Read Iu Mien Gaa^laa^tie 5 Bible Online

Gaa^laa^tie 5 - Iu Mien bible

Gaa^laa^tie 5

¹Weic bun mbuo zoux bungx nqoi nyei mienh, Giduc tengx mbuo duqv bungx nqoi mi'aqv. Oix zuqc liepc duqv wuonv zoux bungx nqoi nyei mienh, maiv dungx aengx zoux nzunc nouh.[12]

²Muangx longx oc. Yie, Baulo, mbuox meih mbuo, se gorngv meih mbuo gan jiex gaatv nyei leiz, se hnangv Giduc maiv lamh longc, tengx maiv duqv yietc deix meih mbuo.

³Yie aengx mbuox dauh dauh gan jiex gaatv nyei leiz nyei mienh, ndongc haaix zungv oix zuqc ei nzengc leiz-latc nyei diuh diuh leiz.

⁴Meih mbuo oix gan leiz-latc duqv caux Tin-Hungh horpc hnyouv nyei mienh aah! Meih mbuo leih ndutv Giduc mi'aqv, bungx ndortv Tin-Hungh nyei en.

⁵Mv baac mbuo maaih lamh hnamv oix duqv caux Tin-Hungh horpc hnyouv, mbuo ziouc longc sienx fim kaux Singx Lingh jorm hnyouv nyei zuov.

⁶Weic zuqc mbuo caux Giduc Yesu juangc maengc ziangh, jiex gaatv nyei leiz fai maiv jiex gaatv nyei leiz maiv tengx haaix nyungc. Longc jienv nyei maaih nduqc nyungc hnangv, se oix zuqc maaih sienx fim biux mengh cuotv daaih bun laanh hnamv laanh.

⁷Zinh ndaangc meih mbuo sienx[13] duqv longx. Haaix dauh dangv jienv meih mbuo, nduov meih mbuo maiv gan zien leiz?

⁸Nduov meih mbuo se maiv zeiz Tin-Hungh, weic zuqc ninh heuc meih mbuo daaih.

⁹Maaih waac gorngv, “Diqv dien bingv zoux bun ziangh ndunh njuov butv nzengc.”

¹⁰Mv baac yie kaux Ziouv sienx dingc meih mbuo caux yie maiv oix maaih ganh nyungc hnyouv. Jiuv lunc meih mbuo wuov dauh, maiv gunv dongh haaix dauh, zungv oix zuqc Tin-Hungh dingc zuiz.

¹¹Gorx-youz aac, se gorngv yie corc zunh mbuox mienh oix zuqc jiex gaatv nyei leiz nor, yie weic haaix diuc corc zuqc mienh zoux doqc yie? Se gorngv yie hnangv naaic zunh nor, yie zunh Yesu yiem ziepc nzaangc jaax daic nyei leiz ziouc maiv maaih haaix nyungc bun mienh nqemh aqv.

¹²Feix duqv jiuv lunc meih mbuo wuov deix mienh maiv daan jiex gaatv hnangv, zungv im nzengc ninh mbuo ganh aqv.

¹³Zuangx gorx-youz aac, Tin-Hungh heuc meih mbuo daaih zoux bungx nqoi nyei mienh. Meih mbuo duqv bungx nqoi mv baac maiv dungx weic naaiv sueih ganh ei ganh nyei hnyouv hanc zoux. Daaux nzuonx oix zuqc laanh hnamv laanh ziouc laanh fu-sux laanh,

¹⁴weic zuqc leiz-latc yietc zungv nzutv zunv juangc diuh, se “Oix zuqc hnamv mienh hnangv hnamv ganh nor.”

¹⁵Se gorngv meih mbuo zoux hnangv hieh zoih, laanh ngaatc laanh, laanh naqv laanh, oix zuqc faix fim. Nziex meih mbuo laanh zoux bun laanh zutc nzengc.

¹⁶Yie gorngv nyei eix leiz se hnangv naaiv. Oix zuqc bun Singx Lingh dorh meih mbuo. Maiv dungx ei ganh nyei hnyouv hanc zoux.

¹⁷Mienh nyei hnyouv hanc zoux nyei se maiv doix Singx Lingh oix zoux nyei. Singx Lingh oix zoux nyei yaac maiv doix mienh nyei hnyouv hanc zoux. Naaiv deix i nyungc zoux win-wangv cingx daaih meih mbuo oix zoux nyei, maiv haih zoux.

¹⁸Mv baac se gorngv Singx Lingh dorh meih mbuo, meih mbuo ziouc maiv yiem leiz-latc ga'ndiev.

¹⁹Mienh ei ganh nyei hnyouv hanc zoux se buatc duqv mengh nyei hnangv naaiv. Zoux buangh liouh nyei sic, zoux maiv cing-nzengc, zoux maiv luonx horngc nyei sic,

²⁰baaix miuc-fangx, bungx faatv, laanh nzorng laanh benx win-wangv, nzaeng jaax mborqv jaax, mueic jieqv, qiex jiez, nzaeng zoux hlo, bun nqoi zoux ziex guanh,

²¹hanc mienh, diuv nquin, gapv zunv zoux waaic sic lo haaix. Naaiv deix waac yie gorngv mbuox jiex meih mbuo nyei, ih zanc yie aengx gorngv nzunc. Haaix dauh zoux naaiv nyungc sic, maiv haih duqv Tin-Hungh zoux Ziouv gunv ninh mbuo.

²²Mv baac Singx Lingh bun nyei se,[14] bun mienh maaih hnyouv hnamv mienh, bun mienh maaih njien-youh, maaih baengh orn, maaih noic, maaih hnyouv korv-lienh mienh, zoux longx nyei sic, maaih ziepc zuoqv nyei hnyouv,

²³zoux hnyouv suonc, haih gunv duqv ganh. Naaiv deix yietc zungv jauv leiz-latc maiv haangh.

²⁴Za'gengh zoux Giduc Yesu nyei mienh wuov deix, zorqv ninh mbuo baamh mienh nyei eix, dongh ninh mbuo nyei hnyouv oix zoux nyei caux hnyouv hanc zoux nyei yietc zungv ding liuz ziepc nzaangc jaax mi'aqv.

²⁵Mbuo kaux Singx Lingh ziangh jienv, ziouc oix zuqc bun Singx Lingh dorh mbuo.

²⁶Maiv dungx taaih ganh hlo, laanh cuoqv laanh, laanh hanc laanh.