Read Iu Mien 2 Ko^lin^to 5 Bible Online

2 Ko^lin^to 5 - Iu Mien bible

2 Ko^lin^to 5

¹Mbuo hiuv duqv mbuo yiem jienv naaiv norm baamh gen nyei ndopv-liuh, dongh mbuo nyei sin, zuqc caeqv wuov zanc, yiem wuov tin-dorngh Tin-Hungh oix bun norm maiv zeiz mienh nyei buoz zoux daaih nyei biauv mbuo yiem, se yietc liuz nyei biauv.

²Ih zanc mbuo yiem jienv naaiv norm sin njunh jienv yiem, aqc duqv zuov maiv taux duqv yiem[4] tin-dorngh nyei biauv.

³Yiem jienv tin-dorngh nyei biauv se hnangv zuqv jienv lui-houx nor, ziouc maiv zuqc laengh gaengv yiem.

⁴Mbuo corc yiem naaiv norm ndopv-liuh kouv haic, njunh jienv yiem. Naaiv maiv zeiz mbuo oix guangc baamh gen nyei sin, mv baac oix duqv[5] tin-dorngh nyei sin. Haih daic nyei sin ziouc tiuv benx yietc liuz nyei sin.[6]

⁵Tin-Hungh ganh liuc leiz ziangx mbuo, oix bun mbuo hnangv naaiv goiv yienc. Ninh yaac bun Singx Lingh mbuo weic zoux dingc-zinh beu jienv nqa'haav oix duqv nyei nyungc-nyungc.

⁶Weic naaiv mbuo bungx dingc hnyouv. Mbuo hiuv duqv, da'faanh mbuo nyei sin corc zoux mbuo nyei biauv, mbuo leih Ziouv nyei biauv aqv.

⁷Mbuo yiem naaiv seix zaangc kaux sienx fim, maiv zeiz kaux mbuo mangc duqv buatc nyei.

⁸Mbuo bungx dingc hnyouv yaac gauh oix leih naaiv norm sin mingh caux Ziouv yiem.

⁹Gauh camv jiex, maiv gunv mbuo yiem naaiv seix zaangc nyei sin fai yiem tin-dorngh nyei sin, mbuo oix zoux horpc Ziouv nyei hnyouv.

¹⁰Weic zuqc mbuo yietc zungv oix zuqc yiem Giduc nyei nza'hmien bun ninh siemv. Ziux dauh dauh mienh yiem baamh gen nyei sin zoux longx fai ciouv, Giduc ziouc winh bun ninh mbuo.

¹¹Yie mbuo hiuv duqv gamh nziex Ziouv se hnangv haaix nor, yie mbuo ziouc kuinx mienh. Yie mbuo hnangv haaix nor, Tin-Hungh hiuv nzengc. Yie yaac hnamv daaih yiem meih mbuo nyei hnyouv meih mbuo yaac hiuv duqv yie.

¹²Naaiv maiv zeiz yie mbuo oix ceng ganh bun meih mbuo muangx. Mv baac yie mbuo oix bun meih mbuo haih dorh yie mbuo mingh ceng, weic bun meih mbuo maaih waac dau mienh, dongh ei beih zaangc ceng, maiv zeiz ei hnyouv ceng nyei mienh.

¹³Se gorngv yie mbuo butv ndin nor, se weic Tin-Hungh butv. Se gorngv yie mbuo nzang, se weic tengx meih mbuo.

¹⁴Giduc maaih hnamv mienh nyei hnyouv. Naaiv nyungc hnyouv ziouc gunv yie mbuo, weic zuqc yie mbuo hiuv dingc, yietc dauh mienh weic[7] zuangx mienh daic, zuangx mienh ziouc daic mi'aqv.

¹⁵Giduc weic zuangx mienh daic, bun ziangh jienv nyei mienh maiv zeiz weic ninh mbuo ganh ziangh. Oix zuqc weic Giduc ziangh, dongh weic ninh mbuo daic, Tin-Hungh aengx bun nangh daaih wuov dauh.

¹⁶Hnangv naaic, yangh naaiv jiex yie mbuo maiv ziux baamh mienh hnamv cuotv daaih nyei za'eix samx haaix dauh. Maiv gunv zinh ndaangc yie mbuo longc baamh mienh nyei za'eix samx Giduc, ih zanc yie mbuo maiv hnangv naaiv nor zoux aqv.

¹⁷Haaix dauh caux Giduc juangc maengc ziangh, wuov dauh benx siang-zeix daaih nyei mienh. Loz nyei nyungc-nyungc jiex nzengc, yietc zungv benx siang nyei daaih aqv.

¹⁸Naaiv yietc zungv se Tin-Hungh zoux daaih. Tin-Hungh longc Giduc bun mbuo caux ninh horpc hnyouv yaac paaiv yie mbuo kuinx mienh daaih caux ninh horpc hnyouv.

¹⁹Yie mbuo zunh nyei se Tin-Hungh longc Giduc bun maanc mienh caux ninh horpc hnyouv, yaac guangc, maiv funx mienh nyei zuiz. Ninh aengx paaiv yie mbuo mingh zunh mbuox mienh hnangv haaix nor haih duqv caux Tin-Hungh horpc hnyouv.

²⁰Hnangv naaic, yie mbuo zoux Giduc nyei douc fienx mienh ziouc hnangv Tin-Hungh ganh longc yie mbuo douc ninh nyei waac kuinx meih mbuo nor. Yie mbuo tengx Giduc tov! meih mbuo caux Tin-Hungh horpc hnyouv.

²¹Giduc maiv maaih zuiz mv baac weic mbuo, Tin-Hungh zoux bun ninh hnangv ninh benx zuiz-mienh,[8] bun mbuo caux ninh juangc maengc ziangh ziouc duqv caux Tin-Hungh horpc hnyouv.