Read Iu Mien Lugaa 12 Bible Online

Lugaa 12 - Iu Mien bible

Lugaa 12

¹Naaiv deix ziangh hoc, maaih ziex cin laanh mienh daaih zunv muangx Yesu, laanh yaac caaiv zuqc laanh. Yesu caux ninh nyei sai-gorx mbuo gorngv ndaangc, “Oix zuqc faix fim Faa^li^si Mienh nyei bingv. Eix leiz se ninh mbuo beih zaqc hnyouv njuotv.

²Maiv maaih haaix nyungc gem jienv maiv zuqc cuotv yaangh. Maiv maaih haaix nyungc bingx jienv mienh maiv haih hiuv.

³Meih mbuo yiem hmuangx zong gorngv nyei waac, mienh yiem njang zong haih muangx duqv haiz. Yiem wuov gen gu'nyuoz bingx jienv gorngv nyei waac-sapv yaac oix maaih mienh yiem biauv-ngorh[38] zunh mbuox mienh.

⁴“Yie nyei gorx-youz aac, yie mbuox meih mbuo, meih mbuo maiv dungx gamh nziex kungx haih daix mbuo nyei sin wuov deix, nqa'haav maiv haih zoux haaix nyungc hoic.

⁵Yie oix donv meih mbuo, bun meih mbuo hiuv duqv oix zuqc gamh nziex haaix dauh. Oix zuqc gamh nziex Tin-Hungh. Ninh daix liuz mienh, corc maaih lingc zoi njiec deic nyuoqc. Yie mbuox meih mbuo, za'gengh oix zuqc gamh nziex Tin-Hungh.

⁶Biaa norm norqc meix maaic duqv i norm dongh zinh hnangv maiv zeiz? Mv baac Tin-Hungh corc maiv la'kuqv yietc norm naaiv deix norqc meix.

⁷Liemh meih mbuo nyei mba'biei zungv saauv nzengc mi'aqv. Hnangv naaic maiv dungx gamh nziex. Meih mbuo zungv gauh jaaix jiex norqc meix camv.

⁸“Yie mbuox meih mbuo, haaix dauh dorng zuangx nyiemc yie, yie Baamh Mienh nyei Dorn, ziouc yiem Tin-Hungh nyei fin-mienh nyei nza'hmien nyiemc wuov dauh.

⁹Mv baac haaix dauh maiv dorng zuangx nyiemc yie, yie, Baamh Mienh nyei Dorn, yiem Tin-Hungh nyei fin-mienh nyei nza'hmien maiv nyiemc wuov dauh aqv.

¹⁰“Haaix dauh gorngv doqc yie, Baamh Mienh nyei Dorn, Tin-Hungh haih guangc wuov dauh nyei zuiz. Mv baac haaix dauh gorngv doqc Singx Lingh, Tin-Hungh maiv guangc wuov dauh nyei zuiz.

¹¹“Ninh mbuo dorh meih mbuo mingh taux wuic dorngh, fai jien-fouv, fai maaih lingc nyei mienh, meih mbuo maiv dungx nzauh oix zuqc hnangv haaix nor dau, hnangv haaix nor gorngv.

¹²Taux wuov norm ziangh hoc Singx Lingh oix njaaux meih mbuo hiuv duqv hnangv haaix nor gorngv.”

¹³Yiem wuov guanh mienh maaih laanh mienh gorngv mbuox Yesu, “Fin-Saeng aac, tov mbuox yie nyei gorx zorqv yie nyei die paaiv bun yie nyei buonc jaa-dingh bun yie oc.”

¹⁴Yesu dau ninh, “Youz aah! Haaix dauh orn yie zoux bun-zorng mienh, zorqv meih mbuo nyei jaa-dingh ga'naaiv bun nqoi?”

¹⁵Yesu gorngv mbuox zuangx mienh, “Oix zuqc faix fim. Maiv dungx zoux hnyouv hlo mauv haaix nyungc. Maiv gunv ndongc haaix butv zoih, zien maengc maiv zeiz yiem naaiv deix ga'naaiv.”

¹⁶Yesu ziouc gorngv naaiv diuh waac-beiv mbuox ninh mbuo. “Maaih dauh butv-zoih mienh maaih lingh deic longx haic, zuangx duqv ga'naaiv camv.

¹⁷Naaiv dauh butv-zoih mienh hnamv daaih, ‘Oix zuqc hnangv haaix nor zoux mv bei? Yie siou daaih nyei ga'naaiv yie maiv maaih dorngx dapv duqv njiec.’

¹⁸Ninh aengx hnamv cuotv, ‘Aa, yie oix zuqc caeqv nqoi yie nyei loz-lamz, aengx ganh zoux gauh hlo, ziouc zorqv yie nyei laangh ziqc caux yietc zungv siou daaih nyei ga'naaiv dapv jienv.’

¹⁹Ninh aengx hnamv daaih, ‘Aa, yie maengc longx haic aqv. Nyungc-nyungc longx nyei ga'naaiv yie maaih gaux nyanc gaux hopv ziex hnyangx. Yie kungx bueix jienv nyanc, bueix jienv hopv, njien-youh a'nziaauc hnangv.’

²⁰“Mv baac Tin-Hungh gorngv mbuox ninh, ‘Ga'naaiv-hngongx aah! Ih muonz meih oix zuqc daic aqv. Meih siou daaih liouh meih ganh longc nyei ga'naaiv, naaiv nzunc oix benx haaix dauh nyei?’+”

²¹Yesu aengx gorngv setv mueiz waac, “Haaix dauh kungx oix siou jienv ga'naaiv camv liouh ninh ganh longc, se hnangv wuov dauh butv zoih nyei mienh hngongx mienh nor. Ei Tin-Hungh mangc, ninh se mienh jomc mienh.”

²²Yesu aengx mbuox ninh nyei sai-gorx, “Hnangv naaic yie mbuox meih mbuo, maiv dungx weic yungz maengc nyei nyanc hopv kuonx hnyouv. Yaac maiv dungx weic sin zaangc nyei lui-houx kuonx hnyouv.

²³Maengc gauh jaaix jiex nyanc hopv. Sin yaac gauh jaaix jiex lui-houx.

²⁴Hnamv mangc gaax, norqc aa! Ninh mbuo maiv zuangx yaac maiv siou. Ninh mbuo maiv maaih mbaatc yaac maiv maaih lamz. Mv baac Tin-Hungh uix ninh mbuo. Meih mbuo zungv gauh jaaix jiex norqc.

²⁵Meih mbuo haaix dauh laaix kuonx hnyouv haih borqv duqv maengc ndaauv deix?[39]

²⁶Ndongc naaiv faix nyei sic meih mbuo zungv maiv haih zoux, meih mbuo corc kuonx hnyouv da'nyeic nyungc zoux haaix nyungc?”

²⁷Hnamv mangc gaax, baeqc horqc biangh hnangv haaix nor ziangh! Biangh maiv zoux gong yaac maiv baeng suix ndatv ndie, mv baac yie mbuox meih mbuo, liemh Saa^lo^morn Hungh ndongc naaic butv zoih yaac maiv maaih zorng-zuqv ndongc yietc dorv naaiv deix biangh nzueic.

²⁸Lomc nyei miev ih hnoi ziangh, njang hnoi kou nqaai zuqc douz buov, mv baac Tin-Hungh zorng miev nzueic. Hnangv naaic, Tin-Hungh zungv gauh oix zorng meih mbuo. Meih mbuo sienx duqv hei haic weqv!

²⁹“Meih mbuo maiv dungx zanc-zanc nzauh jienv oix zuqc nyanc oix zuqc hopv haaix nyungc, yaac maiv dungx kuonx hnyouv.

³⁰Lungh ndiev maanc fingx, maiv sienx Tin-Hungh nyei mienh, zanc-zanc lorz naaiv deix ga'naaiv. Meih mbuo nyei Zaangc Diex hiuv duqv meih mbuo qiemx zuqc longc naaiv deix ga'naaiv.

³¹Oix zuqc bun Tin-Hungh zoux meih mbuo nyei Ziouv gunv meih mbuo, naaiv deix yietc zungv ga'naaiv ninh ziouc jaa tipv bun meih mbuo.

³²“Meih mbuo naaiv guanh zoqc nyei mienh aah! Maiv dungx gamh nziex oc. Meih mbuo nyei Zaangc Diex a'hneiv zorqv ninh nyei guoqv bun meih mbuo.

³³Oix zuqc maaic nzengc meih mbuo nyei jaa-dingh aengx cuotv fim tengx mienh jomc mienh. Oix zuqc lorz yietc liuz maiv haih waaic nyei nyaanh mbuoqc dapv jaaix nyei ga'naaiv siou wuov tin-dorngh. Yiem wuov, naaiv deix ga'naaiv maiv haih zitc, janx-zaqc maiv haih betv bieqc mingh nimc, gaeng yaac maiv haih ngaatc waaic.

³⁴Meih mbuo siou jaaix nyei ga'naaiv yiem haaix norm dorngx, meih mbuo nyei hnyouv haaix zanc yaac jangx jienv wuov aqv.

³⁵“Meih mbuo oix zuqc liuc leiz ziangx zorng jienv yaac diemv zieqc dang zuov jienv,

³⁶hnangv bou zuov jienv ninh mbuo nyei ziouv mingh cing-jaa-yinh nzuonx nor. Taux biauv-ziouv heuc, bou mbuo ziouc liemh zeih koi gaengh.

³⁷Ziouv nzuonx daaih buatc bou hnangv naaiv ging hnyouv zuov jienv, bou ziouc maaih njien-youh aqv. Yie mbuox meih mbuo, ziouv oix heuc ninh nyei bou mbuo zueiz jienv nyanc hnaangx, ninh ganh ziouc njunc jienv lui-mueiz liuc leiz bou mbuo.

³⁸Maiv gunv wuov dauh ziouv ndaamv muonz fai ndaamv muonz jiex nzuonx daaih, se gorngv buatc bou mbuo corc ging hnyouv zuov jienv nyei, wuov deix bou ziouc duqv njien-youh aqv.

³⁹“Naaiv meih mbuo hiuv duqv nyei. Se gorngv biauv-ziouv hiuv duqv janx-zaqc haaix norm ziangh hoc oix daaih, ninh ziouc zuov jienv maiv bun janx-zaqc bieqc biauv.

⁴⁰Meih mbuo yaac oix zuqc liuc leiz ziangx zanc-zanc zuov jienv, weic zuqc meih mbuo jangx maiv zaaic nyei ziangh hoc yie, Baamh Mienh nyei Dorn, ziouc taux aqv.”

⁴¹Bide naaic gaax, “Ziouv aah! Naaiv diuh waac-beiv gorngv bun yie mbuo fai gorngv bun zuangx mienh?”

⁴²Ziouv dau, “Haaix dauh zoux hnyouv zingx, cong-mengh nyei bou, dongh biauv-ziouv oix paaiv goux ninh nyei biauv yaac ziux ziangh hoc zorqv horpc zuqc duqv nyei buonc nyanc hopv bun bou mbuo?

⁴³Ziouv nzuonx daaih buatc naaiv dauh bou zoux duqv zingx, bou ziouc njien-youh aqv.

⁴⁴Yie mbuox zien meih mbuo, ziouv oix bun naaiv dauh bou goux nzengc ninh nyei yietc zungv jaa-dingh.

⁴⁵Mv baac se gorngv wuov dauh bou yiem hnyouv hnamv, ‘Aa, yie nyei ziouv maiv gaengh nzuonx siepv,’ ninh ziouc dongz sin mborqv m'jangc bou m'sieqv bou yaac nyanc beuv hopv nquin.

⁴⁶Bou jangx maiv zaaic nyei hnoi, jangx maiv zaaic nyei ziangh hoc, ninh nyei ziouv ziouc nzuonx daaih aqv. Ziouv oix dingc ninh nyei zuiz hniev nyei.[40] Yaac zunc ninh mingh caux maiv sienx nyei mienh yiem.

⁴⁷“Haaix dauh bou hiuv duqv ninh nyei ziouv oix ninh hnangv haaix nor zoux, ninh yaac maiv liuc leiz yaac maiv ei jienv zoux, wuov dauh zuqc mborqv gauh camv.

⁴⁸Haaix dauh bou maiv hiuv duqv ziouv oix ninh hnangv haaix nor zoux, ninh zoux liuz nyei sic horpc zuqc mborqv nyei mv baac zuqc mborqv zoqc. Haaix dauh duqv camv, wuov dauh oix zuqc cuotv camv. Jiu bun haaix dauh zipv camv, wuov dauh oix zuqc cuotv gauh camv.”

⁴⁹“Yie daaih weic oix bun douz zieqc baamh gen. Feix duqv ih zanc zieqc jienv aqv maiv zei!

⁵⁰Mv baac yie feix-nyungc zungv oix zuqc siouc kouv[41] ndaangc. Maiv gaengh jiex wuov deix siouc kouv nyei hnoi yie haiz hnyouv maiv henh yietc deix.

⁵¹Meih mbuo hnamv yie daaih bun baamh gen taaix-baengh fai? Maiv zeiz. Yie mbuox meih mbuo, yie daaih zoux bun mienh bun nqoi.

⁵²Yiem naaiv mingh, yietc buonc mienh maaih biaa laanh mv baac oix zuqc bun nqoi. Buo laanh caux i laanh bun nqoi. I laanh caux buo laanh bun nqoi.

⁵³Die caux dorn, dorn caux die yaac bun nqoi. Maa caux sieqv, sieqv caux maa bun nqoi. Maa-buoc caux mbuangz, mbuangz caux maa-buoc yaac bun nqoi.”

⁵⁴Yesu yaac gorngv mbuox zuangx mienh, “Meih mbuo buatc fai bung maengx faaux dorv mbuonx meih mbuo ziouc gorngv, ‘Oix duih mbiungc aqv,’ yaac za'gengh hnangv naaic.

⁵⁵Meih mbuo haiz nziaaux yiem naamh bung maengx buonc daaih, meih mbuo gorngv, ‘Oix yuoqv aqv,’ yaac za'gengh yuoqv.

⁵⁶Beih zaqc hnyouv njuotv nyei mienh aah! Meih mbuo haih samx lungh samx ndau nyei setv zeiv. Weic haaix diuc samx maiv cuotv ih jaax nyei sic?

⁵⁷“Meih mbuo ganh weic haaix diuc maiv haih dingc haaix nyungc se horpc fai maiv horpc?

⁵⁸Se gorngv maaih dauh mienh gox meih, oix dorh meih mingh mbenc sic mienh wuov, yiem ndaamv-jauv meih oix zuqc caux ninh gorngv sung. Maiv zei nor, ninh oix tor meih mingh siemv zuiz jien wuov. Siemv zuiz jien oix zorqv meih jiu bun hungh baeng. Hungh baeng ziouc dorh meih mingh wuonx jienv loh.

⁵⁹Yie mbuox meih mbuo, meih oix zuqc wuonx jienv loh taux funx sung nzengc, maiv caa yietc norm dongh zinh nyei zaeqv cingx daaih duqv cuotv.”