Read Iu Mien Nzamc Leiz-Latc 3 Bible Online

Nzamc Leiz-Latc 3 - Iu Mien bible

Nzamc Leiz-Latc 3

¹Nqa'haav mbuo huin hungx jienv Mbaasaan mingh. Mbaasaan Deic nyei Okc Hungh, caux ninh nyei zuangx baeng ziouc cuotv daaih taux E^nden^i Zingh caux mbuo mborqv jaax.

²ZIOUV gorngv mbuox yie, “Maiv dungx gamh nziex ninh, weic zuqc yie zorqv ninh caux ninh nyei zuangx baeng caux ninh nyei deic-bung jiu bun yiem meih mbuo nyei buoz-ndiev mi'aqv. Oix zuqc zoux bun ninh hnangv meih mbuo zoux bun yiem Hetv^mbon wuov dauh Aa^mo^lai Mienh nyei hungh, Si^honx, wuov nor.”

³ZIOUV, mbuo nyei Tin-Hungh, yaac zorqv Mbaasaan nyei Okc Hungh, caux ninh nyei zuangx baeng jiu bun yiem mbuo nyei buoz-ndiev. Mbuo ziouc daix nzengc ninh mbuo. Maiv liouh yietc dauh.

⁴Wuov zanc mbuo zorqv nzengc ninh nyei yietc zungv zingh. Yiem Mbaasaan nyei Okc Hungh gunv nyei Aan^gopc Deic, mbuo zorqv nzengc luoqc ziepc norm zingh. Maiv maaih yietc norm zingh mbuo maiv duqv zorqv.

⁵Naaiv deix yietc zungv zingh maaih zingh laatc hlang, maaih laatc gaengh, yaac maaih gaengh sorn tengx zingh wuonv. Maiv maaih zingh laatc nyei laangz yaac maaih camv nyei.

⁶Mbuo yaac mietc nzengc ninh mbuo[15] hnangv mbuo zoux bun Hetv^mbon Zingh nyei Si^honx Hungh wuov nor, se mietc nzengc norm-norm zingh, liemh m'jangc m'sieqv caux fu'jueiv.

⁷Mv baac yietc zungv saeng-kuv caux yiem zingh caangv daaih nyei ga'naaiv mbuo dorh mingh liouh mbuo ganh longc.

⁸Wuov zanc mbuo caangv nzengc Aa^mo^lai Mienh nyei i dauh hungh nyei deic-bung yiem Jor^ndaen Ndaaih nyei dong bung maengx, Aannon Horngz, mingh taux Hemon Mbong.

⁹(Naaiv norm Hemon Mbong, Sai^ndorn Mienh heuc Si^li^orn. Aa^mo^lai Mienh heuc Seni.)

¹⁰Mbuo caangv duqv nzengc lamh hlang ndau-baengh nyei norm-norm zingh caux Gi^le^aatc Deic yietc zungv caux Mbaasaan Deic yietc zungv, mingh taux Saax^le^kaa caux E^nden^i Zingh. Naaiv se Mbaasaan Guoqv nyei Okc Hungh nyei zingh.

¹¹(Zengc njiec nyei Le^faa^im Mienh kungx maaih Mbaasaan nyei Okc Hungh hnangv. Ninh nyei coux[16] longc hlieqv[17] zoux daaih, ndaauv nduoh ndorqc, jangv biei ndorqc, ziux pou-tong nyei ndorqc. Naaiv zung coux ih jaax hnoi corc yiem Ammon Mienh nyei Lapv^mbaa Zingh.)

¹²Wuov zanc mbuo caangv duqv daaih nyei deic-bung yiem Aannon Horngz ga'hlen nyei Aa^lo^e Zingh baqv bung, liemh Gi^le^aatc nyei yietc buonc mbong zaangc dorngx caux wuov deix deic-bung nyei zingh jiu bun Lu^mben Fingx caux Gaatc Fingx.

¹³Gi^le^aatc zengc njiec nyei ndau caux Okc Hungh nyei guoqv, Mbaasaan, se Aan^gopc Deic yietc zungv, yie jiu bun Maa^natv^se ndaamv-fingx. (Mbaasaan Deic mienh heuc zoux Le^faa^im Mienh nyei deic.

¹⁴Maaih dauh Maa^natv^se nyei zeiv-fun, Jaa^i, caangv duqv Aan^gopc Deic yietc zungv, se Mbaasaan Deic-Bung mingh taux Gesu Mienh caux Maa^aa^kaa Mienh nyei gapv-jaaix. Ninh cuotv wuov norm dorngx nyei laangz nyei mbuox heuc nitv ninh ganh nyei mbuox. Mbaasaan Deic-Bung corc maaih mbuox heuc Haau^wotv Jaa^i hnangv ih jaax hnoi nor.)

¹⁵Yie zorqv Gi^le^aatc Deic bun dauh Maa^natv^se nyei zeiv-fun, Maa^ki^le.

¹⁶Yiem Aannon Horngz, longc horngz mbu'ndongx zoux gapv-jaaix, mingh taux Ammon Mienh nyei gapv-jaaix, Yapv^mborkc Ndaaih, yie bun nzengc Lu^mben Fingx caux Gaatc Fingx.

¹⁷Fai bung nyei gapv-jaaix yiem Aa^laa^mbaa nyei Jor^ndaen Ndaaih, se yiem Kin^ne^letv Koiv-Dorn[18] mingh taux Aa^laa^mbaa Koiv, se Koiv-Nzauv, Bitc^gaa nyei mbong-juoqv.

¹⁸Wuov zanc yie paaiv meih mbuo, gorngv, “ZIOUV, meih mbuo nyei Tin-Hungh, zorqv naaiv norm deic-bung jiu bun meih mbuo, benx meih mbuo nyei buonc. Meih mbuo nyei yietc zungv mborqv jaax henv nyei mienh oix zuqc buix jienv wuoqc ginc yiem meih mbuo nyei I^saa^laa^en Mienh gorx-youz nyei wuov ndaangc maengx jiex Jor^ndaen Ndaaih.

¹⁹Mv baac meih mbuo nyei auv-jueiv caux meih mbuo nyei saeng-kuv, (yie hiuv duqv meih mbuo maaih saeng-kuv camv haic), oix zuqc yiem yie jiu bun meih mbuo liuz wuov deix zingh,

²⁰zuov meih mbuo nyei gorx-youz duqv hitv kuonx hnangv meih mbuo nor. Se zuov ninh mbuo duqv yiem jienv wuov ngaanc bung Jor^ndaen Ndaaih, dongh ZIOUV, meih mbuo nyei Tin-Hungh, jiu bun ninh mbuo nyei deic-bung. Nqa'haav meih mbuo gorqv-mienh duqv nzuonx yie ceix bun gorqv-mienh nyei buonc ndau.”

²¹Wuov zanc yie mbuox Yo^su^waa, “Meih ganh nyei m'zing duqv buatc ZIOUV, meih nyei Tin-Hungh, hnangv haaix nor zoux bun naaiv deix i dauh hungh. ZIOUV yaac oix hnangv wuov nor zoux bun dongh jiex wuov ngaanc meih mbuo oix mingh nyei norm-norm deic-bung.

²²Maiv dungx gamh nziex ninh mbuo weic zuqc ZIOUV, meih mbuo nyei Tin-Hungh ganh, oix weic meih mbuo mborqv jaax.”

²³Wuov zanc yie qaqv tov ZIOUV,

²⁴“O Ziouv TIN-HUNGH aac, meih bun yie, meih nyei bou, jiez gorn buatc meih henv haic nyei domh qaqv.[19] Yiem lungh yiem ndau maaih haaix dauh zienh haih hnangv ZIOUV zoux hlo haic, henv haic nyei sic?

²⁵Tov nqoi nzuih bun yie jiex wuov ngaanc ziqc Jor^ndaen Ndaaih mangc wuov norm longx haic nyei deic-bung, se wuov norm nzueic haic nyei geh zorng, caux Le^mbaa^norn Geh.”

²⁶Mv baac laaix meih mbuo, ZIOUV qiex jiez yie, maiv muangx yie. ZIOUV gorngv, “Gaux aqv! Maiv dungx aengx caux yie gorngv naaiv deix sic maah!

²⁷Meih faaux Bitc^gaa Mbong-ningv mingh mangc dong naamh fai baqv. Longc meih ganh nyei m'zing mangc wuov norm deic-bung weic zuqc meih zungv maiv duqv jiex Jor^ndaen Ndaaih.

²⁸Oix zuqc paaiv Yo^su^waa, kuinx ninh, tengx ninh zungx qaqv, weic zuqc ninh oix zuqc dorh naaiv deix mienh jiex ndaaih nzipc meih duqv buatc nyei deic-bung.”

²⁹Hnangv naaic, mbuo yiem jienv Mbetc Be^o Zingh doix-ngaanc nyei horngz.