Read Iu Mien Lugaa 20 Bible Online

Lugaa 20 - Iu Mien bible

Lugaa 20

¹Maaih hnoi Yesu yiem zaangc Tin-Hungh nyei biauv njaaux mienh yaac zunh kuv fienx. Sai mienh bieiv caux njaaux leiz nyei fin-saeng caux mienh gox daaih gorngv,

²“Mbuox yie mbuo oc. Meih maaih haaix nyungc leiz zoux naaiv deix sic? Naaiv nyungc leiz haaix dauh bun meih?”

³Yesu dau, “Yie yaac oix naaic joux meih mbuo. Mbuox yie oc.

⁴Haaix dauh bun Yo^han maaih leiz tengx mienh jiex wuom nyei leiz, Tin-Hungh fai baamh mienh?”

⁵Ninh mbuo ziouc laanh caux laanh caangh laangh, “Mbuo horpc zuqc hnangv haaix nor gorngv? Se gorngv mbuo gorngv, ‘Tin-Hungh bun daaih,’ ninh oix gorngv, ‘Wuov nyungc meih mbuo weic haaix diuc maiv sienx Yo^han?’

⁶Mv baac se gorngv mbuo gorngv, ‘Mienh bun daaih,’ zuangx mienh oix zorqv la'bieiv zong daic mbuo weic zuqc ninh mbuo funx dingc Yo^han se douc waac mienh.”

⁷Ninh mbuo ziouc dau, “Yie mbuo maiv hiuv duqv haaix dauh bun ninh maaih leiz zoux.”

⁸Yesu mbuox ninh mbuo, “Hnangv naaic yie yaac maiv mbuox meih mbuo yie maaih haaix nyungc leiz zoux naaiv deix sic.”

⁹Yesu aengx gorngv waac-beiv bun mienh muangx. Ninh gorngv, “Maaih laanh mienh zuangx nzong a'ngunc biouv, yaac gouv bun mienh. Ninh ganh aeqv, cuotv deic-bung mingh lauh nyei.

¹⁰Taux biouv zuoqc nyei ziangh hoc, ninh paaiv dauh bou mingh lorz gouv huingx nyei mienh, weic siou ninh nyei buonc gouv huingx nyei biouv. Mv baac gouv huingx mienh mborqv wuov dauh bou, zunc ninh kungx-buoz baeqc zaux nyei nzuonx.

¹¹Huingx-ziouv ziouc aengx paaiv dauh bou mingh, mv baac gouv huingx mienh aengx mborqv ninh, zoux doqc bun ninh nyaiv, yaac zunc ninh kungx-buoz baeqc zaux nyei nzuonx.

¹²Huingx-ziouv aengx paaiv da'faam dauh mingh. Gouv huingx nyei mienh aengx mborqv duqv ninh siang haic, tor guangc ga'nyiec ziqc huingx mingh.

¹³“Huingx-ziouv ziouc gorngv, ‘Aa, yie oix zuqc hnangv haaix nor zoux ni? Yie paaiv yie ganh nyei dorn-hnamv mingh, m'nziex ninh mbuo oix taaih ninh mv bei.’

¹⁴“Mv baac gouv huingx mienh buatc ninh, laanh mbuox laanh, ‘Nzipc naaiv norm huingx se dongh naaiv dauh aqv. Mbuo zorqv ninh daix guangc mingh. Ninh nzipc nyei jaa-dingh ziouc benx mbuo nyei aqv.’

¹⁵Ninh mbuo ziouc zorqv ninh tor cuotv ga'nyiec ziqc huingx daix guangc mi'aqv.” Yesu naaic gaax, “Hnangv naaic huingx-ziouv oix hnangv haaix nor zoux bun gouv huingx mienh?

¹⁶Ninh oix mingh daix guangc ninh mbuo aengx bun ganh deix mienh gouv wuov norm huingx.” Zuangx mienh haiz liuz naaiv deix waac, ninh mbuo gorngv, “Cin-maanc maiv dungx bun maaih hnangv naaic.”

¹⁷Yesu mangc jienv ninh mbuo naaic gaax, “Ging-Sou fiev jienv naaiv joux waac maaih haaix nyungc eix leiz? ‘Gomv biauv zaangc nqemh cuotv wuov norm la'bieiv, zungv benx an biauv-gorqv gauh longc jienv jiex wuov norm.’

¹⁸Haaix dauh ndorpc, zong zuqc naaiv norm la'bieiv, wuov dauh ziouc huv benx ziex deix mi'aqv. Naaiv norm la'bieiv ndortv, zong zuqc haaix dauh, wuov dauh ziouc muonc nzengc mi'aqv.”

¹⁹Njaaux leiz nyei fin-saeng caux sai mienh bieiv hiuv duqv Yesu gorngv naaiv diuh waac-beiv ziqv zuqc ninh mbuo. Wuov norm ziangh hoc ninh mbuo oix zorqv Yesu haic aqv, mv baac ninh mbuo gamh nziex zuangx mienh.

²⁰Njaaux leiz nyei fin-saeng caux sai mienh bieiv ziouc zanc-zanc cienh mangc jienv Yesu. Ninh mbuo paaiv mienh mingh zoux sic hnangv kuv mienh, mv baac ninh mbuo oix nduov Yesu gorngv dorngc ziouc haih zorqv ninh jiu bun yiem Lomaa Zungx nyei buoz-ndiev.

²¹Ninh mbuo ziouc naaic gaax Yesu, “Fin-Saeng aah! Yie mbuo hiuv duqv meih gorngv nyei waac caux njaaux nyei leiz se horpc nyei. Meih yaac maiv mangc haaix dauh nyei hmien. Tin-Hungh nyei jauv meih yaac njaaux duqv zien.

²²Wuov nyungc meih mbuox yie mbuo oc. Mbuo cuotv nzou-zinh bun Lomaa Hungh se dorngc mbuo nyei leiz fai?”

²³Yesu hiuv duqv ninh mbuo nyei mbienv-mbeux ziouc gorngv,

²⁴“Zorqv norm nyaanh daaih bun yie mangc gaax. Naaiv haaix dauh nyei fangx caux haaix dauh nyei mbuox?” Ninh mbuo dau, “Lomaa Hungh nyei.”

²⁵Yesu ziouc gorngv, “Haaix nyungc Lomaa Hungh nyei, oix zuqc bun Lomaa Hungh. Haaix nyungc Tin-Hungh nyei, oix zuqc bun Tin-Hungh.”

²⁶Dorng jienv zuangx mienh ninh mbuo maiv buatc Yesu gorngv dorngc haaix nyungc. Ninh mbuo mbuoqc horngh haic ninh dau nyei waac ziouc maiv ko lo aqv.

²⁷Maaih deix Saa^ndu^si Mienh daaih lorz Yesu. Saa^ndu^si wuov jauv mienh gorngv mienh daic mingh maiv haih nangh aqv.

²⁸Ninh mbuo naaic Yesu, “Fin-Saeng aah! Mose weic mbuo fiev naaiv diuh leiz, ‘Se gorngv maaih laanh mienh longc jienv auv, maiv gaengh maaih fu'jueiv mv baac ninh daic mi'aqv, ninh nyei youz oix zuqc longc nyaam zoux auv weic duqv fu'jueiv funx gorx nyei buonc.’

²⁹Zinh ndaangc maaih siec muoz-dorn. Dorn-hlo dorng jienv jaa, maiv maaih fu'jueiv, ninh daic mi'aqv.

³⁰Da'naix longc nyaam-guaav aengx daic mi'aqv. Maiv maaih fu'jueiv.

³¹Lauv Saan aengx longc gau, daic mi'aqv. Naaiv deix siec muoz longc jiex nzengc, yaac fih hnangv nyei maiv maaih fu'jueiv, ziang naaic daic mi'aqv.

³²Zoux gau, nqa'haav wuov dauh m'sieqv dorn yaac daic mi'aqv.

³³Hnangv naaic, mienh daic mingh, taux nangh daaih wuov hnoi, wuov dauh m'sieqv dorn funx haaix dauh nyei auv? Weic zuqc ninh mbuo siec muoz yietc zungv longc jiex ninh.”

³⁴Yesu dau ninh mbuo, “Naaiv seix mienh longc auv longc nqox, bungx sieqv zoux cing-jaa.

³⁵Mv baac daic mingh puix duqv nangh daaih yiem nqa'haav wuov seix m'jangc m'sieqv maiv longc auv longc nqox, maiv bungx sieqv zoux cing-jaa.

³⁶Ninh mbuo yaac maiv haih daic weic zuqc ninh mbuo hnangv fin-mienh nor. Ninh mbuo zoux Tin-Hungh nyei naamh nyouz weic zuqc ninh mbuo daic mingh aengx nangh daaih.

³⁷Mose yaac bun cing mienh daic mingh aengx nangh daaih weic zuqc ninh gorngv douz zieqc ndiangx-dorn-fomv wuov diuh jauv. Ninh heuc Ziouv zoux ‘Apc^laa^ham nyei Tin-Hungh, I^sakc nyei Tin-Hungh caux Yaakopv nyei Tin-Hungh.’

³⁸Tin-Hungh se mienh nangh mienh nyei Tin-Hungh, maiv zeiz daic mingh nyei mienh nyei Tin-Hungh, weic zuqc ei Tin-Hungh mangc, yietc zungv se ziangh jienv nyei.”

³⁹Maaih deix njaaux leiz nyei fin-saeng gorngv, “Fin-Saeng aac, meih dau duqv horpc haic.”

⁴⁰Gorngv liuz ninh mbuo maiv gaamv naaic haaix nyungc ninh aqv.

⁴¹Yesu ziouc naaic ninh mbuo, “Mienh hnangv haaix nor haih gorngv Giduc zoux Ndaawitv Hungh nyei Zeiv-Fun?

⁴²Weic zuqc yiem Singx Nzung Sou Ndaawitv ganh fiev, ‘Ziouv gorngv mbuox yie nyei Ziouv, “Zueiz jienv yie nyei mbiaauc maengx bung

⁴³zuov yie bun meih nyei win-wangv zoux meih lorngx zaux nyei dorngx.”+’

⁴⁴Ndaawitv heuc ninh zoux Ziouv. Wuov nyungc, Giduc hnangv haaix nor haih zoux Ndaawitv nyei zeiv-fun?”

⁴⁵Zuangx mienh muangx Yesu gorngv wuov zanc, Yesu mbuox ninh nyei sai-gorx mbuo,

⁴⁶“Oix zuqc faix fim njaaux leiz nyei fin-saeng. Ninh mbuo a'hneiv zuqv lui-ndaauv mingh mingh daaih daaih, mingh wuov hei-horngc oix mienh taaih, zorqv yieqv bun ninh mbuo. Mingh wuic dorngh ninh mbuo ginv longx jiex nyei dorngx zueiz. Bieqc yinh ninh mbuo kungx oix zueiz dieh gorn hnangv.

⁴⁷Ninh mbuo nduov auv-guaav nyei jaa-dingh nyanc yaac duqv-eix daux gaux ndaauv nyei nduov mienh. Dongh naaiv nyungc mienh oix zuqc dingc zuiz gauh hniev jiex.”