Read Iu Mien Lomaa 9 Bible Online

Lomaa 9 - Iu Mien bible

Lomaa 9

¹Yie caux Giduc juangc maengc ziangh, yie gorngv zien waac, maiv gorngv-baeqc. Yie ganh nyei hnyouv maaih Singx Lingh gunv jienv ziouc bun yie hiuv dingc yie maiv gorngv-baeqc.

²Yie weic yie ganh nyei fingx, juangc orv juangc mbungv nyei mienh, nzauh duqv kouv haic. Hnyouv zanc-zanc mun jienv yiem.

³Se gorngv haih tengx duqv ninh mbuo nor, yie nyunc bun Tin-Hungh zioux yie zuqc caux Giduc leih nqoi.

⁴Ninh mbuo se I^saa^laa^en Mienh, dongh Tin-Hungh ginv daaih benx ninh nyei naamh nyouz. Ninh mbuo duqv buatc ninh hinc cuotv nyei njang-laangc. Tin-Hungh duqv caux ninh mbuo laengz jiex camv-nyungc ngaengc waac yaac bun leiz-latc ninh mbuo. Ninh mbuo hiuv duqv hnangv haaix nor zaangc Tin-Hungh, yaac zipv liuz ninh laengz nyei waac.

⁵Ninh mbuo se zoux maaih mengh dauh wuov deix ong-taaix nyei zeiv-fun. Giduc cuotv seix benx baamh mienh yaac yiem ninh mbuo nyei buonv cuotv daaih. Zuangx mienh oix zuqc yietc liuz ceng Tin-Hungh, dongh gunv maanc muotc wuov dauh. Aamen.

⁶Yie maiv zeiz gorngv Tin-Hungh bungx ndortv ninh laengz nyei waac, weic zuqc I^saa^laa^en Mienh yaac maiv zeiz dauh dauh benx nzengc Tin-Hungh nyei mienh.

⁷Apc^laa^ham nyei zeiv-fun yaac maiv zeiz yietc zungv zoux Tin-Hungh nyei naamh nyouz. Tin-Hungh mbuox Apc^laa^ham, “Meih nyei hoz doic zeiv-fun oix yiem I^sakc daaih.”

⁸Eix leiz se maiv zeiz Apc^laa^ham zoux die duqv daaih nyei fu'jueiv zoux Tin-Hungh nyei naamh nyouz. Se kungx ei Tin-Hungh laengz nyei waac cuotv seix wuov deix cingx funx zien zeiv-fun.

⁹Weic zuqc Tin-Hungh laengz nyei waac hnangv naaiv nor gorngv. “Taux dingc ziangx nyei ziangh hoc yie aengx daaih, Saalaa ziouc duqv dauh dorn daaih aqv.”

¹⁰Maiv daan hnangv naaic. Le^mbe^kaa nyei i dauh dorn juangc dauh die. Dongh mbuo nyei ong-taaix, I^sakc.

¹¹Mv baac naaiv deix sung-gu'nguaaz maiv gaengh cuotv seix, maiv gaengh zoux haaix nyungc longx fai waaic, Tin-Hungh bun cing ninh ei ninh ganh nyei eix ginv mienh daaih. Maiv zeiz mienh zoux haaix nyungc, se Tin-Hungh ganh ginv daaih.

¹²Tin-Hungh ziouc mbuox Le^mbe^kaa, “Gorx oix zuqc fu-sux youz.”

¹³Hnangv Ging-Sou fiev jienv gorngv nor, “Yie hnamv Yaakopv mv baac yie nzorng Esaau.”

¹⁴Wuov nyungc mbuo oix zuqc hnangv haaix nor gorngv? Tin-Hungh maiv baengh fim fai? Zungv maiv zeiz!

¹⁵Tin-Hungh gorngv mbuox Mose, “Yie oix korv-lienh haaix dauh yie ziouc korv-lienh, oix zoux longx bun haaix dauh, yie ziouc zoux longx aqv.”

¹⁶Hnangv naaic, Tin-Hungh korv-lienh mienh se maiv zeiz weic mienh oix nyei, yaac maiv zeiz weic mienh zoux haaix nyungc. Se Tin-Hungh ganh korv-lienh hnangv.

¹⁷Yiem wuov Ging-Sou, Tin-Hungh maaih joux waac mbuox I^yipv Deic-Bung nyei hungh diex. Ging-Sou gorngv, “Yie weic naaiv bun meih duqv zoux hungh. Yie oix longc meih bun mienh buatc yie nyei domh qaqv yaac bun yie duqv mengh dauh sing buangv lungh ndiev.”

¹⁸Hnangv naaic, Tin-Hungh oix korv-lienh haaix dauh ninh ziouc korv-lienh aqv. Oix bun haaix dauh hnyouv ngaengc ninh ziouc bun wuov dauh hnyouv ngaengc aqv.

¹⁹Wuov nyungc, nziex maaih dauh meih mbuo oix mbuox yie, “Hnangv naaic, Tin-Hungh hnangv haaix nor haih guaix mienh? Haaix dauh haih ngaengc Tin-Hungh nyei eix?”

²⁰Meih zoux haaix dauh cingx gaamv caux Tin-Hungh nzaeng? Meih kungx zoux baamh mienh hnangv. Nie-ongx zungv maiv naaic nanv nie zaangc, “Meih weic haaix diuc nanv yie daaih hnangv naaiv nor?”

²¹Nanv nie zaangc maaih leiz zorqv ndunh nie sueih eix nanv i norm ongx maiv zeiz? Nanv norm zoux pou-tong nyei ongx, nanv norm zoux lengc jeiv nyei ongx.

²²Tin-Hungh yaac fih hnangv nyei zoux. Ninh oix bun cing ninh nouz haic mienh yaac bun ninh mbuo buatc ninh nyei domh qaqv. Mv baac ninh zoux hnyouv ndaauv nyienz jienv dongh ninh nouz haic, liuc leiz zuqc mietc wuov deix.

²³Tin-Hungh yaac oix bun ninh nyei domh njang-laangc cuotv daaih, ninh ziouc korv-lienh mbuo, dongh ninh liuc leiz ziangx juangc jienv zipv ninh nyei njang-laangc wuov deix.

²⁴Mbuo se dongh wuov nyungc mienh aqv, dongh ninh heuc daaih wuov deix. Maiv daan heuc Yiutai Mienh daaih hnangv, ninh yaac heuc Janx.

²⁵Yiem Ho^se^yaa fiev daaih nyei sou Tin-Hungh gorngv, “Dongh maiv zeiz zoux yie nyei baeqc fingx, yie oix heuc zoux ‘Yie nyei baeqc fingx.’ Dongh yie maiv hnamv wuov dauh, yie oix heuc ‘Yie hnamv wuov dauh.’+”

²⁶“Aengx yiem Tin-Hungh gorngv mbuox jiex ninh mbuo, ‘Meih mbuo maiv zeiz yie nyei baeqc fingx.’ Yiem wuov norm dorngx ninh mbuo oix duqv mbuox heuc, ‘Ziangh jienv nyei Tin-Hungh nyei naamh nyouz.’+”

²⁷I^saa^yaa yaac heuc jienv gorngv I^saa^laa^en Mienh. Ninh gorngv, “Maiv gunv I^saa^laa^en Mienh ndongc koiv-hlen nyei saa-ziou camv, zengc njiec duqv njoux nyei mienh zoqc.

²⁸Weic zuqc Ziouv oix yiem naaiv lungh ndiev siepv-siepv nyei siemv nzengc mienh nyei zuiz.”

²⁹Aengx hnangv zinh ndaangc I^saa^yaa gorngv jiex, “Se gorngv Nernh Jiex nyei Ziouv maiv liouh njiec deix zeiv-fun bun yie mbuo, yie mbuo ziouc zuqc hnangv So^ndom caux Go^mo^laa Zingh.”

³⁰Wuov nyungc, mbuo oix zuqc hnangv haaix nor gorngv? Oix zuqc gorngv naaiv. Janx maiv zeiz lorz jauv caux Tin-Hungh horpc hnyouv, mv baac ninh mbuo sienx kaux Tin-Hungh ziouc duqv caux ninh horpc hnyouv mi'aqv.

³¹I^saa^laa^en Mienh hnamv oix kaux leiz-latc duqv caux Tin-Hungh horpc hnyouv mv baac ninh mbuo maiv duqv caux ninh horpc.

³²Weic haaix diuc? Weic zuqc ninh mbuo bangc ninh mbuo ganh zoux nyei sic, ninh mbuo maiv sienx kaux Tin-Hungh. Ninh mbuo ndiqv zuqc dongh Ging-Sou gorngv wuov norm la'bieiv.

³³Ging-Sou gorngv, “Mangc gaax, yie bun norm la'bieiv yiem wuov Si^on Zingh. Mienh ziouc ndiqv zuqc wuov norm la'bieiv ndorpc. Haaix dauh sienx kaux ninh, wuov dauh yietc liuz maiv nyaiv.”