Read Iu Mien Lugaa 9 Bible Online

Lugaa 9 - Iu Mien bible

Lugaa 9

¹Yesu heuc ninh nyei ziepc nyeic dauh gong-zoh daaih zunv ziouc jiu lingc jiu hatc maaz bun ninh mbuo haih zunc duqv nyungc-nyungc mienv cuotv yaac haih zorc duqv baengc longx.

²Ninh paaiv ninh mbuo cuotv mingh zunh Tin-Hungh zoux Ziouv gunv mienh nyei kuv fienx yaac zorc baengc.

³Yesu mbuox ninh nyei sai-gorx, “Cuotv jauv maiv dungx dorh haaix nyungc mingh. Biaav-mbiaac, mbuoqc jorngx, bienh fuix, zinh nyaanh, liemh lui-houx yienc yaac maiv dungx dorh.

⁴Meih mbuo hitv haaix dauh nyei biauv, oix zuqc hitv taux cuotv mingh ganh norm mungv.

⁵Mienh maiv zipv nor, oix zuqc cuotv wuov norm laangz yaac fengx guoqv zaux nyei nie-mbung guangc wuov, weic zoux zorng-zengx bun ninh mbuo hiuv duqv ninh mbuo zoux dorngc.”

⁶Gong-zoh mbuo ziouc mingh laangz jiex laangz, yiem norm-norm dorngx zunh kuv fienx yaac zorc baengc.

⁷Gunv Gaa^li^li Deic-Bung wuov dauh Helotv Hungh haiz naaiv deix yietc zungv sic cuotv, ninh hnamv maiv mengh baeqc. Maaih deix gorngv tengx mienh jiex wuom nyei leiz wuov dauh Yo^han aengx nangh daaih.

⁸Maaih deix gorngv E^li^yaa hinc cuotv daaih. Aengx maaih deix gorngv maaih yietc dauh loz-hnoi nyei douc waac mienh nangh daaih.

⁹Helotv gorngv, “Yo^han nyei m'nqorngv yie zungv mbuox mienh hngaqv ndutv mi'aqv. Wuov nyungc, dongh yie haiz gorngv zoux naaiv deix sic wuov laanh mienh se haaix dauh?” Helotv ziouc lorz qangx buatc Yesu.

¹⁰Gong-zoh mbuo nzuonx daaih gorngv ninh mbuo zoux liuz nyei yietc zungv jauv-louc bun Yesu muangx. Yesu dorh jienv gong-zoh mbuo ganh mingh norm mungv, mbuox heuc Mbetc^sai^ndaa.

¹¹Mienh camv hiuv duqv, ziouc gan jienv mingh. Yesu zipv ninh mbuo yaac gorngv Tin-Hungh zoux Ziouv nyei kuv fienx mbuox ninh mbuo. Haaix dauh qiemx zuqc zorc baengc, ninh yaac zorc longx.

¹²Mba'hnoi aav lamh deix muotv aqv. Wuov deix ziepc nyeic dauh sai-gorx daaih mbuox Yesu, “Oix zuqc bun naaiv deix mienh mingh aqv. Mbuox ninh mbuo mingh naaiv deix dorngx nyei laangz caux ndeic-liuh jorm lorz ga'naaiv nyanc, lorz dorngx hitv, weic zuqc naaiv se lengh nyei dorngx.”

¹³Mv baac Yesu mbuox ninh mbuo, “Meih mbuo ganh lorz bun ninh mbuo nyanc maah!” Ninh mbuo dau, “Yie mbuo kungx maaih nduqc biaa norm njuov caux i dauh mbiauz hnangv. Sai-Diex oix yie mbuo mingh maaiz ga'naaiv bun ndongc naaiv camv nyei mienh nyanc?”

¹⁴(Yiem wuov nyei m'jangc dorn maaih leih maiv go biaa cin laanh nyei dorngx.) Yesu mbuox ninh nyei sai-gorx mbuo, “Heuc zuangx mienh zueiz jienv yietc mbomz yietc mbomz nyei. Yietc mbomz leih maiv go hmz ziepc laanh nyei dorngx.”

¹⁵Sai-gorx mbuo ei jienv naaiv deix waac zoux. Zuangx mienh ziouc zueiz njiec.

¹⁶Yesu zorqv wuov deix biaa norm njuov caux i dauh mbiauz cau hmien mangc lungh, laengz zingh Tin-Hungh liuz ziouc maeqv nqoi bun sai-gorx mbuo dorh mingh bun nqoi zuangx mienh nyanc.

¹⁷Zuangx mienh nyanc beuv nzengc. Zengc njiec muonc wuov deix ga'naaiv, sai-gorx mbuo siou daaih duqv ziepc nyeic ndaan buangv.

¹⁸Maaih hnoi Yesu yiem lengh nyei dorngx, ninh ganh daux gaux. Sai-gorx mbuo yaac caux ninh yiem nyei. Yesu naaic gaax ninh mbuo, “Zuangx mienh gorngv yie se haaix dauh?”

¹⁹Sai-gorx mbuo dau, “Maaih deix gorngv meih dongh tengx mienh jiex wuom nyei leiz wuov dauh Yo^han. Maaih deix gorngv E^li^yaa. Aengx maaih deix gorngv meih yietc dauh loz-hnoi nyei douc waac mienh aengx nangh daaih.”

²⁰Yesu aengx gorngv, “Meih mbuo ni? Meih mbuo gorngv yie dongh haaix dauh?” Bide dau, “Meih dongh Tin-Hungh paaiv daaih nyei Giduc.”[24]

²¹Yesu hatc ninh nyei sai-gorx, heuc ninh mbuo maiv dungx gorngv naaiv deix sic mbuox haaix dauh.

²²Ninh yaac gorngv, “Yie, Baamh Mienh nyei Dorn, oix zuqc siouc camv-nyungc kouv. Mienh gox caux sai mienh bieiv caux njaaux leiz nyei fin-saeng oix nqemh yie, dorh yie mingh daix guangc, mv baac nqa'haav buo hnoi yie aengx nangh daaih.”

²³Yesu aengx gorngv mbuox ninh mbuo yietc zungv, “Haaix dauh oix gan yie mingh oix zuqc siev jienv ninh ganh. Hnoi-hnoi oix zuqc ndaam jienv ninh nyei ziepc nzaangc jaax gan yie mingh.

²⁴Haaix dauh kungx hnamv njoux ninh ganh nyei maengc hnangv, wuov dauh nyei maengc ziouc zuqc guangc. Mv baac haaix dauh weic yie guangc ninh nyei maengc, wuov dauh ziouc njoux duqv ninh nyei maengc.

²⁵Haaix dauh duqv nzengc lungh ndiev nyei ga'naaiv mv baac ninh ganh zuqc mietc, wuov dauh duqv haaix nyungc maaih lamh longc?

²⁶Haaix dauh nyaiv yie yaac nyaiv yie njaaux nyei waac, yie, Baamh Mienh nyei Dorn, caux yie ganh nyei njang-laangc yaac caux Zaangc Diex caux cing-nzengc fin-mienh nyei njang-laangc daaih wuov zanc, yie ziouc nyaiv wuov dauh.

²⁷Yie gorngv zien mbuox meih mbuo, yiem naaiv nyei mienh maaih deix zungv maiv gaengh daic ziouc duqv buatc Tin-Hungh daaih zoux Ziouv gunv mienh.”

²⁸Yesu gorngv liuz naaiv deix waac, nqa'haav siec hietc hnoi nyei dorngx, ninh dorh jienv Bide, Yo^han, caux Yaagorpc mingh wuov jiex mbong daux gaux.

²⁹Yesu daux gaux wuov zanc, ninh nyei hmien tiuv nzengc mi'aqv. Ninh nyei lui-houx yaac tiuv mi'aqv, mbopv baeqc nyei, zaengh zaengh wuov.

³⁰Liemh zeih maaih i laanh mienh yiem wuov caux Yesu gorngv waac, se Mose caux E^li^yaa.

³¹Ninh mbuo yiem njang-laangc hinc cuotv yaac yiem wuov caux Yesu gorngv taux ninh daic nyei jauv maiv lauh oix yiem Ye^lu^saa^lem Zingh ziangh sic.

³²Wuov zanc Bide caux ninh nyei i dauh doic m'zing nyuix, oix m'njormh haic aqv. Ninh mbuo yietv nyie daaih, buatc Yesu nyei njang-laangc yaac buatc wuov deix i laanh mienh caux Yesu souv jienv wuov.

³³Wuov deix i laanh caux Yesu oix leih doic wuov zanc Bide gorngv mbuox Yesu, “Ziouv aah! Yie mbuo yiem naaiv gengh longx haic. Tov bun yie mbuo zoux buo norm liuh, zoux norm bun meih, zoux norm bun Mose, aengx zoux norm bun E^li^yaa.” (Bide zungv maiv hiuv duqv ninh gorngv haaix nyungc.)

³⁴Ninh gorngv waac zungv maiv gaengh setv, maaih dorv mbuonx daaih nzie jienv ninh mbuo. Sai-gorx mbuo bieqc mbuonx gu'nyuoz ninh mbuo gamh nziex haic.

³⁵Haiz waac yiem mbuonx gu'nyuoz cuotv daaih gorngv, “Naaiv se yie nyei dorn, dongh yie ginv daaih wuov dauh.[25] Muangx ninh maah!”

³⁶Naaiv deix qiex sekv mi'aqv, kungx maaih Yesu ganh yiem wuov hnangv. Sai-gorx mbuo yaac muangh jienv naaiv deix jauv-louc, maiv gaengh gorngv ninh mbuo duqv buatc liuz nyei jauv mbuox haaix dauh.

³⁷Da'nyeic hnoi, Yesu mbuo yiem mbong njiec daaih, maaih guanh mienh camv nyei daaih lorz Yesu.

³⁸Wuov guanh mienh maaih dauh m'jangc dorn heuc jienv gorngv, “Fin-Saeng aah! Tov meih tengx mangc yie nyei dorn. Yie kungx maaih naaiv dauh dorn-ndoqc hnangv.

³⁹Ninh zuqc mienv muoqv. Yietv zuqc yietc nzunc, ziouc nauc-nauc nyei heuc aengx ciou aqv. Wuom-nzuih mbiaauz bomh bomh nyei cuotv. Mienv zanc-zanc hoic ninh kouv haic, maiv kangv bungx guangc.

⁴⁰Yie tov meih nyei sai-gorx mbuo zunc mienv cuotv mv baac ninh mbuo zunc maiv haih cuotv.”

⁴¹Yesu mbuox zuangx mienh, “Meih mbuo ih jaax nyei mienh aah! Meih mbuo za'gengh maiv sienx, m'normh yaac hoz haic. Yie oix zuqc caux meih mbuo yiem, oix zuqc nyienz meih mbuo ndongc haaix lauh?” Yesu aengx gorngv mbuox wuov laanh mienh, “Dorh meih nyei dorn daaih naaiv maah!”

⁴²Naaiv dauh dorn daaih jienv wuov zanc, mienv aengx muoqv ninh king njiec ndau ciou duqv kouv haic. Yesu ziouc hatc hieh guaiv mienv yaac zorc longx wuov dauh dorn, jiu bun ninh nyei die mi'aqv.

⁴³Zuangx mienh mbuoqc horngh haic Tin-Hungh nyei domh qaqv. Zuangx mienh corc mbuoqc horngh haic Yesu zoux nyei yietc zungv sic wuov zanc, Yesu mbuox ninh nyei sai-gorx,

⁴⁴“Meih mbuo longx-longx nyei muangx yie ih zanc mbuox meih mbuo naaiv deix waac. Yie, Baamh Mienh nyei Dorn, oix zuqc jiu bun yiem mienh nyei buoz-ndiev.”

⁴⁵Mv baac sai-gorx mbuo maiv mengh baeqc naaiv joux waac nyei eix leiz. Se hnangv ormv jienv nor, ninh mbuo cingx daaih maiv haih mengh baeqc. Ninh mbuo yaac gamh nziex maiv naaic Yesu.

⁴⁶Sai-gorx mbuo yiem ninh mbuo ganh mbu'ndongx nzaeng haaix dauh zoux gauh hlo jiex.

⁴⁷Mv baac Yesu hiuv duqv ninh mbuo yiem hnyouv hnangv haaix nor hnamv, ninh ziouc ken dauh fu'jueiv daaih souv jienv ninh nyei ga'hlen,

⁴⁸yaac gorngv mbuox ninh mbuo, “Haaix dauh dengv yie nyei mbuox zipv naaiv dauh faix nyei fu'jueiv, wuov dauh yaac zipv yie. Haaix dauh zipv yie yaac zipv paaiv yie daaih wuov dauh. Hnangv naaic, yiem meih mbuo nyei mbu'ndongx, haaix dauh zoux gauh faix jiex, wuov dauh duqv zoux gauh hlo jiex.’

⁴⁹Yo^han gorngv, “Sai-Diex aah! Yie mbuo buatc dauh mienh longc meih nyei mbuox zunc mienv cuotv. Yie mbuo maiv bun ninh zoux, weic zuqc ninh maiv zeiz zoux mbuo nyei guanh.”

⁵⁰Yesu mbuox ninh, “Maiv dungx laanh ninh, weic zuqc haaix dauh maiv caux mbuo doix-dekc, wuov dauh se tengx mbuo aqv.”

⁵¹Tin-Hungh oix zipv Yesu faaux tin-dorngh nyei hnoi-nyieqc taux fatv aqv. Yesu ziouc liepc dingc hnyouv mingh Ye^lu^saa^lem Zingh.

⁵²Ninh paaiv deix mienh mingh ndaangc. Ninh mbuo bieqc norm Saa^maa^lie Laangz, oix tengx Yesu liuc leiz dorngx,

⁵³mv baac laangz zaangc mienh maiv kangv zipv weic zuqc buatc Yesu oix mingh Ye^lu^saa^lem Zingh.

⁵⁴Yesu nyei sai-gorx, Yaagorpc caux Yo^han, buatc hnangv naaiv, ninh mbuo gorngv, “Ziouv aah! Meih oix yie mbuo heuc lungh douz njiec daaih buov mietc nzengc ninh mbuo fai?”[26]

⁵⁵Yesu huin nzuonx gorngv ninh mbuo.[27]

⁵⁶Yesu mbuo aengx mingh ganh norm laangz mi'aqv.

⁵⁷Ninh mbuo gan jienv jauv mingh gau, maaih laanh mienh mbuox Yesu, “Maiv gunv meih mingh haaix, yie oix gan meih mingh.”

⁵⁸Yesu gorngv mbuox ninh, “Hieh juv maaih kuotv yiem, norqc yaac maaih lauz, mv baac yie, Baamh Mienh nyei Dorn, maiv maaih dorngx bueix hitv kuonx.”

⁵⁹Yesu aengx mbuox laanh mienh, “Gan yie mingh maah!” Wuov laanh mienh dau, “Domh Gorx aah! Yie tov nzuonx mingh biopv yie nyei die ndaangc.”

⁶⁰Yesu dau, “Sueih daic mingh nyei mienh ganh biopv ninh mbuo nyei daic mingh nyei mienh aqv. Meih gunv mingh zunh Tin-Hungh zoux Ziouv gunv mienh nyei kuv fienx.”

⁶¹Aengx maaih laanh gorngv mbuox Yesu, “Domh Gorx aah! Yie oix gan meih mingh mv baac yie tov nzuonx mbuox dangh yie nyei hmuangv doic.”

⁶²Yesu gorngv, “Haaix dauh nanv jienv laih bieiv laih lingh mv baac ninh huin nzuonx mangc nqa'haav, wuov dauh maiv puix yiem Tin-Hungh nyei guoqv.”