng-zengx gox Yesu. Ninh mbuo gorngv,

⁵⁸“Yie mbuo haiz ninh gorngv, ‘Yie oix zorqv mienh nyei buoz zoux daaih naaiv norm zaangc Tin-Hungh nyei biauv caeqv nzengc. Nqa'haav buo hnoi yie aengx ganh ceix norm, dongh maiv zeiz mienh nyei buoz zoux nyei.’+”

⁵⁹Mv baac liemh ninh mbuo gorngv naaiv deix zorng-zengx nyei waac maiv doix.

⁶⁰Domh sai mienh yiem zuangx mienh nyei nza'hmien souv jiez daaih naaic Yesu, “Naaiv deix mienh hnangv naaiv nor gox meih, meih maiv dau fai?”

⁶¹Mv baac Yesu maiv ko lo. Yietc joux yaac maiv dau. Domh sai mienh aengx naaic Yesu, “Wuov nyungc, meih zoux Giduc, dongh mienh ceng wuov dauh Tin-Hungh nyei Dorn fai?”

⁶²Yesu dau, “Zeiz nyei. Meih mbuo yietc zungv yaac oix duqv buatc yie, Baamh Mienh nyei Dorn, zueiz jienv Nernh Jiex nyei Tin-Hungh nyei mbiaauc maengx, yaac yiem wuov lungh nyei mbuonx njiec daaih.”

⁶³Domh sai mienh haiz naaiv deix waac ziouc betv ninh ganh nyei lui yaac gorngv, “Mbuo maiv zuqc lorz haaix dauh zoux zorng-zengx aqv.

⁶⁴Meih mbuo haiz ninh ki Tin-Hungh. Meih mbuo oix hnangv haaix nor dingc ninh?” Ninh mbuo yietc zungv dingc ninh dorngc. Zic duqv daic aqv.

⁶⁵Maaih deix yiem wuov nyei mienh ziouc tuiv wuom-nzuih naetv Yesu, aengx buang jienv ninh nyei hmien, mborqv ninh, yaac gorngv, “Cai gaax! Haaix dauh mborqv meih?” Baeng yaac mbaix ninh nyei hmien.

⁶⁶Bide corc yiem jienv ga'ndiev, laatc gu'nyuoz, maaih domh sai mienh nyei yietc dauh m'sieqv bou daaih.

⁶⁷Ninh buatc Bide yiem wuov nzaaux douz ziouc nuqv-nuqv nyei mangc jienv ninh gorngv, “Meih yaac gan wuov dauh Naa^saa^letv Mienh, Yesu.”

⁶⁸Mv baac Bide maiv nyiemc. Ninh dau, “Yie maiv hiuv yaac maiv mengh baeqc meih gorngv haaix nyungc.” Bide ziouc cuotv taux laatc gaengh. Wuov zanc jai ziouc nqaaix aqv. [45]

⁶⁹Wuov dauh m'sieqv bou buatc ninh yiem wuov aengx mbuox souv ga'hlen wuov deix mienh, “Naaiv dauh mienh benx wuov guanh mienh nyei yietc dauh.”

⁷⁰Mv baac Bide aengx maiv nyiemc. Yietc zanc jiex, souv ga'hlen wuov deix mienh aengx gox Bide gorngv, “Meih za'gengh benx wuov guanh mienh nyei yietc dauh aqv, weic zuqc meih se Gaa^li^li Mienh.”

⁷¹Bide ziouc ndouv jiez zioux gorngv, “Se gorngv yie gorngv maiv zien nor, laengz bun Tin-Hungh dingc yie nyei zuiz aqv. Yie za'gengh! maiv hiuv duqv meih mbuo gorngv wuov laanh mienh.”

⁷²Liemh zeih jai ziouc nqaaix da'nyeic nzunc. Bide jangx zuqc Yesu mbuox jiex ninh, “Jai maiv gaengh nqaaix i nzunc, meih maiv nyiemc yie buo nzunc.” Bide jangx zuqc wuov deix waac ziouc nyiemv duqv kouv haic.