Read Iu Mien Nzamc Leiz-Latc 29 Bible Online

Nzamc Leiz-Latc 29 - Iu Mien bible

Nzamc Leiz-Latc 29

¹Naaiv deix waac se yiem Mo^apc wuov zanc, ZIOUV hatc Mose caux I^saa^laa^en Mienh liepc nyei ngaengc waac, tipv jienv yiem Holepv ninh caux ninh mbuo liepc nyei ngaengc waac.

²Mose heuc I^saa^laa^en nyei zuangx mienh gapv zunv ziouc gorngv mbuox ninh mbuo, Meih mbuo ganh nyei m'zing duqv buatc yiem I^yipv Deic-Bung, ZIOUV hnangv haaix nor zoux bun Faalo Hungh caux ninh nyei zuangx jien caux gormx ninh nyei deic-bung.

³Meih mbuo ganh nyei m'zing duqv buatc wuov deix domh zeqc naanc caux mbuoqc horngh nyei sic caux jangx-hoc.

⁴Mv baac taux ih hnoi ZIOUV maiv bun meih mbuo nyei hnyouv haih mengh baeqc, maiv bun meih mbuo nyei m'zing haih mangc duqv buatc, yaac maiv bun meih mbuo nyei m'normh haih muangx duqv haiz.

⁵Yie dorh meih mbuo yiem deic-bung-huaang wuov deix feix ziepc hnyangx gu'nyuoz, meih mbuo zuqv nyei lui-houx yaac maiv huv. Meih mbuo daapc nyei heh yaac maiv waaic.

⁶Meih mbuo maiv duqv nyanc njuov yaac maiv duqv hopv a'ngunc diuv fai diuv-kuv. Yie hnangv naaiv zoux weic bun meih mbuo hiuv duqv yie se ZIOUV, meih mbuo nyei Tin-Hungh.

⁷Meih mbuo daaih taux naaiv norm deic-bung wuov zanc Hetv^mbon Zingh nyei Si^honx Hungh caux Mbaasaan nyei Okc Hungh, cuotv daaih caux mbuo mborqv jaax mv baac mbuo mborqv hingh ninh mbuo.

⁸Mbuo caangv nzengc ninh mbuo nyei deic-bung jiu bun Lu^mben Fingx, Gaatc Fingx, caux Maa^natv^se nyei ndaamv-fingx.

⁹Meih mbuo oix zuqc ziepc zuoqv nyei gan longx naaiv deix ngaengc waac weic bun meih mbuo zoux nyei nyungc-nyungc duqv longx.

¹⁰Ih hnoi meih mbuo fingx-fingx nyei bieiv zeiv caux mienh gox, meih mbuo nyei jien, I^saa^laa^en Mienh nyei yietc zuangx m'jangc dorn,

¹¹meih mbuo nyei auv-jueiv, yiem meih mbuo nyei ndopv-liuh ciangv nyei ganh fingx mienh, caux tengx meih mbuo gaeqv zaangh ndaam wuom nyei mienh, daaih gapv zunv souv jienv ZIOUV, meih mbuo nyei Tin-Hungh, nyei nza'hmien.

¹²Meih mbuo daaih weic zipv ZIOUV, meih mbuo nyei Tin-Hungh, houv jienv caux meih mbuo laengz jiez nyei ngaengc waac, se dongh ih hnoi ZIOUV, meih mbuo nyei Tin-Hungh, caux meih mbuo liepc jiez nyei ngaengc waac.

¹³Ih hnoi ZIOUV oix liepc meih mbuo benx ninh ganh nyei baeqc fingx. Ninh ziouc benx meih mbuo nyei Tin-Hungh, hnangv ninh caux meih mbuo laengz, yaac hnangv ninh caux meih mbuo nyei ong-taaix, Apc^laa^ham, I^sakc, caux Yaakopv houv jienv laengz wuov nor.

¹⁴Yie maiv daan caux meih mbuo liepc naaiv deix ngaengc waac,

¹⁵se maiv zeiz kungx caux yie mbuo souv jienv naaiv yiem ZIOUV, mbuo nyei Tin-Hungh, nyei nza'hmien wuov deix hnangv. Yie yaac caux nqa'haav hingv maiv gaengh cuotv seix nyei zeiv-fun liepc naaiv deix ngaengc waac.

¹⁶Meih mbuo hiuv duqv mbuo yiem I^yipv Deic-Bung wuov zanc mbuo hnangv haaix nor yiem, yaac hiuv duqv mbuo jiex wuov deix camv-fingx mienh nyei guoqv hnangv haaix nor jiex.

¹⁷Meih mbuo duqv buatc yiem ninh mbuo mbu'ndongx longc ndiangx, longc la'bieiv fai jiem nyaanh zoux daaih wuov deix youx haic, gamh nziev haic nyei miuc-fangx.

¹⁸Oix zuqc faix fim, nziex yiem meih mbuo mbu'ndongx nyei haaix dauh m'jangc m'sieqv fai haaix buonc, haaix fingx mienh guangc ZIOUV, meih mbuo nyei Tin-Hungh, mingh zaangc wuov deix guoqv nyei zienh. Nziex yiem meih mbuo mbu'ndongx haih hnangv maaih gorn cuotv im haic, haih laengc mienh nyei biouv.

¹⁹Se gorngv maaih dauh naaiv nyungc mienh haiz naaiv deix houv nyei ngaengc waac, ninh yiem hnyouv haiz hnangv buang waac ninh ganh ziouc laaic, “Maiv gunv sueih eix zoux, yie corc haih duqv longx nyei.” Hnangv naaic, maiv gunv kuv mienh fai orqv mienh, yietc zungv oix zuqc mietc nzengc.[70]

²⁰ZIOUV yietc liuz maiv guangc naaiv nyungc mienh nyei zuiz. ZIOUV qiex jiez, hanc gau, ziouc bun naaiv laanh mienh siouc fiev jienv naaiv buonv sou yietc zungv zioux nyei waac taux zuqc mietc nzengc, maiv duqv yiem naaiv lungh ndiev.

²¹ZIOUV oix yiem fingx-fingx I^saa^laa^en Mienh mbu'ndongx zorqv ninh nduqc laanh mienh cuotv, bun ninh zuqc kouv, ziux naaiv buonv Leiz-Latc Sou fiev jienv nyei ngaengc waac zuqc zioux.

²²Meih mbuo doic jiex doic nqa'haav hingv cuotv seix nyei zeiv-fun caux yiem go nyei deic-bung daaih nyei ganh fingx mienh ziouc buatc naaiv norm deic-bung zuqc buangh nyei domh sic caux ZIOUV bun deic-bung zuqc nyei nyungc-nyungc baengc.

²³Naaiv norm deic-bung kungx maaih hungh,[71] maaih nzauv, benx ndau-huaang, weic zuqc douz buov qui mi'aqv. Maiv maaih haaix dauh zuangx ga'naaiv yaac maiv maaih haaix nyungc gaeng-zuangx cuotv. Liemh miev yaac maiv cuotv. ZIOUV oix bun deic-bung zuqc baaic hnangv ninh qiex jiez! haic ziouc zoux bun So^ndom, Go^mo^laa, Atc^maa caux Se^mbo^yim zuqc baaic wuov nor.

²⁴Maanc fingx mienh zungv oix naaic, “ZIOUV weic haaix diuc hnangv naaiv nor zoux bun naaiv norm deic-bung? Ninh weic haaix diuc ndongc naaic qiex jiez?”

²⁵Mienh ziouc dau, “Se weic zuqc naaiv deix mienh guangc ZIOUV, ninh mbuo nyei ong-taaix nyei Tin-Hungh, dorh ninh mbuo cuotv I^yipv Deic-Bung nyei ziangh hoc caux ninh mbuo liepc nyei ngaengc waac.

²⁶Ninh mbuo mingh fu-sux baaix dongh ninh mbuo maiv baaix jiex nyei zienh, se ZIOUV maiv bun ninh mbuo zaangc nyei zienh.

²⁷Weic naaiv ZIOUV qiex jiez! haic naaiv norm deic-bung, bun ninh mbuo zuqc zioux hnangv naaiv buonv sou fiev jienv nyei waac.

²⁸ZIOUV nouz haic, qiex jiez jienv baeng ninh mbuo cuotv daaih guangc yiem ganh norm guoqv hnangv ih jaax hnoi nor.”

²⁹Gem jienv nyei sic se ZIOUV, mbuo nyei Tin-Hungh nyei. Laauc yaangh nyei sic yietc liuz benx mbuo nyei caux mbuo nyei zeiv-fun nyei, weic bun mbuo haih ei jienv naaiv deix leiz-latc nyei yietc zungv waac zoux.