Read Iu Mien Nzamc Leiz-Latc 34 Bible Online

Nzamc Leiz-Latc 34 - Iu Mien bible

Nzamc Leiz-Latc 34

¹Mose ziouc yiem Mo^apc Ndau-Baengh faaux Ne^mbo Mbong taux Bitc^gaa Mbong-ningv, yiem Ye^li^ko Zingh nyei doix-ngaanc. Yiem wuov ZIOUV bun ninh mangc gormx wuov norm deic-bung, se mangc yiem Gi^le^aatc Deic taux Ndaan Zingh,

²Napv^taa^li Deic huing nzuonx nyei yietc zungv, mangc E^faa^im Deic caux Maa^natv^se Deic, mangc gormx Yu^ndaa Deic mingh fai bung taux Me^ndi^de^le^nien Koiv,

³aengx mangc Negepc caux Ye^li^ko horngc zaangc nyei ndau-baengh, Daau-Lomc Zingh[104] mingh taux So^aa Zingh.

⁴ZIOUV gorngv mbuox Mose, “Naaiv se yie houv bun Apc^laa^ham, Yaakopv caux I^sakc nyei deic-bung. Wuov zanc yie gorngv, ‘Yie oix jiu bun meih mbuo nyei zeiv-fun.’ Ih zanc yie bun meih mangc yietc mueic mv baac meih maiv duqv bieqc.”

⁵ZIOUV nyei bou, Mose, ziouc yiem Mo^apc Deic-Bung guei seix hnangv ZIOUV gorngv wuov nor.

⁶ZIOUV ziouc zorqv Mose nyei sei zangx jienv wuov Mo^apc Deic, yiem Mbetc Be^o Zingh doix-ngaanc nyei horngz, mv baac taux ih jaax hnoi maiv maaih haaix dauh hiuv duqv ninh nyei zouv yiem haaix.

⁷Mose guei seix wuov zanc, ninh nyei hnyangx-jeiv duqv yietc baeqv nyic ziepc hnyangx. Ninh nyei m'zing maiv gaengh mbuov, ninh nyei qaqv yaac maiv gaengh tuix.

⁸I^saa^laa^en Mienh yiem Mo^apc Ndau-Baengh weic Mose nzauh nyiemv faah ziepc hnoi, taux ninh mbuo nzauh nyiemv nyei ziangh hoc buangv.

⁹Nun nyei dorn, Yo^su^waa, maaih cong-mengh buangv hnyouv, weic zuqc Mose dorh buoz maan jienv ninh. I^saa^laa^en Mienh ziouc muangx ninh yaac ei jienv ZIOUV paaiv Mose nyei waac zoux.

¹⁰Yiem naaic daaih maiv maaih haaix dauh douc waac mienh hnangv Mose, se ZIOUV caux ninh hmien doix hmien gorngv waac.

¹¹Maiv maaih ganh dauh douc waac mienh zoux mbuoqc horngh nyei sic caux jangx-hoc hnangv ZIOUV paaiv Mose doix I^yipv Deic-Bung nyei Faalo Hungh caux Faalo nyei jien caux ninh nyei guoqv nyei baeqc fingx zoux.

¹²Maiv maaih ganh dauh douc waac mienh hnangv Mose yiem I^saa^laa^en yietc zuangx mienh nyei nza'hmien maaih domh qaqv zoux yietc zungv mbuoqc horngh, gamh nziex haic nyei sic.