Read Iu Mien Maako 8 Bible Online

Maako 8 - Iu Mien bible

Maako 8

¹Yiem wuov deix hnoi mienh camv haic aengx gapv zunv. Zoux gau, ninh mbuo maiv maaih haaix nyungc nyanc aqv. Yesu ziouc heuc ninh nyei sai-gorx mbuo daaih yaac mbuox ninh mbuo,

²“Yie korv-lienh haic naaiv deix mienh. Ninh mbuo daaih caux yie yiem duqv buo hnoi aqv. Ih zanc yaac maiv maaih haaix nyungc nyanc.

³Se gorngv yie bun ninh mbuo hnyouv sie jienv nzuonx biauv, nzauh heix taux ndaamv-jauv mau haic, haih king mv bei. Maaih deix yaac yiem go nyei daaih.”

⁴Ninh nyei sai-gorx mbuo dau, “Yiem naaiv deic-bung-huaang, haaix dauh haih lorz duqv ga'naaiv gaux bun ndongc naaic camv nyei mienh nyanc?”

⁵Yesu naaic ninh mbuo, “Meih mbuo maaih mbu'ziex norm njuov?” Ninh mbuo dau, “Maaih siec norm.”

⁶Yesu ziouc heuc zuangx mienh zueiz jienv wuov ndau. Ninh zorqv wuov deix siec norm njuov daaih laengz zingh liuz Tin-Hungh, aengx maeqv nqoi cunv bun sai-gorx dorh mingh bun nqoi zuangx mienh. Sai-gorx mbuo ziouc dorh mingh bun nqoi zuangx mienh aqv.

⁷Ninh mbuo aengx maaih i ziex dauh mbiauz-dorn. Yesu ziouc weic naaiv deix mbiauz laengz zingh liuz Tin-Hungh, ziouc mbuox sai-gorx mbuo bun nqoi zuangx mienh.

⁸Zuangx mienh nyanc beuv nzengc. Sai-gorx mbuo ziouc mingh siou nyanc zengc wuov deix daaih dapv buangv siec norm ndaan.

⁹Nyanc nyei mienh leih maiv go biei cin laanh. Yesu heuc zuangx mienh bun nzaanx liuz,

¹⁰ziouc caux ninh nyei sai-gorx liemh zeih bieqc nzangv mingh Ndaan^maa^nu^taa Deic.[19]

¹¹Maaih deix Faa^li^si Mienh daaih lorz Yesu, ziouc jiez gorn caux Yesu nzaeng. Ninh mbuo oix seix ninh cingx daaih tov ninh bun norm yiem tin-dorngh daaih nyei jangx-hoc.

¹²Yesu tauv jienv domh qiex gorngv, “Naaiv doic mienh weic haaix diuc tov norm jangx-hoc? Yie gorngv zien mbuox meih mbuo, yie maiv bun jangx-hoc meih mbuo ih jaax nyei mienh mangc.”

¹³Yesu ziouc leih nqoi ninh mbuo mi'aqv. Aengx bieqc nzangv nzaeng jienv mingh wuov ngaanc ziqc koiv-dorn.

¹⁴Sai-gorx mbuo la'kuqv maiv dorh njuov mingh. Ninh mbuo yiem wuov nzangv kungx maaih nduqc norm njuov hnangv.

¹⁵Yesu mbuox ninh mbuo, “Oix zuqc faix fim, mbungh jienv Faa^li^si Mienh nyei bingv caux Helotv Hungh nyei bingv.”

¹⁶Sai-gorx mbuo, laanh caux laanh gorngv, “Sai-Diex hnangv naaiv nor gorngv weic zuqc mbuo maiv maaih njuov mv bei?”

¹⁷Yesu hiuv duqv ninh mbuo hnangv haaix nor gorngv, ninh ziouc naaic ninh mbuo, “Meih mbuo weic haaix diuc caangh laangh gorngv maiv maaih njuov? Meih mbuo corc maiv mengh baeqc, maiv bieqc hnyouv fai? Meih mbuo za'gengh ndongc naaic hngongx?

¹⁸Meih mbuo maaih m'zing yaac mangc maiv buatc? Maaih m'normh yaac muangx maiv haiz? Meih mbuo maiv jangx fai?

¹⁹Yie maeqv nqoi biaa norm njuov bun biaa cin laanh mienh nyanc wuov zanc, meih mbuo siou nyanc zengc nyei, duqv mbu'ziex ndaan buangv?” Ninh mbuo dau, “Duqv ziepc nyeic ndaan.”

²⁰Yesu aengx naaic, “Yie maeqv nqoi siec norm njuov bun biei cin laanh mienh nyanc wuov nzunc, meih mbuo siou nyanc zengc wuov deix duqv mbu'ziex ndaan?” Ninh mbuo dau, “Duqv siec ndaan.”

²¹Yesu aengx naaic, “Hnangv naaic, meih mbuo corc maiv gaengh mengh baeqc fai?”

²²Yesu mbuo daaih taux Mbetc^sai^ndaa Laangz, maaih deix mienh ken dauh m'zing maengh nyei mienh daaih lorz Yesu, tov Yesu maan ninh.

²³Yesu ken jienv wuov dauh m'zing maengh nyei mienh cuotv ga'nyiec ziqc laangz ziouc tuiv wuom-nzuih zaah jienv ninh nyei m'zing, yaac longc buoz maan jienv naaic ninh, “Meih mangc duqv buatc deix haaix nyungc fai?”

²⁴Wuov dauh mienh cau hmien daaih mangc yaac gorngv, “Yie buatc mienh mv baac buatc ninh mbuo hnangv ndiangx nor, yangh mingh yangh daaih.”

²⁵Yesu aengx maan nzunc ninh nyei m'zing. Ninh ziouc qaqv mangc. Naaiv nzunc ziouc mangc duqv buatc aqv. Haaix nyungc yaac buatc duqv zien.

²⁶Yesu heuc ninh nzuonx biauv aengx hatc ninh, “Maiv dungx aengx bieqc laangz aqv oc.”[20]

²⁷Jiex mingh, Yesu caux ninh nyei sai-gorx mbuo mingh Si^saa^li^yaa Fi^lipv^poi Zingh nyei fiuv-laangz. Gan jauv mingh wuov zanc, Yesu naaic sai-gorx mbuo, “Mienh gorngv yie dongh haaix dauh?”

²⁸Ninh mbuo dau, “Maaih deix gorngv meih dongh tengx mienh jiex wuom nyei leiz wuov dauh Yo^han. Maaih deix gorngv, E^li^yaa. Aengx maaih deix gorngv, benx dauh douc waac mienh.”

²⁹Yesu aengx naaic ninh mbuo, “Meih mbuo ni? Meih mbuo gorngv yie dongh haaix dauh?” Bide dau, “Meih dongh Giduc wuov dauh.”

³⁰Yesu ziouc hatc ninh mbuo, “Cin-maanc maiv dungx mbuox mienh yie dongh haaix dauh.”

³¹Yiem naaic daaih Yesu jiez gorn njaaux ninh nyei sai-gorx mbuo, “Yie, Baamh Mienh nyei Dorn, oix zuqc siouc camv-nyungc kouv. Mienh gox caux sai mienh bieiv caux njaaux leiz nyei fin-saeng oix nqemh yie. Yie yaac oix zuqc mienh daix daic mv baac da'faam hnoi yie aengx nangh daaih.”

³²Ninh gorngv naaiv deix sic mengh nyei. Bide ziouc ken Yesu mingh pien deix kuinx ninh.

³³Mv baac Yesu huin nzuonx mangc jienv sai-gorx mbuo, yaac gorngv Bide, “Saadaan aah! Biaux nqoi maah! Meih hnamv nyei sic se maiv zeiz hnangv Tin-Hungh hnamv. Se hnangv baamh mienh hnamv cuotv nyei sic hnangv.”

³⁴Yesu ziouc heuc zuangx mienh caux ninh nyei sai-gorx mbuo daaih zunv yaac mbuox ninh mbuo, “Haaix dauh oix gan yie mingh oix zuqc siev jienv ninh ganh, ndaam jienv ninh nyei ziepc nzaangc jaax, gan yie mingh.

³⁵Haaix dauh kungx hnamv njoux ninh ganh nyei maengc hnangv, wuov dauh nyei maengc ziouc zuqc guangc. Mv baac haaix dauh weic yie yaac weic kuv fienx guangc ninh nyei maengc, wuov dauh ziouc njoux duqv ninh nyei maengc.

³⁶Haaix dauh duqv nzengc lungh ndiev nyei ga'naaiv mv baac zuqc guangc ninh nyei maengc, wuov dauh duqv haaix nyungc maaih lamh longc?

³⁷Ninh maaih haaix nyungc haih tiuv duqv ninh nyei maengc nzuonx?

³⁸Yiem naaiv doic orqv haic, hieh hnyouv nyei mienh,[21] se gorngv haaix dauh nyaiv yie yaac nyaiv yie njaaux nyei waac, yie, Baamh Mienh nyei Dorn, yiem yie nyei Die nyei njang-laangc, yaac caux cing-nzengc nyei fin-mienh daaih wuov zanc, ziouc nyaiv wuov dauh aqv.”