Read Iu Mien Gong-Zoh 6 Bible Online

Gong-Zoh 6 - Iu Mien bible

Gong-Zoh 6

¹Wuov deix caamx, zanc-zanc maaih mienh tim bieqc daaih zoux sai-gorx jaa camv jienv faaux. Zoux gau, gorngv Gikc waac wuov deix Yiutai Mienh ngopv gorngv Hipv^lu waac nyei Yiutai Mienh weic zuqc hnoi-hnoi juang ga'naaiv, kuei zuqc gorngv Gikc waac wuov deix nyei auv-guaav.

²Ziepc nyeic dauh gong-zoh ziouc heuc sai-gorx mbuo daaih zunv, mbuox ninh mbuo, “Yie mbuo guangc jienv maiv zunh Tin-Hungh nyei doz, mingh liuc leiz juang auv-guaav se maiv horpc.

³Gorx-youz aah! Yiem meih mbuo naaiv gu'nyuoz oix zuqc ginv siec laanh mienh, dongh maaih mengh dauh longx, maaih Singx Lingh buangv hnyouv, yaac maaih cong-mengh nyei mienh. Yie mbuo oix paaiv ninh mbuo liuc leiz naaiv deix gong.

⁴Yie mbuo ziouc haih longc nzengc hnyouv daux gaux, zunh Tin-Hungh nyei doz.”

⁵Zuangx mienh haiz naaiv deix waac ninh mbuo horpc hnyouv nyei, ziouc ginv Saa^te^fen. Saa^te^fen sienx duqv longx haic yaac maaih Singx Lingh buangv hnyouv. Ninh mbuo aengx ginv Filipv, Bo^ko^latv, Ni^kaa^no, Timon, Baan^me^natv caux yiem An^ti^okc Zingh daaih nyei Janx, dongh gan Yiutai Mienh sienx Tin-Hungh wuov dauh Ni^ko^lau.

⁶Zuangx mienh dorh naaiv deix sai-gorx mingh gong-zoh mbuo wuov. Gong-zoh mbuo ziouc maan jienv ninh mbuo daux gaux.

⁷Nqa'haav Tin-Hungh nyei doz hiaangx jienv mingh. Yiem Ye^lu^saa^lem Zingh, sai-gorx nyei soux mouc gunv zoux gunv camv jienv faaux. Aengx maaih sai mienh camv nyei daaih sienx.

⁸Saa^te^fen duqv Tin-Hungh nyei en caux domh qaqv yiem zuangx mienh mbu'ndongx zoux domh jangx-hoc caux mbuoqc horngh nyei sic.

⁹Mv baac maaih deix mienh daaih caux ninh doix-dekc nzaeng. Daaih nzaeng naaiv deix mienh yiem Sailin Mungv, Aa^lekv^saan^nde^lie Zingh, Si^li^sie Saengv caux Esie Saengv daaih nyei Yiutai Mienh. Ninh mbuo se juangc wuic nyei mienh, dongh mienh heuc, “Bungx Nqoi nyei Mienh nyei Wuic.”

¹⁰Mv baac ninh mbuo nzaeng maiv hingh weic zuqc Singx Lingh bun Saa^te^fen maaih cong-mengh gorngv waac.

¹¹Ninh mbuo ziouc beic ndiev cingv mienh gorngv, “Yie mbuo haiz naaiv laanh mienh ki Mose yaac ki Tin-Hungh.”

¹²Ninh mbuo ziouc coqv zuangx mienh caux mienh gox caux njaaux leiz nyei fin-saeng mingh zorqv Saa^te^fen dorh mingh Yiutai Mienh nyei Gunv Sic Wuic wuov.

¹³Ninh mbuo aengx lorz mienh zoux jaav zorng-zengx gorngv, “Naaiv laanh mienh maiv dingh liouh nyei gorngv ki zaangc Tin-Hungh nyei biauv[13] caux leiz-latc,

¹⁴weic zuqc yie mbuo haiz ninh gorngv Naa^saa^letv Mungv nyei Yesu oix zoux waaic naaiv norm dorngx yaac goiv nzengc loz-hnoi Mose jiu bun mbuo nyei leiz-fingx.”

¹⁵Zueiz jienv Gunv Sic Wuic nyei zuangx mienh nuqv-nuqv nyei mangc jienv Saa^te^fen nyei hmien, buatc hnangv fin-mienh nyei hmien nor.