Read Iu Mien Gong-Zoh 25 Bible Online

Gong-Zoh 25 - Iu Mien bible

Gong-Zoh 25

¹Fe^saa^tatv daaih taux ninh nyei saengv, zoux jienv zungx duqv buo hnoi, ninh cuotv Si^saa^li^yaa mingh Ye^lu^saa^lem Zingh.

²Sai mienh bieiv caux Yiutai Mienh nyei bieiv ziouc mingh Fe^saa^tatv wuov gox Baulo,

³tov ninh tengx deix ninh mbuo, fungx Baulo mingh Ye^lu^saa^lem Zingh. Ninh mbuo hnangv naaiv nor tov weic zuqc ninh mbuo daav za'eix dangv jienv ndaamv-jauv daix Baulo.

⁴Fe^saa^tatv dau, “Baulo kuonx jienv yiem Si^saa^li^yaa Zingh. Maiv nangc lauh yie yaac oix nzuonx aqv.

⁵Se gorngv Baulo zoux dorngc haaix diuc, oix zuqc bun deix meih mbuo zoux hlo nyei mienh gan jienv yie mingh gox ninh.”

⁶Fe^saa^tatv yiem Ye^lu^saa^lem Zingh maiv gauh lauh hietc hnoi fai ziepc hnoi cingx daaih nzuonx Si^saa^li^yaa Zingh. Da'nyeic hnoi ninh zueiz jienv sic dorngh heuc mienh dorh Baulo daaih.

⁷Baulo bieqc daaih, yiem Ye^lu^saa^lem Zingh daaih gox ninh wuov deix mienh souv huing gormx lorz zuiz hniev nyei gox Baulo mv baac maiv maaih yietc yiemc maaih zorng-zengx zien.

⁸Baulo ziouc gorngv jaiv sin nyei waac. Ninh gorngv, “Yie maiv zoux dorngc Yiutai Mienh nyei haaix nyungc leiz fai zaangc Tin-Hungh nyei biauv fai Lomaa Domh Ziuh Hungh.”

⁹Fe^saa^tatv oix Yiutai Mienh a'hneiv ninh ziouc naaic Baulo, “Meih nyunc mingh Ye^lu^saa^lem Zingh bun yie dunx meih nyei sic fai?”

¹⁰Baulo gorngv, “Ih zanc yie souv jienv Lomaa Hungh nyei sic dorngh, horpc zuqc yiem naaiv dunx yie nyei sic. Yie maiv zoux haaix nyungc dorngc Yiutai Mienh, meih ganh yaac za'gengh hiuv nyei.

¹¹Se gorngv yie zoux dorngc haaix nyungc zic duqv daic, yie yaac maiv ngaengc. Mv baac se gorngv naaiv deix Yiutai Mienh daaih gox yie naaiv deix sic maiv zien nor, maiv maaih haaix dauh maaih leiz zorqv yie jiu bun ninh mbuo. Yie tov bun Lomaa Domh Ziuh Hungh siemv zuiz.”

¹²Fe^saa^tatv caux ninh nyei gunv sic mienh caangh laangh liuz ninh ziouc gorngv, “Meih tov Lomaa Hungh siemv zuiz, wuov nyungc meih zungv oix zuqc mingh Lomaa Hungh wuov aqv.”

¹³Nqa'haav lauh deix, Aa^nqi^paa Hungh caux Mbenitv mingh Si^saa^li^yaa Zingh wuic buangh Fe^saa^tatv, caux ninh nziaauc.

¹⁴Yiem wuov camv-hnoi deix nyei, Fe^saa^tatv zorqv Baulo nyei jauv gorngv mbuox hungh diex. Ninh gorngv, “Maaih laanh mienh, Felikv cuotv wuov zanc zorqv ninh kuonx jienv naaiv.

¹⁵Yie mingh Ye^lu^saa^lem wuov zanc, sai mienh bieiv caux Yiutai Mienh nyei mienh gox daaih gox ninh yaac tov yie dingc ninh nyei zuiz.

¹⁶Mv baac yie dau ninh mbuo, hnangv naaic zoux se maiv horpc Lomaa Mienh nyei leiz. Maiv gunv haaix dauh maaih sic, oix zuqc bun ninh caux gox ninh wuov deix doix zengx cingx daaih zorqv ninh jiu bun haaix dauh.

¹⁷Gox ninh wuov deix mienh daaih taux naaiv yie maiv ngaih. Da'nyeic hnoi hnangv yie mingh zueiz sic dorngh heuc mienh dorh Baulo bieqc daaih.

¹⁸Gox ninh wuov deix souv jiez sin daaih gorngv mv baac maiv gox hnangv yie laaic ninh mbuo oix gox nyei orqv sic nor.

¹⁹Ninh mbuo kungx nzaeng taux ninh mbuo Yiutai Mienh nyei leiz hnangv, yaac nzaeng taux laanh mienh, mbuox heuc Yesu. Ninh daic mingh mv baac Baulo gorngv ninh corc ziangh jienv nyei.

²⁰Yie maiv hiuv duqv oix zuqc hnangv haaix nor mbenc naaiv deix sic ziouc naaic Baulo ninh nyunc mingh Ye^lu^saa^lem dunx naaiv deix sic fai?

²¹Mv baac Baulo tov mingh Domh Ziuh Hungh wuov siemv, yie ziouc heuc baeng dorh mingh kuonx jienv zuov taux yie maaih ziangh hoc cingx bun ninh mingh Lomaa Hungh wuov.”

²²Aa^nqi^paa gorngv mbuox Fe^saa^tatv, “Yie ganh yaac oix muangx ninh gorngv.” Fe^saa^tatv gorngv, “Wuov nyungc, njang hnoi meih duqv muangx ninh gorngv aqv.”

²³Da'nyeic hnoi Aa^nqi^paa caux Mbenitv zorng nzoih, caux domh baeng-bieiv mbuo caux wuov norm zingh zoux hlo nyei, maaih mengh dauh nyei mienh, houc jienv bieqc hungh jaa nyei domh wuic dorngh. Daaih nzoih, Fe^saa^tatv heuc mienh dorh Baulo bieqc daaih.

²⁴Fe^saa^tatv gorngv, “Aa^nqi^paa Hungh caux yiem naaiv nyei zuangx mienh aah! Meih mbuo buatc naaiv laanh mienh. Yiem Ye^lu^saa^lem caux yiem naaiv nyei yietc zuangx Yiutai Mienh nauc jienv gorngv ninh maiv horpc zuqc maaih maengc ziangh aqv.

²⁵Mv baac yie zaah naaic ninh, maiv buatc ninh dorngc haaix nyungc zic duqv daix ninh. Ninh ganh tov bun Lomaa Domh Ziuh Hungh dunx sic yie ziouc dingc hnyouv fungx ninh mingh.

²⁶Mv baac yie lorz maiv duqv haaix nyungc sic fiev bun Lomaa Hungh. Yie ziouc dorh ninh daaih naaiv, meih mbuo nyei nza'hmien, yaac lengc jeiv nyei yiem meih, Aa^nqi^paa Hungh, nyei nza'hmien, weic zaah naaic ninh, yie cingx daaih maaih waac fiev.

²⁷Weic zuqc ei yie hnamv, fungx zuiz-mienh mingh yaac maiv maaih gox ninh nyei waac se maiv horpc.”