Read Iu Mien Yo^han 14 Bible Online

Yo^han 14 - Iu Mien bible

Yo^han 14

¹Yesu aengx gorngv, “Maiv dungx hnyouv huaang hnyouv nzauh. Oix zuqc sienx kaux Tin-Hungh yaac sienx kaux yie.

²Yie nyei Die nyei biauv maaih yiem nyei dorngx camv nyei. Se gorngv maiv maaih yie zungv mbuox meih mbuo mi'aqv. Yie yaac mingh liuc leiz dorngx bun meih mbuo yiem.

³Yie mingh liuc leiz ziangx dorngx bun meih mbuo yiem, yie aengx daaih dorh meih mbuo mingh caux yie yiem wuov. Yie yiem haaix meih mbuo ziouc caux yie yiem wuov.

⁴Yie oix mingh nyei dorngx wuov diuh jauv, meih mbuo yaac hiuv nyei.”

⁵Tomatv gorngv mbuox ninh, “Ziouv aah! Yie mbuo maiv hiuv duqv meih mingh haaix. Yie mbuo hnangv haaix nor haih hiuv duqv jauv mingh?”

⁶Yesu dau, “Yie se dongh mingh Zaangc Diex wuov diuh jauv, yaac dongh zien leiz, yaac dongh ziangh maengc. Cuotv liuz kaux yie, maiv maaih haaix dauh haih mingh duqv taux Zaangc Diex wuov.

⁷Se gorngv meih mbuo za'gengh hiuv duqv yie, meih mbuo ziouc hiuv duqv yie nyei Die. Yangh naaiv jiex meih mbuo hiuv duqv ninh, meih mbuo yaac buatc jiex ninh.”

⁸Filipv gorngv mbuox Yesu, “Ziouv aah! Tov meih bun yie mbuo buatc Zaangc Diex oc. Buatc liuz yie mbuo hnyouv nqaai aqv.”

⁹Yesu gorngv, “Filipv aah! Yie caux meih mbuo yiem lauh haic aqv. Meih corc maiv gaengh hiuv duqv yie fai? Haaix dauh buatc jiex yie se buatc jiex Zaangc Diex. Hnangv naaiv meih weic haaix diuc gorngv, ‘Tov bun yie mbuo buatc Zaangc Diex?’

¹⁰Meih maiv sienx yie yiem Zaangc Diex gu'nyuoz, Zaangc Diex yiem yie gu'nyuoz fai? Yie caux meih mbuo gorngv naaiv deix waac maiv zeiz yie ganh hnamv cuotv daaih gorngv. Zaangc Diex yiem yie gu'nyuoz zoux ninh ganh nyei gong.

¹¹Meih mbuo oix zuqc sienx yie yiem Zaangc Diex gu'nyuoz, Zaangc Diex yaac yiem yie gu'nyuoz. Maiv zei aeqv, oix zuqc weic yie zoux nyei sic sienx.

¹²Yie gorngv zien mbuox meih mbuo, haaix dauh sienx kaux yie, wuov dauh oix zoux hnangv yie zoux nor. Ninh zoux nyei sic zungv oix zoux gauh hlo jiex yie nyei, weic zuqc yie mingh Zaangc Diex wuov.

¹³Meih mbuo dengv yie nyei mbuox tov haaix nyungc, yie zungv oix zoux wuov nyungc. Hnangv naaiv, Zaangc Diex weic ninh nyei dorn duqv mienh taaih.

¹⁴Se gorngv meih mbuo dengv yie nyei mbuox tov haaix nyungc, yie zungv oix zoux wuov nyungc.

¹⁵“Se gorngv meih mbuo hnamv yie, meih mbuo ziouc ei jienv yie nyei lingc zoux.

¹⁶Yie oix tengx Zaangc Diex tov, ninh ziouc oix bun ganh dauh daaih tengx meih mbuo, caux meih mbuo yietc liuz yiem.

¹⁷Naaiv dauh se Singx Lingh, dongh bun mienh hiuv duqv zien leiz wuov dauh. Baamh mienh maiv haih zipv ninh, weic zuqc baamh mienh mangc maiv buatc ninh yaac maiv hiuv duqv ninh. Mv baac meih mbuo hiuv duqv ninh nyei, weic zuqc ninh caux meih mbuo yiem yaac yiem meih mbuo nyei hnyouv.[29]

¹⁸Yie maiv guangc meih mbuo benx guh hanh dorn. Yie aengx oix daaih lorz meih mbuo.

¹⁹Maiv lauh baamh mienh maiv buatc yie, mv baac meih mbuo oix duqv buatc yie. Weic zuqc yie ziangh jienv, meih mbuo ziouc duqv ziangh jienv.

²⁰Taux wuov hnoi meih mbuo ziouc hiuv duqv yie yiem yie nyei Die gu'nyuoz, meih mbuo yaac yiem yie gu'nyuoz, yie yaac yiem meih mbuo gu'nyuoz.

²¹“Haaix dauh zipv yie nyei lingc yaac ei jienv zoux, dongh wuov dauh hnamv yie. Haaix dauh hnamv yie, yie nyei Die yaac hnamv ninh. Yie yaac hnamv ninh yaac oix bun ninh hiuv duqv yie.”

²²Yu^ndaatc, maiv zeiz maaic Yesu wuov dauh Yu^ndaatc I^saa^kaa^li^otc, naaic Yesu, “Ziouv aah! Meih weic haaix diuc gorngv meih oix bun yie mbuo hiuv duqv meih mv baac maiv bun baamh mienh hiuv duqv meih?”

²³Yesu dau ninh, “Haaix dauh hnamv yie ziouc ei jienv yie njaaux nyei waac zoux. Yie nyei Die ziouc hnamv ninh. Yie caux yie nyei Die yaac oix daaih lorz ninh, caux ninh yiem.

²⁴Haaix dauh maiv hnamv yie ziouc maiv ei yie njaaux nyei waac. Meih mbuo haiz yie gorngv liuz naaiv deix waac, maiv zeiz yie ganh hnamv cuotv daaih gorngv. Se Zaangc Diex, dongh paaiv yie daaih wuov dauh, nyei waac.

²⁵“Yie corc caux meih mbuo yiem nyei ziangh hoc yie gorngv nzengc naaiv deix waac mbuox meih mbuo.

²⁶Tengx Mienh Wuov Dauh, dongh Zaangc Diex oix dengv yie nyei mbuox paaiv daaih nyei Singx Lingh, oix njaaux nyungc-nyungc meih mbuo, yaac oix bun meih mbuo haih jangx duqv yie mbuox jiex nyei yietc zungv.

²⁷“Yie liouh baengh orn bun meih mbuo. Se yie ganh nyei baengh orn yie ceix bun meih mbuo. Yie bun nyei maiv hnangv baamh mienh bun nyei. Maiv dungx nzauh faanh yaac maiv dungx gamh nziex.

²⁸“Meih mbuo haiz yie gorngv jiex, yie oix zuqc leih nqoi meih mbuo, mv baac yie aengx oix daaih lorz meih mbuo. Se gorngv meih mbuo hnamv yie, meih mbuo oix zuqc a'hneiv yie mingh Zaangc Diex wuov weic zuqc Zaangc Diex gauh hlo jiex yie.

²⁹Naaiv deix sic maiv gaengh cuotv yie jaa-ndaangc mbuox ziangx meih mbuo. Zuov naaiv deix sic cuotv meih mbuo ziouc sienx aqv.

³⁰“Yangh naaiv jiex yie maiv duqv caux meih mbuo gorngv waac camv weic zuqc gunv baamh gen wuov dauh oix daaih. Ninh maiv maaih hatc maaz gunv yie.

³¹Mv baac yie ei nzengc Zaangc Diex paaiv yie nyei waac weic bun lungh ndiev mienh hiuv duqv yie hnamv Zaangc Diex. Jiez sin daaih. Mbuo mingh aqv.