Read Iu Mien Lugaa 1 Bible Online

Lugaa 1 - Iu Mien bible

Lugaa 1

¹Zien oix nyei domh gorx, Te^o^fi^latv aac, Yiem yie mbuo gu'nyuoz cuotv liuz nyei sic maaih mienh camv nyei fiev jienv.

²Zunh doz mienh nyei m'zing buatc naaiv deix sic yiem gorn cuotv wuov zanc yaac zunh mbuox yie mbuo, mienh ziouc ei jienv fiev.

³Naaiv deix jauv yiem gorn daaih yietc zungv yie ganh dimv liuz ziouc zueih yietv zueih nyeic nyei fiev jienv bun meih.

⁴Hnangv naaiv, meih haih hiuv duqv mienh njaaux jiex meih wuov deix waac yietc zungv zien nyei.

⁵Yiem Yu^ndie nyei hungh, Helotv, gunv nyei ziangh hoc, maaih dauh sai mienh, mbuox heuc Se^kaa^li^yaa, benx Aa^mbi^yaa sai mienh nyei guanh. Ninh nyei auv, E^li^saa^mbetc, yaac zoux Aalon sai mienh nyei zeiv-fun.

⁶Ziux Tin-Hungh mangc, ninh mbuo i hmuangv benx kuv mienh, muangx Ziouv hatc nyei yietc zungv waac caux leiz. Maiv maaih dorngx nqemh aqv.

⁷Mv baac ninh mbuo maiv maaih fu'jueiv weic zuqc E^li^saa^mbetc maiv haih maaih. Ninh mbuo i hmuangv yaac gox haic aqv.

⁸Maaih hnoi Se^kaa^li^yaa yiem zaangc Tin-Hungh nyei biauv zoux sai mienh nyei gong ei ninh mbuo nyei luonh baan hnoi zoux.

⁹Dongh naaic hnoi, ei sai mienh nyei leiz dingc daaih, ndortv zuqc Se^kaa^li^yaa oix zuqc bieqc Ziouv nyei biauv buov hung.

¹⁰Ninh buov hung nyei ziangh hoc, zuangx mienh yiem ga'nyiec daux gaux.

¹¹Wuov zanc maaih dauh Ziouv nyei fin-mienh hinc cuotv daaih souv jienv buov hung dieh mbiaauc maengx.

¹²Se^kaa^li^yaa yietv buatc ziouc haeqv ninh hnyouv huaang nzengc, gamh nziex haic.

¹³Fin-mienh mbuox ninh, “Se^kaa^li^yaa aah! Meih maiv dungx gamh nziex oc. Dongh meih tov Tin-Hungh wuov deix waac, Tin-Hungh haiz mi'aqv. Meih nyei m'sieqv dorn, E^li^saa^mbetc, oix maaih dauh dorn. Oix zuqc gan ninh cuotv mbuox heuc Yo^han.

¹⁴Meih ziouc njien-youh, orn-lorqc haic. Naaiv dauh fu'jueiv cuotv seix, mienh camv yaac a'hneiv haic.

¹⁵Ei Ziouv mangc, naaiv dauh fu'jueiv yaac zoux dauh maaih mengh hoc nyei mienh. Ninh yietc seix maiv hopv a'ngunc diuv fai haih nquin mienh nyei ga'naaiv. Ninh cuotv seix daaih ziouc maaih Singx Lingh buangv nzengc ninh nyei hnyouv aqv.

¹⁶Ninh oix dorh I^saa^laa^en Mienh camv nyei aengx nzuonx daaih lorz Ziouv, ninh mbuo nyei Tin-Hungh.

¹⁷Ninh oix mingh ndaangc Ziouv, yaac maaih hatc maaz, maaih qaqv hnangv E^li^yaa nor. Ninh oix tengx zoux die nyei mienh caux ninh mbuo nyei fu'jueiv horpc hnyouv daaih. Maiv muangx waac nyei mienh, ninh yaac haih tengx goiv hnyouv daaih gan doz-leiz. Ninh yaac oix tengx Tin-Hungh nyei mienh liuc leiz zipv Ziouv.”

¹⁸Se^kaa^li^yaa naaic fin-mienh, “Meih hnangv naaic gorngv, yie fungc haih hiuv duqv zien? Yie gox haic aqv. Yie nyei m'sieqv dorn yaac gox haic.”

¹⁹Fin-mienh dau, “Yie se Gaa^mbe^lien, dongh souv jienv Tin-Hungh nyei nza'hmien fu-sux ninh. Tin-Hungh paaiv yie daaih douc naaiv deix kuv fienx mbuox meih.

²⁰Meih maiv sienx yie nyei waac, mv baac taux horpc zuqc cuotv wuov zanc za'gengh oix ei jienv yie nyei waac cuotv daaih aqv lorqc. Laaix meih maiv sienx yie nyei waac, meih oix zuqc hngongx mingh. Zuov taux naaiv deix sic cuotv liuz, cingx daaih haih gorngv waac.”

²¹Zuangx mienh corc yiem ga'nyiec maengx zuov jienv Se^kaa^li^yaa. Ninh mbuo maiv mengh baeqc ninh weic haaix diuc yiem zaangc Tin-Hungh nyei biauv gu'nyuoz ndongc naaic lauh.

²²Zoux gau, Se^kaa^li^yaa cuotv daaih maiv haih caux ninh mbuo gorngv waac. Zuangx mienh ziouc hiuv duqv ninh yiem zaangc Tin-Hungh nyei biauv gu'nyuoz buatc hinc yaangh nyei sic. Ninh kungx longc buoz uv hnangv. Yietc joux waac yaac maiv haih gorngv aqv.

²³Se^kaa^li^yaa yiem zaangc Tin-Hungh nyei biauv zoux ziangx ninh nyei buonc gong ziouc nzuonx mi'aqv.

²⁴Nqa'haav E^li^saa^mbetc maaih jienv sin. Ninh ziouc yiem biaa hlaax nyieqc biauv, maiv mingh haaix ndau.

²⁵Ninh gorngv, “Ih zanc Ziouv a'hneiv yie, tengx yie haih maaih fu'jueiv, yie ziouc maiv zuqc nyaiv mienh aqv.”

²⁶E^li^saa^mbetc maaih jienv sin duqv juqv hlaax nyieqc, Tin-Hungh paaiv Gaa^mbe^lien wuov dauh fin-mienh mingh taux Gaa^li^li Saengv, Naa^saa^letv Mungv,

²⁷douc fienx mbuox dauh sieqv,[1] mbuox heuc Maa^li^yaa. Maaih dauh Ndaawitv Hungh nyei Zeiv-Fun, mbuox heuc Yosepv, daaih gorngv ziangh ninh mi'aqv.

²⁸Fin-mienh mingh taux Maa^li^yaa wuov mbuox ninh, “Maa^li^yaa aac, baengh orn nyei saah? Ziouv caux meih yiem yaac ceix en bun meih.”

²⁹Maa^li^yaa haiz naaiv deix waac, liemh zeih hnyouv huaang nzengc, hnamv maiv hiuv fin-mienh weic haaix diuc hnangv naaiv nor gorngv mv bei.

³⁰Fin-mienh aengx gorngv mbuox ninh, “Maa^li^yaa aac, meih maiv dungx gamh nziex oc. Tin-Hungh ceix en bun meih.

³¹Meih oix maaih norm sin, yungz duqv dauh dorn. Meih yaac oix zuqc tengx ninh cuotv mbuox heuc Yesu.

³²Ninh oix duqv zoux hlo, yaac duqv heuc benx Yiem Hlang Jiex Wuov Dauh nyei Dorn. Ziouv Tin-Hungh oix bun ninh nzipc ninh nyei ong-taaix-ngaeqv, Ndaawitv, nyei weic.[2]

³³Ninh oix yietc liuz gunv Yaakopv nyei zeiv-fun. Ninh nyei hungh hoc yietc liuz maiv haih jiex.”

³⁴Maa^li^yaa naaic gaax fin-mienh, “Yie liemh maiv caux haaix dauh m'jangc dorn bueix jiex. Hnangv haaix nor haih maaih sin?”

³⁵Fin-mienh aengx dau, “Singx Lingh oix njiec daaih yiem meih. Yiem Hlang Jiex nyei Tin-Hungh nyei qaqv oix nzie jienv meih. Hnangv naaiv meih ziouc duqv dauh maiv maaih zuiz, cing-nzengc nyei fu'jueiv, heuc Tin-Hungh nyei Dorn.

³⁶Meih hnamv mangc gaax meih nyei cien-ceqv, E^li^saa^mbetc. Mienh gorngv ninh maiv haih maaih gu'nguaaz. Ih zanc ninh ndongc naaic gox mv baac ninh zungv maaih jienv sin duqv juqv hlaax nyieqc aqv loh!

³⁷Maiv maaih haaix nyungc Tin-Hungh maiv haih zoux.”

³⁸Maa^li^yaa dau, “Yie zoux Ziouv nyei bou. M'daaih oix zuqc hnangv meih gorngv nor aqv.” Gorngv liuz naaiv deix waac, fin-mienh mingh mi'aqv.

³⁹Nqa'haav maiv lauh Maa^li^yaa ziouc mbenc ga'naaiv gaanv jienv cuotv jauv mingh Yu^ndie Saengv, mbong zaangc nyei yietc norm mungv.

⁴⁰Mingh taux, ninh ziouc bieqc Se^kaa^li^yaa nyei biauv caux E^li^saa^mbetc gorngv wuic buangh waac.

⁴¹E^li^saa^mbetc yietv haiz Maa^li^yaa nyei qiex, gu'nguaaz yiem ga'sie dongz duqv seix haic. E^li^saa^mbetc yaac duqv Singx Lingh buangv nzengc hnyouv

⁴²ziouc heuc qiex mbui nyei gorngv, “Yiem zuangx m'sieqv dorn mbu'ndongx, Tin-Hungh ceix fuqv bun meih gauh camv jiex. Tin-Hungh yaac ceix fuqv bun meih maaih jienv naaiv dauh gu'nguaaz.

⁴³Yie weic haaix diuc duqv ndongc naaiv longx? Duqv yie nyei Ziouv nyei maa daaih caux yie nziaauc ni?

⁴⁴Yie yietv haiz meih nyei qiex, yie maaih jienv naaiv norm sin a'hneiv haic, ziouc liemh zeih dongz duqv seix haic.

⁴⁵Meih sienx Ziouv gorngv liuz wuov deix waac za'gengh oix cuotv daaih zien nyei, meih ziouc maaih orn-lorqc haic.”

⁴⁶Maa^li^yaa gorngv, “Yie nyei hnyouv ceng Ziouv weih hlo,

⁴⁷yie nyei Njoux Ziouv, Tin-Hungh bun yie nyei lingh wuonh njien-youh.

⁴⁸Yie zoux ninh nyei bou, maiv maaih haaix nyungc mengh hoc mv baac ninh corc jangx taux yie. Yiem naaiv mingh nqa'haav hingv, doic-doic mienh zungv oix gorngv yie duqv fuqv,

⁴⁹weic zuqc Maaih Domh Qaqv nyei Tin-Hungh ceix mbuoqc horngh haic nyei sic bun yie. Ninh nyei mbuox se cing-nzengc haic.

⁵⁰Ninh korv-lienh taaih ninh nyei mienh, yietc doic jiex yietc doic.

⁵¹Ninh sung ninh nyei buoz zoux cuotv domh sic, bun maux nyei mienh caux ninh mbuo nyei nyungc-nyungc za'eix faatv nzaanx nzengc mingh.

⁵²Zoux hlo nyei mienh, ninh tutv njiec weic, zoux faix wuov deix, ninh bouh faaux hlang.

⁵³Ngorc nyei mienh ninh ceix longx nyei ga'naaiv bun nyanc beuv, bun mienh maaih mienh kungx-buoz baeqc zaux nyei mingh.

⁵⁴Ninh ei ninh caux mbuo nyei ong-taaix laengz liuz nyei waac tengx ninh nyei bou, I^saa^laa^en. Ninh korv-lienh Apc^laa^ham, yaac yietc liuz korv-lienh Apc^laa^ham nyei zeiv-fun.”

⁵⁵

⁵⁶Maa^li^yaa caux E^li^saa^mbetc yiem aav lamh duqv buo hlaax nyieqc nyei dorngx, Maa^li^yaa ziouc nzuonx mi'aqv.

⁵⁷E^li^saa^mbetc maaih sin nyei ziangh hoc gaux, ninh ziouc yungz duqv dauh dorn.

⁵⁸Ninh nyei laangz zaangc mienh caux cien-ceqv haiz Ziouv hnangv naaiv nor korv-lienh ninh, yietc zungv ziouc lomh nzoih tengx ninh a'hneiv.

⁵⁹Gu'nguaaz cuotv seix daaih duqv hietc hnoi, oix jiex gaatv nyei leiz wuov zanc, mienh oix tengx gu'nguaaz cuotv mbuox heuc nitv ninh nyei die, Se^kaa^li^yaa.

⁶⁰Mv baac ninh nyei maa gorngv, “Maiv zeiz lorqc. Ninh nyei mbuox oix zuqc heuc Yo^han.”

⁶¹Wuov deix mienh gorngv mbuox ninh, “Meih nyei cien-ceqv nyei mbuox maiv maaih haaix dauh hnangv naaic nor heuc niaa.”

⁶²Gorngv liuz ninh mbuo ziouc longc buoz uv naaic gaax gu'nguaaz nyei die oix tengx ninh nyei dorn cuotv mbuox heuc haaix nyungc.

⁶³Se^kaa^li^yaa tov kuaaiv fiev nzaangc benv daaih fiev jienv gorngv, “Ninh nyei mbuox heuc Yo^han.” Zuangx mienh ziouc hnamv maiv mengh baeqc.

⁶⁴Se^kaa^li^yaa liemh zeih aengx haih gorngv cuotv waac daaih ziouc ceng Tin-Hungh.

⁶⁵Laangz zaangc mienh za'gengh gamh nziex haic. Naaiv deix sic nyei fienx nqa'haav sing buangv Yu^ndie Saengv, mbong zaangc nyei dorngx.

⁶⁶Haiz liuz nyei mienh zorqv naaiv deix sic an jienv hnyouv hnamv, “Aa, naaiv dauh fu'jueiv hlo daaih benx haaix nyungc mienh ni?” Weic zuqc mengh mengh baeqc baeqc nyei buatc jienv Ziouv[3] caux ninh yiem.

⁶⁷Yo^han nyei die, Se^kaa^li^yaa, duqv Singx Lingh buangv nzengc hnyouv ziouc douc waac gorngv,

⁶⁸“Mbuo oix zuqc ceng Ziouv, I^saa^laa^en Mienh nyei Tin-Hungh, weic zuqc ninh daaih zuoqc ninh nyei mienh nzuonx.

⁶⁹Ninh yiem ninh nyei bou, Ndaawitv, nyei zeiv-fun, weic mbuo liepc dauh maaih qaqv nyei Njoux Ziouv,[4]

⁷⁰hnangv loz-hnoi Tin-Hungh longc ninh nyei cing-nzengc douc waac mienh gorngv nyei waac.

⁷¹Tin-Hungh oix njoux mbuo leih ndutv mbuo nyei win-wangv, caux nzorng mbuo wuov deix mienh nyei buoz-ndiev.

⁷²Ninh gorngv ninh oix korv-lienh mbuo nyei ong-taaix, yaac zanc-zanc jangx jienv ninh laengz liuz wuov deix cing-nzengc nyei ngaengc waac.

⁷³Tin-Hungh laengz ngaengc waac bun mbuo nyei ong-taaix-ngaeqv, Apc^laa^ham.

⁷⁴Ninh gorngv ninh oix bun yiem mbuo nyei win-wangv nyei buoz-ndiev biaux cuotv daaih buoqc zaangc ninh, maiv zuqc gamh nziex haaix nyungc,

⁷⁵yaac bun mbuo yietc seix yiem ninh nyei nza'hmien cing-nzengc, zoux duqv horpc ninh nyei hnyouv.

⁷⁶Yie nyei dorn aac, meih nyei mbuox oix zuqc heuc Yiem Hlang Jiex Wuov Dauh nyei douc waac mienh, weic zuqc meih oix zuqc mingh ndaangc liuc leiz Ziouv nyei jauv.

⁷⁷Oix zuqc bun ninh nyei baeqc fingx hiuv duqv ninh mbuo duqv njoux se weic zuqc duqv ninh mbuo nyei zuiz guangc liuz.

⁷⁸Tin-Hungh korv-lienh mienh, ziouc oix bun njoux en njiec daaih, hnangv lungh ndorm nziouv nyei njang

⁷⁹ziux jienv yiem hmuangx nyei caux yiem zuqc daic nyei dongh linh gu'nyuoz wuov deix. Ninh yaac oix yienz mbuo yangh baengh orn nyei jauv.”

⁸⁰Naaiv dauh fu'jueiv gunv hlo, ninh nyei hnyouv gunv henv. Ninh yiem deic-bung-huaang zuov taux ziangh hoc ninh cuotv daaih bun I^saa^laa^en Mienh hiuv duqv ninh.