Read Iu Mien Lugaa 19 Bible Online

Lugaa 19 - Iu Mien bible

Lugaa 19

¹Yesu bieqc Ye^li^ko Zingh, oix yangh zingh jiex.

²Yiem wuov maaih dauh mienh zoux siou nzou-zinh nyei bieiv zeiv, mbuox heuc Sakc^kietv. Ninh yaac butv-zoih mienh.

³Ninh oix mangc gaax Yesu hnangv haaix nor, mv baac Sakc^kietv aiv haic. Mienh camv torngv jienv ninh, ninh mangc maiv buatc Yesu.

⁴Ninh ziouc caangv jiex ndaangc faaux ngongh nyorx ndiangx, yiem wuov zuov jienv mangc Yesu, weic zuqc Yesu oix yangh naaiv diuh jauv jiex.

⁵Yesu jiex taux ndiangx-gorn ziouc cau hmien gorngv mbuox Sakc^kietv, “Sakc^kietv aac, gaanv njiec daaih maah! Ih hnoi yie oix zuqc mingh hitv meih nyei biauv.”

⁶Sakc^kietv huaang-huaang zaang-zaang nyei njiec daaih, a'hneiv nyei zipv Yesu.

⁷Zuangx mienh buatc naaiv deix sic ninh mbuo ziouc ngopv gorngv, “Naaic laanh mienh mingh zoux zuiz-mienh nyei kaeqv aqv loh!”

⁸Sakc^kietv souv jiez daaih gorngv mbuox Ziouv, “Ziouv aah! Yie maaih nyei yietc zungv ga'naaiv yie oix zorqv yietc buonc bun mienh jomc mienh. Se gorngv yie pienx haaix dauh nyei haaix nyungc, yietc gouv yie oix buih biei gouv ninh mbuo.”

⁹Yesu gorngv mbuox ninh, “Ih hnoi njoux en daaih taux naaiv buonc mienh. Naaiv laanh mienh yaac zoux Apc^laa^ham nyei zeiv-fun.

¹⁰Yie, Baamh Mienh nyei Dorn, daaih lorz yaac njoux dingx laaih nyei mienh.”

¹¹Zuangx mienh corc muangx jienv naaiv deix waac, Yesu aengx gorngv diuh waac-beiv. Wuov zanc ninh aav lamh deix taux Ye^lu^saa^lem Zingh, mienh laaic Tin-Hungh zoux Ziouv gunv mienh nyei ziangh hoc taux aqv mv bei.

¹²Yesu ziouc gorngv, “Maaih dauh jien oix cuotv mingh go nyei guoqv zipv lingc zoux hungh. Zipv liuz ninh aengx nzuonx daaih.

¹³Oix mingh wuov zanc ninh heuc ninh nyei ziepc dauh bou daaih, yietc dauh bun diuh nyaanh.[54] Ninh gorngv, ‘Dorh naaiv deix nyaanh mingh zoux saeng-eix taux yie nzuonx.’

¹⁴“Wuov dauh jien nyei baeqc fingx nzorng haic ninh ziouc paaiv mienh gan nqaang mingh gorngv, ‘Yie mbuo maiv oix longc naaiv laanh mienh zoux yie mbuo nyei hungh.’

¹⁵“Mv baac wuov dauh jien duqv lingc zoux hungh aengx nzuonx daaih aqv. Ninh ziouc heuc dongh ninh bun nyaanh wuov deix bou, daaih mangc gaax ninh mbuo zornc duqv mbu'ziex.

¹⁶“Da'yietv dauh bou daaih gorngv, ‘Ziouv aah! Meih bun yie wuov diuh nyaanh yie zornc duqv ziepc diuh.’

¹⁷“Ziouv dau, ‘Longx aqv. Meih za'gengh hnyouv zingx nyei bou. Deix baav faix-fiuv sic meih zungv goux ndongc naaic longx, yie bun meih gunv ziepc norm zingh.’

¹⁸“Da'nyeic dauh bou daaih gorngv, ‘Ziouv aah! Meih bun yie wuov diuh nyaanh yie aengx zornc duqv biaa diuh.’

¹⁹“Ziouv mbuox ninh, ‘Yie bun meih gunv biaa norm zingh.’

²⁰“Aengx maaih dauh bou daaih gorngv, ‘Ziouv aah! Naaiv! Meih bun yie wuov diuh nyaanh. Yie longc siqc jaauv beu jienv siou longx nyei.

²¹Yie gamh nziex haic meih. Yie hiuv duqv meih maiv sie haaix dauh. Maiv zeiz meih ganh nyei ga'naaiv meih yaac zorqv. Meih ganh maiv zuqc ndortv qaqv zuangx mv baac meih yaac siou.’

²²“Ziouv gorngv mbuox ninh, ‘Meih waaic haic nyei bou aah! Yie longc meih ganh nyei waac dingc meih nyei zuiz. Meih hiuv duqv yie maiv sie haaix dauh? Meih yaac hiuv duqv maiv zeiz yie nyei ga'naaiv yie yaac zorqv? Maiv zeiz yie ndortv qaqv zuangx yie yaac siou?

²³Hnangv naaic meih zoux haaix nyungc maiv dorh yie nyei nyaanh mingh dapv nyaanh lamz? Yie nzuonx daaih yie duqv buonv-zinh yaac duqv deix leic zinh caux jienv niaa.’

²⁴“Ziouv aengx mbuox souv ga'hlen wuov deix mienh, ‘Zorqv ninh wuov diuh nyaanh bun maaih ziepc diuh wuov dauh maah!’

²⁵“Wuov deix gorngv, ‘Ziouv aah! Ninh zungv maaih ziepc diuh niaa.’

²⁶“Wuov dauh hungh dau, ‘Yie mbuox meih mbuo, haaix dauh maaih nyei, oix jaa bun ninh maaih gauh camv. Haaix dauh maiv maaih, liemh ninh maaih deix baav, zungv oix zuqc zorqv mingh.

²⁷Mv baac maiv oix yie zoux hungh wuov deix win-wangv dorh daaih naaiv yiem yie nyei nza'hmien daix guangc.’+”

²⁸Yesu gorngv liuz naaiv deix waac ninh ziouc mingh ndaangc. Sai-gorx mbuo gan jienv mingh Ye^lu^saa^lem Zingh.

²⁹Mingh taux Ga'lanv Mbong, leih Mbetc^faa^yi caux Mbe^taa^ni Laangz maiv go, ninh paaiv i dauh sai-gorx mingh ndaangc.

³⁰Ninh gorngv mbuox ninh mbuo, “Meih mbuo mingh taux nza'hmien maengx wuov norm laangz. Bieqc laangz mingh ziouc buatc dauh maaz-li dorn ndoh jienv wuov, mienh maiv gaengh geh jiex. Jaiv ken jienv daaih oc.

³¹Se gorngv maaih mienh naaic, ‘Meih mbuo jaiv maaz-li dorn zoux haaix nyungc?’ Oix zuqc mbuox ninh mbuo, ‘Ziouv qiemx zuqc longc.’+”

³²Ninh mbuo ziouc mingh ndaangc, buatc nyungc-nyungc doix Yesu gorngv nyei waac.

³³Ninh mbuo jaiv maaz-li dorn wuov zanc, maaz-li nyei ziouv naaic gaax, “Meih mbuo jaiv maaz-li dorn zoux haaix nyungc?”

³⁴Ninh mbuo dau, “Ziouv qiemx zuqc longc.”

³⁵Ninh mbuo ziouc ken maaz-li dorn mingh Yesu wuov, aengx zorqv ganh nyei domh lui dimc jienv, yaac baav Yesu faaux mingh geh jienv maaz-li nyei diqc daanz.

³⁶Geh jienv mingh wuov zanc, zuangx mienh zorqv ninh mbuo nyei domh lui dimc jienv wuov jauv.

³⁷Yesu taux fatv Ye^lu^saa^lem Zingh, njiec Ga'lanv Mbong wuov zanc, zuangx sai-gorx ziouc lomh nzoih njien-youh nyei longc qiex hlo nyei ceng Tin-Hungh weic ninh mbuo buatc jiex yietc zungv mbuoqc horngh haic nyei sic. Ninh mbuo ziouc heuc,

³⁸“Tov Tin-Hungh ceix fuqv dengv Ziouv nyei mbuox daaih naaiv dauh hungh. Tin-dorngh maaih baengh orn. Yiem hlang jiex nyei dorngx maaih njang-laangc.”

³⁹Yiem wuov maaih deix Faa^li^si Mienh gorngv mbuox Yesu, “Fin-Saeng aah! Hatc meih nyei sai-gorx mbuo sekv maah!”

⁴⁰Yesu dau, “Yie mbuox meih mbuo, se gorngv ninh mbuo maiv ko lo, la'bieiv zungv oix zuqc heuc jiez daaih.”

⁴¹Yesu mingh aav lamh taux Ye^lu^saa^lem Zingh. Mangc buatc zingh ninh ziouc weic wuov norm zingh nyiemv.

⁴²Ninh yaac gorngv, “Feix duqv ih hnoi meih hiuv duqv haaix nyungc haih bun meih maaih baengh orn. Mv baac ih zanc naaiv deix sic gem jienv, meih nyei m'zing mangc maiv buatc.

⁴³Ziangh hoc oix taux, meih nyei win-wangv oix wetv nie-ndui huing gormx meih. Ninh mbuo oix weic jienv biei bung kuonx jienv meih.

⁴⁴Liemh meih ganh caux yiem meih nyei zingh laatc gu'nyuoz nyei mienh yietc zungv ninh mbuo oix mietc nzengc, maiv liouh yietc kuaaiv la'bieiv lapv jienv, weic zuqc meih zieqv maiv duqv Tin-Hungh daaih njoux meih nyei ziangh hoc.”

⁴⁵Yesu bieqc zaangc Tin-Hungh nyei biauv mingh ziouc zunc maaiz maaic nyei mienh cuotv mingh,

⁴⁶yaac mbuox ninh mbuo, “Ging-Sou fiev jienv gorngv, ‘Yie nyei biauv oix zuqc zoux daux gaux nyei biauv,’ mv baac meih mbuo longc zoux ‘Janx-zaqc bingx nyei kuotv.’+”

⁴⁷Yesu hnoi-hnoi yiem wuov zaangc Tin-Hungh nyei biauv njaaux mienh. Sai mienh bieiv caux njaaux leiz nyei fin-saeng caux gunv baeqc fingx nyei bieiv oix daix Yesu,

⁴⁸mv baac ninh mbuo lorz maiv duqv qangx weic zuqc zuangx mienh a'hneiv muangx Yesu njaaux, yaac maiv oix bungx ndortv yietc joux ninh nyei waac.