Read Iu Mien Nzamc Leiz-Latc 23 Bible Online

Nzamc Leiz-Latc 23 - Iu Mien bible

Nzamc Leiz-Latc 23

¹Da'faanh zuqc im dov nyei[56] fai zuqc lamh mbueiz dorngx gaatv juotc nyei m'jangc dorn, maiv dungx bun bieqc ZIOUV nyei mienh gapv zunv nyei wuic.

²Toi daaih nyei fu'jueiv, maiv dungx bun bieqc ZIOUV nyei mienh gapv zunv nyei wuic. Liemh njiec taux ziepc doic zeiv-fun, maiv duqv bieqc Ziouv nyei mienh gapv zunv nyei wuic.

³Da'faanh Ammon Mienh fai Mo^apc Mienh, maiv dungx bun bieqc ZIOUV nyei mienh gapv zunv nyei wuic. Liemh njiec taux ninh mbuo nyei ziepc doic zeiv-fun, yaac maiv duqv bieqc.

⁴Meih mbuo cuotv I^yipv Deic-Bung wuov zanc, naaiv deix i fingx mienh maiv dorh nyanc hopv, maiv dorh wuom daaih zipv meih mbuo. Ninh mbuo zungv cingv yiem Me^so^bo^de^mie nyei Beto Zingh, Mbe^o nyei dorn, Mbaa^laa^am, zioux meih mbuo.

⁵Mv baac Ziouv, meih mbuo nyei Tin-Hungh, maiv muangx Mbaa^laa^am nyei waac. Daaux nzuonx ninh bun wuov deix zioux nyei waac tiuv benx buang nyei waac, weic zuqc ZIOUV, meih mbuo nyei Tin-Hungh, hnamv meih mbuo.

⁶Meih mbuo yietc liuz yietc seix maiv dungx tengx ninh mbuo duqv baengh orn fai duqv longx.

⁷Maiv dungx nzorng E^ndom Mienh weic zuqc ninh mbuo zoux meih mbuo nyei gorx-youz. Yaac maiv dungx nzorng I^yipv Mienh weic zuqc meih mbuo zoux ganh fingx mienh yiem jiex ninh mbuo nyei deic-bung.

⁸Naaiv deix mienh nyei da'faam doic zeiv-fun haih duqv bieqc ZIOUV nyei mienh gapv zunv nyei wuic.

⁹Meih mbuo cuotv mingh caux win-wangv mborqv jaax, yiem ciangv nyei ziangh hoc oix zuqc simv nqoi nyungc-nyungc haih bun meih mbuo maaih uix nyei ga'naaiv.

¹⁰Se gorngv meih mbuo nyei haaix dauh mienh lungh muonz zanc bueix m'njormh maaih jaix-nongc cuotv, ninh ziouc maaih uix. Ninh oix zuqc cuotv ga'nyiec ndopv-liuh ciangv yiem jienv wuov.

¹¹Mv baac taux lungh maanz-hmuangx oix zuqc nzaaux nzengc sin. Taux mba'hnoi muotv, bieqc ndopv-liuh ciangv duqv aqv.

¹²Yiem meih mbuo nyei ciangv ga'nyiec maengx oix zuqc dingc norm dorngx zoux jaiv buoz nyei dorngx.

¹³Oix zuqc maaih diuh ciu caux jienv meih mbuo nyei jaa-sic an. Haaix zanc mingh jaiv buoz oix zuqc longc ciu wetv kuotv. Jaiv liuz buoz, nqa'haav aengx biopv jienv.

¹⁴ZIOUV, meih mbuo nyei Tin-Hungh, caux meih mbuo yiem ciangv gu'nyuoz weic beu jienv meih mbuo, tengx meih mbuo mborqv hingh meih mbuo nyei win-wangv. Weic naaiv meih mbuo nyei ciangv oix zuqc cing-nzengc weic bun ZIOUV maiv buatc yiem meih mbuo mbu'ndongx maaih haaix nyungc maaih uix, laih hlopv nyei ga'naaiv ziouc leih nqoi meih mbuo.

¹⁵Se gorngv maaih dauh nouh biaux ninh nyei ziouv ziouc daaih kaux meih mbuo, maiv dungx zorqv ninh jiu bun ninh nyei ziouv.

¹⁶Bun ninh yiem meih mbuo mbu'ndongx. Oix yiem haaix norm mungv, haaix norm dorngx, sueih ninh ginv. Yaac maiv dungx zoux doqc hoic ninh.

¹⁷I^saa^laa^en Mienh m'jangc m'sieqv maiv dungx maaih haaix dauh yiem zaangc zienh nyei biauv zoux maaic buonv-sin nyei mienh.

¹⁸M'jangc[57] fai m'sieqv maaic buonv-sin duqv daaih nyei nyaanh maiv dungx dorh bieqc ZIOUV, meih mbuo nyei Tin-Hungh, nyei biauv weic jaauv sung laengz nyei ngaengc waac, weic zuqc naaiv deix i nyungc mienh, ZIOUV, meih mbuo nyei Tin-Hungh, youx! haic.

¹⁹Gaav haaix nyungc bun meih mbuo nyei gorx-youz, maiv dungx longc leic zinh, maiv gunv gaav nyaanh fai nyanc hopv fai haaix nyungc haih duqv leic zinh nyei ga'naaiv.

²⁰Gaav bun ganh fingx mienh weic longc leic duqv nyei. Mv baac gaav bun caux meih mbuo juangc fingx nyei I^saa^laa^en Mienh gorx-youz maiv dungx gaav weic longc leic. Hnangv naaic meih mbuo bieqc oix benx meih mbuo nyei buonc wuov norm deic-bung, ZIOUV, meih mbuo nyei Tin-Hungh, ziouc ceix fuqv meih mbuo nyei buoz zoux nyei nyungc-nyungc gong.

²¹Se gorngv meih mbuo laengz ngaengc waac bun ZIOUV, meih mbuo nyei Tin-Hungh, maiv dungx ngaih, oix zuqc jaauv, weic zuqc ZIOUV, meih mbuo nyei Tin-Hungh, ndongc haaix zungv oix aapv meih mbuo jaauv. Maiv jaauv nor, benx zuiz mi'aqv.

²²Mv baac se gorngv meih mbuo simv jienv, maiv laengz haaix nyungc, meih mbuo ziouc maiv maaih zuiz.

²³Meih mbuo nyei nzuih gorngv cuotv laengz haaix nyungc, za'gengh oix zuqc ei jienv wuov nyungc zoux, weic zuqc se meih mbuo ganh maaih hnyouv laengz bun ZIOUV, meih mbuo nyei Tin-Hungh.

²⁴Se gorngv meih mbuo bieqc juangc laangz mienh nyei a'ngunc huingx, sueih binc nyanc a'ngunc biouv, mv baac maiv dungx gaeqv dapv ndaan dorh nzuonx.

²⁵Se gorngv bieqc ganh dauh mienh nyei mbiauh ndeic, longc buoz nietv mbiauh dorv hlatv nyanc duqv nyei, mv baac maiv dungx longc nzuqc limh gaatv.