Read Iu Mien Yo^han 12 Bible Online

Yo^han 12 - Iu Mien bible

Yo^han 12

¹Siex Maengc Zipv maiv gaengh taux, zinh ndaangc juqv hnoi, Yesu mingh Mbe^taa^ni Laangz, dongh daic mingh Yesu bun nangh daaih wuov dauh Laa^saa^latv yiem nyei laangz.

²Yiem wuov ninh mbuo mbenc donx hnaangx houc Yesu. Maataa liuc leiz ninh mbuo. Laa^saa^latv yaac caux Yesu mbuo juangc dieh nyanc hnaangx.

³Wuov zanc, Maa^li^yaa zorqv ziepc faam lungz[18] zien haic, jaaix haic nyei naa^ndaa youh ndaang dox Yesu nyei zaux, aengx longc ninh ganh nyei mba'biei sortv. Youh nyei qiex ndaang buangv yietc norm biauv.

⁴Maaih dauh Yesu nyei sai-gorx, Yu^ndaatc I^saa^kaa^li^otc, dongh oix maaic Yesu wuov dauh ziouc gorngv,

⁵“Zoux haaix nyungc maiv dorh naaiv deix youh mingh maaic duqv nyaanh daaih bun mienh jomc mienh? Naaiv funx daaih horpc faam-baeqv hnoi nyei gong-zinh[19] niaa.”

⁶Yu^ndaatc hnangv naaiv nor gorngv se maiv zeiz ninh maaih hnyouv korv-lienh mienh jomc mienh. Se weic zuqc ninh ganh zoux janx-zaqc. Ninh tengx goux Yesu mbuo nyei domh zuangx nyaanh mbuoqc mv baac ninh ganh yaac pinx nyaanh cuotv.

⁷Yesu gorngv, “Maiv dungx gorngv ninh maah! Ninh maaih nyei sueih ninh liouh taux biopv yie wuov norm hnoi.

⁸Meih mbuo zanc-zanc maaih mienh jomc mienh caux meih mbuo yiem, mv baac meih mbuo maiv duqv yie caux meih mbuo yietc liuz yiem.”

⁹Maaih Yiutai Mienh camv haiz gorngv Yesu yiem Mbe^taa^ni Laangz. Ninh mbuo ziouc mingh wuov maiv zeiz kungx lorz Yesu hnangv. Ninh mbuo yaac oix mangc daic mingh, Yesu bun nangh daaih wuov dauh Laa^saa^latv.

¹⁰Sai mienh bieiv mbuo ziouc daav za'eix oix liemh Laa^saa^latv daix,

¹¹weic zuqc ninh nyei sic cuotv daaih bun mienh camv guangc jienv sai mienh bieiv sienx Yesu.

¹²Da'nyeic hnoi, daaih jiex Zipv wuov deix zuangx mienh haiz gorngv Yesu daaih aav lamh taux Ye^lu^saa^lem.

¹³Ninh mbuo ziouc nanv jienv daau-normh cuotv mingh zipv, yaac heuc jienv gorngv, “Ho^saa^naa![20] Tov ceix fuqv bun dengv Ziouv nyei mbuox daaih wuov dauh. Tov Tin-Hungh ceix fuqv bun I^saa^laa^en Mienh nyei Hungh Diex.”

¹⁴Yesu lorz duqv dauh maaz-li caan ziouc geh jienv daaih, hnangv Ging-Sou fiev jienv gorngv nor,

¹⁵“Si^on Zingh[21] aah! Maiv dungx gamh nziex. Meih nyei hungh diex geh jienv maaz-li caan daaih.”

¹⁶Daauh dangh Yesu nyei sai-gorx mbuo maiv mengh baeqc naaiv deix jauv. Mv baac Yesu daic, Tin-Hungh aengx bun ninh nangh daaih taaih ninh zoux hlo, ninh mbuo cingx jangx zuqc Ging-Sou fiev jienv hnangv naaiv nor gorngv taux Yesu, yaac jangx zuqc mienh hnangv naaiv nor zoux bun Yesu.

¹⁷Buatc Yesu heuc Laa^saa^latv yiem zouv nangh cuotv daaih wuov deix zuangx mienh zoux zorng-zengx gorngv nzengc naaiv deix jauv-louc.

¹⁸Weic zuqc zuangx mienh haiz gorngv Yesu zoux naaiv nzunc mbuoqc horngh nyei jangx-hoc, ninh mbuo ziouc mingh zipv.

¹⁹Faa^li^si Mienh ziouc laanh mbuox laanh, “Mangc maah! Mbuo zoux maiv cuotv haaix nyungc. Lungh ndiev mienh gan nzengc ninh mi'aqv.”

²⁰Mingh Ye^lu^saa^lem Zingh jiex Siex Maengc Zipv wuov zanc, maaih deix Janx-Gikc yaac gan jienv mingh zaangc Tin-Hungh.

²¹Naaiv deix Janx daaih lorz Filipv, dongh yiem Gaa^li^li Saengv, Mbetc^sai^ndaa Mungv daaih wuov dauh sai-gorx, gorngv mbuox ninh, “Domh Gorx aac, yie mbuo oix buangh[22] Yesu oc.”

²²Filipv ziouc mingh mbuox An^ndaa^lu. Ninh mbuo i dauh ziouc mingh mbuox Yesu.

²³Yesu dau ninh mbuo, “Ih zanc yie, Baamh Mienh nyei Dorn, duqv njang-laangc nyei ziangh hoc zungv taux aqv.

²⁴Yie gorngv zien mbuox meih mbuo, maaih yietc norm cuqv maiv zuangx njiec ndau huv mingh nor, m'daaih dongh wuov nduqc norm cuqv hnangv. Mv baac se gorngv zuangx njiec ndau huv mingh ziouc cuotv daaih duqv camv aqv.

²⁵Haaix dauh kungx hnamv ninh ganh nyei maengc, wuov dauh ziouc zuqc guangc ninh nyei maengc. Mv baac haaix dauh maiv korv-fiqv ninh nyei maengc, wuov dauh ziouc goux jienv ninh nyei maengc taux yietc liuz.

²⁶Haaix dauh oix tengx yie zoux bou, oix zuqc gan jienv yie mingh. Yie yiem haaix, bou yaac caux yie yiem wuov. Haaix dauh zoux yie nyei bou, yie nyei Die oix taaih ninh.

²⁷“Ih zanc yie hnyouv nzauh haic. Yie oix zuqc hnangv haaix nor gorngv ni? Oix zuqc gorngv, ‘Aa Die aah! Tov Die njoux yie maiv zuqc buangh naaiv deix kouv nyei sic’ fai? Maiv zeiz! Yie daaih weic oix zuqc siouc naaiv nyungc kouv.

²⁸Aa Die aah! Tov bun Die nyei mbuox duqv njang-laangc.” Aengx maaih qiex yiem wuov lungh gorngv, “Yie zungv bun yie nyei mbuox duqv njang-laangc. Yie aengx oix bun duqv njang-laangc.”

²⁹Souv jienv wuov nyei zuangx mienh haiz wuov nyungc qiex mbui, maaih deix gorngv, “Mba'ong mbui.” Maaih deix gorngv, “Fin-mienh caux ninh gorngv waac.”

³⁰Mv baac Yesu mbuox ninh mbuo, “Naaiv deix qiex mbui se weic meih mbuo, maiv zeiz weic yie.

³¹Ih zanc taux ziangh hoc Tin-Hungh oix dingc lungh ndiev mienh nyei zuiz. Gunv baamh gen wuov dauh yaac oix zuqc zunc cuotv.

³²Yie yiem ndau zuqc mienh liepc faaux hlang wuov zanc, yie oix yuoqc dauh dauh mienh daaih lorz yie.”

³³(Yesu hnangv naaiv nor gorngv weic bun cing ninh oix zuqc hnangv haaix nor daic.)

³⁴Zuangx mienh gorngv, “Leiz-Latc mbuox yie mbuo, Giduc oix yietc liuz yiem. Wuov nyungc meih hnangv haaix nor haih gorngv Baamh Mienh nyei Dorn oix zuqc mienh liepc faaux hlang? Naaiv dauh Baamh Mienh nyei Dorn dongh haaix dauh?”

³⁵Yesu mbuox ninh mbuo, “Njang aengx caux meih mbuo yiem douc hnangv. Corc maaih njang nyei ziangh hoc gaanv jienv yangh jauv mingh aqv. M'nziex hmuangx oix daaih om jienv[23] meih mbuo. Haaix dauh yiem hmuangx yangh jauv, wuov dauh maiv hiuv duqv ninh mingh haaix.

³⁶Maaih njang nyei ziangh hoc meih mbuo oix zuqc sienx kaux njang. Meih mbuo ziouc benx yiem njang nyei mienh.” Gorngv liuz naaiv deix waac, Yesu cuotv mingh bingx ninh mbuo mi'aqv.

³⁷Maiv gunv Yesu zoux mbuoqc horngh haic nyei jangx-hoc ndongc naaic camv bun Yiutai Mienh buatc, ninh mbuo corc maiv sienx ninh.

³⁸Hnangv naaic weic bun douc waac mienh, I^saa^yaa, nyei waac cuotv daaih doix nzengc. I^saa^yaa gorngv, “Ziouv aah! Maaih haaix dauh sienx yie mbuo zunh nyei waac? Ziouv bun haaix dauh duqv buatc ninh nyei qaqv?”[24]

³⁹Weic naaiv ninh mbuo maiv haih sienx. Weic zuqc I^saa^yaa aengx gorngv,

⁴⁰“Tin-Hungh bun ninh mbuo nyei m'zing maengh, yaac bun ninh mbuo nyei hnyouv ngaengc. Nziex ninh mbuo nyei m'zing haih mangc duqv buatc, ninh mbuo nyei hnyouv yaac haih mengh baeqc ziouc huin nzuonx daaih bun yie zorc longx ninh mbuo.”

⁴¹I^saa^yaa hnangv naaiv nor gorngv weic zuqc ninh duqv buatc Yesu nyei njang-laangc yaac gorngv taux ninh.

⁴²Maaih zoux hlo nyei Yiutai Mienh camv nyei sienx Yesu. Mv baac ninh mbuo maiv dorng zuangx nyiemc weic zuqc ninh mbuo gamh nziex Faa^li^si Mienh oix zunc ninh mbuo cuotv wuic dorngh.

⁴³Ninh mbuo a'hneiv mienh ceng ninh mbuo gauh camv duqv Tin-Hungh ceng.

⁴⁴Yesu longc qiex hlo nyei aengx gorngv, “Haaix dauh sienx yie, maiv daan sienx yie hnangv. Ninh yaac sienx paaiv yie daaih wuov dauh.

⁴⁵Haaix dauh buatc yie, yaac buatc paaiv yie daaih wuov dauh.

⁴⁶Yie daaih bieqc baamh gen weic zoux norm njang. Haaix dauh sienx yie, maiv zuqc yiem hmuangx gu'nyuoz.

⁴⁷Haaix dauh haiz yie nyei waac yaac maiv ei jienv zoux, yie maiv siemv ninh nyei zuiz. Yie daaih maiv zeiz oix siemv baamh mienh nyei zuiz. Yie daaih weic njoux ninh mbuo.

⁴⁸Haaix dauh nqemh yie, maiv muangx yie nyei waac, maaih dauh oix siemv ninh. Taux nqa'haav laai wuov hnoi yie gorngv nyei waac oix siemv ninh nyei zuiz.

⁴⁹Weic zuqc yie nyei waac maiv zeiz ei yie ganh nyei hnyouv hnamv cuotv daaih gorngv. Zaangc Diex paaiv yie daaih mbuox yie gorngv haaix nyungc yaac oix zuqc hnangv haaix nor gorngv.

⁵⁰Yie hiuv duqv ninh nyei lingc haih bun mienh duqv yietc liuz nyei maengc. Weic naaiv yie gorngv nyei waac yietc zungv se ei yie nyei Die mbuox yie gorngv.”