Read Iu Mien Gaa^laa^tie 4 Bible Online

Gaa^laa^tie 4 - Iu Mien bible

Gaa^laa^tie 4

¹Yie gorngv nyei eix leiz se hnangv naaiv, dongh oix nzipc die nyei jaa-dingh wuov dauh dorn, hnyangx-jeiv lunx nyei ziangh hoc ninh caux nouh gauv fih hnangv nyei, maiv ganh nyungc, maiv gunv yietc zungv jaa-dingh benx nzengc ninh nyei.

²Hnyangx-jeiv lunx nyei ziangh hoc, ninh yiem goux ninh caux goux jaa-dingh wuov deix mienh nyei buoz-ndiev, zuov ninh nyei die dingc daaih nyei ziangh hoc taux.

³Mbuo fih hnangv nyei. Zoux fu'jueiv nyei ziangh hoc mbuo yiem gunv lungh ndiev wuov deix mienv nyei buoz-ndiev zuqc zoux nouh.

⁴Mv baac taux ziangh hoc buangv, Tin-Hungh paaiv ninh nyei Dorn daaih, bun ninh yiem dauh m'sieqv dorn cuotv seix, yaac yiem leiz-latc ga'ndiev

⁵weic zuoqc yiem leiz-latc ga'ndiev nyei mienh nzuonx, bun mbuo duqv benx Tin-Hungh nyei naamh nyouz.[10]

⁶Weic zuqc meih mbuo zoux Tin-Hungh nyei naamh nyouz, Tin-Hungh ziouc paaiv ninh nyei Dorn[11] nyei Singx Lingh daaih yiem mbuo nyei hnyouv gu'nyuoz heuc jienv gorngv, “Aa^mbaa aac.” Eix leiz se “Aa Die aac.”

⁷Hnangv naaic, yangh naaiv jiex meih mbuo maiv zoux nouh aqv. Meih mbuo zoux naamh nyouz. Weic zuqc meih mbuo zoux Tin-Hungh nyei naamh nyouz, dongh Tin-Hungh laengz bun ninh nyei yietc zungv naamh nyouz meih mbuo yaac duqv nzipc.

⁸Zinh ndaangc meih mbuo maiv gaengh hiuv duqv Tin-Hungh nyei ziangh hoc, meih mbuo zuqc zoux zienh nyei nouh. Wuov deix zienh yaac maiv zien.

⁹Mv baac ih zanc meih mbuo hiuv duqv Tin-Hungh, (zungv horpc zuqc gorngv Tin-Hungh hiuv duqv meih mbuo). Meih mbuo weic haaix diuc aengx nzuonx mingh zaangc gunv baamh gen nyei mienv? Ninh mbuo maiv henv, tengx maiv duqv haaix nyungc. Meih mbuo aengx oix zoux ninh mbuo nyei nouh fai?

¹⁰Meih mbuo gan duqv jienv dingc daaih nyei hnoi, hlaax, gueix caux hnyangx.

¹¹Yie tengx meih mbuo nzauh haic. Nziex yie weic meih mbuo zoux nyei gong zoux maiv cuotv haaix nyungc.

¹²Zuangx gorx-youz aac, yie tov meih mbuo, oix zuqc hnangv yie nor, weic zuqc yie yaac hnangv meih mbuo. Meih mbuo maiv dorngc haaix nyungc yie.

¹³Meih mbuo hiuv duqv zunh daauh nzunc kuv fienx bun meih mbuo muangx wuov zanc se weic zuqc yie nyei sin zaangc daaix jienv baengc.

¹⁴Mv baac maiv gunv yie nyei baengc hoic meih mbuo kouv, meih mbuo maiv mangc piex yaac maiv nqemh yie. Daaux nzuonx meih mbuo zipv yie hnangv zipv dauh Tin-Hungh nyei fin-mienh yaac hnangv zipv Giduc Yesu nor.

¹⁵Wuov zanc meih mbuo orn-lorqc haic. Ih zanc meih mbuo nyei orn-lorqc jiex haaix mi'aqv? Yie ganh haih tengx meih mbuo zoux zorng-zengx, wuov zanc zoux duqv nor, meih mbuo zungv nyunc gueix meih mbuo nyei m'zing cuotv daaih bun yie.

¹⁶Laaix yie gorngv zien leiz mbuox meih mbuo, ih zanc yie benx meih mbuo nyei win-wangv fai?

¹⁷Wuov deix mienh jorm hnyouv caux meih mbuo zoux longx mv baac maiv zeiz oix tengx meih mbuo duqv longx. Ninh mbuo oix caeqv nqoi meih mbuo, maiv bun caux yie mbuo, weic bun meih mbuo jorm hnyouv caux ninh mbuo zoux longx.

¹⁸Jorm hnyouv caux mienh zoux longx se horpc nyei, da'faanh zoux weic bun mienh duqv longx. Oix zuqc zanc-zanc zoux, maiv daan yie caux meih mbuo yiem nyei ziangh hoc.

¹⁹Yie hnamv haic nyei fu'jueiv aah! Yie weic meih mbuo hnyouv mun hnangv m'sieqv dorn mun gu'nguaaz nor, zuov meih mbuo duqv Giduc nyei fiem-fingx yiem meih mbuo nyei hnyouv gu'nyuoz.

²⁰Feix duqv yie ih zanc duqv caux meih mbuo yiem, yie ziouc haih goiv yie nyei eix. Yie gengh! nzauh haic meih mbuo aqv.

²¹Oix yiem leiz-latc ga'ndiev nyei mienh aah! Leiz-latc hnangv haaix nor gorngv meih mbuo maiv haiz fai? Mbuox yie maah!

²²Leiz-Latc Sou fiev jienv gorngv, Apc^laa^ham maaih i dauh dorn. Yietc dauh se nouh beiz yungz daaih. Yietc dauh se bungx nqoi nyei mienh, dongh Apc^laa^ham nyei auv, yungz daaih.

²³Nouh beiz yungz nyei dorn se hnangv pou-tong mienh yungz nyei. Mv baac bungx nqoi wuov dauh nyei, se ei Tin-Hungh laengz nyei waac yungz daaih.

²⁴Naaiv deix sic mbuo haih longc zoux waac-beiv. Wuov deix i dauh m'sieqv dorn beiv i nyungc ngaengc waac. Maaih dauh beiv yiem Sinaai Mbong liepc daaih nyei ngaengc waac. Naaiv dauh se Haagaa. Yungz daaih nyei fu'jueiv zoux nouh.

²⁵Haagaa beiv yiem Aa^laa^mbie Deic-Bung nyei Sinaai Mbong yaac beiv ih jaax hnoi nyei Ye^lu^saa^lem Zingh, weic zuqc yietc norm zingh caux zingh nyei baeqc fingx zoux nouh.

²⁶Mv baac yiem gu'nguaaic nyei Ye^lu^saa^lem se bungx nqoi nyei, se zoux mbuo nyei maa,

²⁷weic zuqc Ging-Sou fiev jienv gorngv, “Maiv haih maaih fu'jueiv nyei m'sieqv dorn aah! Oix zuqc njien-youh aqv. Maiv mun jiex gu'nguaaz nyei m'sieqv dorn aah! Gunv njien-youh nyei heuc aqv. Weic zuqc auv-leih duqv fu'jueiv zungv gauh camv maaih nqox wuov dauh duqv.”

²⁸Zuangx gorx-youz aac, ih zanc meih mbuo ei Tin-Hungh laengz nyei waac zoux Tin-Hungh nyei naamh nyouz hnangv I^sakc zoux nor.

²⁹Wuov zanc pou-tong mienh yungz nyei wuov dauh dorn zoux doqc bun ei Singx Lingh yungz daaih wuov dauh. Ih zanc yaac fih hnangv nyei.

³⁰Mv baac Ging-Sou hnangv haaix nor gorngv? Ging-Sou gorngv, “Zunc nouh beiz mbuo i dorn-maac cuotv mingh maah! Weic zuqc nouh beiz nyei dorn maiv maaih buonc caux bungx nqoi wuov dauh nyei dorn nzipc ninh nyei die nyei jaa-dingh.”

³¹Gorx-youz aac, hnangv naaic mbuo maiv zeiz nouh beiz nyei naamh nyouz. Mbuo zoux bungx nqoi wuov dauh nyei naamh nyouz.