Read Iu Mien Yo^han 9 Bible Online

Yo^han 9 - Iu Mien bible

Yo^han 9

¹Yesu yangh jienv jauv mingh, buatc dauh yiem-toi m'zing maengh nyei mienh.

²Sai-gorx mbuo naaic Yesu, “Sai-Diex aah! Naaiv dauh mienh cuotv seix daaih m'zing maengh se laaix ninh ganh nyei zuiz fai laaix ninh nyei diex maac nyei zuiz?”

³Yesu dau, “Ninh m'zing maengh maiv zeiz laaix ninh ganh nyei zuiz fai ninh diex maac nyei zuiz. Ninh nyei m'zing maengh se weic bun Tin-Hungh zoux nyei sic yiem naaiv dauh mienh nyei sin biux mengh cuotv daaih.

⁴Maiv gaengh hmuangx, mbuo oix zuqc zoux paaiv yie daaih wuov dauh nyei gong. Hmuangx yietv taux, maiv maaih haaix dauh zoux duqv gong.

⁵Yie corc yiem jienv baamh gen nyei ziangh hoc yie zoux njang ziux baamh gen.”

⁶Yesu gorngv liuz naaiv deix waac, ninh tuiv wuom-nzuih wuov ndau, caix benx wuom-bamc daaih, nzaatv jienv wuov dauh mienh nyei m'zing,

⁷mbuox ninh, “Mingh wuov norm Si^lo^am Wuom-Domh nzaaux oc.” (Si^lo^am wuov norm mbuox nyei eix leiz se “Paaiv Mingh.”) Wuov dauh mienh mingh nzaaux liuz, nzuonx daaih ziouc mangc duqv buatc aqv.

⁸Ninh nyei laangz zaangc mienh caux aah loc buatc ninh tov nyaanh wuov deix, laanh naaic laanh, “Naaiv dauh mienh dongh aah loc zueiz jienv tov nyaanh wuov dauh maiv zeiz?”

⁹Maaih deix gorngv, “Zeiz nyei, dongh naaiv dauh aqv.” Maaih deix gorngv, “Maiv zeiz. Se hnangv ninh hnangv.” Wuov dauh mienh ganh ziouc gorngv, “Zeiz nyei. Dongh yie aqv.”

¹⁰Wuov deix mienh ziouc naaic ninh, “Aav, wuov nyungc meih nyei m'zing hnangv haaix nor haih longx, mangc duqv buatc?”

¹¹Ninh dau, “Maaih dauh mienh, mbuox heuc Yesu, caix wuom-bamc nzaatv yie nyei m'zing aengx heuc yie mingh Si^lo^am Wuom-Domh nzaaux. Yie ziouc mingh. Nzaaux liuz, mangc duqv buatc daaih aqv.”

¹²Wuov deix mienh aengx naaic, “Wuov dauh mienh yiem haaix?” Ninh gorngv, “Yie maiv hiuv.”

¹³Ninh mbuo ziouc dorh m'zing maengh longx daaih wuov dauh mienh mingh Faa^li^si Mienh wuov.

¹⁴Dongh Yesu caix wuom-bamc tengx ninh nzaatv jienv m'zing njang daaih wuov hnoi se Dingh Gong Hnoi.

¹⁵Wuov deix Faa^li^si Mienh yaac naaic ninh, “Meih nyei m'zing hnangv haaix nor haih longx, mangc duqv buatc?” Ninh gorngv, “Yesu zorqv wuom-bamc nzaatv yie nyei m'zing. Yie nzaaux liuz ziouc mangc duqv buatc daaih aqv.”

¹⁶Maaih deix Faa^li^si Mienh gorngv, “Tengx m'zing mangc duqv buatc wuov dauh mienh maiv zeiz yiem Tin-Hungh daaih, weic zuqc ninh maiv ei Dingh Gong Hnoi nyei leiz zoux.” Mv baac maaih deix gorngv, “Baamz zuiz nyei mienh hnangv haaix nor haih zoux naaiv deix mbuoqc horngh haic nyei jangx-hoc?” Hnangv naaic ninh mbuo ziouc bun nqoi mi'aqv.

¹⁷Faa^li^si Mienh aengx naaic nzunc wuov dauh mienh, “Ninh tengx meih nyei m'zing longx, haih mangc duqv buatc. Wuov nyungc, meih gorngv ninh se haaix nyungc mienh?” Wuov dauh mienh dau, “Ninh zoux dauh douc waac mienh.”

¹⁸Zoux hlo nyei Yiutai Mienh corc maiv sienx ninh zinh ndaangc m'zing maengh, ih zanc haih mangc duqv buatc. Ninh mbuo ziouc heuc ninh nyei diex maac daaih

¹⁹naaic ninh mbuo, “Naaiv dauh mienh meih mbuo nyei dorn? Meih mbuo gorngv ninh yiem-toi m'zing maengh dongh naaiv dauh fai? Wuov nyungc, ninh ih zanc hnangv haaix nor haih mangc duqv buatc?”

²⁰Wuov dauh mienh nyei diex maac dau, “Yie mbuo hiuv duqv ninh zoux yie mbuo nyei dorn, yaac hiuv duqv ninh cuotv seix daaih m'zing maengh mi'aqv.

²¹Mv baac yie mbuo maiv hiuv duqv ninh hnangv haaix nor haih mangc duqv buatc, yaac maiv hiuv duqv haaix dauh zorc ninh nyei m'zing njang. Meih mbuo ganh naaic gaax ninh maah! Ninh hlo aqv. Ninh ganh haih gorngv ninh ganh nyei jauv.”

²²Ninh nyei diex maac hnangv naaiv nor gorngv weic zuqc ninh mbuo gamh nziex zoux hlo nyei Yiutai Mienh. Zoux hlo nyei wuov deix zungv gorngv liuz, haaix dauh nyiemc Yesu zoux Giduc, ninh mbuo oix zunc cuotv wuic dorngh.

²³Weic naaiv ninh nyei diex maac cingx daaih gorngv, “Ninh hlo aqv. Meih mbuo naaic gaax ninh ganh maah!”

²⁴Faa^li^si Mienh heuc m'zing maengh zorc longx wuov dauh mienh aengx daaih da'nyeic nzunc yaac mbuox ninh, “Meih oix zuqc dorng jienv Tin-Hungh laengz meih kungx gorngv zien hnangv.[16] Yie mbuo hiuv duqv zorc meih nyei m'zing wuov dauh se zuiz-mienh aqv.”

²⁵Wuov dauh mienh dau, “Ninh zoux zuiz-mienh zeiz fai maiv zeiz, yie maiv hiuv. Yie kungx hiuv duqv yietc nyungc hnangv. Zinh ndaangc yie m'zing maengh, ih zanc yie haih mangc duqv buatc.”

²⁶Ninh mbuo aengx naaic, “Ninh zoux haaix nyungc bun meih? Ninh hnangv haaix nor zorc meih nyei m'zing longx, mangc duqv buatc?”

²⁷Ninh dau, “Yie mbuox jiex meih mbuo, meih mbuo yaac maiv muangx. Meih mbuo weic haaix diuc aengx oix muangx nzunc? Meih mbuo yaac oix zoux ninh nyei sai-gorx fai?”

²⁸Ninh mbuo ziouc gorngv doqc ninh. Ninh mbuo gorngv, “Meih zoux wuov dauh lov nyei sai-gorx. Yie mbuo zoux Mose nyei sai-gorx.

²⁹Yie mbuo hiuv duqv Tin-Hungh caux Mose gorngv waac. Mv baac wuov dauh lov yie mbuo liemh maiv hiuv duqv ninh yiem haaix daaih.”

³⁰Wuov dauh mienh dau, “Naaiv za'gengh mbuoqc horngc haic. Meih mbuo maiv hiuv duqv ninh yiem haaix daaih. Mv baac ninh zorc yie nyei m'zing mangc duqv buatc.

³¹Mbuo hiuv duqv Tin-Hungh maiv muangx baamz zuiz mienh nyei waac. Mv baac haaix dauh taaih Tin-Hungh, ei jienv ninh nyei eix zoux, ninh muangx wuov dauh.

³²Yiem zeix lungh zeix ndau cuotv daaih taux ih zanc, maiv maaih haaix dauh haiz jiex maaih haaix dauh zorc yiem-toi m'zing maengh nyei mienh longx, haih mangc duqv buatc.

³³Se gorngv naaiv dauh mienh maiv zeiz yiem Tin-Hungh daaih nor, ninh maiv haih zoux haaix nyungc.”

³⁴Zoux hlo nyei wuov deix dau, “Meih zuiz-mienh cuotv seix daaix jienv zuiz hlo daaih, mv baac meih oix njaaux yie mbuo?” Ninh mbuo ziouc zunc ninh cuotv wuic dorngh mi'aqv.

³⁵Yesu haiz gorngv ninh mbuo zunc naaiv dauh mienh cuotv wuic dorngh. Ninh ziouc mingh lorz buatc yaac naaic ninh, “Meih sienx Baamh Mienh nyei Dorn fai?”

³⁶Wuov dauh mienh dau, “Domh Gorx aah! Ninh dongh haaix dauh? Tov meih mbuox yie oc. Yie ziouc haih sienx ninh.”

³⁷Yesu gorngv mbuox ninh, “Meih buatc jiex ninh nyei. Dongh ih zanc caux meih gorngv waac wuov dauh.”

³⁸Wuov dauh mienh gorngv, “Ziouv aah! Yie sienx aqv.” Ninh ziouc gueic njiec baaix Yesu.

³⁹Yesu gorngv, “Yie njiec baamh gen weic siemv zuiz, bun m'zing maengh nyei mienh haih mangc duqv buatc, yaac bun mangc duqv buatc wuov deix m'zing maengh mingh.”

⁴⁰Maaih deix Faa^li^si Mienh caux Yesu yiem wuov haiz ninh hnangv naaiv nor gorngv ziouc naaic, “Hnangv naaic, yie mbuo yaac m'zing maengh nyei fai?”

⁴¹Yesu dau, “Se gorngv meih mbuo m'zing maengh nor, meih mbuo maiv maaih zuiz aqv. Mv baac meih mbuo gorngv, ‘Yie mbuo mangc duqv buatc nyei.’ Hnangv naaic meih mbuo corc maaih zuiz nyei.”