Read Iu Mien 2 Ko^lin^to 12 Bible Online

2 Ko^lin^to 12 - Iu Mien bible

2 Ko^lin^to 12

¹Yie oix zuqc bungx waac-maux, maiv gunv naaiv deix waac-maux maiv tengx haaix nyungc. Mv baac ih zanc yie oix gorngv yiem Ziouv daaih nyei hinc yaangh caux laauc yaangh nyei sic.

²Yie hiuv duqv dauh Giduc Mienh, zinh ndaangc ziepc feix hnyangx Tin-Hungh zipv faaux taux da'faam nzangh tin-dorngh. Yie maiv hiuv duqv liemh sin mingh fai maiv mingh, Tin-Hungh ganh hiuv hnangv.

³Yie hiuv duqv Tin-Hungh zipv naaic dauh mienh mingh orn-lorqc huingx[18] mv baac yie aengx gorngv, liemh sin mingh fai maiv mingh yie maiv hiuv, kungx Tin-Hungh hiuv hnangv.

⁴Yiem wuov ninh haiz dongh baamh mienh liemh maiv maaih waac gorngv yaac gorngv maiv duqv nyei waac.

⁵Yie oix weic naaiv dauh mienh bungx waac-maux mv baac weic yie ganh yie maiv bungx waac-maux, cuotv liuz gorngv yie mau nyei dorngx.

⁶Se gorngv yie oix bungx waac-maux, yie maiv zeiz zoux mienh hngongx mienh weic zuqc yie kungx gorngv zien hnangv. Mv baac yie maiv oix bungx waac-maux weic zuqc maiv oix haaix dauh taaih yie gauh hlo ninh mbuo buatc yie zoux nyei sic, haiz yie gorngv nyei waac.

⁷Weic zuqc yie duqv buatc laauc yaangh nyei sic ndongc naaic camv,[19] yie haih ceng-hlo, mv baac yie zuqc hnangv diuh ceix baqv jienv yie nyei sin nor. Naaiv diuh ceix se hnangv Saadaan nyei bou, hoic[20] jienv yie, bun yie maiv haih ceng-hlo jiex jaax.

⁸Weic naaiv deix sic yie daux gaux buo nzunc tov Ziouv zorqv naaiv diuh ceix cuotv yie nyei sin mingh.

⁹Mv baac Ziouv dau yie, “Meih duqv yie nyei en ziouc gaux aqv. Weic zuqc meih mau nyei ziangh hoc yie nyei qaqv se gauh henv jiex.” Hnangv naaiv, yie a'hneiv bungx waac-maux gorngv yie mau nyei dorngx weic duqv Giduc nyei qaqv nzie jienv yie.

¹⁰Yie ziouc weic Giduc buangv hnyouv diev mau, zuqc mienh gorngv doqc, zuqc kouv naanc, zuqc mienh zoux doqc, zuqc heiv sic, weic zuqc yie haaix zanc mau, wuov zanc yie ziouc henv aqv.

¹¹Yie bungx naaiv deix waac-maux yie zoux hnangv mienh hngongx mienh nor, mv baac meih mbuo ganh aapv yie zoux. Se meih mbuo horpc zuqc ceng yie. Maiv gunv yie ziangh maiv benx haaix nyungc mienh, yie yaac maiv gauh faix yietc deix wuov deix “domh gong-zoh.”

¹²Yie yiem meih mbuo mbu'ndongx longc nyungc-nyungc noic yaac zoux jangx-hoc, zoux mbuoqc horngh caux maaih qaqv nyei sic biux mengh yie zoux gong-zoh.

¹³Yie kuei zuqc meih mbuo, zoux maiv hnangv yie zoux bun wuov deix jiu-baang fai? Cuotv liuz yie maiv feix luic meih mbuo tengx nyaanh yie. Yie hnangv naaiv nor kuei meih mbuo, tov meih mbuo guangc nqoi oc.

¹⁴Ih zanc yie mbenc ziangx mingh meih mbuo naaic da'faam nzunc. Yie mingh yaac maiv oix feix luic meih mbuo haaix nyungc. Yie oix longc nyei se meih mbuo ganh, maiv zeiz meih mbuo nyei zinh nyaanh, weic zuqc fu'jueiv maiv zeiz oix zuqc liouh nyaanh bun domh mienh. Horpc zuqc domh mienh liouh bun fu'jueiv.

¹⁵Yie a'hneiv longc yie maaih nyei nyungc-nyungc yaac longc yie ganh weic tengx meih mbuo. Yie yietc zei hnamv meih mbuo, daaux nzuonx meih mbuo yietc zei maiv hnamv yie fai?

¹⁶Hnangv haaix yaac baac, yie maiv feix luic jiex meih mbuo. Mv baac maaih mienh gorngv yie guv guaix haic, nduov meih mbuo mi'aqv.

¹⁷Yie hnangv haaix nor nduov meih mbuo? Yie paaiv mienh mingh meih mbuo naaic, yie longc ninh mbuo haaix dauh zoux kuei meih mbuo?

¹⁸Yie tov Tidatc mingh meih mbuo naaic aengx paaiv ganh dauh gorx-youz caux jienv ninh mingh. Tidatc zoux kuei meih mbuo fai? Ninh caux yie maiv zeiz dongh diuc eix yaac caux yie zoux fih hnangv nyei fai?

¹⁹Nziex meih mbuo zanc-zanc laaic yie mbuo kungx doix meih mbuo gorngv naaiv deix waac jaiv sin hnangv. Zungv maiv zeiz. Yie mbuo yiem Tin-Hungh nyei nza'hmien gorngv hnangv Giduc oix yie mbuo gorngv nor. Hnamv nyei gorx-youz aac, yie mbuo zoux nyei nyungc-nyungc se kungx weic ceix meih mbuo hnangv.

²⁰Yie nzauh heix yie mingh taux nyei ziangh hoc ziouc buatc meih mbuo ganh nyungc, maiv hnangv yie oix buatc nyei. Meih mbuo yaac buatc yie ganh nyungc, maiv hnangv meih mbuo oix buatc nyei. Yie nzauh heix buatc meih mbuo nzaeng jaax, mueic jieqv, qiex jiez, nzaeng hingh, daanh mienh, gorngv waac-huv, zoux maux, ceux lunc.

²¹Yie nzauh heix yie aengx taux meih mbuo naaic, yie nyei Tin-Hungh oix bun yie yiem meih mbuo nyei nza'hmien zuqc nyaiv. Yie oix zuqc nzauh mienh camv weic zuqc zinh ndaangc ninh mbuo baamz zuiz yaac maiv goiv hnyouv guangc ninh mbuo zoux maiv cing-nzengc, hienx sieqv hienx dorn caux buangh liouh nyei sic.