Read Iu Mien Yo^han 11 Bible Online

Yo^han 11 - Iu Mien bible

Yo^han 11

¹Maaih dauh mienh, mbuox heuc Laa^saa^latv, butv baengc mi'aqv. Ninh yiem Mbe^taa^ni Laangz, dongh Maa^li^yaa caux ninh nyei dorc, Maataa, yiem wuov norm laangz.

²(Naaiv dauh Maa^li^yaa se dongh longc ndaang nyei youh dox Ziouv nyei zaux, yaac longc ninh ganh nyei mba'biei sortv. Butv baengc wuov dauh Laa^saa^latv se Maa^li^yaa nyei nauz.)

³Maataa mbuo i muoz-sieqv ziouc bun waac mingh mbuox Yesu, “Ziouv aah! Dongh meih hnamv wuov dauh butv baengc mi'aqv.”

⁴Yesu haiz naaiv deix waac ninh gorngv, “Laa^saa^latv butv naaiv norm baengc mv baac setv mueiz ninh maiv daic. Ninh butv weic bun mienh taaih Tin-Hungh. Naaiv norm baengc yaac oix bun mienh taaih Tin-Hungh nyei Dorn.”

⁵Yesu hnamv haic Maataa mbuo i muoz-sieqv caux Laa^saa^latv.

⁶Ninh haiz mienh gorngv Laa^saa^latv butv jienv baengc, ninh corc yiem ninh yiem wuov norm dorngx i hnoi liuz

⁷cingx daaih gorngv mbuox ninh nyei sai-gorx, “Mbuo aengx mingh Yu^ndie Saengv aqv.”

⁸Sai-gorx mbuo dau, “Sai-Diex aah! Jiex daaih maiv gaengh maaih mbu'ziex hnoi, yiem wuov nyei Yiutai Mienh oix zorqv la'bieiv zong meih niaa. Meih corc aengx oix mingh wuov?”

⁹Yesu dau, “Yietc hnoi maaih ziepc nyeic norm ziangh hoc nyei njang maiv zeiz? Haaix dauh lungh hnoi zanc yangh jauv, ninh maiv ndiqv zuqc ndorpc weic zuqc ninh mangc duqv buatc baamh gen nyei njang.

¹⁰Mv baac se gorngv ninh lungh muonz zanc yangh jauv nor, ninh ndiqv zuqc ndorpc weic zuqc maiv maaih njang ziux ninh.”

¹¹Yesu hnangv naaiv nor gorngv liuz ninh aengx gorngv, “Mbuo nyei doic Laa^saa^latv m'njormh mi'aqv, mv baac yie oix mingh heuc ninh nyie daaih.”

¹²Sai-gorx mbuo dau, “Ziouv aah! Se gorngv ninh m'njormh nor, ninh haih longx nyei.”

¹³Yesu gorngv nyei eix leiz se Laa^saa^latv daic mi'aqv. Mv baac sai-gorx mbuo laaic Laa^saa^latv kungx m'njormh hnangv.

¹⁴Yesu ziouc gorngv zaqc mbuox ninh mbuo, “Laa^saa^latv daic mi'aqv.

¹⁵Mv baac weic tengx meih mbuo sienx yie, yie a'hneiv yie maiv duqv caux ninh yiem. Mbuo mingh ninh wuov orqc?”

¹⁶Tomatv, dongh mienh heuc Sung-Gu'nguaaz wuov dauh, gorngv mbuox yiem wuov nyei sai-gorx, “Mbuo lomh nzoih gan jienv Sai-Diex mingh orqc? Mbuo ziouc duqv caux ninh daic.”

¹⁷Yesu mingh taux Mbe^taa^ni Laangz wuov zanc, haiz mienh gorngv Laa^saa^latv zangx jienv duqv biei hnoi aqv.

¹⁸Mbe^taa^ni Laangz leih Ye^lu^saa^lem Zingh buo gilo jauv nyei dorngx.

¹⁹Yiutai Mienh camv nyei daaih mangc Maataa caux Maa^li^yaa, tengx ninh mbuo jaiv nzauh weic zuqc ninh mbuo nyei nauz daic.

²⁰Maataa haiz gorngv Yesu daaih aqv, ninh ziouc cuotv mingh zipv. Mv baac Maa^li^yaa corc yiem wuov biauv.

²¹Maataa gorngv mbuox Yesu, “Ziouv aah! Se gorngv meih yiem naaiv nor, yie nyei nauz maiv daic.

²²Mv baac, yie hiuv duqv ih zanc meih tengx Tin-Hungh tov haaix nyungc, Tin-Hungh oix bun wuov nyungc meih.”

²³Yesu gorngv mbuox ninh, “Meih nyei nauz aengx oix nangh daaih.”

²⁴Maataa dau, “Zeiz nyei, yie hiuv duqv taux nqa'haav laai wuov hnoi, zuangx mienh nangh daaih wuov zanc, ninh yaac aengx nangh daaih.”

²⁵Yesu gorngv mbuox ninh, “Yie se dongh bun mienh nangh daaih maaih maengc ziangh wuov dauh. Haaix dauh sienx yie, maiv gunv ninh daic mingh, ninh aengx oix nangh daaih.

²⁶Haaix dauh ziangh jienv yaac sienx yie, wuov dauh yietc liuz maiv daic. Naaiv meih sienx nyei fai?”

²⁷Maataa dau, “Ziouv aah! Yie sienx nyei. Yie sienx meih za'gengh Giduc,[17] Tin-Hungh nyei Dorn, dongh oix njiec daaih yiem naaiv baamh gen wuov dauh.”

²⁸Maataa hnangv naaiv nor gorngv liuz, ninh nzuonx mingh bingx jienv mbuox ninh nyei nziez, Maa^li^yaa, “Sai-Diex taux daaih aqv. Ninh yaac heuc meih.”

²⁹Maa^li^yaa haiz naaiv deix waac ziouc siepv-siepv nyei jiez sin mingh Yesu wuov.

³⁰Wuov zanc Yesu maiv gaengh bieqc laangz, corc yiem Maataa buangh ninh wuov norm dorngx.

³¹Caux Maa^li^yaa yiem biauv tengx ninh jaiv nzauh wuov deix mienh, buatc Maa^li^yaa huaang jienv jiez sin cuotv, ninh mbuo ziouc gan jienv mingh, laaic ninh mingh wuov zouv nyiemv mv bei.

³²Maa^li^yaa mingh taux Yesu wuov, yietv buatc ziouc gueic njiec ninh nyei zaux ga'hlen gorngv, “Ziouv aah! Se gorngv meih yiem naaiv, yie nyei nauz maiv daic.”

³³Yesu buatc Maa^li^yaa nyiemv, gan Maa^li^yaa daaih wuov deix Yiutai Mienh yaac nyiemv, ninh ziouc haiz hnyouv mun haic, nzauh haic.

³⁴Yesu naaic, “Meih mbuo dorh ninh mingh zangx haaix?” Ninh mbuo dau, “Ziouv aah! Daaih mangc maah!”

³⁵Yesu nyiemv.

³⁶Wuov deix Yiutai Mienh gorngv, “Mangc gaax, ninh ndongc naaic hnamv Laa^saa^latv.”

³⁷Mv baac maaih deix gorngv, “Ninh bun m'zing maengh nyei mienh haih mangc duqv buatc. Wuov nyungc ninh maiv haih bun naaiv dauh mienh maiv daic fai?”

³⁸Yesu aengx haiz hnyouv mun, nzauh haic, ziouc mingh wuov zouv. Wuov norm zouv se mbaengx-kuotv. Maaih norm la'bieiv hlo nyei mbaeqc jienv kuotv-ndaangc.

³⁹Yesu gorngv, “Zorqv nqoi la'bieiv maah!” Daic wuov dauh Laa^saa^latv nyei dorc, Maataa, gorngv mbuox Yesu, “Ziouv aah! Zangx jienv duqv biei hnoi aqv. Daaix zueix haic.”

⁴⁰Yesu gorngv mbuox ninh, “Yie mbuox jiex meih maiv zeiz? Se gorngv meih sienx, meih oix duqv buatc Tin-Hungh nyei njang-laangc.”

⁴¹Wuov deix mienh ziouc zorqv nqoi la'bieiv. Yesu cau hmien mangc gu'nguaaic lungh gorngv, “Aa Die aah! Yie laengz zingh weic zuqc Die muangx yie nyei waac.

⁴²Yie hiuv duqv Die haaix zanc yaac muangx yie, mv baac yie hnangv naaiv nor gorngv se weic bun souv ga'hlen naaiv deix mienh sienx Die paaiv yie daaih.”

⁴³Yesu gorngv liuz naaiv deix waac ninh qiex hlo nyei heuc jienv gorngv, “Laa^saa^latv aah! Cuotv daaih maah!”

⁴⁴Daic mingh wuov dauh mienh ziouc cuotv daaih aqv. Ninh nyei buoz-zaux corc maaih ndie nzenc jienv. Hmien yaac maaih ndie buang jienv. Yesu mbuox ninh mbuo, “Nqongh tengx ninh jaiv nqoi, bungx ninh maah!”

⁴⁵Hnangv naaic daaih mangc Maa^li^yaa wuov deix Yiutai Mienh camv buatc Yesu zoux naaiv deix sic ziouc sienx ninh.

⁴⁶Mv baac maaih deix nzuonx mingh gorngv nzengc Yesu zoux nyei jauv-louc bun Faa^li^si Mienh muangx.

⁴⁷Naaiv deix sai mienh bieiv caux Faa^li^si Mienh ziouc heuc Gunv Sic Wuic nyei mienh gapv zunv caangh laangh. Ninh mbuo gorngv, “Aa, mbuo oix zuqc hnangv haaix nor zoux? Naaiv laanh mienh zoux mbuoqc horngh nyei jangx-hoc camv haic.

⁴⁸Se gorngv mbuo sueih ninh hnangv naaiv zoux jienv mingh, mienh ziouc sienx ninh nzengc aqv. Hnangv naaic, Lomaa jien oix bangc naaiv norm qangx zoux waaic mbuo zaangc Tin-Hungh nyei biauv, yaac zoux waaic mbuo nyei fingx.”

⁴⁹Naaiv guanh mienh maaih dauh, mbuox heuc Kaa^yaa^faatv, dongh wuov hnyangx zoux domh sai mienh. Ninh gorngv, “Meih mbuo maiv hiuv duqv haaix nyungc.

⁵⁰Meih mbuo maiv hiuv fai? Bun yietc dauh mienh daic div baeqc fingx se gauh longx yietc fingx mienh zuqc mietc nzengc.”

⁵¹Kaa^yaa^faatv gorngv naaiv deix waac se maiv zeiz ei ninh ganh nyei hnyouv hnamv cuotv daaih gorngv. Se weic zuqc wuov hnyangx ninh zoux domh sai mienh ziouc gorngv zinh hoz waac, gorngv Yesu oix zuqc weic yietc fingx Yiutai Mienh daic.

⁵²Yaac maiv zeiz weic wuov fingx daic hnangv. Ninh yaac daic weic siou zunv Tin-Hungh nyei naamh nyouz, se yiem nzaanx wuov deix, gapv zunv daaih benx yietc guanh.

⁵³Yiem naaic hnoi daaih, zoux hlo nyei Yiutai Mienh jiez gorn daav za'eix daix Yesu.

⁵⁴Weic naaiv Yesu maiv hnangv zinh ndaangc dorng zuangx youh Yu^ndie Saengv bun Yiutai Mienh buatc. Ninh mingh norm laangz heuc E^faa^im, nitv deic-bung-huaang fatv nyei, caux ninh nyei sai-gorx mbuo yiem wuov.

⁵⁵Aav lamh deix taux Yiutai Mienh jiex Siex Maengc Zipv, mienh camv yiem faam-bung feix louc mingh Ye^lu^saa^lem Zingh weic ei jienv leiz saax uix cingx daaih jiex zipv.

⁵⁶Ninh mbuo yiem zaangc Tin-Hungh nyei biauv-hlen lorz Yesu. Laanh naaic laanh, “Aa, meih hnangv haaix nor hnamv? Daaix ninh maiv daaih naaiv jiex zipv saah?”

⁵⁷Wuov zanc sai mienh bieiv caux Faa^li^si Mienh jaa ziangx waac gorngv, se gorngv haaix dauh hiuv duqv Yesu yiem haaix oix zuqc mingh mbuox ninh mbuo, ninh mbuo ziouc haih mingh zorqv ninh.